Te Manako Tikai Maira Tetai

E TAUATINI ua atu te tangata te akaari ra e te manako tikai maira ratou. Kare ratou e akono ana i te manako noinoi, e te aroa kore e ko te au manamanata o tetai ke kare ia e no ratou. Mari ra, ka rave ratou i te ka rauka ia ratou​—tetai taime te tuku anga i to ratou uaorai oraanga ki roto i te tumatetenga—​kia akamama mai i te mamae. E aka angaanga teia, ko tetai tei akangataia e te au mana ririnui kare e rauka ia ratou i te akatere.

Te au tumu mei te noinoi, te ravenga poritiki, te au tamaki, e te au tumatetenga natura ka akataitaia i “te au tauta anga aruaruia e te akamarama anga no te akakore i te pongi,” i tuatuai tetai tangata tauturu. Te takoreanga i te pongi ko tetai ia o te au manamanata e manganui te aro atura te au tangata te manako maira. Te tamaki katoa ra ratou i te au mea mei te maki, te putaua, te tika kore, e te maata o te mamae tei akatupuia e te tamaki. Inara te re ra ainei ratou?

Kua tuatua te tangata maata o tetai akaaerenga tauturu e ko te aronga te rave ra i taua “tauta anga aruaruia e te akamarama anga” no te akameangiti i te pongi e te mamae mei te tangata Samaria tangi aroa rai tei akatakaia i roto i ta Iesu Karaiti akatutu anga. (Luka 10:29-37) Inara noatu e eaa ta ratou ka rave, i tuatuai aia, kua tupu ua atu te numero o te aronga takinokinoia. No reira kua ui aia: “Eaa ta te tangata Samaria meitaki ka rave me ka teretere aia na runga i taua mataara i te au ra no etai au mataiti e ka kite akaou i tetai tangata takinoia e te aronga keia i te epetoma tataki tai i te pae mataara?”

E mea ngoie i te tuku ua ki tei akatakaia e ko ‘te maki kino no te akono roiroi’ e ka tuku ua ki te taitaia. Ki to ratou akameitaki anga, ko te aronga tikai te manako ra kare e tuku ua. (Galatia 6:9, 10) Ei akaraanga, kua akameitaki tetai tangata tei tata ki te Jewish Telegraph Peritane i te Au Kite o Iehova, i te tuatau o te Nazi i Tiamani “kua tauturu e tauatini ua atu ngati Iuda kia ora i te au taitaia o Auschwitz.” “I te mea te iti ra te kai,” i tuatuai te tangata tata, “kua tua ratou i ta ratou varaoa ma to matou au taeake e te au tuaine [ngati Iuda]!” Kua rave ua te Au Kite i te ka rauka ia ratou ma ta ratou au apinga.

Inara, ko te tika anga kare e rauka i te orongaanga i te varaoa i te apai mai i te openga tikai ki te mamaeanga tangata. Kare teia e te akapuapinga kore ra i tei raveia e te au tangata tangi aroa. Ko tetai raveanga angaanga te ka akameangiti ra i te mamae e mea puapinga ia. Kua akameangiti taua Au Kite i te mamae o te au taeake mouauri, i te openga ra kua takoreia te apii anga Nazi. Inara, te vai ua ra te akaaerenga ao te akatupu ra i te takinga kino anga, e te maata ra rai te au tangata manako kore. E tikai, “e uki ra, e tau to ratou nio i te koke, e to ratou nio ponga ra mei te matipi ïa, kia pou te ao i te enua nei, e te aronga putaua i roto i te tangata katoa nei.” (Maseli 30:14) Papu rai, ka umere koe eaa ra e ko teia te tu.

Eaa ra i Putaua ei e te Takinga Kino Anga?

I tuatua ana a Iesu Karaiti: “Te noo tamou nei te putaua ki o kotou nei, e kia inangaro ra, e tika ïa kia takinga-meitaki atu.” (Mareko 14:7) Ko ta Iesu aiteanga ainei e kare roa e ope te putaua e te takinga kino anga? Mei tetai au tangata, kua irinaki ainei aia e tuanga taua mamaeanga o te parani a te Atua kia oronga ki te aronga tangi aroa i te tuatau kia akaari e te manako maira ratou? Kare! Kare a Iesu i irinaki ana i te reira. Te tuatua ra aia e ka riro te putaua ei tuanga o te oraanga i teia akatereanga e vai ua nei. Inara kua kite katoa a Iesu i teia: Kare i te akakoroanga no tona Metua i te rangi ra kia tupu taua au turanga i te enua nei.

Kua anga te Atua ko Iehova i te enua ei parataito, kare ei ngai akakinoia e te putaua, te tika kore, e te takinga kino anga. Kua akaari mai aia e te manako ra aia i te pamiri tangata na te maani anga i te au apinga meitaki te ka kapiti atu ki te rekareka o te oraanga. Eaa ra, ka akamanako ana i te ingoa o te kainga te ngai i noo ei to tatou nga metua mua, ko Adamu raua ko Eva! Kua tapaia e ko Edene, te aiteanga “Taurekareka.” (Genese 2:8, 9) Kare a Iehova i kotinga i te au tangata ki te ka rauka ua e orai i roto i tetai reva takinga kino tau kore. I te openga o tana angaanga anga, kua akara atura a Iehova i tana i maani e kua tuatua i te reira “te meitaki roa ra.”​—Genese 1:31.

I na, eaa ra i maatai te putaua, te takinga kino anga, e tetai atu au tumu o te mamae i te ao katoa i teia tuatau? Te vai nei te akatereanga kino o te au mea no te mea kua iki to tatou nga metua mua i te akarongo kore i te Atua. (Genese 3:1-5) Kua akatupu teia i te ui anga me ka tau i te Atua kia umuumu i te akarongo mei tana au mea ora. No reira kua akatika a Iehova i tetai tuatau takake kotingaia ki ta Adamu uanga. Te manako nei rai te Atua no runga i tei tupu ki te pamiri tangata. Kua oronga mai aia i te ravenga no te tatara pouroa i te kino ta te meameaau anga iaia i akatupu. Kare e roa atu, ka akakore a Iehova i te putaua e te takinga kino anga​—te tika, pouroa te mamaeanga.​—Ephesia 1:8-10.

E Manamanata Kare e Rauka i te Tangata i te Rapakau

I roto i te au anere mataiti mei te angaia mai anga te tangata, kua neke mamao atu te tangata ravarai mei te au turanga a Iehova. (Deuteronomi 32:4, 5) I ta ratou patoi tamou anga i ta te Atua au ture e te au kaveinga, kua ta te au tangata ravarai i tetai e tetai, e “te tutara ra tetai tangata ki rungao i tetai.” (Koheleta 8:9) Pouroa te au tauta anga no te apai mai i tetai taiate tika tikai, kua kore mei te au apinga te akakino ra i to te tangata mamae, kua takinoia e te tu noinoi o te aronga tei inangaro i te rave i te au apinga i ta ratou i manako kare i tuku ua ki te tu ngateitei o te Atua.

Te vaira tetai atu manamanata​—tetai penei ka akakore te manganui ei manako purepure. Te akakeu nei rai tei akamata i te meameaau i te Atua i te tangata kia rave i te kino e te noinoi. Ko Satani e Tiaporo aia, e kua kapiki a Iesu Karaiti iaia “te ariki o teianei ao.” (Ioane 12:31; 14:30; 2 Korinetia 4:4; 1 Ioane 5:19) I roto i te akakite anga tei orongaia ki te apotetoro ko Ioane, kua akatakaia a Satani e ko te tumu maata o te mamae​—tei apa e ko “tei pikikaa i to te ao katoatoa nei.”​—Apokalupo 12:9-12.

Noatu mei teaa te maata o te inangaro o tetai tangata i te au taeake tangata, kare rava e rauka ia ratou i te akaatea ia Satani te Tiaporo me kare kia taui i teia akatereanga te akono nei i te au tangata takinoia ma te maata te numero. Eaa, i reira, te umuumuia ra kia akatikatika i te au manamanata o te tangata? Te pau anga kare e ko tetai tangata te manako ua maira. Te anoanoia ra tetai ma te anoano e te mana kia akaatea ia Satani e tana akatereanga tika kore.

“Kia Akonoia Toou Anoano i te Enua Nei”

Kua taputou te Atua i te takore i teia akatereanga kino o te au mea. Tei iaia te anoano e te mana tei inangaroia kia akapera. (Salamo 147:5, 6; Isaia 40:25-31) I roto i te puka totou Pipiria o Daniela, kua totouia: “E akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu”​—ae, ma te mutu kore. (Daniela 2:44) Ko te kavamani i te rangi ra ma te meitaki e te mutu kore ta Iesu Karaiti i manako i te apii anga aia i tana au pipi kia pati ki te Atua i roto i te pure: “Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:9, 10.

Ka pau a Iehova i taua au pure no te mea te manako tikai maira aia no runga i te pamiri tangata. Kia tau ki te au tuatua totou o Salamo 72, ka akaue te Atua i tana Tamaiti, ko Iesu Karaiti, kia apai mai i te akapumaana mutu kore ki te putaua, tei takinoia, e tei takinga kinoia te turu ra i ta Iesu tutara anga. No reira, kua imene te tata taramo akauruia e: “Nana [te Ariki Mesia o te Atua] e akataka i te tuatua i tei akaaka i o te au tangata ra; te tamariki a te aronga apinga kore ra, nana e akaora, ka atiati takiri rava oki aia i tei takinga-kino ra. . . . Ko tei putaua ra me kapiki maira, nana ïa e akaora; e tei akaaka ra, e kare ona e tauturu. Ka akaperepere aia i tei apikepike ra e tei putaua, e akaora oki aia i te au vaerua o te aronga ao ra. Ka akaora aia i to ratou vaerua i te takinga-kino e te rotoriri ra, e to ratou toto, ka riro ïa ei mea apinga nana.”​—Salamo 72:4, 12-14.

I roto i tetai orama te o maira to tatou tuatau, kua kite atu te apotetoro ko Ioane “i te rangi ou e te enua ou,” tetai akatereanga o te au mea ou tikai tei akatumuia e te Atua. Mei teaa ra te akameitakianga no te tangata mamae ra! Te totouanga no runga i ta Iehova ka rave, kua tata a Ioane: “Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito. Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore.”​—Apokalupo 21:1-5.

Ae, ka rauka ia tatou i te irinaki i taua au tuatua, e tiratiratu oki te reira e te tika. Kare e roa atu ka rave angaanga a Iehova no te akaatea mei te enua te putaua, te pongi, te takinga kino anga, te maki, e te tika kore ravarai. Mei ta teia makatini i taiku putuputu mei te au Tuatua Tapu, te akaari maira te maata o te au kite anga e te noo nei tatou i roto i te taime e akatupuiai teia au taputou. Te vaitata maira ta te Atua taputou no tetai ao ou! (2 Petero 3:13) Kare e roa atu, ka ‘akakore [a Iehova] i te mate e tuatau ua atu’ e ka “orei i te roi-mata i te au mata ravarai.”​—Isaia 25:8.

E tae ua atu i te tupu anga o te reira, ka rekareka tatou i teianei te vaira te aronga te manako tikai maira. Ko tetai akatupu anga maata atu no te rekareka koia oki te manako tikai maira te Atua ko Iehova. Kare e roa atu ka takore pouroa aia i te takinga kino anga e te mamaeanga.

Tei ia koe te irinaki anga i roto i ta Iehova au taputou. Kua akapera tona tavini ko Iosua. Ma te kore e emiemi, kua akakite aia ki to te Atua iti tangata taito: “Kua kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.” (Iosua 23:14) No reira, koi vai ei te akatereanga o te au mea i teianei, auraka e tuku ia koe uaorai kia taitaiaia e te au timata anga ka aro atu koe. E titiri pouroa i toou taitaia ki runga ia Iehova, no te mea te manako tikai maira aia.​—1 Petero 5:7.

[Au Tutu i te kapi 7]

I roto i to te Atua ao ou taputouia, ka kore te enua mei te putaua, te takinga kino anga, te maki, e te tika kore