Ko Tatou te Aronga e Akarongo To Tatou
Orongaanga i Tetai Akakitekite Anga Akapumaana i Itaria
KO Iehova “te Atua nona anake te pumaana.” Na te apiianga kia aru iaia ra, kua “tika ia [tona au tavini] kia akapumaana i te aronga i rokoia e te mate ra.” (2 Korinetia 1:3, 4; Ephesia 5:1) Ko teia tetai akakoroanga maata o te angaanga tutu aere tei raveia e te Au Kite o Iehova.
Tauturuanga i Tetai Vaine tei Anoano
I te au mataiti i ou ake nei no te kore anga, te tamaki, e te umuumu anga kia kite i tetai oraanga meitaki kua akakeuia te manganui kia neke atu ki tetai enua puapinga tikai. Inara kare i te mea ngoie ua kia noo atu ki roto i tetai ngai ou. E noo ana Manjola ma tetai au oa Albania i Borgomanero. I te mea e kua noo tureia aia i Itaria, kare aia i inangaro i te tuatua atu kia Wanda, koia tetai o te Au Kite o Iehova. Inara, i te openga iora kua akapapa a Wanda i tetai tuatau ma Manjola, tei akaari maira i te inangaro maata i te apiianga i te Tuatua a te Atua, noatu e kua ngata no te arai anga o te reo. Inara, i muri ake i etai atoro anga, kare a Wanda i kite akaou ana i tetai tangata i te kainga. Eaa tei tupu? Kua kite a Wanda e kua oro ke atu te au tangata kainga katoatoa no te mea ka inangaroia tetai o ratou—te oa tane o Manjola—no te ta tangata!
E a marama i muri mai, kua kite akaou a Wanda ia Manjola. “Maratea e te ikoke, kua akaari mai aia i te tu o tetai tangata te kite ra i te oraanga ngata,” i akamaara ei a Wanda. Kua akakite mai a Manjola e tei roto tona oa tane i mua ana i te are auri e te au oa tana i ariu atura no te tauturu kua akamareka kore tikai ratou iaia. Ma te aue anga, kua pure aia ki te Atua no te tauturu. Kua akamaara aia i reira ia Wanda, tei tuatua ana no runga i te Pipiria. Mei teaa ra to Manjola mataora i te kite akaou anga iaia!
Kua akamata akaouia tetai apii Pipiria, e kare i roa ana kua akamata Manjola i te aere atu ki te au uipaanga Kerititiano. Kua autu aia kia rauka te tika anga kia noo i Itaria. I muri ake i te mataiti okotai, kua riro mai a Manjola ei Kite papetitoia. Akapumaanaia e te au taputou tu-Atua, kua oki aia ki Albania kia akakite atu i te akakitekite anga Pipiria akapumaana ki tona iti tangata.
Te Tutu Aereanga i te Ngai Puakapa no te Aronga Ou
Kua raveia e te au putuputuanga Itaria e manganui te akapapa anga kia tutu aere ki te aronga ou mei ia Manjola rai. Ei akatauanga, kua raveia e tetai putuputuanga i Florence te au akapapa anga kia atoro putuputu i tetai ngai puakapa no te aronga ou. Kua kite te aronga ou o te puakapa—e manganui no Europa Itinga, Maketonia, e Kosovo—i te au manamanata tuke tuke tikai. E manamanata to tetai i te au apinga akakona me kare te kava. Kua akono te manganui ia ratou uaorai na te keikeia rikiriki anga.
E akaaoanga tikai te tutu aere anga i teia ngai. Inara, kua aravei tetai vaine evangeria tamou ko Paola tona ingoa ia Jaklina, ko tetai vaine Maketonia. I muri ake i etai tuatua anga, kua akamaroiroi a Jaklina i tona oa ko Susanna kia akara matatio i te Pipiria. I muri akera, kua tuatua Susanna ki tetai atu au kopu tangata. Kare i roa ana, e rima o te pamiri kua apii putuputu i te Pipiria, kua aere atu ki te au uipaanga Kerititiano, e kua rave i te au mea ta ratou i apii maira. Noatu te au manamanata ta ratou e aro atura, kua rauka mai ia ratou te akapumaana anga mei ia Iehova ra e tana Tuatua Tapu.
Kua Ariki Tetai Paretenia i te Akapumaana Anga mei ia Iehova ra
I roto i te oire o Formia, kua tuatua tetai vaine evangeria tamou ko Assunta tona ingoa ki tetai vaine tei aaere atura ma te tu ngata. Ko te vaine e paretenia tei piri atura ki tetai akaaerenga akonoanga tei oronga i te tauturu ki te maki e te apikepike i roto i te au are maki e te au kainga.
Kua karanga atu a Assunta ki te paretenia: “Te mamae katoa nei koe, kare ainei? Ma te mii, e au manamanata ta tatou pouroa ka akono.” I te kite anga i te reira kua pururu te roimata o te paretenia e kua akakite mai e e maata rai tona au manamanata i te pae kopapa. Kua akamaroiroi a Assunta iaia, i te tuatua anga e ka rauka i te Atua o te Pipiria i te akapumaana iaia. Kua ariki te paretenia i te au makatini akatumuia ki runga i te Pipiria ta Assunta i oake kiaia.
I roto i ta raua pukapuka anga i muri mai, kua karanga te paretenia, ko Palmira tona ingoa, e e kino roa tona mamae anga. Kua noo ana aia no tetai tuatau roa i roto i tetai ngai tei akaaereia e te au paretenia. I te akaruke anga aia no tetai tuatau poto ua no te pae kopapa, kare aia i akatikaia kia oki atu. Inara, kua piri to Palmira manako ngakau ki te Atua e te tia tana i rave i riro mai ei aia ei paretenia. Kua ariu atu aia ki te au taunga no te “rapakau” inara kua kino roa atu. Kua akatika a Palmira i te apii Pipiria, e kua aere atu aia ki te au uipaanga Kerititiano no tetai mataiti okotai. Kua neke atu aia i reira ki tetai ngai ke, e kua ngaro atura aia i te Kite. Kua pati e rua mataiti i te kite akaou anga Assunta iaia. Kua kiteia e Palmira te patoi anga kino roa mei tona pamiri e te au orometua. Inara, kua akamata akaou aia i tana apii Pipiria, kua tupu aia i te pae vaerua, e kua papetitoia aia e ko tetai o te Au Kite o Iehova.
Ae, kua akamaroiroiia te manganui e te akakitekite anga a ‘te Atua nona te akapumaana.’ (Roma 15:4, 5) No reira, kua inangaro ua atu te Au Kite o Iehova i Itaria kia aru i te Atua na te orongaanga kia etai atu i tana akakitekite anga akapumaana umere tikai.