Au Kite o Iehova Tere ki Mua ma te Ki i te Kite!

Ripoti a te Uipaanga Mataiti

I ROTO i teia tuatau papu kore e te ekoko anga, te tu ra te Au Kite o Iehova ma te tuke ei au Kerititiano ma te ki i te kite. Kua akakite meitakiia teia i te uipaanga mataiti a te Taiate Punanga Tiaki Pipiria e te Pepa o Pennsylvania, tei raveia i te Are Akaputuputuanga o te Au Kite o Iehova i Jersey City, i New Jersey, i te Maanakai, Okotopa 7, 2000.a

I roto i tana tuatua akamata anga, kua akakite te tiamana, ko John E. Barr, e mema o te Pupu Akaaere o te Au Kite o Iehova, e: “O te au pirioni o te enua, te kite nei e te irinaki nei tatou e kua akateronoia ta Iehova Tamaiti akaperepere, ko Iesu Karaiti, i teianei i te rangi ra, te tutara nei i rotopu i tona au enemi.” Kua orongaia mai te kite anga o te reira tu ki i te kite e te au ripoti akakeu anga e ono mei te ao katoa.

Autuanga i te Purepure ma te Tuatua Mou Pipiria i Haiti

Te tupu maata ra te purepure i Haiti. “Tei matauia,” i akakite ei te akaaere o te Kumiti Manga ko John Norman, “ka rave te tangata i te voodoo ei paruru ia ratou uaorai.” Kua tupu te au ekoko anga ki tetai tangata purepure i te ngere anga aia i tona vaevae i roto i tetai tumatetenga. ‘Akapeea oki teia i te tupu anga kiaku i te mea e te paruruia ra au e te au vaerua?’ i umere ei aia. Mei tetai e manganui, kua apiiia ki teia tangata te tuatua mou e te Au Kite o Iehova e kua tauturuia kia akarangatiraia mai i te purepure. Te tau anga e kia tupu i Haiti te akaari ia maira e te akakite anga e ia Aperira 19, 2000, e a taime te numero o te papuritia Patireia i taua enua tei tae atu no te Akamaara Anga i te matenga o Karaiti.

Maroiroi i Roto i te Ngai Angaanga Maata i Korea

I Korea, e 40 patene o te Au Kite o Iehova te rave ra i te angaanga tamou. “Ma teia pupu maata,” i akakite ei te akaaere o te Kumiti Manga ko Milton Hamilton, “te akonoia ra ta matou ngai angaanga e tere atu i te 47 mirioni tangata vaitata i te okotai marama.” Te kite meitakiia ra te tupu anga i roto i te au putuputuanga reo akairo. I roto i tetai kotinga reo akairo, te akonoia ra e 800 apii Pipiria i te kainga. Te avereti ra teia e okotai apii ki te papuritia okotai. Ma te maromaroa, te tukuia ra rai te au taeake mapu ki roto i te are auri no to ratou tu neutara. Inara, te akono marekaia ra teia au Kerititiano tiratiratu, e te oronga putuputuia ra kia ratou te au angaanga te umuumu ra i te irinaki anga.

Aro Anga Atu i te Au Umuumu Anga Tupu Anga i Mexico

Kua ripoti tetai aronga tutu Patireia te take e 533,665 i te angaanga koro i Mexico ia Aukute 2000. E maata atu i te toru taime o taua numero o te aronga tei tae atu ki te Akamaara Anga. “Ko to matou akakoroanga i teia mataiti koia oki kia patu e maata atu i te 240 Are Uipaanga Patireia,” i na te akaaere Kumiti Manga ei ko Robert Tracy. “Noatu rai,” i nana ei, “e maata rai te anoanoia ra e matou.”

E akaraanga tau te au mapu i roto i te Au Kite o Iehova i Mexico. No runga i tetai mapu, kua akakite tetai orometua Katorika: “Te inangaro ra au i tetai mei iaia rai i roto i taku aronga aru. Te umere nei au i teia au tangata no to ratou anoano anga pakari e te taangaanga kite pakari anga i te Pipiria. Kua paruru ratou i te Atua, noatu me ka ngere to ratou au oraanga.”

Vai Tiratiratu i Roto i te Turanga Manamanata i Sierra Leone

Mei ia Aperira 1991 mai, te tupu anga te tamaki tangata i Sierra Leone, e tauatini ua atu te tangata tei taiaia, tei takinokinoia, me kore tei tamateia. “Kua akatupu te tamaki e te turanga ngata i te akakeu anga oonu ki runga i te tangata,” i ripoti ei te akaaere Kumiti Manga ko Bill Cowan. “Ko te manganui tei reka kore i ta matou tuatua te akarongo nei i teianei ma te inangaro. Kare i te mea matau koreia no tetai tangata i runga i te mataara kia tomo mai ki roto i to matou au Are Uipaanga Patireia kia aere mai ki ta ratou uipaanga mua. E putuputu te taime kua tapuia te au taeake i runga i te mataara e kua patiia no tetai apii Pipiria.” Noatu te tu marikonga kore o te enua, te uua ra te angaanga tutuanga i te Patireia i Sierra Leone.

Te Porokaramu Patuanga Maatamaata i Aperika Apatonga

I ou akenei, te vaira te anoano anga maata no te au Are Uipaanga Patireia e tauatini ua atu i te ngai te akonoia ra e te opati manga i Aperika Apatonga. Kua patu keia e au anere ua atu au are uipaanga. “Koi kore ei e aravei ki roto i te are rakau iti ua me kare i raro ake i te tumu rakau, mei tei raveia i mua ana, te rauka nei i to tatou au taeake i te aravei ki roto i tetai ngai tau ma te nooanga meitaki,” i akakite ei te mema Kumiti Manga ko John Kikot. “Noatu e akapapa anga tau ua te maata anga o teia au Are Uipaanga Patireia, te tu meitaki ra te reira e ko tetai au are tau tikai i to ratou ngai. I tetai au ngai, kua kiteia mai e i muri ake i te patuanga i tetai Are Uipaanga Patireia, ka taki rua te maata o te putuputuanga i te mataiti ka aru mai.”

Tetai Uki Ou o te Au Kite i Ukraine

I te mataiti tavini anga 2000, kua kite atu teia enua i tetai take e 112,720 papuritia. E maata atu i te 50,000 o teia aronga kua apii i te tuatua mou Pipiria i te au mataiti e rima i topa akenei. “E tikai, kua utuutu mai a Iehova i tetai uki mapu ou o te Au Kite kia akakite i tona ingoa!” i karangai a John Didur, te akaaere o te Kumiti Manga. “I te rua mataiti i topa,” i nana ei, “kua akaruke ana matou e maata atu i te 50 mirioni makatini, te aiteite ra ki te katoa anga o te enua. I te marama tataki tai, i te avereti, e rauka ana ia matou te au reta e tauatini ua atu mei te au tangata inangaro te pati maira kia kite maata atu.”

Tetai Atu Au Tu Akakeu Anga o te Porokaramu

Kua oronga a Daniel Sydlik, e mema o te Pupu Akaaere, i tetai tuatua akakeu tikai. Te atikara “Mei Teaa te Tuke i te Pupu Akaaere ki te Taokotaianga i te Pae Ture,” te kiteia ra i roto i teia makatini, kua akanooia ki runga i taua akakite anga tau tikai.

Kua oronga a Theodore Jaracz o te Pupu Akaaere i tetai tuatua akakeu manako te ingoa “Au Akaaere e te Au Tavini Orometua kua Akataoonga Teokaratikiia.” Tetai o nga atikara i roto i teia makatini kua akanooia ki runga i taua tumu tuatua.

Kua kapiti katoa mai ki roto i te uipaanga mataiti te tuatua akakeukeu tei orongaia e tetai mema o te Pupu Akaaere ko David Splane no runga i te irava o te mataiti 2001. Tei akanooia ki runga i te au tuatua a te apotetoro ko Paulo, koia oki: “Kia mou apa kore rai kotou ma te ki i te kite i te au anoano katoa o te Atua ra.” (Kolosa 4:12) Te aruaru ra te Au Kite o Iehova i te ao katoa no te rave akapera ia ratou e tutu tiratiratu ra i te tuatua meitaki o te Patireia o te Atua i te ao katoa.​—Mataio 24:14.

[Tataanga Rikiriki i Raro]