Tetai Akakite anga Takake

I TE openga o te uipaanga mataiti a te Taiate Punanga Tiaki Pipiria e te Pepa o Pennsylvania ia Okotopa 7, 2000, kua orongaia tetai akakite anga takake e te tiamana, ko John E. Barr o te Pupu Akaaere. Ko teia akakite anga tei akariro ia e ko te tumu o te tuatua anga tei orongaia i mua atu i taua ra ra e Theodore Jaracz raua ko Daniel Sydlik.​—Akara i te kapi 12-16 e te 28-31 o teia makatini.

Te akakite anga i tetai tumu puapinga, kua tuatua te Taeake ko Barr: “Kua orongaia ki ‘te tavini akono meitaki e te pakari’ e to te reira Pupu Akaaere te au mea teitei atu e e maata te ka o mai i tei akamanaia ki te au taokotaianga i te pae ture. Tei akanooia i roto i te au papaanga tataia o te reira au taokotaianga tataki tai ko te au manako tei tikaia kia ratou uaorai. Inara, kua akataoonga to tatou Pu, ko Iesu Karaiti, i te pupu tavini akono ki rungao i tana ‘au apinga ravarai,’ me kore te au mea o te Patireia i te enua nei.”​—Mataio 24:​45-47.

No runga i te taokotaianga o Pennsylvania, te akakite ra te Taeake ko Barr: “Mei to te reira taokotai anga mai i te 1884, kua rave te Taiate Punanga Tiaki Pipiria e te Pepa o Pennsylvania i tetai tuanga puapinga i roto i to tatou tuatua enua i teianei. Noatu rai, e taokotaianga ia i te pae ture te vaira kia taangaangaia e ‘te tavini akono meitaki e te pakari’ me anoanoia te reira.”

I roto i ta raua tuatua anga, kua akamarama ke nga Taeake ko Sydlik raua ko Jaracz i te mea e kua orongaia ki “te tavini akono meitaki e te pakari” te au apinga a te Atu i te enua nei kare te reira e arai i te pupu tavini kia akatika i te au tangata tau mei te “mamoe ke atu” kia akono i tetai au apainga akaaerenga. (Ioane 10:16) Kare katoa e tumu anga Tuatua Tapu kia umuumu i te katoatoa me kore i tetai o te aronga akaaere o te au taokotaianga i te pae ture tei taangaangaia e te Au Kite o Iehova e ko te au Kerititiano akatainu uaia.

Kua akakite te Taeake ko Barr ki te aronga akarongo e i ou akenei kua akaruke puareinga ua tetai o te au mema o te Pupu Akaaere o te Au Kite o Iehova tei tavini ana ei au akaaere e e au opita mei te pupu akaaere o te au pupu taokotaianga katoatoa tei taangaangaia e “te tavini akono meitaki e te pakari” i Marike. Kua ikiia te au taeake tau o te mamoe ke atu kia mono i teia.

E puapinga tikai teia ikianga. Te akatika ra te reira i te au mema o te Pupu Akaaere kia akapou maata i te tuatau i roto i te akapapaanga i te kai pae vaerua e te akonoanga i te au anoano i te pae vaerua no te au taeake i te ao katoa.

Ei taopenga anga, kua akakite te tiamana ki tana aronga akarongo rekareka: “Koi orongaiai te au angaanga tuke tuke i te pae ture e te au angaanga akaaere ra ki te au akaaere kite tikai, . . . te tavini ra te katoa anga ia ratou i raro ake i te arataki anga i te pae vaerua a te Pupu Akaaere. . . . Te akara nei tatou katoatoa na roto i te pure kia Iehova no tana akameitakianga ki runga i te au tauta anga taokotai i te raveanga i tona anoano, ei akangateitei e te akakaka i tona ingoa maata.”