“Ei Aronga Tutu Maroiroi i te Patireia” Akaputuputu Rekareka

TE TAMANATA ra te au tu kino i te pae akono, te pae moni, e te poritiki i te ao. Inara, i roto i teia manamanata, kua putuputu mai te Au Kite o Iehova no tetai au Uruoaanga Tapere e toru ra ma te ponuiaau “Ei Aronga Tutu Maroiroi i te Patireia.” Akamata mai ia Me 2002, kua raveia teia au akaputuputuanga takapini i te koropu.

Kua riro te au uruoaanga ei au atianga rekareka. Ka akara poto ana tatou i te porokaramu akamatutu tei akanooia ki runga i te Pipiria.

Ra Mua te Akakite Pakari ra i to Iesu Tu Maroiroi

Te tumu tuatua no te ra mua o te uruoaanga koia oki “Aru i te Maroiroi o to Tatou Atu, ko Iesu.” (Ioane 2:17) Te tuatua “Kia Rekareka i te Kapitianga ei Aronga Tutu Patireia” kua pati maana atu i te aronga tei tae atu kia piri mai i roto i te tu rekareka tei akatakaia mai i te au uruoaanga o te iti tangata o te Atua. (Deuteronomi 16:15) Kua aru mai teia tuatua i te au uiui anga ma te aronga tutu maroiroi i te tuatua meitaki.

Te tuatua “Kia Rekareka ia Iehova Uaorai” kua akara atu i te irava taki tai ia Salamo 37:1-11. Kua raurau ia tatou auraka kia “kinokino” no te akaraanga manuia o te aronga kino. Noatu ka tuatua pikikaa te aronga kino no tatou, kare e roa atu ka akapapu mai a Iehova e koai tikai tona iti tangata tiratiratu. Te tuatua “Kia Akaari Kotou Uaorai i te Tu Akameitaki Ua” kua uriuri e akapeea e raukai ia tatou i te akaari i te tu akameitaki ki te Atua. Kia oronga te au Kerititiano katoatoa i te ‘atinga i te akameitaki’ kia Iehova. (Ebera 13:15) E tikai, te maata o te taime ta tatou e akapou ra no ta Iehova angaanga tei runga i to tatou tu ariki anga e te au turanga.

Te tuatua puapinga maata te ingoa “Kia Maroiroi Tikai te Aronga Tutu Patireia.” Te tou ra te reira kia Iesu Karaiti e ko to tatou akaraanga meitaki roa atu no te tu maroiroi. I muri mai i te akanoo angaia te Patireia i te rangi ra i te 1914, kua anoanoia te maroiroi e te au Kerititiano mou no te akakite i te tuatua meitaki. Kua taiku te vaa tuatua i te uruoaanga i Cedar Point, Ohio, U.S.A., i te 1922 e kua akamaara mai ia tatou i te kapiki anga tuatua enua: “E Akakite i te Ariki e tona Patireia”! I te openga ra, kua akakeu te maroiroi o to te Atua au tavini tiratiratu ia ratou kia akakite i te au tuatua mou meitaki tikai o te Patireia ki te au pa enua ravarai.

Te tuatua “Kia Mataku i te Kiteanga e Tei ia Tatou a Iehova,” tei orongaia i te avatea o taua ra mua, kua akaari mai e e takete takake na Satani te iti tangata o te Atua. Inara, noatu e te rokoia ra tatou e te patoi anga, ta tatou akamaara anga i te au akaraanga e manganui no te akarongo i teianei e to te Pipiria ka akamaroiroi ia tatou kia aro atu i te au tumatetenga e te au timataanga ma te mataku kore.​—Isaia 41:10.

Tei aru mai i runga i te porokaramu ko te tuatua kapipiti e toru tuanga te tumu tuatua “Akamaroiroi ta Mika Totou ia Tatou kia Aaere i to Iehova Ingoa.” Kua akaaite te vaa tuatua mua i te kore anga o te akono tau, te au akonoanga apoteiti, e te anoano apinga materia i to Mika tuatau ki to tatou tuatau. Kua akakite aia: “Ka papu to tatou manakonakoanga no te tuatau ki mua me tatanu tatou i tetai ngakau akarongo e te akapapu anga e te tapu ra to tatou tu akono e kua ki to tatou oraanga i te au angaanga akono tau i te Atua​—e auraka tatou e akangaropoina e ka aere mai to Iehova ra.”​—2 Petero 3:11, 12.

Kua taiku mai te rua o te vaa tuatua no te tuatua kapipiti anga i ta Mika akaapa anga i te au arataki ngati Iuda. Kua akakino ratou i te au tangata paruru koreia e te putaua. Inara kua totou katoa a Mika i te autu anga o te akamori anga mou. (Mika 4:1-5) Kua akamanaia e to Iehova vaerua tapu, te titau tamou nei tatou i te akakite i teia tuatua akaoraoraanga no te manakonakoanga. Inara akapeea me te manako ra tatou e te tapuia ra e te au maki me kore kua manako kotingaia i etai atu tu? Kua tuatua mai te toru o te vaa tuatua: “E tau ua ta Iehova au umuumu anga e pera katoa ka rauka ua.” Kua uriuri mai aia i te au tu tukeke o Mika 6:8, i reira ka tatau tatou: “Eaa ta Iehova inangaro ia koe ra, mari ra ko te rave i te tuatua-tau, e kia inangaro i te aroa, e te aerenga akamako tikai i to Atua ra?”

I te mea ka akakino to te ao tu akono tau kore i te au Kerititiano, kua akapuapingaia tatou katoatoa mei te tuatua te ingoa “Akono Tamou i te Tu Viivii Kore na te Paruruanga i Toou Ngakau.” Ei akatauanga, ka tauturu ta tatou akono anga i te tu viivii kore ia tatou kia rauka tetai akaipoipo anga mataora. Ei au Kerititiano, auraka rava tatou e manako e ka rauka ua i te rave i te ainga tau kore.​—1 Korinetia 6:18.

Te tuatua “Paruru Anga mei te Pikikaa” kua akaari mai e kia pakari tatou i te akono ei poitini te au tuatua tarurike, kare i tika, e te pikikaa tei akakitekiteia e te aronga apoteiti. (Kolosa 2:8) Pera katoa, auraka tatou e akavare ia tatou uaorai i te manakoanga e ka rauka ia tatou i te akamerengo i to tatou au anoano ara ma te kore te au tupu anga kino.

“Akamori i te Atua Mou Anake” ko te tumu tuatua ia o te tuatua openga o te ra mua. I te au turanga o te ao e kino pakari atura, mei teaa ra te pumaana i te kite e kare e roa atu ka apai mai a Iehova i tona ao ou tuatua tika! Koai ma ka noo ki reira? Ko te aronga anake tei akamori ia Iehova. Ei tauturu ia tatou, ta tatou tamariki, e ta tatou aronga apiipii Pipiria kia rauka taua akakoroanga, kua tuku mai te vaa tuatua i te puka apii ou Akamori i te Atua Mou Anake. Mei teaa to tatou rekareka i te rauka anga mai te reira!

Ra Rua te Akakite Maata ra i te Tu Maroiroi no Tei Meitaki

Te tumu tuatua no te rua o te ra uruoaanga “Kia Maroiroi no Tei Meitaki.” (1 Petero 3:13) Kua uriuri te vaa tuatua mua i te tia Pipiria no te ra. Kua akakite aia e ko te akara putuputu anga e te puapinga i te tia i te ra te akamaata ra i to tatou tu maroiroi.

Aru mai ko te tuatua kapipiti “Aronga Tutu Patireia Tei Akakaka i ta Ratou Angaanga Orometua.” Kua akakite te tuanga mua i te umuumu anga kia akono meitaki i ta te Atua Tuatua. (2 Timoteo 2:15) Ta tatou taangaanga meitaki anga i te Pipiria te akatuera ra i te mataara no te reira kia ‘akakeu i te ririnui’ i roto i te au oraanga o te tangata. (Ebera 4:12, NW) Kia akaari tatou i te manako ki te Pipiria e kia akamarama papu tikai mei te reira. Kua raurau te tuanga rua o te tuatua kapipiti ia tatou kia aere taokioki ua ki te aronga tei inangaro ra. (1 Korinetia 3:6) Te anoanoia ra te akapapa anga e te mataku kore no te oki akaou ma te viviki ki te aronga tei inangaro ra. Kua akamaroiroi mai te tuanga toru i te akara anga i te tangata tataki tai ta tatou e aravei ra ei pipi tikai e kua akaari mai e ko te oronga anga i tetai apii Pipiria i te aravei mua anga ka taki atu ki te tu rekareka no te tauturu anga i tetai tangata kia riro ei au pipi.

“Eaa ka ‘Pure Putuputu Ei’” ko te tumu tuatua ia no te tuatua i aru mai. Kua raurau te Pipiria i te au Kerititiano kia akara ki te Atua no te arataki anga i roto i te au tu ravarai o te oraanga. Ka anoanoia tatou kia akanoo i te taime no te pure i te ngai takake. Pera katoa, kia rave ua atu tatou i te pure, penei ka tuku ua a Iehova ia tatou kia pure tamou ua atu no tetai tuatau i mua ake ka tupu ei tana pau anga.​—Iakobo 4:8.

Te tuatua “Akamaroiroi te Pukapuka Anga i te Pae Vaerua” kua raurau mai ia tatou kia taangaanga i to tatou vaa kia akamaroiroi ia tatou uaorai e tetai atu. (Philipi 4:8) Te anoanoia ra e te au tokorua akaipoipo e te tamariki te pukapuka anga i te pae vaerua i te au ra. E raukai te reira, kia tauta te au pamiri i te kaikai kapiti e tai taime i te ra okotai, te akatupu anga i te pukapuka anga akamaroiroi.

Kua taopenga te porokaramu i te popongi ma te tuatua pumaana “Akapeea te Akatapu Anga e te Papetito Anga i te Arataki Anga ki te Ora.” Kua rauka i te aronga ka papetitoia te kite, kua akono i te akarongo, kua tataraara, kua akaruke i te rave kino, e kua akatapu ia ratou uaorai ki te Atua. I muri ake i te papetito angaia, i tuatua ei te vaa tuatua, kia tupu ua atu ratou i te pae vaerua e kia vai maroiroi ratou e te akono meitaki.​—Philipi 2:15, 16.

I taua avatea rai, kua akakiteia e rua nga tumu manako maata i roto i te tuatua “Kia Mako, e kia Akono Meitaki i Toou Mata.” Te aite anga o te tu mako koia oki kia rauka te manako tika tikai no to tatou au kotinga e to tatou turanga ki mua i te Atua. Te tauturu ra te tu mako ia tatou kia akono “meitaki” i to tatou mata​—te akara tika anga ki te Patireia o te Atua, kare i te au apinga. Me rave tatou i teia, kare tatou e taitaiaia, no te mea ka oronga mai a Iehova i tei umuumuia e tatou.​—Mataio 6:22-24, 33, 34.

Kua akaari mai te vaa tuatua i aru mai i te tumu ka tau ei tatou kia “Irinaki Pu Tikai ia Iehova i te Au Tuatau Tumatetenga.” Akapeea e raukai ia tatou i te autu i te au mea mei te au tu paruparu uaorai e te au manamanata i te pae moni me kare i te oraanga? Ka pati tatou kia Iehova no te pakari tau e ka pati tauturu mei tetai atu. Kare e ka tuku ua ki te mataku me kore te taitaia, kia akaketaketa tatou i to tatou irinaki i te Atua na te tatauanga i tana Tuatua.​—Roma 8:35-39.

Te tumu tuatua no te tuatua kapipiti openga o te uruoaanga “Te Puapinga o to Tatou Akarongo ka Timataia e te Au Tumatetenga Tukeke.” Kua akamaara mai te tuanga mua kia tatou e te aro atura te au Kerititiano katoatoa i te takinokino anga. Te riro ra ei akakite anga, te akaketaketa ra i to tatou akarongo, e te oronga maira i tetai tuatau kia tatou kia akatutu i to tatou tu tiratiratu ki te Atua. Noatu kare tatou e takinokino puapinga kore ana i to tatou au oraanga, kare rava tatou e taangaanga i te au ravenga kare i tau i te irava kia kopae i te takinokino anga.​—1 Petero 3:16.

Kua tuatua te rua o te vaa tuatua no teia tuatua kapipiti i te au ui anga no te tu neutara. Kare te au Kerititiano mua i te aronga akatupu i te manako patoi, inara kua kite ratou e kia oronga uaia to ratou tu tiratiratu ki te Atua. Pera katoa i teia tuatau, te mou ngaueue kore ra te Au Kite o Iehova i te kaveinga: “Kare kotou i to teianei ao.” (Ioane 15:19) I te mea ka tupu viviki mai te au timata anga no to tatou tu neutara, ka tau te au pamiri kia akanoo i tetai taime no te akara akaou anga i te au arataki anga Pipiria no teia manako. Mei tei akakiteia mai e te toru o te tuatua no teia tuatua kapipiti, ko to Satani akakoroanga, kare kia tamate tikai ia tatou, mari ra kia maro ia tatou kia tiratiratu kore. Na te akakoromaki tiratiratu anga i te aviri, te au taomi anga akono tau kore, te mamae i te pae ngakau, e te au tu maki, te akapaapaa ra tatou ia Iehova.

Te pati anga maanaana kia “Akavaitata Atu kia Iehova” kua riro e ko te upoko tuatua no te tuatua openga o te ra. Te maramaanga i to Iehova au tu maata te akavaitata ra ia tatou kiaia. Te taangaanga ra aia i tona mana kotinga koreia kia paruru i tona iti tangata, i te pae vaerua tikai. Kare tona tu tau e kino roa mari ra te akakeu ra iaia kia akariro i te oraanga mutu kore kia rauka i te katoatoa te angaanga ra no te tuatua tika. Te kitea ra to te Atua tu pakari i roto i tana taangaanga anga i te au tangata apa ua kia tata i te Pipiria. Tei akaperepere maataia ko tona aroa, tei akakeu iaia kia rave i te akapapa anga e orai te tangata ravarai na roto ia Iesu Karaiti. (Ioane 3:16) Kua taopenga te vaa tuatua na te tuku anga i te puka pumaana ou Akavaitata Atu kia Iehova.

Ra Toru te Akara ra i te Tu Maroiroi no te Au Angaanga Memeitaki

Te tumu tuatua no te uruoaanga i te toru o te ra koia oki “Tetai Iti Tangata Maroiroi no te Au Angaanga Memeitaki.” (Tito 2:14) Kua akamata te tuanga popongi ma tetai pukapuka anga i te tia o te ra. Aru mai ko te tuatua “Tei Roto Ainei Toou Irinaki Anga ia Iehova?” Kua tuku tarevake te pa enua i to ratou irinaki papu na te irinaki anga i to ratou uaorai pakari e te maroiroi. Inara, ei tuke anga, kua irinaki rekareka ua te au tavini o Iehova ma te mataku kore ki runga iaia noatu te au tumatetenga.​—Salamo 46:1-3, 7-11.

Te tuanga te ingoa “Au Mapu​—Patu no te Tuatau ki Mua ma ta Iehova Akaaerenga” te akara ra i teia ui anga: “Akapeea e raukai i tetai tangata mapu tei meitaki tikai i te oraanga? Kare teia e rauka na te kimi anga i te moni, te au apinga, e te tu teitei. Te raurau ra to tatou Atua aroa ua i te au mapu kia akamaara iaia ia ratou e ou ua ra. Kua uiui te vaa tuatua i etai tei aruaru ia ratou uaorai i roto i te angaanga Kerititiano i te mapu anga, e te kite atura tatou i to ratou tu mataora. E mei teaa te puapinga i te rauka anga te aenga pepa ou, Youths​—What Will You Do With Your Life?, tei akapapaia kia tauturu i te Au Kite mapu kia akanoo i te tumu anga no te ora mutu kore i te tuatau ki mua ma ta Iehova akaaerenga!

Aru mai ko te nuku Pipiria akakeu ua “E Tu Ngaueue Kore i te Au Tuatau Manamanata.” Kua akataka mai te reira i te roa o ta Ieremia angaanga mei tona mapu anga ki te akapou anga o Ierusalema, tei akakite maroiroiia e ia. Kua manako tau kore a Ieremia no tana tuku anga angaanga, inara kua akatupu aia i te reira noatu te patoi anga, e kua akaora a Iehova iaia.​—Ieremia 1:8, 18, 19.

Aru mai i te nuku ko te tuatua “Kia Riro Mei ia Ieremia Rai​—Tutu Mataku Kore i te Tuatua a te Atua.” I te maata anga o te taime kua riro te aronga tutu i te Patireia o teia tuatau ei takete no te au tuatua kino e te tuatua akaariu ke pikikaa ra. (Salamo 109:1-3) Inara, mei ia Ieremia rai, ka rauka ia tatou i te akono atu i te akamaroiroi kore na te akono mareka anga i te Tuatua a Iehova. E te papu ra ia tatou e ko te aronga e tamaki maira ia tatou kare e autu.

E tau tikai, te tuatua ki te katoatoa, te ingoa “Te Akaraanga o Teia Ao te Taui Nei.” Kua akairoia to tatou tuatau e te taui anga maata. Kua totou te Pipiria e ko taua au turanga, kapiti mai te aueanga no te “au, e kare e kino,” te taki atura ki to te Atua ra mataku akauruia no te akautunga anga. (1 Tesalonia 5:3) Ka apai mai te reira i te au taui anga umereia​—te openga o te au tamaki katoatoa, te rave anga kino, te ta ua, e pera te maki. Koi kore ei i reira e irinaki i roto i teia akaaerenga, ko teia te tuatau kia aruaru i te akono tau i te Atua e kia akono i te tu viivii kore.

Kua aru mai te tuatua poto o te apii anga Punanga Tiaki i te epetoma i te tuatua openga no te uruoaanga, te ingoa “Kia Maata Ua Atu Rai i te Au Angaanga Memeitaki ei Aronga Tutu Patireia.” Kua akakite mai te vaa tuatua e akapeea te porokaramu i te akakeukeu anga ia tatou i te pae vaerua e te akamaroiroi anga ia tatou kia irinaki ki runga ia Iehova. I te taopenga anga, kua raurauia mai tatou kia vai ma, aroa ua, e te maroiroi ei aronga tutu i te Patireia o te Atua.​—1 Petero 2:12.

Mei te tu rai o to Iehova au tavini i to Nehemia tuatau, kua oki papu tikai tatou ki te kainga ma te rekareka no te au akameitakianga pae vaerua tei rauka mai mei te au Uruoaanga Tapere “Ei Aronga Tutu Maroiroi i te Patireia.” (Nehemia 8:12) Kua akaki ainei teia uruoaanga akakeukeu ia koe ma te rekareka e te titau anga i te rave tamou ua atu ei tangata tutu maroiroi i te Patireia?

[Pia/Tutu i te kapi 23]

Tetai Puka Tauturu Apii Ou!

I te openga o te ra mua o te uruoaanga, kua rekareka te aronga tei tae atu no te tuku anga o te puka ou Akamori i te Atua Mou Anake. Kua akapapaia te reira kia apiiia ki te aronga tei akamutu i te apii i te puka Te Kite Te ka Arataki ki te Ora Mutu Kore e kare e ekoko anga ka akaketaketa i te akarongo o te aronga tei “akonoia no te ora mutu kore ra.”​—Angaanga 13:48.

[Akameitakianga]

Image on book cover: U.S. Navy photo

[Pia/Au Tutu i te kapi 24]

Tauturu no te Akavaitata Anga ki te Atua

Kua akakite te vaa tuatua openga o te ra rua o te uruoaanga i te tuku anga o te puka ou Akavaitata Atu kia Iehova. Te kapiti maira i nga tuanga maata e a, taki tai no te au tu maata o Iehova​—te mana, te tuatua tau, te pakari, e te aroa. Te tuanga taki tai o te puka e pene tetai te akaari maira e akapeea a Iesu Karaiti i te akanoo anga mai i te au akaraanga maoraora no te au tu o te Atua e angaanga ra. Te akakoroanga maata o teia puka ou koia oki kia tauturu ia tatou e ta tatou aronga apiipii Pipiria kia akatupu i te pirianga ketaketa e te vaitata ma te Atua ko Iehova.

[Pia/Au Tutu i te kapi 26]

Aratakianga Pae Vaerua no te Aronga Mapu

Kua akairoia te ra toru o te uruoaanga e te tuku anga takake o tetai aenga pepa te ingoa Youths​—What Will You Do With Your Life? Kua akapapaia kia tauturu i te au mapu Kite kia akono i te au iki anga tau no to ratou tuatau ki mua, te oronga mai nei teia aenga pepa ou i te ako anga Tuatua Tapu no te raveanga i tetai angaanga mutu kore ki roto i ta Iehova angaanga.