Te Au Ture Tu-atua e Puapinga no Tatou

“Te maata rava nei toku inangaro i taau ra ture!”​—SALAMO 119:97.

1. Eaa te tu akono matauia i te akarongo anga ki te au ture tu-Atua?

KARE te akarongoanga i te au ture tu-Atua i te mea marekaia i teia tuatau. No te aronga e manganui, ko te tatarianga ki tetai mana teitei akara koreia kua manakoia ei mea puapinga kore. Te noo nei tatou i te tuatau no te irinaki anga tu akono, no te au kotinga aveave i rotopu i te tika e te tarevake, e te maata o te ngai kare e ngoie kia akatakaia. (Maseli 17:15; Isaia 5:20) I te akaataanga i te manakoanga te matauia ra i te au taiate e manganui o teianei ao, kua akakite mai tetai ikianga e “kua anoano te maataanga o to Marike kia iki na ratou uaorai te tika, te meitaki e te tau ra.” Kua iki ratou i tetai “Atua kare e ririnui ana. Kare e au ture ketaketa. Kare e aronga teitei, i te pae akono tau me kare tetai atu tu.” Kua akara tetai social analyst e i teia tuatau “te manakoia maira te aronga taki tai kia tamanako na ratou uaorai e eaa te aiteanga kia arataki i te oraanga meitaki e te tau tikai.” Kua tuatua katoa aia: “Ko tetai ua atu tu mana teitei atu ka tau kia akatanotano i tana au akauenga kia tau ki te au umuumuanga o te au tangata tikai.”

2. Akapeea te taiku anga mua i te ture i roto i te Pipiria ra i piri vaitatai ki te akameitakianga e te mareka anga tu-Atua ra?

² I te mea e manganui tei ekoko i te puapinga o te au ture a Iehova ra, ka tau tatou kia akaketaketa i to tatou irinaki anga e ko te au turanga tu-Atua ei puapinga no tatou. E mea tika kia akamanako i te tataanga i taiku muaiai te ture i roto i te Pipiria. Ia Genese 26:5, ka tatau tatou i ta te Atua au tuatua: “Kua akarongo a Aberahama . . . e kua akono i taku ikuanga, e taku au akauenga, e taku au akonoanga, e taku ture.” Kua tuatuaia taua au tuatua ra e au anere ua atu mataiti i mua ake i ta Iehova oronga anga i te ture tataia ki te au anaunga a Aberahama. Akapeea ta te Atua ra tutaki anga i to Aberahama akarongo, kapiti katoa te akarongo anga ki Tana au ture? Kua taputou atu te Atua ko Iehova kiaia: “E ka meitaki te pa enua katoa o te ao nei i toou ra uanga.” (Genese 22:18) Ko te akarongo anga ki te au ture tu-Atua e pirianga tikai to te reira ki te akameitakianga e te mareka anga tu-Atua ra.

3. (a) Eaa te manako ngakau ki te ture a Iehova ta tetai tata taramo ra i akakite? (e) Eaa te au uianga te tau ra kia akamanakoia e tatou?

³ Tetai o te au tata taramo​—penei e tamaiti na te ariki o Iuda e e ariki no te tuatau ki mua​—kua akakite i tetai manako ngakau kare ra i matauia kia taokotaiia atu ki te ture. Kua akakite atu aia ki te Atua: “Te maata rava nei toku inangaro i taau ra ture!” (Salamo 119:97) Kare teia i te manako ngakau tupu ua mai. E akakiteanga ia i te inangaro no to te Atua ra anoano tei akanooia ki roto i tana ture. E au manako ngakau aiteite to Iesu Karaiti, te Tamaiti apa kore ua a te Atua ra. Kua akataka totouia maira a Iesu i te tuatuaanga: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.” (Salamo 40:8; Ebera 10:9) Akapeea oki tatou? Te mareka ra ainei tatou i te raveanga i to te Atua anoano? Te irinaki ra ainei tatou i te meitaki e te au puapinga o te au ture a Iehova? Eaa te ngai o te akarongo i te au ture a te Atua i ta tatou akamori anga, i to tatou oraanga i te ra takitai, i ta tatou rave ikianga, e i to tatou au pirianga ma etai ke ra? Kia inangaro i te ture tu-Atua ra, ka tau tatou kia kite eaa to te Atua tika anga kia akanoo e kia akaue i te au ture.

Ko Iehova​—Tei Tau Tikai ei Oronga Ture

4. Eaa ra a Iehova i tau tikai, ei ei Oronga Ture?

⁴ E ko Tei Anga maira, ko Iehova tei tau tikai ei Oronga Ture i te ao katoa e pini ua ake. (Apokalupo 4:11) Kua tuatua te peroveta ko Isaia: “Ko Iehova ta tatou tuku ture.” (Isaia 33:22) Kua akanoo aia i te au ture kopapa ei akatere i te au mea ora e te au mea kare e ora. (Iobu 38:​4-38; 39:​1-12; Salamo 104:​5-19) Ei mea angaia mai e te Atua, tei raro ake te tangata i ta Iehova ra au ture kopapa. E noatu rai e rima rave rangatira te tangata, ma te kite i te manakoanga tau koia anake, te mataora anake ra aia me ka kauraro aia iaia uaorai ki te au ture akono tau a te Atua e te pae vaerua oki.​—Roma 12:1; 1 Korinetia 2:​14-16.

5. Akapeea te kaveinga ia Galatia 6:7 i tikai no runga i te au ture tu-Atua ra?

⁵ Mei ta tatou i kite ana, kare e aatiia te au ture kopapa a Iehova. (Ieremia 33:​20, 21) Me patoi tetai tangata i etai ture kopapa, mei te ture gravity rai, ka kite aia i te au tupuanga. Mei te reira katoa, te au ture akono tau a te Atua kare e rauka kia tauiia e kare e rauka kia kopaeia me kare kia aatiia ma te kore e akautunga anga. Kua akamanaia ratou mei tana au ture natura ra, noatu rai e kare e viviki mai te au tupuanga. “Kare ua te Atua e vare: ko ta te tangata e ruru ra, ko tana ra ïa e kokoti.”​—Galatia 6:7; 1 Timoteo 5:24.

Te Atea o te Ture a Iehova Ra

6. Eaa te atea o te au ture tu-Atua ra?

⁶ Tetai akakite anga meitaki o te ture tu-Atua ko te Ture a Mose ra. (Roma 7:12) I muri iora, kua monoia e te Atua ko Iehova te Ture a Mose ma “te ture a te Mesia.”a (Galatia 6:2; 1 Korinetia 9:21) Ei au Kerititiano i raro ake “i te ture tika rava o te rangatira ra,” ka ariki tatou e kare te Atua i kotinga i tana au arataki anga ki etai au turanga anake o to tatou oraanga, mei te irinaki anga apiianga ra me kare te au peu oroa ra. Te kapiti maira tana au turanga i te au tu ravarai o te oraanga, kapiti katoa mai te au mea o te pamiri, te au akonoanga pitiniti, te tu akono i te aronga tuke te tane e te vaine, te tu manako i te au oa Kerititiano, e te akono anga i te akamori mou ra.​—Iakobo 1:​25, 27.

7. E oronga mai i te au akatauanga o te au ture tu-Atua puapinga ra?

⁷ Ei akatauanga, te tuatua ra te Pipiria: “Kare te kanga, e te akamori idolo, e te akaturi, e te akavaine, e te aronga sodoma, E te keia, e te noinoi apinga, e te konā kava, e te akakino, e te āru, kare anake ïa e noo i te basileia o te Atua.” (1 Korinetia 6:​9, 10) Ae, kare te akaturi e te kanga i te “au ravenga inangaro” ua. Te au ravenga totoma kare i “tetai oraanga mono ua i tetai atu apinga.” E au aatianga teia i te ture a Iehova. E pera katoa oki te au mea mei te keia, te pikikaa, e te tuatua akakino. (Salamo 101:5; Kolosa 3:9; 1 Petero 4:15) Kua akaapa a Iakobo i te tuatua akatietie, e kua apii mai a Paulo ia tatou kia kopae ke i te tuatua kanga ra e te tuatua rikiriki neneva ra. (Ephesia 5:4; Iakobo 4:16) No te au Kerititiano, ko teia au ture katoatoa no te tu akono e tuanga no te ture apa kore a te Atua ra.​—Salamo 19:7.

8. (a) Eaa te tu o ta Iehova ra ture? (e) Eaa te aiteanga tumu anga o te tuatua Epera no te “ture”?

⁸ Taua au akatikatika anga tumuanga i roto i te Tuatua a Iehova te akakite maira e e maata atu tana ture i tetai au papa anga ture anu ua. Na te reira e akapapa i tetai tumuanga oraanga tau, ma te au tu katoa o te akono tau i te akatupu anga i te meitaki. E akamatutu anga te ture a te Atua, e akono tau, e e apii anga. (Salamo 119:72) Ko te tuatua “ture” tei taikuia ra e te tata taramo kua uriia mai mei te tuatua Epera toh·rahʹ. Kua tuatua tetai tei apiiia i te Pipiria: “Ko teia tuatua kua tupu mai mei tetai verepa tona aiteanga kia taki atu, kia arataki, kia akakoro, kia pupui atu ki mua. Ko tona . . . aiteanga, i reira, ko te arataki anga i te tu akono.” Ki te tata taramo ko te ture e apinga aroa mei ko mai i te Atua ra. Kare ainei tatou e tau kia akateitei i te reira, te tukuanga i te reira kia akapapa i to tatou tu oraanga?

9, 10. (a) Eaa ra tatou i umuumu ei i te arataki anga irinakiia ra? (e) Akapeea anake e raukai ia tatou te oraanga marekaia e te puapinga oki?

⁹ Te umuumuia ra te arataki anga irinakiia e te arataki anga tau e te au mea ora katoatoa. Kua tika teia no Iesu e etai atu au angera, tei teitei atu ra i te tangata. (Salamo 8:5; Ioane 5:30; 6:38; Ebera 2:7; Apokalupo 22:​8, 9) Me ka puapingaia teianei au mea ora apa kore ua mei te arataki anga tu-Atua, mei teaa ra te maata atu o te reira no te au tangata apa ua nei! Te tuatua enua o te tangata e to tatou uaorai kiteanga kua akapapu mai i te tika o te akakite anga a te peroveta ko Ieremia. “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.”​—Ieremia 10:23.

¹⁰ Me ka inangaro tatou kia rauka tetai oraanga marekaia e te puapinga, ka tau tatou kia akara ki te Atua no te arataki anga. Kua kite te Ariki ko Solomona i te kino no te akono kia tau ki ta tetai au turanga, i te oraanga takake i te arataki anga tu-Atua ra: “E ana rai te tangata i te arataa e, e mea tika i tona ra manako; ko te openga ra o taua arataa ra, ko te mate ïa.”​—Maseli 14:12.

Au Tumu no te Akaperepereanga i te Ture a Iehova

11. Eaa ra tatou i tau ei kia inangaro i te marama i te ture a te Atua ra?

¹¹ Ka meitaki tatou kia tatanu i te inangaro oonu kia marama i te ture a Iehova. Kua akakite mai te tata taramo i taua anoano ra i tana tuatua anga: “E akapuera mai koe i oku nei mata, kia kite au i te au mea taka ke i roto i taau ra ture.” (Salamo 119:18) Te maata atu i to tatou kite anga i te Atua e tona au aerenga, te oonu atu ia i to tatou ariki anga i te tuatua mou o te au tuatua a Isaia: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku!” (Isaia 48:​17, 18) Ko te inangaro akatenga o Iehova kia kopae ke tona au tangata i te tumatetenga e kia rekareka i te oraanga na te manako anga i tana au akauenga. E akara matatio tatou i etai au tumu maata eaa tatou i tau ei kia akaperepere i te ture a te Atua.

12. Akapeea to Iehova ra kite anga ia tatou i akariro ei iaia ei Oronga Ture meitaki tikai?

¹² Te aere maira te ture tu-Atua no ko mai i Tei kite meitaki ra ia tatou. I te mea na Iehova tatou i Anga mai, e mea tau e ka kite aia i te au tangata mei roto maira. (Salamo 139:​1, 2; Angaanga 17:​24-28) Te au oa, e te au kopu tangata piri vaitata, pera katoa te au metua kare e kite meitaki ia tatou mei ia Iehova rai. No teaa, te kite meitaki maira te Atua ia tatou i ta tatou i kite ia tatou uaorai! Kare e aiteia te kite o Tei Anga maira ia tatou i te pae vaerua, te manako ngakau, te manako, e te umuumuanga pae kopapa. Iaia e taki maira i tona manako kia tatou, te akaari maira aia i te kite piri vaitata i to tatou tu, to tatou anoano, e to tatou au akakoro anga. Te kite ra a Iehova i to tatou au kotinga, inara te kite katoa ra aia i te meitaki te ka rauka ia tatou. Kua tuatua te tata taramo: “Kua kite oki aia i to tatou tu; te manako ra aia e, e one tatou nei.” (Salamo 103:14) No reira, ka rauka ia tatou te tu no te tinamou pae vaerua, ia tatou e kimi ra kia aaere i roto i tana ture, ma te kauraro puareinga anga ia tatou uaorai ki te arataki anga tu-Atua ra.​—Maseli 3:​19-26.

13. Eaa i raukai ia tatou te irinaki e te manako meitaki maira a Iehova i tei tika meitaki ra no tatou?

¹³ No ko mai te ture tu-Atua ra i Tei aroa mai ia tatou nei. Te manako oonu maira te Atua i to tatou meitaki mutu kore. Kare ainei aia i rave ma te tutaki maata kiaia uaorai i te oronga anga mai i tana Tamaiti “ei oko no te tangata e manganui”? (Mataio 20:28) Kare ainei a Iehova i taputou e ‘kare aia e vaoo ia tatou kia timataia, mari ra ko te tika ia tatou kia akakoromaki ra’? (1 Korinetia 10:13) Kare ainei te Pipiria e akapapu mai ana kia tatou e ‘koia oki te tiaki mai ia tatou’? (1 Petero 5:7) Kare tetai i manako aroa atu i te oronga mai i te au arataki anga puapinga no te au tangata mei ia Iehova ra. Te kite ra aia eaa te meitaki ra no tatou e teiea te kotinga i rotopu i te mataora e te mii. Noatu rai e apa ua tatou e te rave ra i te au tarevake, me aru tatou i te tuatua tika, ka akaari mai aia i tona aroa no tatou na roto i te au tu te ka akatupu i te ora anga e te au akameitakianga.​—Ezekiela 33:11.

14. I roto i teea tu puapinga maata te tuke anga o ta te Atua ra ture mei te au manako tangata nei?

¹⁴ Papu tikai e kare te ture a te Atua e taui. I teia tuatau ngaueue ta tatou e noo nei, e mato a Iehova no te ngaueue kore, tei vai ua mei tupua roa mai e tuatau ua atu. (Salamo 90:2) Kua tuatua aia nona uaorai: “Ko Iehova au, kare au e tu ke ke.” (Malaki 3:6) Ta te Atua au turanga, tei tataia i roto i te Pipiria, te tau tikai ra kia irinakiia​—kare mei te one ngote e taui putuputuia ra te au manako tangata ra. (Iakobo 1:17) Ei akatauanga, no etai mataiti kua akatere te au psychologist i te akatika ua anga i te akonoanga tamariki, inara i muri mai kua taui tetai pae i to ratou au manako e kua akatika e kua tarevake ta ratou apii anga. Te au turanga o teianei ao e te au aratakianga no runga i teia tumu te tairiiri ra mei tetai tua ki tetai tua mei te mea rai e kua puia e te matangi. Inara, kare te Tuatua a Iehova e ngaueue. No te au anere mataiti kua oronga mai te Pipiria i te akoanga e akapeea me akono i te tamariki ma te aroa. Kua tata te apotetoro ko Paulo: “Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.” (Ephesia 6:4) Mei teaa ra te akapapuanga o te reira i te kite e ka rauka ia tatou te irinaki i ta Iehova ra au turanga; kare ratou e taui!

Au Akameitakianga no te Aronga Tei Akarongo i te au Ture a te Atua

15, 16. (a) Eaa te ka tupu me akono tatou i ta Iehova ra au turanga? (e) Akapeea ta te Atua au ture i te riro anga ei arataki anga meitaki i te akaipoipo anga?

¹⁵ Na roto i tana peroveta ko Isaia, kua tuatua te Atua: “Koia katoa taku tuatua no roto i toku nei vaa; . . . e manuia oki.” (Isaia 55:11) Mei tei papu tikai, me tauta akatenga tatou i te aru i te au turanga e kitea ra i roto i tana Tuatua, ka autu tatou, ka akatupu i te meitaki, e ka kitea te mataora.

¹⁶ E akamanako ana i akapeea te au ture a te Atua i tau ei ei arataki ki te akaipoipoanga autu. “Kia akameitakiia te akaipoipo i te tangata ravarai,” ta Paulo ia i tata, “e te viivii kore oki te roi: e akava oki te Atua i te akaturi e te moeana ra.” (Ebera 13:4) Ka tika oki nga tokorua akaipoipoia kia akangateitei e kia aroa i tetai e tetai: “E aroa ra te tangata katoa i tana uaorai vaine mei te aroa iaia uaorai; e te vaine oki e kauraro aia i tana tane.” (Ephesia 5:33) Te tu aroa te anoanoia ra te akatakaia ra ia 1 Korinetia 13:​4-8: “E akakoromaki anga roa to te aroa, e te takinga-meitaki; kare te aroa e vareae, kare te aroa e akamaata, kare oki e akatietie, Kare e rave i te mea tau kore, kare e kimi i te meitaki nona uaorai, kare e riri vave, kare e manako kino ia etai ke; Kare e rekareka i te tuatua-tika kore, e rekareka ra i te tuatua-mou; E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa. Kare ua te aroa e kore.” Ko te akaipoipo tei akairoia ki teia tu aroa kare roa e puapinga kore.

17. Eaa te au puapinga ka rauka mai no te akonoanga i ta Iehova au turanga no te inuanga kava?

¹⁷ Tetai atu akakite anga e e puapinga ta Iehova ra au turanga, ko te tika e te akaapa ra aia i te kona kava. Te mareka kore katoa ra aia i tei “inu ua i te wina.” (1 Timoteo 3:​3, 8; Roma 13:13) E manganui tei akarongo kore i ta te Atua ra au turanga no runga i teianei tumu te makiia ra i te au maki tei akamataia me kore tei akakinoia no te inuanga maata. No te akarongo kore anga i ta te Pipiria akoanga kia meangiti te inu kava, kua o tetai papaki ki roto i te inuanga maata “ei tauturu ia ratou kia akaangaroi.” E manganui te au manamanata no te inuanga maata, kapiti katoa i te kore e akangateiteiia, te akakino anga i te pirianga pamiri, me kare te ngaangaa o te pamiri, te kaimoumou i te moni, e te ngere i te angaanga. (Maseli 23:​19-21, 29-35) Kare ainei te au turanga a Iehova no runga i te inuanga kava i te paruruanga?

18. E tau ainei ta te Atua au ture i te pae o te moni? E akataka mai.

¹⁸ Kua riro katoa ta te Atua ra au turanga ei mea tau no runga i te au tumu o te moni. Te raurau ra te Pipiria i te au Kerititiano kia tiratiratu e kia akono tau oki. (Luka 16:10; Ephesia 4:28; Kolosa 3:23) No ta ratou aru anga i teianei akoanga, e manganui te au Kerititiano kua akateiteiia me kore kua rave ua atu i ta ratou au angaanga e ko etai atu kua akamutuia mei te angaanga. Kua rauka katoa te au puapinga i te pae o te moni me kopae ke tetai tangata i te au ravenga tau kore i te au tuatua tapu e te au raveanga mei te pere moni e te peti oroenua, te kai avaava, e te kai tau kore i te apinga akakona. Kare e ekoko anga ka rauka ia koe i te manako i etai atu au akatauanga no te rave anga tau i te au turanga a te Atua.

19, 20. Eaa i riro ei ei aerenga pakari kia ariki e kia mou oki i te au ture tu-Atua ra?

¹⁹ E mea ngoie ua no te au tangata apa ua nei kia aere ke mei te au ture e te au turanga a te Atua ra. E tamanako ana i to Iseraela i te Maunga i Sinai ra. Kua tuatua te Atua kia ratou: “Kia akarongo tikai kotou i toku reo, e kia akono i taku ra koreromotu, ka riro ïa kotou ei apinga akaperepere maata naku, i te au tangata ravarai ra.” Kua pau maira ratou: “Te au tuatua ravarai ta Iehova i tuatua, ka rave ïa matou.” Inara, mei teaa te tukeanga o te aerenga ta ratou i iki kia aru! (Exodo 19:​5, 8; Salamo 106:​12-43) Ei tuke anga, ka tau kia ariki tatou e kia mou oki ki te au turanga a te Atua.

²⁰ Te aerenga no te pakari e te mataora kia mou piri tikai ki te au ture aite koreia ta Iehova i oronga maira ei tauturu kia arataki i to tatou au oraanga. (Salamo 19:​7-11) E raukai te rave i teia ma te autu, ka tau katoa tatou kia ariki i te puapinga o te au kaveinga tau i te Atua ra. Ko teia te tumu o te atikara e aru mai nei.

[Tataanga Rikiriki i Raro]

Maara Ainei ia Koe?

• Eaa i raukai ia tatou te irinaki e e puapinga te au ture a te Atua no tatou?

• No teea au tumu i tau ei tatou kia akaperepere i te ture a Iehova?

• I teea au tu i puapingai ta te Atua au ture?

[Tutu i te kapi 13]

Kua akameitaki apinganuiia a Aberahama no te akarongoanga i te ture a Iehova

[Au Tutu i te kapi 15]

Na te au apiapi o te oraanga i teia tuatau i akaanga ke i te manako o te aronga e manganui mei te ture tu-Atua ra

[Tutu i te kapi 17]

Mei te are turama i runga i te papa, e ngaueue kore te ture tu-Atua kare e taui