Eaa ra Toou Manako no te Matenga?

TE TUKU ra te matenga i tetai ata ki rungao ia tatou ia tatou e aaere ra i roto i to tatou au oraanga i te au ra ravarai, noatu e mei teaa to tatou tu i te pae kopapa me kare te apinganui. Ka tupu te reira i te tuatau e tikoti ra tatou i tetai mataara me kare te takoto ra i runga i te roi. Ko tetai au tumatetenga mei te au takino anga tamataku ia Tepetema 11, 2001, i New York City e i Washington, D.C., te aro atura tatou ma te tika anga e ko te “enemi openga ra,” ko te matenga, te akaputu ra i tona aronga mate mei roto mai i te oraanga tukeke katoa ra e mei roto i te au pupu tukeke katoa te mataiti, i tetai taime te tamate anga e tauatini ua atu i roto i te au miniti.​—1 Korinetia 15:26.

Noatu rai, i te akara anga ei mea umere na te au tangata te matenga. Kare atu e apinga e oko maataia i te au nutipepa me kare te akapiri maata maira i te au tangata ki te tutu o te tivi i te au ripoti o te matenga ra, te matenga tikai oki o te maata ra o te numero o te au tangata i roto i te au turanga rikarika. I te akara anga kare e rava ana te reira ki te au tangata, noatu e matenga te reira na te tamaki anga, te tumatetenga natura, te kino, me kare te maki. Teia anoano anga i te matenga te kitea ra tona akakite anga umere maata roa atu i roto i te au manako tikai te akaariia ra ki te matenga o tetai tangata maata e o te aronga rongonui ra.

Pouroa teia kare i te mea ekoko koreia. Te umere ua ra rai te au tangata i te matenga​—te matenga o etai ke. Inara, me aro atu i to ratou uaorai matenga, kua mataku ratou. To tatou uaorai mate ko tetai tumu manako ia kare te maata anga ia tatou e inangaro i te akamanako atu.

Oripu Ua Ainei i te Matenga?

Te manako anga no to tatou uaorai matenga e mea reka koreia e ka akapera ua rai te reira. No teaa ra? No te mea kua tatanuia e te Atua ki roto ia tatou te anoano maata kia ora e tuatau ua atu. “Kua tuku katoa aia i te tuatau mutu kore i roto i to ratou ngakau,” i karanga ei a Koheleta 3:11, kia tau ki te Anchor Bible. No reira, te akapapu anga no te matenga, kua akatupu i tetai maro anga i roto i te au tangata, te manako rotai kore anga. Kia akaoki mai i teia maro anga i roto e kia akamerengo i te anoano natura kia ora ua atu, kua maani ua te au tangata i te au tu irinaki anga katoatoa, mei te apiianga o te meta mate kore ki te irinaki anga i roto i te reincarnation.

Noatu eaa te tu, e tu manamanata, e tupu anga matakutakuanga te matenga, e ko te mataku anga i te matenga te takapini ra i te ao katoa. No reira, kare tatou e poitirere ua e te kite ra te taiate o te au tangata nei i te matenga ei manakonako anga akaaoanga. No tetai mea ra, te akatuera ra te matenga i te puapinga kore no tetai oraanga te akapou maata ra i te aruaru anga i te apinganui e te mana.

Kua Akatakakeia e te Matenga?

I te au tuatau i topa, ko tetai tangata tei makiia me kare tei kino tikai kua akatikaia kia mate i tona uaorai kainga te au ngai tei matauia e te akaperepereia ra. Te rave putuputuia ra te reira i te au tuatau Pipiria, e te tika ra rai te reira i roto i tetai au peu. (Genese 49:​1, 2, 33) I roto i taua au turanga ra, ka akaputu mai te pamiri, e kua kapitiia mai te au tamariki i roto i te puka anga. Te oronga ra teia ki te mema pamiri tataki tai ra i te manako e kare koia ua e mamae ra e te oronga anga i te akapumaana no te rave kapiti anga i te apainga e te rave kapiti anga i te miianga.

E tuke maata teia i tei raveia i roto i tetai taiate e te tapuia ra te uriurianga no te matenga, tei manakoia e kare e tau ana, e kua akaateaia atu te au tamariki no te manako anga e e “maata roa” te reira no ratou. E tuke te matenga i teia tuatau i roto i te au ravenga e manganui, e te maata anga e mea maromaroa te reira. Noatu e te inangaro ra te maata anga kia mate i te kainga, kia akonoia e te pamiri ma te au e te aroa, no te manganui kua mate ratou i roto i te are maki, kua akatakakeia e te mamae ra, kua tamoumouia ki runga i tetai apinga matini matakutaku e te tuke ra. I tetai tua, e mirioni ua atu tei mate kitea koreia​—te aronga tei tamate kitea koreia no te akapou anga ra, te onge, AIDS, tamaki tangata, me kare no te maata o te putaua.

Tetai Tumu Manako kia Akamanakoia

Kare te Pipiria i akamaroiroi kore mai ana i te manakoanga no te matenga. Ko te tika, te akakite maira a Koheleta 7:2 kia tatou: “E mea meitaki te aere ki te are aue anga, i te aere ki te are kaingakai; ko te openga oki te reira o te tangata katoa ra.” Me aro tika tikai atu i te matenga, penei ka taui tatou mei ta tatou au manako ravenga ra me kare te au angaanga e ka akara atu ki runga i te poto ua anga o te oraanga. Ka tauturu teia ia tatou kia akono i to tatou oraanga na tetai mataara puapinga maata noonoo ua me kare e mea puapinga kore ua.

Eaa ra toou manako no te matenga? I akara matatio ana ainei koe i toou au manako, te au irinaki anga, te au manakonako anga, e te au mataku anga no runga i te ope anga o toou oraanga?

Mei te tu o te oraanga ra, tei runga atu te tu o te matenga i te kite o te tangata kia akataka e kia marama. Okotai ua te ka rauka i te tuatua no runga i te manako ma te mana irinakiia ko Tei Anga ia tatou ra. Koia “te tumu o te ora,” e tei iaia ‘i oraʼi te au mate nei.’ (Salamo 36:9; 68:20) Ma te poitirere tikai, na te akara matatio anga i tetai au irinaki anga rongonui no runga i te matenga i roto i te Tuatua a te Atua ka akapapu mai i te akapumaana e te akamaroiroianga. Ka akaari mai te reira e kare te matenga e ko te opengaia o te au mea ravarai.

[Tataanga i te kapi 4]

Te ka tupu no te matenga te tauturu ra ia tatou kia akono i to tatou au oraanga na tetai mataara puapinga maata