E Tavini Tamou Marie e Pakuivi ma te Pakuivi

“Ei reira au e oronga atu ei ki te au tangata nei i te taui anga ki tetai reo ma, kia tautopa ratou katoatoa i te ingoa o Iehova, kia tavini atu iaia e pakuivi ma te pakuivi.”​—ZEPHANIA 3:9, NW.

1. Eaa te tupu nei i te akatupu anga ia Zephania 3:9?

E VAITATA i te 6,000 reo te tuatuaia ra i te enua katoa. I te pae atu i teia, e au reo keke etai, me kare e au tu reo no etai ngai. Inara, me te tuatua ra te au tangata i te au reo tuke mei te Arapia e te Zulu rai, kua rave te Atua i tetai mea umere tikai. Kua akariro aia kia rauka i te au tangata i te au ngai ravarai kia apii e kia tuatua oki i tetai reo ma anake ua. Te tupu nei teia i te akatupu anga i te taputou tei orongaia na roto i te peroveta ko Zephania: “Ei reira au [te Atua ko Iehova] e oronga atu ei ki te au tangata nei i te taui anga ki tetai reo ma [“e ngutu ma”], kia tautopa ratou katoatoa i te ingoa o Iehova, kia tavini atu iaia e pakuivi ma te pakuivi.”​—Zephania 3:9, NW.

2. Eaa te “reo ma,” e eaa ta te reira i akariro kia rauka mai?

² Te “reo ma” ko te tuatua mou a te Atua te kitea ra i roto i tana Tuatua, te Pipiria. E mea maata oki ko te tuatua mou ia no te Patireia o te Atua, te ka akatapu i te ingoa o Iehova, ka akatika i tona ngateitei, e ka apai mai i te au akameitakianga ki te au tangata ravarai. (Mataio 6:9, 10) Ei reo ma anake i runga i te enua nei i te pae vaerua, te tuatuaia ra te reo ma e te au tangata o te au pa enua katoatoa e te au kopu katoa. Te akariro ra te reira ia ratou kia tavini ia Iehova “e pakuivi ma te pakuivi.” Te tavini taokotai ra ratou iaia, me kare “ma te manako okotai.”​—The New English Bible.

Kare e Ngai no te Papakitai

3. Na teaa i akariro ia tatou kia tavini taokotai atu ia Iehova?

³ Ei au Kerititiano, te mareka nei tatou no te au reo tini taokotaiia te vai nei i roto ia tatou. Noatu te tutu nei tatou i te evangeria o te Patireia i roto i te au reo o te tangata e manganui, te tavini taokotai nei tatou i te Atua. (Salamo 133:1) Te rauka nei teia no te mea, noatu teiea tatou e noo ra i te enua nei, te tuatua nei tatou i te reo ma okotai ei akapaapaa ia Iehova.

4. Eaa ra kia kore ei e papakitai i rotopu i te au tangata o te Atua ra?

⁴ Kare e tika kia vai te tu papakitai ki roto i te au tangata o te Atua. Kua akataka meitaki te apotetoro ko Petero i te reira iaia e tutu ra i te kainga o te rangatira vaeau Kenitara ko Korenelio i te 36 T.N. e kua akakeuia kia tuatua: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35) I te mea e tika te reira, kare te putuputuanga Kerititiano i te ngai no te tu papakitai, te pupu taka ke, me kare te akaperepere i etai ua.

5. Eaa ra i tarevake ei kia tauturu i te au pupu takake i roto i te putuputuanga ra?

⁵ No runga i tona aereanga ki te Are Uipaanga Patireia, kua tuatua tetai tamaine apii i te kaoreti e: “Tei matauia, ka akaputu mai te au ekaretia i te au mema no tetai kopu ua me kare e pupu eteniki. . . . kua noo kapiti katoatoa te Au Kite o Iehova e kare i roto i te au pupu tataka ke.” Inara, ko etai au mema o te putuputuanga i Korinetia taito ra kua akatupu i te tataka ke anga. Na te akatupuanga i te tataka ke anga, kua patoi ratou i te angaanga a te vaerua tapu o te Atua ra, no te mea te akatupu ra te reira i te taokotai anga e te au. (Galatia 5:22) Me ka akatupu tatou i te pupu tataka ke i roto i te putuputuanga, te rave patoi ra tatou i te au aratakianga a te vaerua. No reira, kia akamanako tatou i te au tuatua a te apotetoro ko Paulo ki to Korinetia: “E te au taeake, te ako atu nei au ia kotou i te ingoa o to tatou Atu ra o Iesu Mesia, e ei tuatua okotai ta kotou ravarai, e auraka ei pae ke i roto ia kotou na; kia kapiti marie ra kotou ma te ngakau okotai e te manako okotai.” (1 Korinetia 1:10) Kua akaketaketa katoa a Paulo i te taokotai anga i roto i tana reta ki to Ephesia ra.​—Ephesia 4:1-6, 16.

6, 7. Eaa te akoanga ta Iakobo i oronga no runga i te akaperepere anga i etai, e akapeea te akonoanga o tana tuatua?

⁶ Te papakitai kore kua umuumu tamouia no te au Kerititiano. (Roma 2:11) I te mea te akaari ra tetai papaki i te anere mataiti mua i te akaperepere anga i etai o te aronga apinganui, kua tata te pipi ko Iakobo: “E aku au taeake ra, auraka kotou e mou i te tuatua a to tatou Atu ra a Iesu Mesia, i te Atu o te kakā ra, ma te akono i te tu o te tangata. Kia aere mai oki tetai tangata ki roto i to kotou uipa anga ma te tapeka auro i te rima, ma te kakau manea ra, e kia tomo katoa mai tetai tangata apinga kore ma te kakau kino ra; Kite atura kotou i tei kakau i te kakau manea ra, e kua karanga atura kiaia, E noo koe i ko nei ki te ngai meitaki; ka karanga atu ei ki te tangata apinga kore ra, Ka tu atu koe ki ko atu, e kare ïa, e noo koe i ko nei i taku tiroaroaanga vaevae nei: Kare aina kua akatu ke kotou, e kua riro ei eumiumi manako kino ra?”​—Iakobo 2:1-4.

⁷ Me aere mai te aronga akarongo kore apinganui ma te au tapea rima auro e te au kakau manea ki tetai uipaanga Kerititiano e pera katoa te aronga akarongo kore putaua i roto i te au kakau viivii, kua rauka i te aronga apinganui i te akono anga meitaki. Kua orongaia atu kia ratou te au nooanga “ki te ngai meitaki,” e ko te aronga putaua kua tuatuaia atu kia tu me kare kia noo ki runga i te taua i te tiroaroaanga vaevae o tetai. Inara kua oronga mai te Atua ma te papakitai kore i te atinga oko o Iesu no te aronga apinganui e te putaua ra. (Iobu 34:19; 2 Korinetia 5:14) No reira me ka akamareka tatou ia Iehova e ka tavini iaia e pakuivi ma te pakuivi, auraka tatou e akaari i te tu akaperepere anga i etai me kare ‘koi rekaʼi i te au tu tangata kia puapingaia tatou uaorai.’​—Iuda 4, 16.

E Akakore i te Koumuumu Anga

8. Eaa tei tupu no to Iseraela ra koumuumu anga?

⁸ Kia akono tamou i to tatou taokotai anga e kia rauka ua atu te akaperepere anga tu-Atua, ka tau kia akono tatou i te akoanga a Paulo: “E rave i te au mea ravarai ma te urutoe kore.” (Philipi 2:14, 15) Kua koumuumu te au Iseraela akarongo kore tei akamataraia maira mei te tuikaaanga mei Aiphiti ia Mose e Aarona, e pera katoa i te Atua ko Iehova. No teia ra, pouroa te au tangata e 20 mataiti e aere ki runga kare i tomo atu ki roto i te Enua Taputouia, mari ra ko Iosua tiratiratu raua ko Kaleba e te au ngati Levi, kua mate katoa i te 40 mataiti o Iseraela i aaere ei i te metepara. (Numero 14:2, 3, 26-30; 1 Korinetia 10:10) Mei teaa ra ta ratou tutaki anga no te koumuumuanga!

9. Eaa tei tupu kia Miriama no tona koumuumu anga?

⁹ Te akaari maira teia eaa te ka rauka kia tupu ki etai iti tangata katoa no te koumuumuanga. Akapeea te aronga tataki tai tei koumuumu ra? Ae, te tuaine o Mose, ko Miriama, raua ko tona tungane ko Aarona, kua koumuumu: “Ia Mose anake ra ainei ta Iehova tuatua anga mai? Kare aina aia i tuatua ia taua katoa nei?” Te akakite katoa ra te tataanga: “Te akarongo mairā Iehova.” (Numero 12:1, 2) Te tupu anga? Ko Miriama, i te akara anga nana i akamata i teia akaapa anga, kua taakaakaia e te Atua. Akapeea? Na te akatupu anga i te repera e kua araiia kia noo atu ki vao i te puakapa no te itu ra kia tamaia aia.​—Numero 12:9-15.

10, 11. Te koumuumuanga arai koreia ka rauka i te akatupu i teaa? Akatutu mai.

¹⁰ Kare te koumuumuanga i te akaapa anga anake ua no tetai tarevake. Te aronga koumuumu tamou te akakite maata rava ra i te puapinga o to ratou manako ngakau me kare turanga, i te manako maataanga kia ratou uaorai kare ki te Atua. Me kore e araiia, ka akatupu teia i te pekapeka anga i roto i te au taeake pae vaerua e ka arai i ta ratou au tauta anga kia tavini ia Iehova e pakuivi ma te pakuivi. Te tika nei teia no te mea ko te aronga koumuumu ra ka rave ua atu i te tuatua i ta ratou au akaapa anga, kare e ekoko anga te manako ra e ka tangi atu etai ra kia ratou.

¹¹ Ei akatauanga, penei ka akaapa atu tetai i te tu akono a tetai o te aronga pakari i tana au tuanga i roto i te putuputuanga me kare te akono anga no tana au angaanga. Me ka akarongo atu tatou ki tei akaapa ra, penei ka akamata tatou i te manako anga mei iaia rai. I mua ake ka tatanuia te ua o te mareka kore ki roto i to tatou manako, penei kare te au angaanga a te tangata pakari ra i akataitaia mai ia tatou, inara te akapera maira i teianei. I te openga, kare e apinga ta te tangata pakari ra e rave i tika i to tatou au mata, e penei ka akamata katoa tatou i te akaapa atu iaia. Kare teia tu akono i te mea tau ki roto i te putuputuanga o te au tangata o Iehova.

12. Eaa te ka tupu ki to tatou pirianga ma te Atua no te koumuumuanga?

¹² Te koumuumuanga i te au tangata na ratou ra te angaanga i te tiaki anga i te anana a te Atua penei ka taki atu ki te akaapaanga akakinoanga. Ko taua koumuumuanga ra me kare te akakino anga ki runga ia ratou ka rauka kia akatupu i te tu kino ki to tatou pirianga ma Iehova ra. (Exodo 22:28) Te aronga akaapa kino kare ra e tataraara kare anake ia e noo i te Patireia o te Atua ra. (1 Korinetia 5:11; 6:10) Kua tata te pipi ko Iuda no te aronga koumuumu “te akavaavaa nei i te au tutara, e te akakino nei i te aronga taoonga,” me kare ko te au tangata e apainga ta ratou i roto i te putuputuanga. (Iuda 8) Kare i rauka i taua aronga koumuumu ra i te tu marekaanga tu-Atua, e ka akakore pakari atu tatou i ta ratou aerenga kino.

13. Eaa ra te au akaapaanga katoatoa i kore ei e tarevake?

¹³ E tika, kare te au akaapa anga katoa ra i te mareka koreanga ki te Atua. Kare aia i akaruke i te “aue maata” no Sodoma e Gomora inara kua akapou atu i taua oire kino ra. (Genese 18:20, 21; 19:24, 25) I Ierusalema, i muri poto ake i te Penetekote o te 33 T.N., “kua tupu iora te urutoe a te Eleni ki te Ebera, no te mea kare ta ratou vaine takaua i akonoia i te tuanga apinga i te au ra katoa ra.” No reira, kua akatikatikaia te turanga e “te ngauru ma rua ra” na te akataoonga anga i te “toko itu puke tangata rongo meitaki” ki rungao i “te reira angaanga” i te tua anga kai. (Angaanga 6:1-6) Kare e tika te aronga pakari o teia tuatau kia ‘topiri i to ratou taringa’ i te au akaapaanga tika. (Maseli 21:13) Kare e kia akaapa atu i te au oa akamori ra, ka tau te aronga pakari ra kia akamaroiroi e kia akamatutu atu.​—1 Korinetia 8:1.

14. Kia akakore i te koumuumuanga, eaa te tu tau te umuumuia ra?

¹⁴ Pouroa tatou ka tau kia akakore i te koumuumuanga, no te mea te vaerua o te akaapaanga e tu kino ia i te pae vaerua. Ka akakino taua tu ra i to tatou taokotai anga. Kareka ra, e tuku tatou i te vaerua tapu kia akatupu i te aroa ki roto ia tatou. (Galatia 5:22) Na te akarongoanga i ‘te ture ariki no te aroa’ ka tauturu ia tatou kia tamou marie i te tavinianga ia Iehova e pakuivi ma te pakuivi.​—Iakobo 2:8; 1 Korinetia 13:4-8; 1 Petero 4:8.

E Paruru Atu i te Tuatua Akakino

15. Akapeea koe me akatuke i rotopu i te urutoe e te tuatua akakino?

¹⁵ I te mea ka taki atu te koumuumu anga ki te urutoe anga kino, ka tika tatou kia matakite i ta tatou ka tuatua. Ko te urutoe e tuatua puapinga kore ua no runga i tetai tangata e ta ratou au angaanga. Inara, ko te tuatua akakino, e ripoti pikikaa ia tei akakoroia kia akakino i te turanga o tetai tangata. Ko taua tu tuatua ra e akakino anga e te tau kore i te Atua. No reira kua tuatua atu te Atua ki to Iseraela: “Auraka koe e monomono korero aere na roto i to iti-tangata na: auraka oki koe e tu ki runga ei tapepe pikikaa i to tangata tupu.”​—Levitiku 19:16.

16. Eaa ta Paulo i tuatua no etai aronga urutoe ra, e akapeea te tupu anga tau kia tatou no tana akoanga ra?

¹⁶ I te mea penei ka taki atu te tuatua puapinga kore ki te tuatua akakino anga, kua tuatua patoi a Paulo no taua aronga urutoe ra. I muri ake i te taikuanga i etai au vaine takaua tei tau ra no te tauturu anga a te putuputuanga, kua tuatua aia no teau vaine takaua “kua akamātau ratou i te koka aere ua i tera are i tera are; kare ra i te akatau anake, e apai tuatua oki ratou, e te akara matariki i ta tetai ke ra akonoanga, i te tuatua anga oki i te au mea tika kore ra.” (1 Timoteo 5:11-15) Me kite tetai vaine Kerititiano e e tu paruparu tona no taua tu tuatua ra te ka taki atu ki te tuatua akakino, ka tau meitaki aia kia akarongo i ta Paulo akoanga “eiaa ei tapepe ua, ei maroiroi ra.” (1 Timoteo 3:11) Ae, ka tika katoa te au tangata Kerititiano kia paruru atu i te tuatua urutoe.​—Maseli 10:19.

Auraka e Rave i te Akavaanga!

17, 18. (a) Eaa ta Iesu i tuatua no te akavaanga i to tatou taeake ra? (e) Akapeea e raukai ia tatou i te akonoanga i ta Iesu au tuatua no te akavaanga?

¹⁷ Noatu rai me kare tatou e akakino atu i etai ke ra, penei ka tau katoa tatou kia tauta maata i te kopae atu i te akavaanga ia etai ke ra. Kua akaapa a Iesu i taua vaerua ra i tana tuatua anga: “Auraka e akakino atu; kia kore kotou e akakinoia mai. Ko ta kotou oki e akakino ia etai ke ra, e akakino katoaia kotou i te reira; ko te aite ta kotou e aite atu, ko ta kotou rai ïa kia akaaiteia mai. E eaa koe i akaraʼi i te tanga iti i roto i te mata o to taeake ra, e kare koe i kite e tei roto i toou uaorai mata te rakau maata? E eaa oki koe e tikaʼi kia karanga atu ki to taeake, o mai, naku e kiriti i te tanga iti i roto i toou mata, e i na, tei roto i toou uaorai mata te rakau maata? E tera ra pikikaa e, e timata ana i te kiriti i te rakau maata i roto i toou uaorai mata; ei reira koe e kite meitaki ei, kia kiriti i te tanga iti i roto i te mata o to taeake.”​—Mataio 7:1-5.

¹⁸ Kare tatou e oronga kia kiriti i te “tanga iti” mei te mata o to tatou taeake kia tauturu iaia kareka to tatou uaorai kia rave i te akavaanga tau te araiia ra e tetai “rakau maata” akatutuia ra. Ko te tika, me te ariki tika ra tatou i akapeea to te Atua aroa ra, kare tatou e manako kia akava atu i to tatou au taeake e te au tuaine pae vaerua ra. Akapeea e raukai ia tatou kia kite tika ia ratou mei to tatou Metua i te rangi ra? No reira ra a Iesu i akamatakite mai ei ia tatou e ‘auraka e akakino atu; kia kore kotou e akakinoia mai’! Na te akaraanga tika i to tatou uaorai au tu apa ka tau kia tapu ia tatou kia kore e akava atu ta te Atua ka akamanako e e tuatua tika kore ia.

Apikepike Inara ma te Ngateitei

19. Akapeea tatou i te manako anga i te au taeake akarongo ra?

¹⁹ Me te tamanako ra tatou kia tavini atu i te Atua e pakuivi ma te pakuivi ma te au taeake akarongo, kare tatou e kopae anake ua i te akavaanga. Ka rave tatou i te taki anga i te akaarianga ngateitei kia ratou. (Roma 12:10) Ko te tika, ka kimi tatou i te meitaki no ratou, kare no tatou uaorai, e ka rave rekareka ua i te au angaanga taakaaka no ratou. (Ioane 13:12-17; 1 Korinetia 10:24) Akapeea e raukai ia tatou kia tamou marie i taua vaerua meitaki ra? Na te manako anga e ko te aronga akarongo ravarai e okomaata kia Iehova e te umuumu ra tatou tetai i tetai, mei te au mero o te kopapa tangata te irinaki ra tetai i tetai.​—1 Korinetia 12:14-27.

20, 21. Eaa te aiteanga o te au tuatua ia 2 Timoteo 2:20, 21 no tatou?

²⁰ E tika ra, e ariki karakaraea apikepike ua te au Kerititiano tei irinakiia ma te apinga kaka o te angaanga orometua. (2 Korinetia 4:7) Me ka akono tatou i teianei angaanga akameitakiia kia akapaapaa ia Iehova, ka tika tatou kia tamou marie i tetai turanga ngateitei ki mua iaia e tana Tamaiti. Na te vai akono tau anake e te ma i te pae vaerua ka rauka ia tatou kia vai mai ei ariki ngateitei no ta te Atua angaanga. I teianei tu kua tata a Paulo: “Kare ra to te are maata nei au āriki i te āriki auro anake, e te ario, e mea rakau tetai e te karakaraea, e no te meitaki oki tetai papaki, e no te kino tetai. E teianei, kia tamā marie te tangata iaia uaorai i teianei au tuatua, e riro aia ei āriki no te meitaki, e akatapuia ïa, e te tau oki i to te Atu ra anoano, e te manea oki kia rave i te au angaanga memeitaki katoa ra.”​—2 Timoteo 2:20, 21.

²¹ Te aronga tataki tai kare ra e akono ia ratou uaorai kia rotai ma te umuumu anga tau i te Atua ra e ‘au āriki no te kino ia.’ Inara, na te aruanga i te aerenga tau i te Atua ra, ka riro tatou ei ‘au āriki no te meitaki, e akatapuia ïa, e te tau oki i to te Atu ra anoano, e te manea oki kia rave i te au angaanga memeitaki katoa ra.’ No reira penei ka tau tatou kia ui kia tatou uaorai: ‘E “āriki memeitaki” ainei au? E akatupu anga meitaki ainei taku ki runga i te au taeake akarongo? Ko au ainei tetai mema o te putuputuanga tei angaanga ra e pakuivi ma te pakuivi ma te au taeake akamori ra?’

E Tavini Tamou Ua Atu e Pakuivi ma te Pakuivi

22. Ka rauka kia akaaiteia atu te putuputuanga Kerititiano ki teaa?

²² Te putuputuanga Kerititiano mei tetai akanoonoo anga a te pamiri rai. Te vaira te reva aroa, tauturu ua, e te mareka oki i roto i tetai pamiri me akamori tona au mema katoatoa ia Iehova. Penei te pamiri kua akapapaia ma etai au tangata tataki tai ma te au tu tangata tuketuke ra, inara e turanga ngateitei to te katoatoa. Te aiteite ra taua turanga i roto i te putuputuanga. Noatu e tuketuke tatou katoatoa​—e te apa ua​—kua akavaitata mai te Atua ia tatou kiaia uaorai na roto ia Karaiti. (Ioane 6:44; 14:6) Te inangaro maira a Iehova raua ko Iesu ia tatou, e mei te pamiri taokotaiia ra, te umuumu tika ra tatou kia akaari i te aroa no tetai e tetai.​—1 Ioane 4:7-11.

23. Eaa ta tatou ka tau kia maara e kia tamanako i te rave?

²³ Te putuputuanga Kerititiano mei te pamiri rai e ngai katoa oki ka tika kia kite atu tatou i te tu tiratiratu. Kua tata te apotetoro ko Paulo: “Ko toku ïa anoano i te au tane ra, kia pure i te au ngai katoa ra, ma te apai i te rima viivii kore ki runga, ma te riri kore, e te māro kore.” (1 Timoteo 2:8) No reira kua taokotai atu a Paulo i te tiratiratu ma te pure “i te au ngai katoa ra” i reira te uipa kapipiti ra te au Kerititiano. Ko te au tangata tiratiratu anake ka tau kia rave i te pure anga no te putuputuanga i te ngai tangata. E tika, te manako maira te Atua ia tatou katoatoa kia tiratiratu kiaia e ki tetai e tetai. (Koheleta 12:13, 14) No reira e aruaru tatou katoatoa kia angaanga kapipiti ma te rotai ra, mei te au mero o te kopapa tangata. Kia tavini taokotai katoa tatou ei tuanga no te pamiri akamori o Iehova ra. I runga ravao, kia maara tatou e te umuumu ra tatou tetai i tetai e ka rekareka i te mareka anga tu-Atua e te au akameitakianga me tavini tamou ua atu tatou ia Iehova e pakuivi ma te pakuivi.

Akapeea Koe me Pau?

• Eaa te akariro ra i te au tangata o Iehova kia tavini iaia e pakuivi ma te pakuivi?

• Eaa te au Kerititiano i kopae ei i te papakitai?

• Eaa koe ka tuatuai e te tarevake ra te koumuumuanga?

• Eaa tatou ka akangateitei ei i to tatou au taeake akarongo?

[Tutu i te kapi 15]

Kua kite a Petero e “kare te Atua e akono i te tu o te tangata”

[Tutu i te kapi 16]

Kua kite ainei koe e eaa te Atua i taakaaka ei ia Miriama?

[Tutu i te kapi 18]

Te tavini rekareka ra te au Kerititiano tiratiratu ia Iehova e pakuivi ma te pakuivi