E Akakaka i te Atua Auraka te Tangata

ITE au marama kare i roa akenei, kua kite te au tangata takapini i te koropu te inangaro ra i te tuatua tika e akapeea i te akakaka i te Atua ia ratou e akaputuputu maira ki te Uruoaanga Tapere o te Au Kite o Iehova “E Akakaka i te Atua.” Ka akara akaou ana tatou i te porokaramu apiianga tei orongaia mai ki reira.

Kua taeria te porokaramu tei akatumuia ki runga i te Pipiria e toru ra katoa no te manganui anga o te aronga uruoaanga e e a ra no te aronga tei rauka i te aere atu ki te au akaputuputuanga pa enua takake. I te katoaanga, kua tere atu i te 30 au tuanga Tuatua Tapu tei akarongoia e te aronga uruoaanga, kapiti mai te au tuatua tei akaoonu i te arikianga pae vaerua, te au tupuanga tei akamatutu i te akarongo, te au akatutuanga tei akakite mai i te taangaanga anga i te au kaveinga Pipiria, e te nuku ma te kakau tau tei akatutu mai i te au akaaoanga tei kiteaia e te au Kerititiano i te anere mataiti mua. Me kua aere atu ana koe ki tetai o te au uruoaanga, eaa e kore ei e akara akaou i taau au tataanga ia koe e tatau ra i teia atikara? Kua papu ia matou e ka akaoki mai te reira i te au manako anga meitaki no te kaikaianga pae vaerua ki tikai e kia riro ei ikuikuanga katoa.

Ra Tai ko te Tumu Tuatua: “Kua Tau Koe e Iehova, . . . kia Apai te Kaka”

I muri ake i te akamataanga imene e te pure, kua turou maana mai te vaa tuatua mua i te katoatoa tei tae atu ki tetai tuatua i te akara atu anga ki runga i te tumu maata no te uruoaanga: “Akaputuputuia kia Akakaka i te Atua”. I te taikuanga mei ia Apokalupo 4:11, kua akaketaketa te vaa tuatua i te katoa anga o te tumu manako o te uruoaanga. Kua akataka viviki mai aia e eaa te aiteanga kia akakaka i te Atua. Na te taangaanga anga i te puka o Salamo, kua akaketaketa aia e ko te akakakaanga i te Atua kua kapiti mai te “akamori,” te “akameitakianga,” e te “alelu ia.”​—Salamo 95:6; 100:4, 5; 111:1, 2.

Te ingoa o te tuanga tuatua tei aru mai e “Akameitakiia te Aronga tei Oronga te Kaka ki te Atua.” Kua oronga mai te vaa tuatua i tetai akaraanga umereia. I te mea kua tere atu i te ono mirioni o te Au Kite o Iehova i te au enua e 234 e takapini i te koropu, ka rauka i te karangaia e kare te ra e opu ana ki runga i te aronga te apai maira i te kaka kia Iehova. (Apokalupo 7:15) Te uiuiia anga te numero o te au tungane e te au tuaine tei roto i tetai tuanga o te tavinianga tinamou takake kua riro ia ei tumu ariki rekarekaia o teia tuanga tei tamaana i te ngakau o te aronga tei akarongo ra.

Tei aru mai ko te tuatua “Te Au Mea i Angaia te Tuatua nei i te Kaka o te Atua.” Noatu te muteki, te akamaata ra te au rangi e kite mataia ra i to te Atua tu maata tikai e te tauturu ra ia tatou i te akaoonu i to tatou arikianga no tana akonoanga aroa. Kua akataka meitakiia mai tikai teia.​—Isaia 40:26.

Kua riro te takinga kinoanga, te patoianga, te au akakeuanga o te ao, e te au tu ara ei akaaoanga i te tiratiratu o te au Kerititiano mou. E no reira, te tuatua “Aaere na te Arataa o te Tu Tiratiratu” ka riro kia akarongo meitakiia e te aronga tei tae atu. Kua aru mai tetai uriurianga irava tataki tai o Salamo 26, e pera katoa te au uiuiia anga o tetai Kite te aere apii ra rai ko tei tu ngaueue kore no te tu akono tau e tetai akaou mai tei akapou maata tikai i te taime ma tetai tamataoraanga ekoko maata inara kua rave i te au takai-anga kia autu i te manamanata.

Kua taopenga te porokaramu i te popongi na roto i te tuatua puapinga maata, “Te Akakeu nei te Au Orama Kaka Totouia ia Tatou!” Kua taiku te vaa tuatua i te akaraanga o te peroveta ko Daniela e nga apotetoro ko Ioane e Petero ei aronga tei akamaroiroiia to ratou akarongo e te au orama kaka totouia no runga i te akanooanga e te angaanga anga o to te Atua Patireia o te Mesia. No runga i tetai ua atu penei kua ngaropoina i te akakiteanga taka meitaki tikai i te akapapu mai anga e tei roto tatou i te tuatau openga, i tuatua ai te vaa tuatua: “Te manakonako nei matou ma te ngakau tae e ka rauka i taua aronga ra i te akara akaou ki runga i te tikaanga tikai o to Karaiti parutia i roto i te kaka o te Patireia e ka tauturuia kia rauka akaou mai te maroiroi pae vaerua.”

Kua akamata te porokaramu avatea ma tetai uriurianga manako tei topa ia “Akaariia to Iehova Kaka ki te Aronga Akaaka.” Kua akaari mai te vaa tuatua e akapeea a Iehova i te akanoo anga te akaraanga i roto i te tu akaaka, noatu oki e koia te Peretana teitei rava atu i te ao katoa nei. (Salamo18:35) Te akara meitaki ra a Iehova i taua aronga tu akaaka tikai, inara kua patoi aia taua aronga i te akara anga e e tu akaaka ua i te akono anga i to ratou me kore to ratou aronga teitei atu inara kua takinga kino tikai i taua aronga ra i raro ake i ta ratou akaaere anga.​—Salamo 138:6.

Tei aru mai, kua akaariia mai te totou Pipiria na roto i te tuatua kapipiti tei akamaata atu i te au tu tuketuke o te tumu manako maata: “Te Totou a Amosa​—Tana Karere no to Tatou Tuatau.” I te tou anga ki te akaraanga o Amosa, kua akaariu te vaa tuatua mua i te manako ki ta tatou apainga ka rave kia akamatakite i te tangata no to Iehova ra akavaanga te aere maira. Te tumu manako o tana tuatua e “Tuatua i ta Te Atua Tuatua ma te Mataku kore.” Kua ui mai te rua o te vaa tuatua i te uianga: “Ka takore ainei a Iehova i te au kino e te au mamaeanga i runga nei te enua?” Kua akaari mai tana tuanga “Akavaanga Tu-Atua i te Aronga Kino,” e tau ua ana te akavaanga tu-Atua, e kare e rauka i te kopaeia e e mea ikiia. Kua oronga te vaa tuatua openga o te tuatua kapipiti i te akaariuanga ki te tumu manako “Ka Akara Matatio a Iehova i te Ngakau.” Te aronga tei umuumu i te akamareka ia Iehova ka akarongo i te au tuatua a Amosa 5:15: “Kia rikarika te kino, e kia inangaro i te meitaki.”

Ko te au kava akakona, mei te vaira rai tei akarekareka i te ngakau, ka rauka kia taangaanga tau koreia. I roto i tana tuatua “Kopae i te Ereere o te Inuanga Tau Kore i te Kava,” kua papa te vaa tuatua i te au tumatetenga i te pae kopapa e te pae vaerua no te taangaanga tau kore anga i te kava, noatu e kare tetai tangata e kona ia. Kua oronga mai aia i tetai kaveinga arataki anga: No te mea e tuke te tu o te akakoromakianga i te kava mei tetai tangata ki tetai tangata,ko tetai ua atu tu o te maata te ka takore atu i toou “pakari meitaki e te akono” e maata kino roa te reira noou.​—Maseli 3:21, 22.

No te mea te noo nei tatou i roto i te tuatau kino, kua riro te tuatua tei aru mai, “Ko Iehova, to Tatou ‘Punanga i te au Tuatau Taitaia,’” ei akapumaana anga. Ka rauka te pure, te vaerua tapu, e te au taeake Kerititiano i te tauturu ia tatou kia autu.

Kua akaoti te tuatua openga o te ra, “‘The Good Land’​—Foregeleam of Paradise,” ma tetai mea umeremere rekarekaia no te katoatoa​—e puka ou e manganui te au mapu Pipiria! Ko te ingoa See the Good Land.

Ra Rua ko te Tumu Tuatua: “E Akakite ki to te Pa Enua i Tona Kaka”

I muri ake i te akamanako anga i te tia o te ra, kua oronga ia mai te rua o te tuatua kapipiti o te uruoaanga, ma te tumu manako “E Akaata Mei te Au Io ra i te Kaka o Iehova.” Kua akamaata mai te tuatua mua no runga i te “Akatotoa Anga i te Tuatua Meitaki i te Au Ngai Ravarai” e kua kapitiia mai te au akatutuanga i te au tupuanga tikai o te tavinianga koro. Kua kapiti mai te rua o te au tuatua i tetai akatutuanga o tetai oki akaouanga iaia e oronga ai i te tumu manako “Akaatea Anga i te Araianga Mei Tei Akamatapoia.” Kua akamaataia te tuanga openga, ko te ingoa “Rave Maata Atu Anga i Roto i ta Tatou Angaanga Orometua,” na te au uiuiia anga umereia no runga i te au tupuanga koro.

Te ingoa o te tuanga o te porokaramu tei aru mai e “Makitakitaia ma te Kore ua e Tumu.” Kua kapitiia mai te au uiuianga akamaroiroi o te aronga tiratiratu e i to te Atua ra ririnui kua tamou marie ua atu i te tu tau i raro ake i te patoianga.

Ko tetai akaariarianga o te uruoaanga tei tapapa maataia ko te tuatua papetitoanga tei aru mai ko te taruku takiri anga ki roto i te vai i te katoatoa i te aronga tei tau kia papetitoia. Te akatutu ra te papetitoanga vai i te akatapuanga katoa o tetai kia Iehova. E no reira, kua tau tikai te tumu tuatua e “Akonoanga kia Tau ki to Tatou Akatapuanga ka Akakaka i te Atua.”

Kua akamata te porokaramu i te avatea ma tetai tuatua te akamaroiroi ra kia akara matatio ia koe uaorai, “Tatanu Anga i tetai Tu Manako Mei to Karaiti no te Tu Maata Tikai.” Kua apai mai te vaa tuatua i teia tumu manako umereia: Ka rauka i te tu maata tikai na te aru anga i to Karaiti tu akaaka. E no reira, auraka tetai Kerititiano e kimi i tetai apainga kia akamerengo ua i tona uaorai noinoi. Kia ui aia kiaia uaorai, ‘Ka rave puareinga ua ainei au i te au angaanga tauturu e kare e kitea ngoie ua ia?’

E roiroi ana rai koe? Te kitea ia nei te pau anga. Kua ariki rekarekaia e te katoatoa te tuatua “E Roiroi Kare ra i te Roiroi Takiri.” Kua akaari mai te au uiui anga o te Au Kite e kua roa te tuatau e ka akariro a Iehova ia tatou kia “akaetaetaia. . . i roto ra e tona Vaerua.”​—Ephesia 3:16.

Kare te tu oronga ua e tu tei rauka ua mai mei te anau anga inara ka umuumuia kia apiiia. Kua akamaataia teia tumu manako i roto i te tuanga “Kia Maata Atu, Kia Oronga Aere.” E kua tukuia mai teia uianga ei manakonako anga: “Kua papa ainei tatou i te oronga atu i etai au taime o to tatou ra ma to tatou au tungane e te au tuaine tei pakari, te maki ra, te ngakau taitaia ra, me kare te maromaroa ra?”

Kua opu te manako o te aronga akarongo ki te tuatua “Kia Matakite i ‘te Reo o te Tangata Ke.’” Kua akaaite teia tuatua i te au pipi a Iesu ki te mamoe tei akarongo ua ki tona reo e ko “te tiaki mamoe meitaki” e ko tei kore i akarongo ki “te reo o te tangata ke” tei tuatuaia na roto i te au akaaere anga tangata e manganui te akakeuia nei e te Tiaporo.​—Ioane 10:5, 14, 27.

Kia maramaia ka tau te pupu imene kia imene kapiti. Ka tau te aronga akamori tika tikai takapini i te ao kia taokotai e rauka ai i te akakaka i te Atua. E no reira kua oronga puapinga mai te ikuikuanga, “Kia Akakaka i te Atua ma te Vaa Okotai’” e akapeea e rauka ai ia tatou katoatoa i te tuatua i te okotai “vaa viivii kore” e kia tavini ia Iehova “ma te manako okotai.”​—Zephania 3:9.

Te au metua, mei te mea e tamariki rikiriki ta ratou, kua mataora tikai i te tuatua openga o te ra, “Ta Tatou Tamariki​—E Tuanga Akaperepereia.” Kua tukunaia mai tetai puka ou e 256-kapi, kua poitirere maru ua te aronga tei akarongo. Ka tauturu te puka Learn From the Great Teacher i te au metua i te tuku taime i te akameitaki anga pae vaerua, ma ta ratou tamariki tei oronga aroaia e te Atua kia ratou.

Ra Toru ko te Tumu Tuatua: “Rave te au Mea Ravarai no te Kaka o te Atua”

Kua akamata te ra openga o te uruoaanga ki runga i te manako anga pae vaerua o te au akamaara anga i te tia no te ra. Kua oronga mai te tuanga mua o te porokaramu no teia ra i te manako maata ki te akanoonoo anga o te ngutuare tangata. Kua akanoo te tuatua mua, “Te Au Metua e Akamaroiroi i te Ngutuare Tangata,” i te akapapa i te manako o te aronga tei akarongo. I muri ake i te uriuri anga i te au apainga a te au metua kia akono i tona ngutuare tangata i te pae kopapa, kua akapapu mai te vaa tuatua e ko te apainga maata atu a te au metua e kia akono i ta ratou tamariki i te pae vaerua.

Kua tuatua te vaa tuatua tei aru mai ki te tamariki e kua akara matatio i te manako “Akapeea te Au Mapu i te Akapaapaa Anga ia Iehova.” Kua karanga aia e kua aite te aronga ou ki te ‘au’ no te mea e manganui ratou e e mea oraora to ratou maroiroi mapu . E mataora ana te aronga mamaata i te angaanga kia ratou i roto i ta Iehova ra tavinianga. (Salamo 110:3, NW) Kua kapitiia mai i roto i teia tuanga e te au uiuiia anga rekareka ma te au mapu tau meitaki.

E riro ana te au nuku Pipiria ma te kakau tau ei tuanga marekaia o te au uruoaanga tapere, e kare teia uruoaanga i tuke atu. Kua akataka mai te nuku “Akakitekiteanga Maroiroi Noatu te Patoianga” i te au pipi a Iesu i te anere mataiti mua. Kare i te mea tamataora ua inara, te puapinga maata atu, ei ikuikuanga. Te tuatua tei aru mai i te nuku “Akakite i te Tuatua Meitaki ‘ma te Kore e Tuku Ua,” kua akaketaketa mai i te tumu manako maata o te nuku.

Kua tapapa atu te katoatoa tei tae atu ki tetai akakiteanga maata o te porokaramu i te Tapati, ko te tuatua papuriki, “Koai Ma te Akakaka ra i te Atua i Teia Tuatau?” Kua oronga mai te vaa tuatua i te au akapapuanga maata tikai e i akapeea te komuniti taineti e te akonoanga tei matauia i te kare anga e akakaka i te Atua. Ko te iti tangata anake no tona ingoa, ko te aronga tutu aere e te apii i te tuatua mou no runga ia Iehova, ko te akakaka tikai ra i tona ingoa i teia tuatau.

Tei aru mai i te tuatua papuriki e ko te tapoto anga apii i te makatini Te Punanga Tiaki no tera epetoma. Aru mai i reira ko te tuatua openga, “‘Kia Maata to Kotou Ua Anga’ ki to Iehova Kaka.” Kua oronga mai te vaa tuatua e tai ngauru akakoroanga tumu no te katoatoa tei tae atu kia akono. Kua akatumuia ki runga i te au mataara tukeke te ka oronga i te kaka kia Iehova, ko Tei Anga mai. Kua rongo ia te manako okotai “Ae” i roto i te au uruoaanga mei tetai ope o te enua ki tetai ope.

Kua akaoti i reira te uruoaanga ma te tumu manako “E Akakaka i te Atua” i te tangitangi anga i roto i te au taringa o te aronga tataki tai tei tae atu. E ma te tauturu o to Iehova ra vaerua tapu e te tuanga akara mataia o tana akaaerenga, kia kimi ua atu rai tatou i te akakaka i te Atua e kare i te tangata.

[Pia/Au Tutu i te kapi 23]

Te Au Uruoaanga Pa Enua

Te au uruoaanga pa enua e a ra te roa tei raveia i Aperika, Asia, Autireria, Europa, e i Marike Apatokerau e te Apatonga. Kua patiia atu te Au Kite i ikiia takapini i te ao ei au tereketi ki teia au akaputuputuanga. Na roto i teia mataara kua riro tetai ei “pumaana[anga] oki” i rotopu i te au manuiri e to ratou au taeake tei akono mai. (Roma 1:12) Kua akaou akaouia te pirianga ma te au taeake kua roa e kare i aravei ana, e kua akatupuia te pirianga ma te au taeake ou. Ko tetai atu tuanga takake o te uruoaanga pa enua ko te tuanga o te porokaramu, te ingoa “Te Au Ripoti Mei te Au Enua Keke.”

[Pia/Au Tutu i te kapi 25]

Au Puka Ou Tei Akakaka i te Atua

Kua tukuna ia mai e rua nga puka ou i te Uruoaanga Tapere “E Akakaka i te Atua.” Te vai ra i te papaanga Pipiria See the Good Land te vai pakari ka vai rai e roa te tautau e te au mapu e 36 kapi e te au tutu neneiia o te au ngai Pipiria. Kua ki te au kapi i te au kara ki katoa e te vai ra te au mapu o te au patireia o Asura, o Babulonia, o Madai-Peresia, o Ereni, e Roma. E au mapu takake atu tetai te akara ra i ta Iesu angaanga orometua e te akatotoaanga i te Akonoanga Kerititiano.

E 256 kapi o te puka Learn From the Great Teacher ma etai 230 au tutu. Ka pou te au tuatau rekarekaia e manganui ma te tamariki i te akara ua anga i te au tutu e te pauanga i te au uianga manako oonuia tei kiteaia i roto i te puka. Kua akapapaia teia puka ou ei patoi i ta Satani au tamaki anga ki runga i ta tatou aronga mapu ou, ko te akakoroanga kia akakino i to ratou tu akono tau.

[Tutu i te kapi 23]

Kua akakite te au mitinari i te au tupuanga akamaroiroi i te akarongo

[Au Tutu i te kapi 24]

E tuanga puapinga maata te papetitoanga i te uruoaanga “E Akakaka i te Atua”

[Au Tutu i te kapi 24]

Kua rekarekaia te au nuku Pipiria e te au mapu e te aronga pakari