Au Uianga a te Aronga Tatau

Eaa ra Te Punanga Tiaki o Aperira 1, 2002, i akakite ei i te kapi 11, i te parakarapa 7, e ko te papetitoanga ki te vai no te aronga ngati Iuda irinaki ou i te Penetekote 33 T.N. e akairo ia no “to ratou uaorai akatapuanga ki te Atua na roto ia Karaiti,” inara ko te manako mua tei akonoia koia oki ko te tarukuanga o te ngati Iuda mei te 33 T.N. e tae ua atu ki te 36 T.N. kare i umuumuia ana taua akatapuanga uaorai?

I te 1513 M.T.N., kua oronga te Atua ko Iehova i tetai tuatau ki to Iseraela kia riro mai ei iti tangata tapu kiaia ma te okotai tikaanga e kia ‘akarongo [ratou] i toku reo.’ Kua pau atu ratou: “Te au mea ravarai ta Iehova i tuatua maira, na matou ïa e rave.”​—Exodo 19:3-8; 24:1-8.

Na te akatikaanga i te akono i te Ture koreromotu a Mose, kua akatapu to Iseraela ia ratou uaorai ki te Atua. Mei reira mai kua anauia mai te au ngati Iuda tei aru mai ki roto i taua iti tangata akatapuia. Inara, ko te papetitoanga o te au ngati Iuda tei riro mai ei aronga aru ia Iesu Karaiti mei ia Penetekote 33 T.N. e aere ua atu e tuke tona aiteanga i te akatapu anga i tetai uaorai ki te Atua ei mema no tetai iti tangata akatapuia. Kua akatutu mai te reira i to ratou akatapuanga ki te Atua ko Iehova ki roto i tetai pirianga ou kiaia na roto ia Iesu Karaiti. Akapeea ra?

Aru mai i te riringi angaia te vaerua tapu ki rungao i te 120 pipi tei akaputuputu mai ki roto i tetai pia i runga i Ierusalema ra i te Penetekote 33 T.N., kua tu te apotetoro ko Petero ki runga e kua akamata i te tutu aere ki te urupu ngati Iuda e te aronga poroteraita tei aere mai i te akara i tei tupu. I muri ake i tetai akakiteanga meitaki, kua tuatua atu aia ki te au ngati Iuda tei takinoia te akava ngakau: “E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara.” I te ariu anga atu ki ta Petero raurauanga, “e te aronga katoa i āriki marie i tana tuatua, bapetizoia iora ïa; e kapiti katoaia maira kia ratou e toru katoa paa tausani i taua rā ra.”​—Angaanga 2:1-41.

Kare ainei e e au mema no te iti tangata akatapuia ainei taua aronga ngati Iuda tei papetitoia i muri mai i ta Petero raurauanga? Kare ainei e kua rekareka ratou i tetai pirianga akatapuia ki te Atua? Kare. Kua tata te apotetoro ko Paulo e ‘kua apai keia, e te Atua koia i patiti i te reira ki rungao i te satauro.’ (Kolosa 2:14) Na roto i te matenga o Karaiti i te 33 T.N., kua akaatea te Atua ko Iehova i te Ture koreromotu​—te tumuanga tikai no te apaianga mai i to Iseraela ki roto i tetai pirianga akatapuia Kiaia. Ko te iti tangata tei patoi i ta te Atua Tamaiti kua kopaeia i teianei e te Atua uaorai. “I na oki Iseraela i te akonoanga i te kopapa nei” kare e rauka i te tuatua e e iti tangata akatapuia ki te Atua.​—1 Korinetia 10:18; Mataio 21:43.

Te Ture koreromotu kua akakoreia i te 33 T.N., inara kare i ope to te Atua akara mareka anga e te ariki anga i te au ngati Iuda i taua tuatau ra.a Kua tupu ua atu taua tuatau e tae ua mai ki te 36 T.N., i te tutu aere anga a Petero ki te tangata akono Itaria ko Korenelio e tona ngutuare tangata katoa e pera tetai au Kenitara. (Angaanga 10:1-48) Eaa te tumuanga no te akatotoaanga i teia tu marekaanga?

“E akatinamou oki [te Mesia] i te koreromotu ki te tangata e manganui e okotai akera ebedoma,” i na Daniela 9:27 ei. Ko te koreromotu tei akonoia e itu mataiti, me kore e “okotai akera ebedoma,” mei to Iesu papetitoanga e ki te akamataanga o ta te Mesia angaanga orometua ki te tangata i te 29 T.N. ko te koreromotu ia a Aberahama. Kia riro e ko tetai i roto i taua pirianga koreromotu, kua anoanoia tetai tangata e e uanga Epera no Aberahama. Kare taua koreromotu tua tai i oronga ki tetai tangata tataki tai i tetai pirianga akatapuia kia Iehova. No reira, ko te aronga ngati Iuda irinaki e akono ra i te papetitoanga i muri mai i ta Petero tuatua ia Penetekote 33 T.N., noatu e e aronga kua rauka te akaraanga takake ei ngati Iuda, kare o ratou tikaanga ki tetai pirianga akatapuia ki te Atua i te akakore angaia te Ture koreromotu. Kua anoanoia ratou tataki tai kia akatapu ia ratou uaorai ki te Atua.

Te akatapuanga i tetai uaorai i te tuanga o te ngati Iuda e te au poroteraita e oronga ra ia ratou kia papetitoia i te ra o Penetekote 33 T.N. te anoanoia ra no tetai atu tumu ke. Kua raurau te apotetoro ko Petero i tana aronga akarongo kia tataraara e kia papetitoia i roto i te ingoa o Iesu. Te raveanga i te reira te anoanoia ra e kia akaruke ratou i te mataara o te ao e kia akakite e ko Iesu te Atu e te Mesia, ei Taunga Maata, e koia te noo ra ki te rima katau o te Atua i te rangi ra. Kua anoano ia ratou kia kapiki i te ingoa o te Atua ko Iehova no te ora na roto ia Iesu Karaiti, te kapiti maira i te akono tamou i te akarongo i roto ia Karaiti e te kiteanga iaia e ko to ratou Arataki. Te tumuanga katoa e rauka ei tetai pirianga ma te Atua e te rauka anga te tataraara anga i te au ara kua taui i teianei. Ei aronga tataki tai, kua anoanoia te au ngati Iuda irinaki ra kia ariki i te akanoonooanga ou. Ka akapeea ra? Na te akatapuanga ki te Atua e na te akakiteanga ki te katoatoa e kua rave i te reira na roto i te tarukuanga ki roto i te vai na roto i te ingoa o Iesu Karaiti. E akairo te papetitoanga ki te vai i to ratou akatapuanga ki te Atua, te apaianga mai ia ratou ki roto i tetai pirianga ou ma ia na roto ia Iesu Karaiti.​—Angaanga 2:21, 33-36; 3:19-23.

[Tataanga Rikiriki i Raro]