Kua Anauia Ratou ki Roto i Tetai Iti Tangata Ikiia e te Atua

“Kua ikiia koe e to Atua ra e Iehova ei iti-tangata tikai nona uaorai.”​—DEUTERONOMI 7:6.

1, 2. Eaa te au angaanga ririnui ta Iehova i rave no tona au tangata, e eaa te pirianga ta te au Iseraela i tomo atu ma te Atua?

I TE mataiti 1513 M.T.N., kua apai mai a Iehova i tona au tavini i runga i te enua nei ki roto i tetai pirianga ou kiaia. I taua mataiti rai, kua taakaaka aia i tetai mana o te ao e kua akaora mai i te au tangata ngati Iseraela mei roto mai i te tuikaa. I tona rave anga i te reira, kua riro mai aia ei Akaora e ei Pu no ratou. I mua ake ka rave ei i te reira, kua akakite te Atua kia Mose: “E karanga atu ki te tamariki a Iseraela, Ko au ko Iehova, e naku kotou e arataki ke mai i te au apainga a to Aiphiti ra, e e matara mai kotou iaku i ta ratou akaao anga mai, e ka akaoraia kotou e au i toku rima i akatikaia nei, e ma te tutaki maata: E ka rave oki au ia kotou ei tangata noku uaorai, e ka riro au ei Atua no kotou.”​—Exodo 6:6, 7; 15:1-7, 11.

² I muri poto ua ake i to ratou Aerenga mai mei Aiphiti, kua tomo atu te au Iseraela ki roto i tetai pirianga koreromotu ki to ratou Atua, ko Iehova. Kare aia i akono ana i te au tangata tataki tai, te ngutuare tangata, me kare i te uanga tangata, mei reira mai i akanoo ei a Iehova i tetai au tangata, ei iti tangata nona i runga i te enua. (Exodo 19:5, 6; 24:7) Kua oronga aia i te ture ki tona au tangata ei akaaere i to ratou oraanga i te au ra ravarai e ko te mea puapinga maata roa atu, ko ta ratou akamori anga. Kua karanga a Mose kia ratou e: “Teiea oki ïa enua maata, e vaitata mai to ratou atua ia ratou, mei to tatou Atua ra mei ia Iehova i te au mea katoa ta tatou e kapiki atu ei iaia ra? E teiea ïa enua maata, i tikaʼi tona au akonoanga, e te au tuatua-tau, mei teia katoa nei ture taku i tuku atu ki mua i to kotou aroaro i teianei rā?”​—Deuteronomi 4:7, 8.

Anauia e Iti Tangata ei Au Kite no Iehova

3, 4. Eaa te tumu puapinga maata no to Iseraela riro anga mai ei iti tangata?

³ I te anere mataiti i muri mai, kua akamaara atu a Iehova ki te au Iseraela, na roto i tana peroveta ko Isaia, i tetai tumu puapinga maata no to ratou riro anga ei iti tangata. Te karanga ra a Isaia e: “Te na ko mairā Iehova; ko tei anga ia koe, e Iakoba; e ko tei akaaite ia koe, e Iseraela: Auraka e mataku, kua akaoraia koe e au; naku i tapa i toou ingoa na; noku koe. Ko au oki toou Atua, ko Iehova; Tei Tapu i Iseraela nei, ko toou ïa Akaora. . . . E arataki mai i taku au tamariki tamaroa mei te au ngai mamao mai, e taku au tamaine mei te au openga mai o te enua nei; Te aronga katoa i tapaia i toku nei ingoa: ko tei angaia e au kia kakā au ra; naku i akaaite i tona tu; e naku rai i anga. Te tuatua mairā Iehova, Ko kotou toku kite, e toku tavini i ikiia e au ra; . . . I angaia e au teia iti-tangata nei noku uaorai; na ratou e akameitaki mai iaku.”​—Isaia 43:1, 3, 6, 7, 10, 21.

⁴ Ei au tangata kua kapikiia ki te ingoa o Iehova, kua riro mai te ngati Iseraela ei au kite ki tona ngateitei i mua i te au pa enua. Kua riro mai ratou ei au tangata ‘tei angaia ei kakā no Iehova.’ ‘Ka akameitaki ratou ia Iehova,’ na te akakite anga i tana au angaanga umere no te akaoraanga e i reira i te akakaka anga i tona ingoa tapu. Na roto i tetai akakite anga, e iti tangata ratou e e au kite no Iehova.

5. Na roto i teea au tu i riro mai ei a Iseraela ei iti tangata akatapuia?

⁵ I te 11 anere mataiti M.T.N., kua akakite te Ariki ko Solomona e kua akariro a Iehova ia Iseraela ei iti tangata akataka keia. I te pure anga kia Iehova, kua tuatua aia: “Kua akataka keia ratou e koe mei roto mai i to te ao katoa nei, ei tuanga naau uaorai.” (1 Ariki 8:53) E pirianga takake katoa to Iseraela tataki tai kia Iehova. I mua atu ana, kua akakite ana a Mose kia ratou e: “E tamariki kotou na to kotou Atua ra na Iehova. . . . E aronga tapu oki koe no to Atua ra no Iehova.” (Deuteronomi 14:1, 2) No reira, kare te au mapu Iseraela, e anoanoia kia akatapu i to ratou oraanga kia Iehova. Kua anauia ratou ei au mema no te au tangata akatapuia o te Atua. (Salamo 79:13; 95:7) Kua apiiia te uki ou tataki tai i roto i te au ture a Iehova e kua akaueia kia akono i te reira no te koreromotu oki tei tatua ia Iseraela kia Iehova.​—Deuteronomi 11:18, 19.

Ikianga Rangatira

6. Eaa te ikianga ta te au Iseraela tataki tai i rave?

⁶ Noatu e kua anauia te ngati Iseraela ki roto i tetai iti tangata akatapuia, na te au tangata tataki tai e rave i te ikianga kia tavini i te Atua. I mua ake ka tomo atu ei ratou ki roto i te Enua Taputouia, kua akakite atura a Mose kia ratou e: “Te kapiki nei au ki te rangi e te enua ei kite noku ia kotou i teianei rā e, kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia; ko toou ïa ora aia, e ko te roa ïa o toou ra puke rā; kia noo oki koe i te enua ta Iehova i taputou mai ki to ai metua ra, kia Aberahama, kia Isaaka, e kia Iakoba, e oronga no ratou ra.” (Deuteronomi 30:19, 20) No reira, kua anoanoia te au Iseraela tataki tai kia iki i te inangaro atu ia Iehova, kia akarongo ki tona reo, e kia piri atu kiaia. No te mea e anoano rangatira to te au Iseraela, ka umuumuia ratou kia ariki i te apainga o te au tupuanga ta ratou i iki.​—Deuteronomi 30:16-18.

7. Eaa tei tupu i muri ake i te mate anga to Iosua uki tangata?

⁷ I te tuatau o te au Akava kua orongaia tetai akatutuanga meitaki no te au tupuanga o te tu akarongo mou e te akarongo kore. I mua ua ake ka akamata ai taua tuatau ra, kua aru te au Iseraela i te akaraanga meitaki o Iosua e kua akameitakiia. “Kua akamori oki te tangata ia Iehova e ope rava akera to Iosua au rā, e ope rava akera oki te au rā o te aronga pakari i toe i te ao i muri ake ia Iosua ra, ko tei kite i te au angaanga mamaata ta Iehova i rave ia Iseraela ra.” Inara, i tetai tuatau i muri ake te mate anga a Iosua, “tupu akera oki tetai uki i muri ake ia ratou, kare ïa i kite ia Iehova, e tana katoa ra au angaanga i rave ia Iseraela ra. Kua rave iora te tamariki a Iseraela i te kino ki mua i te mata o Iehova.” (Te Au Akava 2:7, 10, 11) I te akaraanga, kare te uki ou kite kore ra i akaperepere ana i ta ratou tuanga ei au mema no te iti tangata akatapuia, i akatupu ei te Atua ko Iehova i te au angaanga ririnui no ratou i te tuatau i topa.​—Salamo 78:3-7, 10, 11.

Akono Anga i to Ratou Akatapuanga

8, 9. (a) Eaa te akanoonoo anga te akatika ra ia Iseraela kia akaari i to ratou akatapuanga kia Iehova? (e) Eaa tei rauka i te aronga tei oronga ua ia ratou uaorai?

⁸ Kua oronga a Iehova i te au tuatau ki tona au tangata kia akono ratou i to ratou akatapuanga ei iti tangata. Ei akaraanga, kua oronga i tana Ture no te akono anga i te au atinga, me kore te au apinga oronga ua, e mea akaueia tetai, e mea oronga ua tetai. (Ebera 8:3) Kua riro pouroa taua au atinga te kapiti maira i te atinga karakaratio, te atinga kai, e te atinga au ei mea oronga ua​—ei au apinga aroa tei orongaia kia Iehova kia rauka tona mareka anga e te akakite anga i te akameitakianga.​—Levitiku 7:11-13.

⁹ Kua mareka a Iehova i te au atinga oronga ua. Kua karangaia e kua riro te atinga karakaratio e te atinga kai “ei mea aunga kakara na Iehova.” (Levitiku 1:9; 2:2) I roto i te atinga au, kua orongaia te toto e te tongaua o te manu kia Iehova, ko te kiko ra na te au taunga e te aronga tei oronga atu e kai ana. E kainga manga teia te akatutu maira i tetai pirianga au ma Iehova. Kua akakite te Ture: “E kia apai kotou i te atinga au kia Iehova ra, ei apai anga marekaia mai ta kotou.” (Levitiku 19:5) Noatu e kua akatapuia te Iseraela katoatoa kia Iehova, ko te aronga tei iki ia Iehova ei Atua no ratou, ka oronga i te au mea oronga ua “ei apai anga marekaia mai” na ratou, e kua akameitaki maataia.​—Malaki 3:10.

10. Akapeea a Iehova i te akakite anga i tona mareka kore i te tuatau o Isaia raua ko Malaki?

¹⁰ E maata te taime kare te iti tangata akatapuia o Iseraela i akarongo kia Iehova. Na roto i tana peroveta ko Isaia, kua akakite a Iehova kia ratou e: “Kare koe i apai mai i te punua mamoe o taau atinga karakaratio iaku nei; kare oki koe i akateitei mai iaku i taau ra au atinga: kare au i akateiaa ia koe i te atinga kai.” (Isaia 43:23) Pera katoa, kare e puapinga ana te au mea oronga ua kare i oronga puareinga ua ia na roto i te aroa i roto i nga mata o Iehova. Ei akaraanga, e toru anere mataiti i muri ake ia Isaia, i te tuatau o te peroveta ko Malaki, kua oronga te au Iseraela i te au manu kino. No reira, kua akakite a Malaki kia ratou: “Kare au i mareka ia kotou, te tuatua mairā Iehova Sabaota ra, kare oki au e āriki atu i tei apaiia mai e to kotou rima. . . . Kua apai mai kotou i tei aeaeia ra, e tei pirikoki, e tei makiia ra; e kua apai mai oki kotou i te atinga: e āriki atu ainei au i te reira i to kotou na rima? te tuatua mairā Iehova.”​—Malaki 1:10, 13; Amosa 5:22.

Kua Akarukeia ei Iti Tangata Akatapuia

11. Eaa te atianga tei orongaia ki te Iseraela?

¹¹ I te taime i riro mai ei a Iseraela ei iti tangata akatapuia kia Iehova, kua totou aia kia ratou: “Kia akarongo tikai kotou i toku reo, e kia akono i taku ra koreromotu, ka riro ïa kotou ei apinga akaperepere maata naku, i te au tangata ravarai ra: noku uaorai oki te ao katoa nei: E riro rai kotou ei basileia taunga naku, e ei iti-tangata tapu.” (Exodo 19:5, 6) Ka mama mai te Mesia taputouia i rotopu ia ratou e ka oronga atu kia ratou i te atianga mua kia riro mai ei au mema no te kavamani o te Patireia o te Atua. (Genese 22:17, 18; 49:10; 2 Samuela 7:12, 16; Luka 1:31-33; Roma 9:4, 5) Te maataanga o te iti tangata Iseraela kare i akono ana i to ratou akatapuanga. (Mataio 22:14) Kua akaruke ratou i te Mesia e kua tamate iaia.​—Angaanga 7:51-53.

12. Akapeea ta Iesu au tuatua i te akaari anga e kua akarukeia a Iseraela ei iti tangata akatapuia no Iehova?

¹² I nga ra i mua ake i tona matenga, kua akakite a Iesu ki te au arataki akonoanga ngati Iuda e: “Kare kotou i tatau i tei tataia ra e, ‘Ko te toka i akarukeia e te aronga patu are ra, ko tei akariroia ei toka tiavā: na te Atu teia i rave, e te akara atu nei tatou ma te umere?’ E teianei, e karanga atu au kia kotou, E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mataio 21:42, 43) Te akaari anga e kua akaruke a Iehova ia ratou ei iti tangata akatapuia Kiaia, kua tuatua a Iesu: “E Ierusalema e, e Ierusalema e, tei ta i te au peroveta, e tei peî oki ki te toka te aronga i tonokia atu ia koe na, manganui toku inangaro anga i te akaputuputu i to tamariki, mei te moa e akakoukou i tana anaunga i raro ake i tona peau, kare ra i tika ia kotou! I na, kua vaio taneia to kotou nei are.”​—Mataio 23:37, 38.

Tetai Iti Tangata Akatapu Ouia

13. Eaa te tuatua no te totou ta Iehova i akakite i te tuatau o Ieremia?

¹³ I te tuatau o te peroveta ko Ieremia, kua akakite a Iehova i tetai mea ou no runga i tona au tangata. Ka tatau tatou: “I na, e tae maira te au rā, te tuatua mairā Iehova, e papau ei au i te ngutuare o Iseraela, e i te ngutuare o Iuda, i tetai koreromotu ou: Auraka mei te koreromotu taku i papau i to ratou ra au metua, i te rā i rave ei au i to ratou rima, e arataki mai ia ratou mei te enua maira mei Aiphiti; e kua akaatikauia iora e ratou taua koreromotu naku ra, akaruke iora au ia ratou, te tuatua mairā Iehova: Teia ra te koreromotu taku e papau i te ngutuare o Iseraela, i muri ake i te reira au rā, te tuatua mairā Iehova, E tuku au i taku ture ki roto ia ratou, e tataia e au ki runga i to ratou ngakau; e e riro au ei Atua no ratou, e riro oki ratou ei tangata noku.”​—Ieremia 31:31-33.

14. I naea e i runga i teea tumuanga i akamata mai ei to Iehova iti tangata akatapu ouia? Koai teia iti tangata ou?

¹⁴ Kua akanooia te tumuanga o teia koreromotu ou i te mate anga a Iesu e te oronga anga i te puapinga o tona toto ki tona Metua, i te mataiti 33 T.N. (Luka 22:20; Ebera 9:15, 24-26) Inara, te riringi angaia mai te vaerua tapu i te Penetekote mataiti 33 T.N. e te anau anga o tetai iti tangata ou, ko “te Iseraela o te Atua,” kua angaanga i reira te koreromotu ou. (Galatia 6:16; Roma 2:28, 29; 9:6; 11:25, 26) Te tata anga ki te au Kerititiano akatainuia, kua akakite te apotetoro ko Petero e: “E uki ikiia ra kotou, e kau taunga ariki, e iti-tangata tapu, e aronga okoia; kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra: Ko kotou, kare te tangata no te Atua i muatangana, i teianei ra e tangata ïa no te Atua.” (1 Petero 2:9, 10) Kua ope te pirianga takake i rotopu ia Iehova e te Iseraela kopapa. I te mataiti 33 T.N., kua tauiia to Iehova marekaanga mei te Iseraela kopapa ki te Iseraela vaerua, te putuputuanga Kerititiano, ‘e aronga te akaua maira i te ua’ no te Patireia o te Mesia.​—Mataio 21:43.

Te Akatapuanga Tataki Tai

15. I te ra o te Penetekote i te mataiti 33 T.N., eaa te papetitoanga ta Petero i akakeu i te aronga te akarongo maira kia rave?

¹⁵ I muri ake i te Penetekote mataiti 33 T.N., te anoanoia ra te ngati Iuda e te Kenitara tataki tai kia rave i tetai akatapuanga ki te Atua e kia papetitoia “i te ingoa o te Metua, e no te Tamaiti, e no te Vaerua Tapu.”a (Mataio 28:19) I te tuatau Penetekote, kua akakite te apotetoro ko Petero ki te ngati Iuda e te au poroteraita tei akarongo mai: “E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara; e ka orongaia mai ïa te Vaerua Tapu kia kotou.” (Angaanga 2:38) Te anoanoia ra ratou kia akatutu mai i to ratou papetitoanga, kare e na roto ua i te akatapuanga kia Iehova mari ra kia ariki ratou ia Iesu ei ravenga na Iehova kia akakore mai i ta ratou ara. Ka tau ratou kia kite ia Iesu ei Taunga Maata no Iehova e ei Arataki no ratou, ei Upoko no te putuputuanga Kerititiano.​—Kolosa 1:13, 14, 18.

16. I to Paulo tuatau, akapeea te aronga tei ariu mai​—te ngati Iuda e te Kenitara​—i te riro anga ei tuanga no te Iseraela vaerua?

¹⁶ I te au mataiti i muri mai, kua akakite te apotetoro ko Paulo e: “Kua akakite atura ra au i to Damaseko i muatangana, e to Ierusalema, e pini ua ake oki Iudea katoa, e i te etene oki e, e tataraara ratou, e e ariu mai oki ki te Atua, ma te akono i te tuatua e tau ei i te tataraara ra.” (Angaanga 26:20) I muri ake i te akapapu anga ki te au tangata​—te ngati Iuda e te Kenitara​—e ko Iesu te Karaiti, te Mesia, kua tauturu atu a Paulo ia ratou kia akatapuia e kia papetitoia. (Angaanga 16:14, 15, 31-33; 17:3, 4; 18:8) Na te ariu anga ki te Atua, kua riro taua au pipi ou ra ei au mema no te Iseraela vaerua.

17. Ko teea angaanga popani anga te vaitata maira tona openga, e eaa tetai atu angaanga te tere ra ki mua?

¹⁷ I teia tuatau, te vaitata mai nei te popani anga i te toenga o te Iseraela vaerua. Me oti te reira, ka akaueia “nga angela toko a” e tapu ra i te matangi akapouanga o te “mate maata” kia tatara mai i te reira. I teia taime rai, te rave vivikiia nei te akaputuputuanga o te “aronga maata rava,” e manakonakoanga to ratou kia noo ki runga i te enua e tuatau ua atu. Te iki nei teia “mamoe ke atu” i te akono i te akarongo “i te toto o te Punua-mamoe” e kia papetitoia i te akatutuanga i to ratou akatapuanga kia Iehova. (Apokalupo 7:1-4, 9-15; 22:17; Ioane 10:16; Mataio 28:19, 20) E manganui te au mapu i rotopu ia ratou kua utuutuia e nga metua Kerititiano. Me e mapu koe, ka anoanoia koe i te tatau i te atikara e aru maira.

[Tataanga Rikiriki i Raro]

Na te Akamanako Akaou Anga

• No teaa ra i kore ei te au mapu Iseraela i rave ei i te akatapuanga kia Iehova?

• Akapeea te ngati Iseraela i te akaari anga mai e te akono ra ratou i to ratou akatapuanga?

• Eaa a Iehova i akaruke ei ia Iseraela ei iti tangata akatapuia nona, e i akapeea te reira i te monoia anga?

• Mei te Penetekote mataiti 33 T.N. e ara atu, eaa ta te ngati Iuda e te Kenitara ka rave kia riro mai ei au mema no te Iseraela vaerua?

[Tutu i te kapi 21]

Kua anauia mai te au Iseraela mapu ei au mema no te iti tangata ikiia e te Atua

[Tutu i te kapi 23]

Te anoanoia ra te Iseraela tataki tai kia rave i tetai ikianga kia tavini i te Atua

[Tutu i te kapi 23]

Kua riro te au mea oronga ua ei atianga no te Iseraela kia akaari i to ratou aroa kia Iehova

[Tutu i te kapi 25]

I muri ake i te Penetekote mataiti 33 T.N., ka iki te au pipi a Karaiti i te rave i te akatapuanga ki te Atua e te akatutu mai i teia na roto i te papetitoanga