Te Au Karatuati o Gileada kua Akamaroiroiia kia Tuatua i te “Peu Taka Ke”
KUA tae mai tetai 6,635 urupu memeitaki roa atu mei te 52 enua ki te porokaramu karatuati o te pupu 115 a te Apii Pipiria Punanga Tiaki o Gileada i roto ia Tepetema 13, 2003.
Kua akarongo atu ratou i te akamaroiroianga akatumuia ki runga i te Pipiria tei orongaia atu ki te aronga apiipii 48 o te pupu kia apai atu ratou i te “peu taka ke a te Atua” ki te tangata o te 17 enua ra. (Angaanga 2:11) Ko te reira te ngai ka rave ei te aronga karatuati i teianei i ta ratou angaanga.
I roto i tana au tuatua akamata anga, kua akamaara atura a Stephen Lett, e mema no te Pupu Akaaere o te Au Kite o Iehova e tei tavini ana ei tiamana no te karatuatianga, i te aronga apiipii e: “Me akaruke kotou no ta kotou au tukuanga angaanga, noatu e ka aere atu kotou kiea me kore eaa to kotou au turanga ka kiteaia e kotou uaorai, e maata ua atu tei ia kotou i to tei patoi mai ia kotou.” I te taangaanga anga i te pene 6 o Ariki Rua, kua akamaara atura te Taeake ko Lett i te aronga apiipii e ka rauka ia ratou i te irinaki atu ki runga i te Atua ko Iehova e te au angera manotini ia ratou e akakite ra “i te peu taka ke a te Atua.” (2 Ariki 6:15, 16) Kua aro atu te au Kerititiano o te anere mataiti mua i te patoianga e te manako kore i roto i ta ratou angaanga tutu anga e te apiianga, e te aro katoa ra rai te au mitinari Kerititiano i teia tuatau i taua au turanga ra. Inara, ka rauka ia ratou i te irinaki ki runga i te turu anga mei te rangi mai e pera katoa mei te akaaereanga a Iehova i te enua nei.—Salamo 34:7; Mataio 24:45.
Tuatua “i te Peu Taka Ke a te Atua”
Aru mai i te au tuatua akamata anga a te tiamana, kua tuatua mai a Harold Corkern no te Kumiti Manga i Marike no runga i te tumu tuatua “Te Au Tapapa Anga Tika—Te Taviri ki te Angaanga Rekareka e te Autu Anga.” Kua tou mai te Taeake ko Corkern e ko te au manakonako anga kare i akatupuia ka taki atu ki te maromaroa, mei ta Maseli 13:12 e akaari maira. Inara, te aere putuputu maira te maromaroa no te au tapapa anga tika kore kare i akatupuia ana. Te anoanoia ra te au karatuati kia rave i tetai manako tau, te tika no ratou uaorai e ki tetai ke. Kia tapapa ratou e ka raveia etai au tarevake, inara auraka teia e akariro ia ratou kia maata atu te maromaroa ia ratou e aruaru ra i te tauturu i tetai ke kia ariki mai i “te peu taka ke a te Atua.” Kua akamaroiroi te Taeake ko Corkern i te au mitinari ou kia irinaki ki runga ia Iehova, “koia tei tutaki mai i te aronga i kimi tikai iaia.”—Ebera 11:6.
Aru mai i roto i te porokaramu ko Daniel Sydlik, e mema no te Pupu Akaaere, tei tuatua no runga i te tumu tuatua “Te Manakonako Anga Kerititiano—Eaa te Reira?” Kua tuatua aia e: “Te manakonako anga e tu tika-meitaki Kerititiano ia. E turanga no te tika te reira te apai maira i tetai ki roto i tetai pirianga tau ma te Atua. No tetai tangata kare i te Kerititiano kia manakonako mei ia tatou rai e mea ngataia.” Kua tuatua katoa te Taeake ko Sydlik i te akamarama anga i te au tu tukeke no te manakonako anga Kerititiano te ka tauturu i tetai kia vai maroiroi ua noatu te au tu ngata i roto i te oraanga. “Ma te manakonako anga ka rauka ia tatou i te aro atu i te oraanga ma te karape akaouia e tetai vaerua autu anga.” Te tauturu ra tetai manakonako anga Kerititiano iaia kia akara ia Iehova ei Atua no te akakoroanga e kia rekareka i te tavini anga iaia.—Roma 12:12.
Kua akamaroiroi a Wallace Liverance, te tangata retita no te Apii Gileada, i te aronga apiipii kia “Akono i ta te Vaerua Ra.” (Galatia 5:16) Kua akaari mai aia e akapeea a Baruka, te tekeretere o Ieremia, i te vaitata anga i te topa ke anga mei te akono anga i ta te vaerua. I tetai tuanga, kua akaroiroi a Baruka e kua akamata i te aruaru i te au mea maata nona uaorai. (Ieremia 45:3, 5) Kua tou mai i reira te Taeake ko Liverance e kua akaruke etai i te aru ia Iesu e kua kopae atu i te tuatua mou i te pae vaerua, te anoanoia ra no te ora. No te mea oki kare ratou i marama ana eaa tana i apii mai ana, e kua maromaroa ratou e kare ta ratou au tapapa anga tangata i akatupuia mai ana i taua taime ra. (Ioane 6:26, 27, 51, 66) Eaa ra ta te au mitinari, ta ratou angaanga koia oki kia arataki i te manako ki Tei Anga ra e ki tana akakoroanga, e apiiia maira no teia au papaanga? Kua akamaroiroiia te aronga apiipii e auraka e manako atu kia rauka mai tetai turanga, kia rauka mai te ariki anga mei te tangata ra, me kore i te taangaanga anga i te tukuanga angaanga teokaratiki ei akapuapinga ia ratou uaorai.
“E Tangata Oronga Ua Ainei Koe me Kore e Tangata Rave Ua?” ko te uianga ia ta te tangata ikuiku Gileada ko Mark Noumair i ui ei. Kua akatumu aia i tana au tuatua ki runga ia Akava 5:2, te ngai i akapaapaaia ai te au Iseraela tataki tai no te oronga karapii kore anga i te tavini anga i roto i to Baruka vaeau. Kua akameitakiia te aronga apiipii Gileada no to ratou tu vaerua i te akarongo mai anga i te kapiki anga a Baruka Maata, ko Iesu Karaiti, kia piri maata atu ki roto i te tamaki anga i te pae vaerua. Te inangaro ra te au vaeau a Karaiti kia rauka mai te ariki anga o tei tuku atu ia ratou ki roto ra. Kua akamaara te Taeake ko Noumair i te aronga apiipii e: “Me akamata tatou i te manako ua i te akareka ia tatou uaorai, ka akamutu ua tatou i te tamakianga atu i te enemi. . . . Kare no runga ia koe te angaanga mitinari. No runga ra ia Iehova, tona tu ngateitei, e tona anoano kia akatupuia. Kare tatou e tavini ei mitinari no te mea e te inangaro ra tatou ia Iehova kia akamataora mai ia tatou, te tavini ra tatou iaia no te mea te aroa ra tatou iaia.”—2 Timoteo 2:4.
Na te tangata ikuiku Gileada ko Lawrence Bowen tei aru maira i tuatua mai ei tiamana no te tuanga e kia “Akatapu Koe ia Ratou i te Tuatua-Mou.” (Ioane 17:17) Kua kite aia e ko te aronga apiipii o te pupu 115 kua akatapuia ei au orometua na te Atua. Ia ratou i roto i te apii, kua piri katoa atu ratou ki roto i te angaanga koro, i te kimi anga i te aronga ngakau tae te inangaro maira i te tuatua mou. Mei ia Iesu rai e tana au pipi mua, kare te aronga apiipii i tuatua mai ana e na ratou “uaorai te tuatua.” (Ioane 12:49, 50) Kua oronga maroiroi tikai ratou i te tuatua oronga ora akauruia, no te tuatua mou. Te au akaari anga e te au kiteanga a te aronga apiipii ra te akaari maira i te tupu anga ririnui ta te Pipiria i rave ki runga i te aronga ta ratou i aravei atu.
Oronga Maira te Ako Anga e te Kiteanga i te Akamaroiroianga
Na Anthony Pérez raua ko Anthony Griffin, e nga mema no te Tipatimani Tavini Anga no te manga i Marike, i rave taopenga mai i te au uiui anga ma te au mema Kumiti Manga takapini i te ao. Kua uriuri teia nga tangata nei i te au akaaoanga ta te au mitinari ou ka aro atu e kua oronga atu i te ako anga tau tei akatumuia ki runga i te kiteanga uaorai. Ko etai au akaaoanga ra te kapitiia maira te au peu tuke, te reva toropika i te au mataiti ravarai, me kore tetai reva akonoanga e te poritiki kare te aronga apiipii i matau ana. Eaa te ka tauturu i te au mitinari ou kia autu i to ratou au ngai ou? Te aroa ia Iehova, te aroa i te tangata, eiaa e akara ki muri, e eiaa e rapurapu atu i te rave i te angaanga. Kua karanga tetai mema kumiti manga e: “Te tangata tei roto i ta tatou tukuanga angaanga kua noo ana i reira no te au anere mataiti i mua ake ia tatou. Papu e ka rauka ia tatou i te noo ki reira e te akatano atu. I te au taime ravarai ia tatou e aravei ra i te au tu ngata, kua akara matou ki rungao i te reira ei akatano anga i te tu. E irinaki koe ki runga i te pure e ki runga i to Iehova vaerua, e kite ei koe i te tuatua mou o ta Iesu au tuatua e, ‘tei vaitata ua ra au ia kotou.’”—Mataio 28:20.
Na Samuel Herd, e mema no te Pupu Akaaere, i apai mai i te porokaramu ki tetai take teitei ma tana tuatua e, “Kia Tuatua i te Peu Taka Ke a te Atua.” Te akamaringiia mai anga te vaerua tapu i te ra o Penetekote 33 T.N. kua akamaroiroiia te au pipi a Iesu kia tuatua no runga i “te peu taka ke a te Atua.” Eaa te ka tauturu i te au mitinari ou i teia tuatau kia tuatua aiteite ma te maroiroi no runga i te Patireia o te Atua? Ko taua vaerua tapu ra. Kua akamaroiroi te Taeake ko Herd i te aronga apiipii tei karatuati mai “kia kaka ma te vaerua,” kia rekareka no runga i ta ratou au tuku anga angaanga, auraka e akangaropoina i te tereni anga tei tukunaia mai ki roto ia ratou. (Roma 12:11, NW) “E peu taka ke te Pipiria na te Atua,” i karanga ai te Taeake ko Herd. “Auraka e manako meangiti i tona puapinga. E mea ora tona karere. Te koputa tika ra te reira ki te ngakau o te au tumu manako. E taangaanga i te reira kia akanoo i te au mea meitaki i roto i toou au oraanga. E akatika i te reira kia taui i te mataara e manako ra koe. E paruru i toou kite akono meitaki na te apiianga, te tatau anga, e te akamanako anga i te au Tuatua Tapu . . . E rave i te reira ei akakoroanga e ei tautaanga naau kia taangaanga i taau tereni anga Gileada kia tuatua ua atu i ‘te peu taka ke a te Atua.’”
Aru mai i te tatau anga i te au turuanga takapini i te koropu e te oronga anga o te au tiporoma, kua tatau tetai o te karatuati i tetai reta mei te pupu i te akakite anga i te tu ariki anga no te tereni anga tei rauka ra. Kua apai mai i reira te Taeake ko Lett i te atianga rekareka ki tetai taopenga anga tau na te taiku anga kia 2 Paraleipomeno 32:7 e kia Deuteronomi 20:1, 4. Te kapiti anga i tana au tuatua openga ma tana au tuatua akamata anga, kua taopenga aia e: “E te au karatuati akaperepere e, ia kotou e aere atura, ia kotou e mati ra ki roto i te tamaki anga pae vaerua i roto i ta kotou au tukuanga angaanga ou kia maara ra e, te mati ra Iehova ma kotou. Auraka e ngaropoina i te kite i te tika e e maata ua atu tei ia kotou i tei patoi mai ia kotou.”
[Pia i te kapi 25]
TE AU TU O TEPUPU
Numero o te au enua tei komonoia: 7
Numero o te au enua tei tukuia: 17
Numero o te aronga apiipii: 48
Au mataiti avereti: 33.7
Te mataiti avereti i roto i te tuatua mou: 17.8
Au mataiti avereti i roto i te angaanga tamou: 13.5
[Tutu i te kapi 26]
Te 115 Pupu Karatuatianga o te Apii Pipiria Punanga Tiaki o Gileada
I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.