Kia Rekareka e kia Pereperekavana ia Iehova

KO TE akaoti anga puapinga meitaki o tetai ua atu raveanga angaanga ko tetai tuatau ia no te rekareka anga. Ko te au akono anga no te karatuati anga tei raveia ia Mati 13, 1999 i te Ngai Apii Punanga Tiaki i Patterson, New York, ko tetai atianga tikai ia no te 48 aronga apiipiiia no te pupu 106 o te apii Pipiria Punanga Tiaki o Gileada.

Ko te au tuatua akatueraanga na Theodore Jaracz, koia tetai mema no te Pupu Akaaere, e karatuati no te pupu itu o Gileada, e te tiamana oki no te porokaramu karatuati anga, kua akakite maata mai aia i te au tuatua o Salamo 32:11: “Kia rekareka e kia pereperekavana ia Iehova, kotou e te aronga tuatua-tika ra.” I te akatakaanga e eaa i tau ei no te rekareka i teianei atianga, kua tuatua aia: “No ta Iehova e rave nei ma te aronga e tika to ratou ngakau, kapiti katoa oki to tatou aronga apiipiiia i Gileada, i rekarekai tatou i te au atianga mei teianei.” I te parani anga te aronga apiipii kia aere mai ki te Apii Gileada kua rave pakari ia ratou uaorai kia tau no te tavini ei mitinari, na Iehova ra i akariro kia rauka te au mea ravarai kia autu tona akaoti anga. (Maseli 21:5; 27:1) Kua akaketaketa mai te Taeake ko Jaracz, i te reira, ko te tumu ia no ‘te rekarekaanga ia Iehova.’

I roto i te aronga i te otitoriomu i Patterson ko te au mema pamiri e te au manuiri a te aronga apiipiiia tei aere mai no te 12 au enua kia kite i teianei ravenga rekareka. I te akaputu anga e 5,198​—tei kapiti ra i te au mema o te pamiri Betela i Brooklyn, i Patterson, e i Wallkill oki na roto i te akarongo anga e te vitio​—kua manako tapapa atu i te porokaramu te ka aru mai, kua kitea e te vaira te vaerua pereperekavana i reira.

Kua Akamaroiroiia kia Tamou i Tetai Vaerua Pereperekavana

I te akaoti anga ta te Taeake ko Jaracz tuatua akatueraanga, kua akakite mai aia i te mea mua o nga vaa tuatua e rima, tei teateamamao ra i te akamaroiroianga Tuatua Tapu kare no te au Karatuati Gileada anake mari ra te katoatoa tei akaputu atura.

Ko te mea mua tei tuatua ko William Malenfant, koia tetai karatuati no te pupu 34 o Gileada ra, te tavini nei i teianei ei tauturu i te Kumiti Apiianga no te Pupu Akaaere. I te kapiti anga ma tana tumu tuatua e “Kare i te Puapinga Kore te ‘Au Mea Ravarai’!” tei akatumuia ki runga ia Koheleta 1:2, kua ui aia i te uianga: “I tuatua tikai ainei a Solomona i te aite anga e te au mea ravarai, i te tu tikai o taua tuatua ra, e puapinga kore ia?” Te pau anga: “Kare. Te tou maira aia e ko te au ravenga a te tangata nei tei manako kore ra i ta te anoano tu-Atua koia ia te au aruaruanga te takake ra mei te anoano tu-Atua ra​—pouroa taua au apinga ra e puapinga kore anake.” Ei tukeanga, ko te akamori anga i te Atua mou, ia Iehova, kare ia i te puapinga kore; pera katoa te apiianga i te Tuatua a te Atua, koia te Pipiria, e te apiianga i te reira kia etai ke. Kare te Atua e akangaro atu i taua au tautaanga na tona au tavini. (Ebera 6:10) Ko te tika, noatu me ka aere mai te tumatetenga na ko mai i te aronga tei kitea ra e ratou ta te Atua akaperepere, ka riro ratou ‘kia ruruia ki roto katoa i te opa ora i o Iehova ra.’ (1 Samuela 25:29) Mei teaa ra tetai manako akapumaana ngakau! Na te maaraara anga i teianei au tumu ka tauturu i te aronga akamori katoatoa ia Iehova ra kia tamou marie i tetai vaerua pereperekavana.

Ko John Barr, tetai mema o te Pupu Akaaere, kua akamaroiroi atu i te pupu karatuatiia ra ma tana tuatua “E Kimi i te Marekaanga i Ta Kotou Angaanga Mitinari.” Kua akakite mai aia e ko taua tavinianga mitinari ra ko tetai apinga tei piri vaitata ua ra ki te ngakau o te Atua ko Iehova. “Ko tetai apinga ia tei tapeka puia ra ma to Iehova akakiteanga i te aroa no to te ao nei. Kua tono mai aia i tana Tamaiti anau tai ki te enua nei. Ko Iesu te mitinari maata rava atu, koia te mitinari teitei ua atu.” E tika ra ka manako te aronga karatuatiia ra i te au tauianga ta Iesu i rave kia autu ei i tana rave angaanga i te enua nei, te vai nei ra te au puapinga no ta Iesu ra tavinianga ei mitinari ki te aronga katoatoa te ka rave ia ratou ra. Ko teianei no te mea, mei ta te Taeake ko Barr i tou atura, kua mareka a Iesu i te raveanga i ta te Atua ra angaanga, e kua aroa katoa oki aia i te tamariki a te tangata nei. (Maseli 8:30, 31) Kua raurau atura te Taeake ko Barr i te aronga karatuati ra kia mou tikai i ta ratou au angaanga, kare no te akakoromaki anga ua, mari ra no to ratou mareka i te raveanga i te reira. “E irinaki ia Iehova; kare rava aia e akaruke ia koe,” ko tana akamaroiroi anga i taua pupu ra.​—Salamo 55:22.

“Aaereanga Mutu Kore ua Atu i te Ingoa o Iehova” ko te tumu tuatua ia tei ikiia e te vaa tuatua i muri akera, ko Lloyd Barry, koia tetai atu mema no te Pupu Akaaere. Kua tavini aia ei tetai mitinari no te tere atu i te 25 mataiti i Tiapani i muri ake i te otianga te pupu 11 o Gileada, kua akakite mai te Taeake ko Barry i etai o te au tupuanga i te au mitinari mua ra e kua akataka mai i te au akaaoanga ta ratou i aro atu. Eaa tana apii anga tau no taua pupu karatuatianga ra? “I runga ravao, e tamou marie i to kotou tu pae vaerua. Pera katoa oki, e apii i te reo e te au peu. E tamou i te tu akakatakata. E kia mou piri i te angaanga; auraka e akaroiroi me kare e akamutu ua.” Kua akakite atu te Taeake ko Barry ki te aronga karatuati ra e i ta ratou angaanga i te enua ke ra, ka aravei atu ratou i te au tangata e manganui tei aaere ra i roto i te ingoa o te au atua ke ke e te au apinga akamoriia, e kua akamaara atura aia kia ratou i te au tuatua a Mika: “Kia aaere ua te tangata ravarai i te ingoa o tona uaorai atua, ka aaere ra tatou i te ingoa o Iehova, o to tatou Atua, e tuatatau ua atu.” (Mika 4:5) Ko te akatauanga a te au mitinari mua ra e akakeu anga mana ririnui tikai no te au tavini katoatoa o te Atua ra kia aaere ua atu i te ingoa o Iehova ra e kia tavini tiratiratu iaia ra.

Aru mai i runga i te porokaramu ko te puapii Gileada ko Lawrence Bowen. Te tumu o tana oronga anga kua akatu mai i te uianga, “Eaa Taau ka Akariro ia Koe Uaorai?” Kua akakite mai aia e ko te autu anga i te tavini i te Atua ra tei runga ia i te akarongo e te irinaki ia Iehova. No te irinaki takiri anga ia Iehova i apai mai i tetai autu anga aite kore ia no te Ariki ko Asa ki rungao i tetai nuku vaeau enemi e okotai mirioni tangata. Inara kua akamaaraaraia atu aia e te peroveta ko Azaria no te umuumu anga kia irinaki ua atu i te Atua: “Tei ia kotou a Iehova, ko kotou i piri mai kiaia ra.” (2 Paraleipomeno 14:9-12; 15:1, 2) I te mea te ingoa o te Atua, ko Iehova, te akakite maira i te manako e ka riro aia ei tei umuumuia ra kia akatupu i tona akakoro anga​—me kia riro ei Tei Oronga mai, ei Tei Paruru, me kare noatu me ei tetai Tei Tamate mai​—te au mitinari tei irinaki ia Iehova e tei rave angaanga rotai ma tona akakoro anga ka riro kia autu i roto i ta ratou angaanga. (Exodo 3:14) Kua tuatua taopenga atura te Taeake ko Bowen, “auraka e akangaropoina e me ka tamou marie kotou kia akariro i ta Iehova ra akakoroanga ei akakoroanga na kotou, ka akariro aia ia kotou kia riro ei tei umuumuia kia akatupu i ta kotou angaanga.”

Te vaa tuatua openga no teianei tuanga o te porokaramu ko Wallace Liverance, koia tetai mitinari i mua ana e i teianei koia te retita o te apii. Tana tuatua, te tumu “Tamou Marie kia Ora te Tuatua a te Atua e kia Angaanga ki roto ia Koe,” kua akamanako mai i te tuatua kare ra e puapinga kore, me kare te taputou, a te Atua te aere ua atura ki mua ki tona akaoti anga. (Ebera 4:12) Te mana ra ia i te au oraanga o te aronga tei tuku ra i te reira kia rave akapera. (1 Tesalonia 2:13) Akapeea ka raukai taua tuatua ra kia ora e kia rave angaanga i to tatou au oraanga? Na roto i te apiianga pakari i te Pipiria. Kua akamaara mai te Taeake ko Liverance i te aronga karatuati ra i te au ravenga no te apii Pipiria tei apiiia ra i Gileada kia kapiti te reira i tetai tatauanga e te akataka anga i te aite anga e te taangaanga oki i te Tuatua a te Atua ra. Kua taiku mai aia i te au tuatua a Albert Schroeder, koia tetai mema o te Pupu Akaaere te tavini ra ei tiamana no te kumiti tei akanoo maira i te Apii Gileada e tere atu i te 50 mataiti kua topa: “Na te taangaanga i te au tuatua takapini, ka rauka i tetai te mana vaerua ki katoa, e te tika oki tei akakiteia maira e te Atua i tana Tuatua.” Na teianei rave anga i te apii Pipiria ka tamou marie kia ora te Tuatua a te Atua e kia rave angaanga oki.

Au Akakitekite Tupu Anga e te Au Uiui Anga

I muri ake i te au tuatua, kua akarongorongo atu te aronga tei akaputuputuia maira ki etai au akakiteanga tupu anga rekareka mei te aronga apiipiiia maira. I raro ake i te arataki anga a Mark Noumair, koia tetai mitinari i mua ana e e puapii Gileada i teianei, kua akakitekite mai tetai pupu aronga apiipiiia e kua akaari mai e i akapeea ta ratou tauta anga kia rave i tetai akakite anga na roto i etai turanga tuke tuke. Kua rauka i tetai papaki te akamata apii anga Pipiria ma te au tangata o reira na te akara anga i to ratou au turanga e te au tuatua anga e na te akaarianga i te manako atu kia ratou taki tai. I reira kua akaari taua aronga apiiia ra i ‘te matakite ia ratou uaorai e i ta ratou apiianga’ e kua manako tikai kia tauturu atu ia etai ke ra kia rauka te ora.​—1 Timoteo 4:16.

E manganui te au manako anga tau tei orongaia mai, e kua akakiteia mai te rekareka anga i te tavinianga mitinari kua oronga katoaia mai e etai au taeake karape te tereniia ra i te apii no te au mema kumiti tei raveia i te Ngai Apii Punanga Tiaki. Kua akono nga taeake ko Samuel Herd raua ko Robert Johnson no te pupu o te opati maata i tetai uiuianga oraora ma te aronga no te au opati manga mai o te Taiate i Bolivia, i Zimbabwe, i Nicaragua, i Central African Republic, i Dominican Republic, i Papua New Guinea, e i Cameroon oki.

Aru mai i te au akakitekite tupu anga e te au uiuianga, kua oronga mai a Gerrit Lösch, koia tetai karatuati no te pupu 41 o Gileada e i teianei e mema ia no te Pupu Akaaere, kua tuatua i te tuatua openga no runga i te tumu akakeuanga manako “Ko Koe Ainei Tetai e ‘Peretana Inangaroia’?” Kua akamaara mai te Taeake ko Lösch na mua i te aronga karatuati e ko Iesu, te Tamaiti apa kore ua a te Atua ra, kare i akamanakoia ei tetai tei inangaroia e te au tangata ra, mari ra “kua akavaavaaia aia, e kua kopaeia e te tangata.” (Isaia 53:3) No reira kare i te mea poitirere e i teia tuatau nei i te au tuanga e manganui no te ao nei, kua manakoia te au mitinari ei peretana kare e arikiia persona non grata, ei au tangata kare e arikiia me kore kare e inangaroia. I tetai pae, i to Daniela tuatau roa i tavini ei ki Babulonia, na roto i tetai angera i tapaiai Tei Anga maira ia Daniela e “akaperepere maataia.” (Daniela 9:23; 10:11, 19) Na teaa i akariro ia Daniela ki taua tu ra? Kare aia i tuku ua i te au kaveinga Pipiria i te akatikatika anga ki te au peu i Babulonia ra; kua tiratiratu aia i te au tu ravarai, kare i taangaanga i tona turanga no te puapinga nona uaorai; e koia tetai tei totomapu i te apii te Tuatua a te Atua. (Daniela 1:8, 9; 6:4; 9:2) Kua pure putuputu katoa aia kia Iehova e kua viviki i te oronga i te kaka ki te Atua no tana i rave ra. (Daniela 2:20) Na te aruanga i to Daniela akatauanga, ka tau ta te Atua ra au tavini kia inangaroia, penei kare ki to te ao nei, mari ra ki te Atua ko Iehova.

Ei akaoti anga i taua porokaramu taaki vaerua ra ki runga, kua tatau mai te tiamana i etai au terekaramu e te au reta tei rauka mai e takapini i teianei ao. I reira, kua orongaia ki te au 24 tokorua taki tai to ratou au tiporoma, e kua akakiteia mai te enua te ka akaungaia atu ratou. I te openga ra, kua tatauia mai e tetai o te pupu apiiia ra tetai reta tei tataia atu ki te Pupu Akaaere e te pamiri Betela ra, i te akakiteanga i te manako ngakau ariki anga o te pupu ra no te terenianga e te teateamamao anga tei rauka ia ratou i te rima marama i topa.

I te taenga te porokaramu ki tona openga, kua akarongoia “tetai rekarekaanga ma te au akameitaki anga” i roto i te urupu tei aere ke atura.​—Nehemia 12:27.

[Pia i te kapi 27]

Te Au Tu o te Pupu

Numero o te au enua tei komonoia: 10

Numero o te au enua tei tukuia: 19

Numero o te aronga apiipii: 48

Numero o te au tokorua akaipoipo: 24

Au mataiti averiti: 33

Te mataiti averiti roto i te tuatua mou: 16

Au mataiti averiti i roto i te angaanga tamou: 13

[Tutu i te kapi 25]

Te 106 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.