Tua Oraanga

I Matapo Ana Au, Kua Akapueraia ra Oku Nga Mata!

AKAKITEIA E EGON HAUSER

I muri ake i te rua marama o te matapoanga tikai, kua akapueraia oku nga mata ki te au tuatua mou o te Pipiria taku i kopae ana i toku oraanga katoa.

ME OKI au e akara ki muri i te itu ngauru e ara atu au mataiti, e maata tikai te au tuanga o toku oraanga e oronga maira i te marekaanga maata kiaku. Naringa ua ake ra e ka rauka iaku i te taui i tetai apinga, ka iki roa au e kua kite ana au no runga i te Atua ia Iehova i mua ana.

I anauia au i te 1927 i Urukuai, e manga enua ua mei te pea rai te tu i rotopu ia Atenetina e Paratiri e kua rakeiia ki te au kiro mita o te ngai ruperupe i te Pae Tai o Atiranatiki. Ko te maataanga o te tangata i kapuaia mai mei te au uanga o te au tangata tei tere mai mei Itaria e Paniora. Kareka, ko toku nga metua, e nga tangata tere mai mei Ungari, e i toku ouanga, e noo ana matou ki tetai ngai, tau ua, kareka ra te tangata, e aiteite ua te au tu o te oraanga. Kare e anoanoia te au roka i runga i to matou au ngutupa me kore te au arai auri i runga i to matou au maramarama. Kare te tu papaki tai ki te tu o te tangata e kitea ana i rotopu ia matou. Te aronga manuiri e te aronga enua, te kerekere e te teatea​—e au taeake pouroa matou.

E nga Katorika maroiroi toku nga metua, e i te ngauru mataiti kua riro mai au ei tamaiti tiaki atarau. Ei tangata mamaata, e angaanga ana au ma te ekaretia i reira e ei mema no tetai pupu e angaanga ra ei au taote no te epitikopo i roto i te oire. I te mea e kua iki i te tuanga angaanga rapakau, kua patiia mai au kia piri ki roto i tetai apiianga i Venetuera tei akaaereia e te Akonoanga Katorika. Ei au taote i te pae rapakau e angaanga takake ra i roto i te au tu maki pouroa o te vaine, kua tukuia atu to matou pupu kia apii no runga i te au ua akakore anga nui e akamataia ra i te tuku ki runga i te makete i taua taime ra.

Au Manako Mua ei Tangata Apii i te Pae Rapakau

Iaku e apii ra ei tangata apii i te pae rapakau no runga i te kopapa tangata, kua maata e kua maata ua atu rai toku umere i te kite pakari e kiteia ra i roto i te maanianga ia o te reira. Ei akaraanga, kua umere tikai au i te ravenga a te kopapa i te rapakau e te akaora akaou iaia uaorai mei te maki kino, mei te tu rai o te ate me kore o tetai au ivi kaokao te ka rauka ua i te tupu akaou ki te tu mua i muri ake i te kiriti angaia tetai tuanga.

I taua taime rai, e maata taku au tangata i kite tei rokoia e te au u anga kino, e kua taitaia tikai au i to ratou mate anga no tei ariki i te au pamuanga toto. Te maara nei iaku e tae mai ki teia ra e mei teaa tikai te ngata i te tuatua ki te kopu tangata o te aronga maki tei mate no te au manamanata tei tupu mai no te pamu toto. I te maataanga o te taime, kare e akakiteia ana ki te kopu tangata e na te pamu toto i akatupu i te mate o to ratou akaperepere. Inara, e au tumu ke ua te orongaia ana kia ratou. Noatu e e manganui te au mataiti i topa, te maara nei rai iaku toku au manako manamanata no runga i te au pamuanga toto, e ko taku taopengaanga i rauka koia oki e apinga tarevake tikai tetai i te angaanga pamu toto. Naringa ua ake au i taua taime ra i kite i ta Iehova ture no runga i te tu tapu o te toto! I taua tu ra, e kore ana paa au e ekoko no runga i taku i kite e raveia ra.​—Angaanga 15:19, 20.

Marekaanga mei te Tauturu Anga i te Tangata

I muri mai, kua riro au ei taote vavai e ei tangata akatere no tetai ngai tauturu i te rapakauanga i Santa Lucía. E apainga katoa taku i ko i te National Institute of Biological Science. Kua riro teia i te oronga mai i te marekaanga maata kiaku. Kua tauturu au i te tangata i to ratou au maki, kua akamaru mai i to ratou mamae kopapa, i te maataanga o te tu kua akaora i te au oraanga, e kua apai mai i te au oraanga ou ki te ao nei na te tauturu anga i te au mama i te taime anauanga o te tamaiti. No taku au mea ra oki i kite i mua ao no te pamuanga toto, kua kopae au i te oronga i te reira e kua rave ua i te au tauatini ua atu au vavaianga ma te kore e toto. Kua akamanako au e kua aite rai te taeanga toto ki te vai e tae ua maira mei roto i tetai paero. Ko te ravenga ua rai koia oki ko te popani i te ngai e tae ua maira te vai, kare ko te akaki ua rai i te paero.

Rapakau Anga i te Au Kite Maki

Kua akamata mai toku matauanga ki te Au Kite o Iehova i te au mataiti 1960 i to ratou akamata anga i te aere mai ki to matou kiriniki no te vavaianga ma te kore e toto. Kare roa e ngaropoina iaku te turanga o tetai vaine maki, e painia (orometua tamou) ko Mercedes Gonzalez te ingoa. No te moteteaka roa iaia kare te au taote i te are maki o te apii teitei i inangaro i te vavai iaia, i te manako anga tikai e kare aiai e ora. Noatu e te pou ra tona toto, kua vavai rai matou iaia i ko i to matou kiriniki. Kua manuia te vavaianga, e kua painia ua atu rai aia no te 30 e ara atu au mataiti e tae ua atu ki tona matenga i te 86 mataiti.

E umere ua atu ana rai au i te aroa e te inangaro ta te Au Kite e akaari ana i te akono anga i to ratou au taeake Kerititiano i roto i te are maki. Me rave i taku au tutakaanga maki, e reka ana au i te akarongo kia ratou i te tuatua no runga i to ratou au irinakianga, e e ariki ana au i te au puka ta ratou e oronga mai ana naku. Kare rava au i manako ana e kare e roa atu ana ka riro mai au kare ei taote ua no ratou mari ra ei taeake pae vaerua katoa no ratou.

Kua maata roa atu toku pirianga vaitata ki te Au Kite i toku akaipoipo anga ia Beatriz, te tamaine a tetai tangata maki. Kua kapiti ke atu ana te maataanga o tona ngutuare tangata ki te Au Kite, e i muri ake i to maua akaipoipo anga, kua riro katoa aia ei Kite maroiroi. Ko au ra, i tetai tua, te pou ua ra te taime ki taku angaanga e te rekareka ra i te turanga teitei i roto i te tuanga rapakau. I te akaraaga e meitaki tikai te oraanga. Toku kite kore ra e kare e roa atu ana ka tuke takiri toku oraanga.

Tupu te Tumatetenga

Tetai o te au apinga kino roa atu te ka tupu ki tetai taote vavai koia oki ko te kore tona mata e kite akaou. Kua tupu te reira kiaku. Mea poitirere ua ake, kua ngaae a muri i te ua o toku nga mata (retina)​—kua matapoia au e kare i kite e me ka kite akaou au. I muri ake i te vaiia anga, kua takoto ua au ki runga i te roi ma nga mata roa ai kua takaiia, e kua tupu tikai te taitaia. Kua manako au e kare takiri oku puapinga e te manakonakoanga e tae ua atu ki te turanga e kua manako au e akaope i toku oraanga. I te mea e tei runga au i te a o te taua, kua eke au mei runga i te roi e kua aa aere au na te pae paruru i te aerenga, i te kimi i te maramarama. Te aere ra au ka rere kia mate atu au. Inara, kua tano atu au ki te ngai e tomo mai ei ki roto i te are maki, e kua akakaokiia atu au e tetai neti ki ko i toku roi.

Kare roa au i tamata akaou ana i te reira. Kareka ra i roto i toku ao poiri, kua vai taitaia ua rai au e te nooanga ngata. I roto i teia tuatau o te matapoanga, kua taputou au ki te Atua e mei te mea ake e ka kite akaou au, ka tatau roa au i te Pipiria mei tetai kapi ki tetai kapi. I te openga iora, kua rauka akaou iaku te kite manga ua, e ka rauka iaku te tatau. Tera ra kare e rauka kia riro ua atu rai au ei taote vavai. Kareka ra, i Urukuai e aerenga tuatua matauia tetai te na ko ra e “No hay mal que por bien no venga,” “Kare e apinga e kino roa ana e kare takiri e apinga meitaki e rauka mai mei te reira.” Kua vaitata roa au i te kite i te tika tikai o taua tuatua ra.

E Akamataanga Kino

Kua inangaro au i te oko i te tataanga reta mamaata o te The Jerusalem Bible, inara kua kite mai au e e mama atu ta te Au Kite o Iehova Pipiria, ta tetai Kite mapu i oronga kia kave mai ki toku kainga. I tera mai popongi, kua tu mai aia ki toku ngutupa i mua ma te Pipiria. Na taku vaine i vai atu i te ngutupa e kua tuatua atu kiaia. Kua vaa riri atu au mei muri mai i te are e me kua tutaki aia iaia no te Pipiria, kare e tumu tau akaou nona kia noo mai ki toku kainga e kia akaruke, ko tei kore, i anoanoia te tuatua, kua rave viviki ua ra aia. Kare ra oki au i kite e kare e roa atu ana ka riro teia tangata nei tikai i te rave i tetai angaanga puapinga i roto i toku oraanga.

I tetai ra kua maani au i tetai koreromotu ki taku vaine tei kore i rauka iaku i te akatupu. No reira ei tutaki e ei akarekareka iaia, kua karanga atu au e ka aru au iaia ki te Akamaaraanga mataiti o to Iesu matenga. Kia tae ki te ra, kua maara iaku taku koreromotu e kua tae atu ki te akakoroanga ma ia. Kua umere tikai au i te tu oaoa e te turouanga takinga meitaki taku i kite. I te akamata anga te vaa tuatua i tana tuatua, kua poitirere tikai au i te kite e ko taua tangata mapu ra rai taku i akakite riri ana kia akaruke i toku are. Kua akatukia oonu roa tana tuatua iaku, e kua kinokino tikai au no te takinga kino anga atu iaia. Ka akapeea ra au i te akaoki anga atu i te meitaki no te reira?

Kua pati au ki taku vaine kia pati atu iaia ki te kaikai i te aiai, inara kua karanga mai aia e: “Kare ainei koe e manako ana e e mea tau atu me naau e pati iaia? Noo ua ki konei, e ka aere mai aia kia taua.” E tika rai tana. Kua aere mai aia i te aravei ia maua e kua ariki rekareka mai i te patianga.

Ko te pukapukaanga ta matou i rave i te aiai i aere mai ei aia i te atoro kua riro e ko te akamataanga o te au tauianga e manganui noku. Kua akaari mai aia i te puka Te Tuatua-Mou te Ka Arataki ki te Ora Mutukore,a e kua akaari atu au e ono au kopi o taua puka rai kiaia. Na te au Kite maki tuke tuke i ko i te are maki i oronga mai i te reira kiaku, inara kare roa au i tatau ana i te reira. I te taime e kaikai ra e i muri ake, e taena roaia atu te roaanga po, e maata tikai te au uianga taku i ui ei​—tana i pau pouroa mai na te taangaanga anga i te Pipiria. Kua tae roa atu te uriurianga ki te au ora o te popongi metua i tera mai popongi. I mua ake ka akaruke ei, kua oronga mai te tangata mapu kia apii i te Pipiria kiaku, i te taangaanga anga i te puka Tuatua-Mou. Kua oti ia maua te apii i taua puka ra i roto i te toru marama e kua rave atu rai ki roto i te puka “Babylon the Great Has Fallen!” God’s Kingdom Rules!b I muri ake i te reira, kua akatapu au i toku oraanga ki te Atua ko Iehova e kua papetitoia.

Kite Akaou i te Puapinga Tikai

Tei tupu no te matapoanga tikai, kua akapueraia ‘te mata o toku nei ngakau’ ki te au tuatua mou o te Pipiria taku i kopae mai ana e tae ua atu ki tera taime! (Ephesia 1:18) Na te kite ia Iehova e tona akakoroanga aroa i taui i toku oraanga katoa. E teianei akaou, te kite nei au i te puapinga tikai e te mataora. Te tauturu nei au i te tangata i te pae kopapa e te pae vaerua e te akaari kia ratou e ka akapeea te akaroa atu i to ratou au oraanga no etai atu au mataiti i roto i teia akatereanga o te au mea nei e e mutu kore ua atu i roto i te mea ou.

Kua akono tamou atu rai au i te au kite ou i te pae rapakau, e kua rave ana au i te kimikimiaga no runga i te kino o te toto, te au rapakauanga ke atu, te au tikaanga o te tangata maki, e te au manako tau no te ora. Kua rauka ana iaku te au tikaanga kia oronga atu i teia akakiteanga ki te aronga rapakauanga i reira i toku pati angaia mai kia tuatua no runga i teia au tumu tuatua nei i ko i te au apiianga no te pae rapakau. I te 1994, kua tae atu au ki te uipaanga maata mua no runga i te rapakauanga ma te kore e toto i Rio de Janeiro, i Paratiri, e kua oronga i te tuatua no runga e ka akapeea te akono anga i te au taeanga toto. Ko tetai tuanga o taua akakiteanga ra tei roto i tetai atikara taku i tata, “Una propuesta: Estrategias para el Tratamiento de las Hemorragias” (“E Ravenga Rapakauanga Tei Papauia no te Tapuanga i te Taeanga Toto”), tei neneiia ki roto i te makatini no te pae rapakau ko te Hemoterapia.

Tiratiratu i Raro Ake i te Taomianga

I te akamata anga, ko toku au ekokoanga no runga i te pamuanga toto i akatumu maataia ki runga i te kite taineti. Inara, i toku uaorai riro anga ei tangata maki i te are maki, kua kite au e e apinga ke rai te patoi i te pamuanga toto e te akono marie i toku akarongo i te aravei anga atu i te taomianga pakari mei te au taote mai. I muri ake i tetai maki pukuatu pakari tikai, kua tere atu i te rua ora toku akamarama anga i toku turanga ki tetai taote vavai. E tamaiti aia na tetai nga oa meitaki tikai noku e kua tuatua mai e kare aia e tuku ua iaku kia mate me kua manako aia e ka riro te pamuanga toto i te akaora i toku oraanga. Kua pure muteki ua au kia Iehova, i te pati kiaia kia tauturu i teia taote kia marama e kia akangateitei i toku turanga noatu e kare aia e akatika ana ki te reira. I te openga, kua koreromotu te taote kia akangateitei i toku au anoano.

I tetai atianga ke, kua anoanoia kia akapaeia tetai tuma maatamaata mei toku prostate gland. Kua tae ua te toto. Tera akaou i reira, kua akamarama uaorai au i te au tumu no taku patoianga i te pamuanga toto, e noatu kua pou e rua tuanga toru o toku toto, kua akangateitei rai te aronga angaanga rapakau i toku turanga.

Kua Taui te Tu

Ei mema no te International Association of Bioethics, kua rauka ana iaku te marekaanga o te kite i te tauianga i roto i te aronga angaanga rapakau e te aronga mana o te ture ki te au tikaanga o te aronga maki. Te tu akatere pakari o te au taote i te ikianga a te tangata maki kua monoia ki te akangateiteianga no te akatikaanga tei akanooia ki runga i te kite. I teianei ka akatika ratou i te aronga maki kia piri ki roto i te ikianga o te rapakauanga. Kare te Au Kite o Iehova e manako akaouia ana ei aronga marokiakia tei kore i tau kia rapakauia. Mari ra, te manakoia ra ratou ei aronga maki kua marama meitaki ko tei tau kia akangateiteiia to ratou tikaanga. I ko i te au apiianga no te pae rapakau e i runga i te au porokarama tivi, kua tuatua te au poropeta rongonui e: “Meitaki tikai ki te au tautaanga a te Au Kite o Iehova, kua marama matou i teianei . . . ” “Kua kite matou mei te Au Kite . . . ” “Kua apii mai ratou ia matou kia akamako meitaki atu.”

Kua tuatuaia ana e e puapinga rava atu te oraanga i tetai ua atu apinga no te mea me kare te reira e aiteanga kore ua rai to te tu rangaitra, te ora, e te tu ngateitei. I teianei e manganui te ariki ra i te kaveianga teitei o te ture, te ariki anga e ko te tangata tataki tai uaorai te pu o tona au tikaanga uaorai e koia anake rai te ka iki e ko teea o tona au tikaanga tei tau i te ngai mua i raro ake i tetai ua atu au turanga tei akatakaia. Na roto i teia mataara, te orongaiara te ngai mua ki te tu ngateitei, ki te tu rangatira kia iki, e te au irinakianga akonoanga. E tikaanga to te tangata maki kia tuku i tana uaorai ikianga no te rapakauanga. Kua riro te au Hospital Information Service ra, tei akanooia e te Au Kite o Iehova, ei tauturu i te au taote e manganui kia tere ki mua i roto i to ratou marama no teia au mea nei.

Kua riro te turuturu ua rai a toku ngutuare tangata i te tauturu iaku kia puapingaia i roto i te angaanga a Iehova e kia tavini katoa ei tangata pakari i roto i te putuputuanga Kerititiano. Mei taku i akakite ke atu ana e, ko taku mea tumatetenga roa atu koia oki no te kore i kite vave ana no runga ia Iehova i te oraanga i mua ana. Noatu ra, e rekareka maata tikai toku e kua akapuera aia i oku nga mata ki te manakonakoanga umere roa o te noo anga i raro ake i te akanoonoo anga a te Patireia o te Atua, i reira “kare oki to reira e karanga e: Kua maki au.”​—Isaia 33:24.c

[Au Tataanga Rikiriki i Raro]

[Tutu i te kapi 24]

Toku 30 e ara atu anga mataiti, e angaanga ra i ko i te are maki i Santa Lucía

[Tutu i te kapi 26]

Maua ko taku vaine, ko Beatriz, i te 1995