Ka Paruruia Tatou No Te Kimi Anga i te Tuatua Tika

“E na mua ra kotou i te kimi i te . . . tuatua-tika [a te Atua].”​—MATAIO 6:33.

1, 2. Eaa te ikianga ta tetai Kerititiano mapu i rave, e eaa ra aia i rave ei i taua ikianga?

KO TETAI vaine mapu Kerititiano i Asia kua angaanga ana ei tekeretere i roto i tetai opati o te kavamani. E vaine angaanga meitaki aia, e tae viviki ua ana ki te angaanga e kare e taroaroa ana i tana angaanga. Inara, no te mea e kare tana angaanga i akatinamouia, kua akara akaouia te reira. Kua akakite atu te pu o te tipatimani ki te vaine mapu e ka oronga atu aia i te angaanga tinamou nana e ka oronga katoa atu kiaia ra tetai taoonga maata, me ka moe aia kiaia. Kua patoi pakari aia i teia, noatu e ka ruti aia i tana angaanga.

² E manako tika kore ainei to te vaine mapu Kerititiano? Kare, te aru meitaki ra aia i ta Iesu tuatua: “E na mua ra kotou i te kimi i te . . . tuatua-tika [a te Atua].” (Mataio 6:33) E puapinga maata atu kiaia te aru anga i te au kaveinga tuatua tika i te rauka anga mai te puapinga na roto i te ravenga ainga tau kore.​—1 Korinetia 6:18.

Te Puapinga no te Tuatua Tika

3. Eaa ra te tuatua tika?

³ Te “tuatua-tika” te akakite maira i te aru anga i te au kaveinga tau. I roto i te Pipiria, te manako no te au tuatua Ereni e te Epera no te tuatua tika e “tu tika” me kore e “tiratiratu.” Kare te reira e akava ra i tetai uaorai no tona uaorai ra turanga. (Luka 16:15) E tiratiratu te reira tei tau ki ta Iehova au turanga. Na te Atua ia tuatua tika.​—Roma 1:17; 3:21.

4. Eaa ra te tuatua tika ka puapinga ai ki tetai Kerititiano?

⁴ Eaa ra te tuatua tika i puapinga maata ai? No te mea te mareka ra a Iehova, te “Atua tuatua tika,” i tona au tangata me rave ratou i te tuatua tika. (Salamo 4:1, NW; Maseli 2:20-22; Habakuka 1:13) Ko tetai tangata kare e rave ana i te tuatua tika kare ona pirianga vaitata kiaia. (Maseli 15:8) No reira te apotetoro ko Paulo i raurau ei kia Timoteo e: “E rere ke koe i te au anoano o to mea ou anga ra: e aruaru ra i te tuatua-tika,” te kapiti atu anga i tetai au tu puapinga maata. (2 Timoteo 2:22) No reira katoa oki a Paulo i kapiti mai ei i “te tapoki-umauma ra ko te tuatua tika” i te akapapa anga mai aia i te au tuanga ke ke o to tatou rakei tamaki i te pae vaerua.​—Ephesia 6:14.

5. Akapeea te au mea ora apa ra i te kimi anga i te tuatua tika?

⁵ Ae, kare e tangata tuatua tika i roto i te tu tika tikai. Kua tu te katoatoa i te tu apa no ko mai ia Adamu, e tu ara e te tika kore te katoatoa mei te tuatau i anauia mai ei. Inara, kua karanga a Iesu e e kimi tatou i te tuatua tika. Akapeea te reira e rauka ai? Kua oronga mai a Iesu i tona oraanga apa kore ei oko no tatou, e me akono tatou i te akarongo i roto i taua atinga, ka akakore mai a Iehova i ta tatou au ara. (Mataio 20:28; Ioane 3:16; Roma 5:8, 9, 12, 18) I runga i taua tumu anga, ia tatou e apii ra i te au turanga tuatua tika a Iehova e te rave pakari anga tatou i te akono i te reira​—te pure anga no te tauturu kia autu to tatou tu paruparu​—ka ariki mai a Iehova i ta tatou akamorianga. (Salamo 1:6; Roma 7:19-25; Apokalupo 7:9, 14) E akapumaana anga tikai!

Tuatua Tika i Roto i Tetai Ao Tika Kore

6. Eaa ra te ao i riro mai ei e ngai kino no te au Kerititiano mua?

⁶ Te rauka anga mai i te au pipi a Iesu te akauenga kia riro mai ei au kite nana ra “e tae ua atu ki te openga o te enua ra,” kua aro atu ratou i tetai turanga ngata. (Angaanga 1:8) Te au ngai ravarai e angaanga ra ratou tei “raro ake i taua vaerua kino ra,” ko Satani. (1 Ioane 5:19) Kua ki teia ao i te vaerua kino tana i akakeu, e te akatueraia ra te au Kerititiano ki ta te reira akakeu anga kino. (Ephesia 2:2) Kia ratou, e ngai kino teianei ao. Na te kimi anake ra i te tuatua tika a te Atua na mua ra i rauka mai ei ia ratou te tamou marie e te akono tamou i to ratou tiratiratu. Kua tamou marie te maata anga, inara e tokoiti ua tei anga ke mei “te arataa tuatua-tika.”​—Maseli 12:28; 2 Timoteo 4:10.

7. Eaa te au apainga te umuumuia ra kia rauka i tetai Kerititiano i te patoi atu i te au akakeu anga kino?

⁷ E meitaki ainei teianei ao no te au Kerititiano i teia tuatau? Kare! E kino roa atu te reira i to te anere mataiti mua. Kapiti atu, kua uriia mai a Satani ki vao i runga i te enua e te tamaki atura i te au Kerititiano akatainuia, “te toenga a tona [ta te vaine] uanga, ko tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:12, 17) Te tamaki katoa ra a Satani i tetai ke te turu ra i taua “uanga.” Inara, kare e rauka i te au Kerititiano i te akaatea mai mei teianei ao. Noatu e kare ratou i to teianei ao, te noo ra ratou i roto i reira. (Ioane 17:15, 16) E te tutu aere ra ratou i te kimi anga i te aronga tei tau e te apii anga ia ratou kia riro mai ei au pipi na Karaiti. (Mataio 24:14; 28:19, 20) No reira, no te mea e kare e rauka i te au Kerititiano i te kopae tikai i te au akakeu anga kino a teianei ao, e patoi ua atu ra ratou i te reira. Ka akamanako ana tatou e a o taua au akakeu anga.

Te Ereere no te Tu Akono Tau Kore

8. No teaa ra i anga ke ei te ngati Iseraela i te akamori atu i te au atua a te ngati Moabi?

⁸ Tae anga ki te openga o to ratou aaere anga e 40 mataiti i roto i te metepara, e maata te au ngati Iseraela tei anga ke mei te arataa tuatua tika. Kua kite ana ratou i te au angaanga e manganui a Iehova no te akaora anga, e kare e roa atu ka tomo atu ei ratou ki roto i te Enua Taputouia. Inara, i taua taime puapinga maata ra, kua anga ke ratou i te tavini atu i te au atua a te ngati Moabi. No teaa ra? Kua topa ratou ki roto i te “anoano tika kore o te kopapa.” (1 Ioane 2:16) Te akakite maira te rekoti e: “Kua timata iora taua au tangata i te akaturi ki te au vaine Moabi ra.”​—Numero 25:1.

9, 10. Eaa ra te turanga puapinga tikai i teia tuatau kia akamanako ua i te akakeu anga viivii no te au anoano tarevake o te kopapa?

⁹ Te akaari maira taua tupuanga i te mataara tarevake te akakino ra te au anoano o te kopapa i te aronga matakite kore. E meitaki ake no tatou kia apiiia mai e te reira, no te mea te manako tikaiia nei te ainga tau kore ei tu oraanga arikiia. (1 Korinetia 10:6, 8) Te karanga ra tetai ripoti no Marike mai e: “I mua ake i te 1970, kua tureia te noo anga kapiti [te ravenga noo anga kapiti o nga tokorua kare i akaipoipo ake] i Marike ravarai. I teianei, e mea matauia. Maata atu i te apa te au tokorua pouroa tei akaipoipo ka tai nei taime kua noo kapiti ana i mua ake ka akaipoipo ei.” Kare taua noo anga kapiti e te au ravenga tau kore i kotinga uaia e tai ua enua. Kitea pouroaia te reira i te ao katoa, e ma te mii, kua aru etai au Kerititiano i teia tu​—te ngere katoa anga to ratou turanga i roto i te putuputuanga Kerititiano.​—1 Korinetia 5:11.

¹⁰ Tei runga ravao, i te akara anga te akatupu ra te tauta akaariuke i te tu tau kore i te au ngai ravarai. Te karanga ra te au teata e te au porokaramu tivi e e meitaki tikai no te au mapu kia rave i te ainga i mua ake ka akaipoipo ei. Te akaariia maira te au pirianga no te tane e te tane te vaine e te vaine ei mea tau. E e manganui te akaari maira i te au angaanga ainga na roto i tetai tu tikai. Ka rauka ua te au tutu no te ainga tikai i runga i te Internet. Ei akatauanga, kua ripoti mai tetai tangata tata nuti no tetai nutipepa e kua oki mai tana tamaiti e itu ona mataiti ki te kainga mei te apii mai e kua akakite rekareka atu ki tona papa e kua akarakara ana tetai oa i te apii i roto i tetai Internet te akaari maira i tetai vaine taaka ua te rave ra i te au ravenga ainga. Kua poitirere te metua tane, inara eia tamariki tei akara ana i taua ngai e kare i akakite atu ana ki to ratou nga metua? Kapiti mai, eia au metua tei kite i te au apinga no te au apinga kangakanga vitio te kangakanga ra ta ratou tamariki? E manganui te au apinga kangakanga rongonui te akaari maira i te tu viivii akono tau kore, pera katoa te angaanga a te temoni e te kino oki.

11. Akapeea tetai pamiri i te paruruia anga mei te tu akono tau kore a teianei ao?

¹¹ Akapeea tetai pamiri i te kopae anga i taua “tamataoraanga” viivii? Na te kimi anga na mua i te tuatua tika a te Atua, i te patoi anga kia kore e o atu ki roto i tetai mea tau kore ra. (2 Korinetia 6:14; Ephesia 5:3) Te au metua tei akaaere meitaki i te au angaanga a ta ratou tamariki e te apii anga ki ta ratou tamariki i te aroa no Iehova e tana au ture tuatua tika te akaketaketa ra ia ratou mei te au mea viivii, te au apinga kangakanga vitio viivii, te au teata tau kore, e tetai atu au timataanga tika kore.​—Deuteronomi 6:4-9.a

Te Kino te ka Tupu Mai no te Taomianga a te Tapere Tangata

12. Eaa te manamanata tei tupu ana i te anere mataiti mua?

¹² Ia Paulo i Lusetera i Asia Minora, kua akaora temeio aia i tetai tangata. Te karanga ra te papaanga e: “Kite akera taua urupu maata ra i ta Paulo i rave ra, kua akateitei akera to ratou reo i te tuatua Lukaonia, na ko akera, Kua eke mai te au atua ki raro i o tatou nei mei te tangata ra te tu. E tapa akera ratou kia Banaba ia Dia; e ko Paulo ra ko Ereme ïa, no te mea koia te tangata e tuatua.” (Angaanga 14:11, 12) I muri mai kua inangaro taua urupu maata ra i te ta ia Paulo raua ko Banaba. (Angaanga 14:19) Te taka meitaki ra, e e paruparu tikai taua au tangata ra no te taomi anga a te tapere tangata. I te akara anga te riro anga mai etai aronga no roto mai i taua ngai ra ei au Kerititiano, te aru ra rai ratou i to ratou au manako tamataku anga. I roto i tana reta ki te au Kerititiano i Kolosa, kua akamatakite atura a Paulo no runga i te “akamori i te au angela.”​—Kolosa 2:18.

13. Eaa etai au peu ta tetai Kerititiano ka kopae, e akapeea e rauka ai iaia te maroiroi i te rave anga i te reira?

¹³ I teia tuatau, te inangaro katoaia ra te au Kerititiano mou kia kopae i te au peu tei ariki maataia tei akatumuia ki runga i te au manako akonoanga pikikaa te akakino ra i te au kaveinga Kerititiano. I roto i etai au enua, ei akaraanga, e manganui te au oroa taito te akonoia ra no te anau anga e te mate anga tei akatumuia ki runga i te pikikaa e e vaerua to tatou te ora ua atura i te mate anga. (Koheleta 9:5, 10) I roto i te au enua e peu oki na te reira i te tuku i te au tamariki tamaine mapu kia tipuia te mero no te ainga.b E ravenga kino teia kare e inangaroia e kare e rotai ana ki te utuutu anga aroa ta te nga metua Kerititiano e oronga ra ki ta raua tamariki. (Deuteronomi 6:6, 7; Ephesia 6:4) Akapeea te au Kerititiano i te patoi anga i te au taomianga a te tapere tangata e te akaruke anga i taua au ravenga? Na te irinaki tikai anga ki roto ia Iehova. (Salamo 31:6) Ka akaketaketa e ka akono te Atua tuatua tika ra i te aronga tei karanga kiaia mei roto mai i to ratou ngakau e: “Ko koe toku akapuanga, e toku pinanga; taku Atua, e taku i irinaki nei.”​—Salamo 91:2; Maseli 29:25.

Auraka e Akangaropoina ia Iehova

14. Eaa te akamatakite anga ta Iehova i oake ki te ngati Iseraela i mua ua ake ka tomo atu ei ratou ki roto i te Enua Taputouia?

¹⁴ I mua ua ake ka tomo atu ei te ngati Iseraela ki roto i te Enua Taputouia, kua akamatakite atura a Iehova kia ratou e auraka e akangaropoina iaia. Kua karanga aia: “Kia matakite, ko te ngaropoina aea ia koe to Atua ra ko Iehova, i te akono kore i tana au akauenga, e tana au tuatua-tau e tana au akonoanga, i taku i akaue atu kia koe i teianei rā; Ko te kaikai aea koe e merengo iora, e kua akatu i te are memeitaki e kua noo i roto; E kia maata oki taau au puakatoro e taau au mamoe; e kia maata oki taau ario, e taau auro, e kia maata oki taau apinga katoa ra; Ko te teitei aea to ngakau na, ngaropoina iora to Atua ra ko Iehova.”​—Deuteronomi 8:11-14.

15. Akapeea e papu ei ia tatou e kare tatou i akangaropoina ana ia Iehova?

¹⁵ Ka tupu ainei tetai apinga mei te reira rai i teia tuatau? Ae, me e au apinga tarevake ta tatou i tuku na mua. Inara, me kimi tatou na mua i te tuatua tika a te Atua, ka riro mai te akamorianga ma ei mea puapinga maata i roto i to tatou oraanga. Ka rave tatou, mei ta Paulo e akamaroiroi maira ia tatou ra kia, ‘taporoporo marie oki i te tuatau’ e kia akamanako i te tuatau rapurapu i roto i ta tatou angaanga orometua. (Kolosa 4:5; 2 Timoteo 4:2) Inara, me e meangiti ake ia tatou te puapinga no te aere anga ki te uipaanga e te angaanga orometua i to te akaangaroi anga me kore te kimi anga i te au mataara kia rauka mai te mataora tikai, ka ngaropoina ia tatou a Iehova i te tuku anga iaia ra ei tuanga rua i roto i to tatou oraanga. Kua karanga a Paulo e i te tuatau openga ra, ka riro mai te au tangata “ei anoano i te au mea e navenave ei ra, kare i anoano i te Atua.” (2 Timoteo 3:4) Te akara putuputu matatio nei te au Kerititiano ngakau tae ia ratou uaorai i te akapapu anga e kare ratou i akakeuia e taua tu manako.​—2 Korinetia 13:5.

Matakite i Tetai Tu Takake

16. Eaa te tu tarevake ta Eva ratou ko etai pae i to Paulo tuatau ra e akaari maira?

¹⁶ I Edene ra, kua akamareka autu tikai a Satani i to Eva anoano karapii no te akatakake anga. Kua inangaro a Eva i te rave i tana uaorai au ikianga no runga i te tika e te tarevake. (Genese 3:1-6) I te anere mataiti mua, kua aiteite te tu o etai i roto i te putuputuanga Kerititiano no te tu akatakake anga. Kua manako ratou e e kite atu ratou ia Paulo, e kua kapiki akakino aia ia ratou ei au apotetoro mamaata.​—2 Korinetia 11:3-5; 1 Timoteo 6:3-5.

17. Akapeea tatou i te kopae anga i te akatupu i tetai tu akatakake anga?

¹⁷ I roto i teia ao i teia tuatau, e manganui te aronga “ei māro, ei ngakau akateitei,” e ko etai au Kerititiano ra kua akakeuia e taua tu manako. Kua riro mai etai pae ei aronga patoi i te tuatua mou. (2 Timoteo 3:4; Philipi 3:18) I roto i te au tumu no te akamorianga ma, e puapinga tikai kia akara atu tatou kia Iehova no te arataki anga e te taokotai anga a “te tavini akono meitaki e te pakari” e te aronga pakari o te putuputuanga. Ko te mataara te reira no te kimi anga i te tuatua tika, e te paruru ra te reira ia tatou kia kore e akatupu i tetai tu akatakake anga. (Mataio 24:45-47; Salamo 25:9, 10; Isaia 30:21) E “pou e te rangorango o te tuatua-mou ra” te putuputuanga o tei akatainuia. Kua oronga mai a Iehova i te reira ei paruru e ei arataki ia tatou. (1 Timoteo 3:15) Te kite anga i te puapinga tikai o te reira e tauturu ei ia tatou e ‘auraka e mea e raveia ma te akanengonengo puapinga kore’ ia tatou e kauraro akaaka ra ki te anoano tuatua tika o Iehova.​—Philipi 2:2-4; Maseli 3:4-6.

Kia Riro Mai ei Aronga Aru ia Iesu

18. Te akamaroiroiia maira tatou kia aru ia Iesu na roto i teea au mataara?

¹⁸ No Iesu ra, kua karanga totouia mai e te Pipiria e: “I inangaro koe i te tuatua-tika, e te rikarika ra koe i te kino.” (Salamo 45:7; Ebera 1:9) E tu memeitaki i te aru! (1 Korinetia 11:1) Kare a Iesu i kite ua i ta Iehova au turanga tika; kua inangaro aia i te reira. No reira te timata anga a Satani iaia i te metepara, kare a Iesu i tapupu ana i te patoi atu e te aere ke atu mei “te ara tuatua-tika ra.”​—Maseli 8:20; Mataio 4:3-11.

19, 20. Eaa ra te au tupu anga meitaki no te kimi anga i te tuatua tika?

¹⁹ E tika oki, e e pakari atu te au anoano tika kore o te kopapa. (Roma 7:19, 20) Noatu rai, me e puapinga maata te tuatua tika kia tatou, na teia e akaketaketa ia tatou i te patoi atu i te kino. (Salamo 119:165) Ka paruru tetai aroa oonu o te tuatua tika ia tatou me aro atu tatou i te mea tarevake. (Maseli 4:4-6) Kia maara ra e, me tuku atu tatou ki te timataanga, te oronga ra tatou i te upokotu kia Satani. E meitaki atu i te patoi atu iaia e kia oronga i te upokotu kia Iehova!​—Maseli 27:11; Iakobo 4:7, 8.

²⁰ No te mea te kimi ra ratou i te tuatua tika, ko te au Kerititiano mou ra kua “akakiia oki i ta te tuatua-tika [“ua,” NW] i tei tupu ia Iesu Mesia ra, kia akakakāia te Atua e kia akameitakiia.” (Philipi 1:10, 11) Kua akakakauia ratou ma te ‘tangata ou ko tei angaia kia tau i te Atua ra, i te tuatua-tika e te tapu mou.’ (Ephesia 4:24) Na Iehova oki ratou e te ora nei i te tavini iaia, kare kia akamareka ua ia ratou uaorai. (Roma 14:8; 1 Petero 4:2) Na te reira e akaaere i to ratou au manako e te au angaanga. E ngakau mataora ta ratou e apai maira ki to ratou Metua i te rangi ra!​—Maseli 23:24.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa ra i puapinga ai kia kimi i te tuatua tika?

Akapeea ra tetai Kerititiano apa i te kimi anga i te tuatua tika?

• Eaa ua atu etai au mea i roto i teianei ao ta tetai Kerititiano ka kopae?

• Akapeea ra te kimi anga i te tuatua tika i te paruru anga ia tatou?

[Tutu i te kapi 26]

Ki te au pipi a Iesu, e ngai kino tikai teianei ao

[Tutu i te kapi 27]

Te au tamariki tei apiiia kia inangaro ia Iehova ka akaketaketaia kia patoi atu i te tu akono tau kore

[Tutu i te kapi 28]

Kua akangaropoina etai au ngati Iseraela ia Iehova i muri ake te puapinga anga ratou i roto i te Enua Taputouia

[Tutu i te kapi 29]

Mei ia Iesu rai, te makitakita ra te au Kerititiano i te tuatua tika kore