Te Maara ra Ainei ia Koe?

Kua ariki ainei koe i te tatau anga i te au itiu i ou ake nei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Eaa ra tetai au tumu i maata roa ai te kino e vai nei i teia tuatau?

Okotai tumu no te au angaanga kino koia oki ko te tu manako ngakau o te tangata ki te tu kino. (Genese 8:21) Tetai koia oki kua ngere te maataanga o te tangata i te kite tika tikai no runga i te anoano o te Atua. Pera katoa, ko Satani, tei akamata i te kino, te tamanamanata ua nei rai i te au angaanga a te tangata.​—1/1, kapi 4-6.

• Eaa te au tupu anga meitaki ka rauka mai mei tetai tuatua meitaki i te tuatau tau? (Maseli 12:25)

Ka akamaroiroi te reira i te tu papu i roto i te tangata te tuatuaia ra, ka akamaroiroi e ka akakeu iaia, e ka akatupu i tetai tu noo anga tamou ki roto iaia. Pera katoa, ia tatou e kimi ra kia akameitaki atu, ka tauturuia tatou kia akara i te meitaki i roto i tetai ke.​—1/1, kapi 16-17.

• Eaa ra tei roto i te aruna o te koreromotu?

Tei roto i reira te nga papa toka o te Ture pera katoa te mana. I muri ake i te meameaau a Kora, kua tukuia te rakau a Aarona ki roto i te Aruna ei kite no taua uki tangata ra. (Ebera 9:4) Penei kua akaateaia te rakau e te mana mei roto i te Aruna i mua ake i te akatapuanga o te iero o Solomona.​—1/15, kapi 31.

• No teaa te au ngati Iuda i te tuatau o Nehemia i anoanoia ai kia apai mai i te vaie ki te iero?

Kare te Ture a Mose e umuumu mai ana i tetai atinga vaie. Inara i te tuatau o Nehemia te anoano maataia ra e te vai ua ra rai te putunga vaie kia rauka i te tutungi i te au atinga i runga i te atarau.​—2/1, kapi 11.

• Eaa ra te Potopotonga a Muratori?

E tuanga te reira no tetai tataanga Ratino. Kua atuia na mua taua tataanga ra i roto i te reo Ereni mei te openga aere o te rua anere mataiti T.N. Tei roto i reira te papa taito roa atu o te au Tuatua Tapu Kerititiano Ereni tei manakoia ei mea ngateitei, pera katoa te au tuatua no runga i te au puka e to ratou aronga tata.​—2/15, kapi 13-14.

• Eaa ra te Ariki Vaine Peresia ko Vaseti i patoi ei i te aere atu ki te ariki? (Esetera 1:10-12)

Kare te Pipiria i akakite mai i tona au akakoroanga. Te karanga ra tetai aronga apii e kua patoi aia no te mea kare aia i inangaro ana i te taakama iaia uaorai i mua i te au manuiri kona kava a te ariki. Me kore penei kare rai o teia ariki vaine taurekareka tu kauraro, i te tuku anga i reira i tetai akaraanga kino no te au vaine i roto i te Patireia o Peresia.​—3/1, kapi 9.

• Akapeea ra te oko i te oronga anga mai i te akaora anga?

Ka rauka i to Iesu atinga i te akaora mai ia tatou mei te ara tei akatuangaia mai e ka akarangatira mai ia tatou mei te au tu kino o te ara. (Roma 6:23) Ka akarangatira mai teia atinga i te au Kerititiano mou mei tetai akava ngakau apa. E na te akono anga i te akarongo i roto i te oko, ka akaoraia mai tatou mei te mataku no runga i to tatou turanga i mua i te Atua. (1 Ioane 2:1)​—3/15, kapi 8.

• Eaa ta tatou ka kite mai mei te araianga i roto i te Ture e auraka e tunu i te punua puakanio i roto i te u o tona tinana? (Exodo 23:19)

Penei e angaanga peikani taua tu ra tei raveia ei akatupu i te ua. (Levitiku 20:23) I oronga mai te Atua i te u o te tinana puakanio ei utuutu i te punua e ei tauturu i te reira kia tupu. Te akaari ra te tunu anga i te punua ki roto i taua u ra i te tu akangateitei kore no te pirianga tei akanooia e te Atua i rotopu i te metua e te tamariki. Te akaari maira te ture no teia i to te Atua ngakau aroa.​—4/1, kapi 31.