Rekareka Ratou i te Rave Anga i to te Atua Anoano
KUA akanoo a Iesu i tetai akaraanga no te au Kerititiano katoatoa na te pure anga ki tona Metua e: “Kia tupu ra toou anoano, auraka toku.” (Luka 22:42) I teia tuatau kua rongoia taua tuatua akaaka no te kauraro anga kia Iehova e te au tavini a te Atua e mirioni ua atu. E 52 aronga apiipii i rotopu ia ratou no te pupu 120 o te Apii Pipiria Punanga Tiaki o Gileada. I te ra 11 o Mati, 2006, kua rekareka te pupu tei karatuati mai i te manakonako anga i te rave anga i to te Atua anoano i roto i te au enua ke ke, noatu te au turanga ngata.
Eaa tei akakeu i teia au karatuati kia tuku i to Iehova ra anoano kia arataki i to ratou oraanga? Kua akamarama mai a Chris raua ko Leslie, e nga tokorua tei tukunaia kia tavini ei nga mitinari i Porivia, na roto i teia tu: “No te mea kua akaruke maua i to maua uaorai anoano, kua inangaro maua i te oronga ia maua uaorai ki tetai ua atu angaanga i roto i ta Iehova akaaerenga.” (Mareko 8:34) Kua akakite a Jason raua ko Chere, tei tukunaia ki Arapania, e: “Te au tukuanga angaanga katoatoa i rauka mai ia maua no ko mai i te akaaerenga a Iehova, te vai nei rai te au akaaoanga. Inara, kua kitea mai e maua e e mea tau kia oronga i to maua irinaki anga papu tikai kia Iehova.”
Akamaroiroi Anga kia Kauraro ki to Iehova Anoano
Kua akamata a George Smith, e mema aia no te pamiri i Betela te tavini ra i roto i te Tipatimani Toroa Tutu, i te porokaramu no te karatuati na roto i te pure. Kua turou mai a Stephen Lett i te katoatoa tei tae mai, e e mema aia no te Pupu Akaaere o te Au Kite o Iehova e e tiamana no te porokaramu karatuati. No te au enua e 23 te ngai i aere mai ei te au manuiri ki te Ngai Apiipii Anga Punanga Tiaki i Patterson, New York, kia tae mai ki teia atianga rekareka. Kua akakite te Taeake ko Lett ki te pupu karatuati e ka akatupu ratou i tetai “mea ririnui tikai.” Kua arataki atu aia i te manako ki te “au mea i akatumu ketaketaia”—mei te au apiianga pikikaa—ta te au mitinari ka uri ki raro na roto i te mana o te au Tuatua Tapu. (2 Korinetia 10:4, 5; NW) Kua taopenga aia: “Mei teaa atura te rekareka ka rauka mai ia koe kia taangaanga a Iehova ia koe kia uri i te au mea akatumu ketaketaia ki raro, i roto i te au tangata ngakau tika i roto i taau tukuanga angaanga!”
Kua tuatua a Harold Jackson no runga i te tumu tuatua “Te Au Manako kia Akamaaraia,” e mema aia no te aronga angaanga o te opati manga. Kua akakite aia e auraka rava e ngaropoina i te au mitinari kia tuku ‘na mua i te kimi i te basileia o te Atua, e te tuatua-tika nana ra.’ (Mataio 6:33) Kia maara ia ratou e ‘e akamaroiroi anga te aroa’ e ko te taviri mou ia e autu ei. (1 Korinetia 8:1, NW) Kua tuatua aia: “E tuku e ko te aroa te mana arataki anga i roto i to kotou pirianga ki tetai ke.”
Aru mai, kua ui a Geoffrey Jackson, e mema aia no te Pupu Akaaere tei tavini ana ei mitinari mei te mataiti 1979 e tae ua mai ki te mataiti 2003, ki te au karatuati; “Tei ia Kotou Ainei te Apainga?” Kua akakite pakari mai aia i te anoano kia akono i tetai manako tau no runga ia ratou uaorai e, e te angaanga orometua. Tei runga i te au Kerititiano te apainga kia angaanga pakari i te akatupu e te tamauu i te au ua o te tuatua mou. Inara, te tupuanga i te pae vaerua ra na Iehova ia apainga, no te mea “ko te Atua ra ko tei akatupu.” (1 Korinetia 3:6-9) Kua tuatua katoa te Taeake ko Jackson: “Te tuku nei a Iehova i te apainga ki runga ia koe kia maroiroi koe i te pae vaerua. Inara eaa taau apainga maata roa atu? Kia aroa ia Iehova e kia aroa i te au tangata taau ka tavini atu.”
Kua akamanako te tangata apii Gileada ko Lawrence Bowen i te tumu tuatua “Kia Kite Koe i Taau Akono Anga Tika.” Kua akamaara atu aia ki te aronga apiipiiia, e na Iehova i arataki temeio e i paruru i te au Iseraela i roto i te metepara. (Exodo 13:21, 22) I teia tuatau te arataki nei e te paruru nei aia ia tatou, i tetai tuanga na roto i te au ravenga o te putuputuanga Kerititiano akatainuia, “te poupou e te rangorango o te tuatua-mou.” (1 Timoteo 3:14, 15) Kia mou piri tikai te au mitinari ou i te tuatua mou, i te oronga anga i te arataki anga e te paruru anga ki te aronga akaaka.
Kua raurau a Wallace Liverance, koia tetai tangata ikuiku i Gileada, ki te au karatuati e auraka e ngaropoina ia ratou e tei “muri mai” te tuatua a te Atua ia ratou. Tei muri te tuatua a te Atua ia tatou, na roto i te tu e kua oti te Pipiria i te tataia i te anere mataiti i topa akenei. Mei tetai tiaki mamoe e kapikipiki aere ra i te anana na muri mai, tei muri a Iehova i tona au tangata, te oronga anga kia ratou i te akauenga na roto i “te tavini akono meitaki e te pakari.” (Isaia 30:21; Mataio 24:45-47) Kua tauturu te Apii Gileada i te au karatuati kia akamaata atu i to ratou ariki anga rekareka no taua pupu tavini. Kua oronga katoa mai te “tavini” i te New World Translation of the Holy Scriptures. Kua akamaroiroi te vaa tuatua i te au karatuati e: “E rave i teia putunga apinga nei no te akakitekiteanga, e kia taangaanga i te reira i te apii atu anga i tetai ke.”—Mataio 13:52.
Rave Anga i to Iehova Anoano i Roto i te Angaanga Orometua
I roto i te tuanga o te porokaramu “Kia Maroiroi i te Akakite i te Tuatua Meitaki,” kua akakite te tangata ikuiku i Gileada ko Mark Noumair i tetai au mea i tupu ana ta te au karatuati e rekareka ana i roto i te angaanga orometua i te ngai tangata i to ratou aere anga mai ki te Apii Gileada. (Roma 1:15; NW) Kua akaariia mai na roto i te au uiuianga ki tetai au karatuati e kua akaari tikai ratou i te anoano maata kia tutu aere ratou i te au atianga ravarai.
Kua rauka i te au karatuati tetai atu akamaroiroi anga na roto i tetai uriuri anga i uiuiia e Kenneth Flodin ki nga akaaere tutaka e toru, te tavini ra i teianei i Marike. Kua akamarama mai a Richard Keller raua ko Alejandro Lacayo, tei tavini ana i te Pae Tonga e i Rotopu ia Marike i te mataiti i topa akenei, e akapeea raua i te akakoromaki anga i te au timataanga tukeke e te akakite anga mai i tetai au akameitakianga tei rauka ia raua i to raua tavini anga ei nga mitinari. Kua maara ia Moacir Felisbino te tereni anga tei rauka iaia i tona angaanga piri vaitata anga ki te au mitinari i Paratiri, i te ngai i maata mai ei aia.
E toru mitinari kite karape roa atu, ko Robert Jones, ko Woodworth Mills, e Christopher Slay, ta David Schafer i uiui ana. Kua akakite mai te au taeake toko toru e i akapeea ratou i te apiiia anga kia irinaki kia Iehova me tupu mai te au turanga ngata. Kua akapapu atu ratou ki teia pupu tangata nei e te tereni anga tei rauka mai ia ratou no ko mai i te akaaerenga a Iehova, kua teateamamao meitaki ia ratou no ta ratou tukuanga angaanga mitinari. Kua akamarama mai te Taeake ko Mills i teia tu: “Kare e na te tuanga kite karape o Gileada i tauturu tikai mai iaku, mari ra na te apii i apii mai iaku no runga i te turanga akaaka e te aroa.”
Kua oronga mai te mema o te Pupu Akaaere ko Guy Pierce i te tuatua maata no te tumu tuatua, tei tapaia “Kare Rava a Iehova e Tarevake.” Kua tarevake a Adamu, inara ko te aite anga ainei e kua tarevake ta te Atua ra tuanga? Kua tarevake ainei te Atua i te anga apa kore anga ia Adamu, mei ta tetai au tangata e karanga ra? Kare roa, no te mea “kua anga te Atua i te tangata ma te tiratiratu.” (Koheleta 7:29) Kua akapapu mai to Iesu aerenga tiratiratu i raro ake i te timataanga maata roa atu i runga i te enua e “kare a Adamu kotoeanga, kare e tumu anga kia tarevake,” i akakite ei te vaa tuatua. E meangiti ake to Adamu timataia anga no te akarongo i roto i te aua kainga i Edene i te timataanga ta Iesu i aro atu ana ma te autu tikai. Inara, kua tarevake a Adamu. Noatu rai, kare rava a Iehova e tarevake. Kua tupu tana taputou. (Isaia 55:11) Kua akakite te Taeake ko Pierce ki te au mitinari ou e: “Tei ia kotou te akameitakianga no te akangateitei anga ia Iehova ma to kotou tu akaatinga anga ia kotou uaorai. Kia vai rai a Iehova i te pae ia kotou tataki tai i te au ngai e tavini ra kotou iaia ei au mitinari.”
I muri ake te akakite anga mai i te au akameitakianga a te au opati manga tukeke o te Au Kite o Iehova, kua oronga atu te tiamana, te Taeake ko Lett, ki te au karatuati i ta ratou au tiporoma e te au tukuanga angaanga. Na Vernon Wisegarver i akaoti i te pure anga no te katoatoa, e mema aia no te pamiri i Betela kua roa aia i te tavini anga.
Te manako ra te aronga e 6,872 tei tae mai e kua akamaroiroi akaouia ratou e te porokaramu no te karatuati kia rave i to te Atua ra anoano. (Salamo 40:8) Kua tuatua mai nga tangata i karatuati ko Andrew raua ko Anna e: “Kua akatapu maua i to maua oraanga kia Iehova. Kua taputou maua kia Iehova e ka rave maua i tetai au mea tana ka pati mai kia rave maua. Tei tupu mai kua pati mai a Iehova e kia aere atu maua ki Cameroon, i Aperika.” Kua inangaro raua e tetai au mema o te pupu tei karatuati i te tomo ki roto i tetai angaanga te ka oronga mai i te rekareka e te mareka anga kia ratou. Ae, kua rekareka ratou i te rave anga i to te Atua anoano.
[Pia i te kapi 17]
TE AU TU O TE PUPU
Numero o te au enua tei komonoia: 6
Numero o te au enua tei tukuia: 20
Numero o te aronga apiipii: 52
Mataiti avereti: 35.7
Au mataiti avereti i roto i te tuatua mou: 18.3
Au mataiti avereti i roto i te angaanga orometua tamou: 14.5
[Tutu i te kapi 18]
Te 120 Pupu Karatuatianga o te Apii Pipiria Punanga Tiaki o Gileada
I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.