Mareko

8 E MANGANUI te tangata i te reira au rā, e kare e kai kia kai, kua karanga aturā Iesu ki tana au pipi, na ko atura kia ratou,

2 Te tangi nei au i teianei aronga maata, i te mea ka po toru akenei ratou iaku nei, e kare e manga kia kai:

3 E kia tuku au ia ratou i to ratou ngutuare ma te pongi, e paruparu ratou i te ara: e ngai mamao oki to tetai papaki.

4 Kua na ko maira tana au pipi kiaia, Eiea te kai e raukaʼi i te medebara nei e ravaʼi i teianei aronga maata?

5 Kua ui atura aia kia ratou, Eia a kotou manga? Kua na ko maira ratou, E itu.

6 Kua akaue atura aia i te au tangata ra, e noo ki raro, kua rave iora aia i nga manga e itu ra, akameitaki atura, vavaʼi iora, e tuku atura ki tana au pipi, kia tuku atu ki mua i te aroaro o te tangata tini ra; kua tua atura oki ratou.

7 E puke ika rikiriki oki ta ratou; kua akameitaki katoa atura, e kua akaue atura, kia tuku katoaia ki mua ia ratou ra.

8 Kai iora ratou, e pangia rava akera; akaputuia iora te ungaungā kai toe ra, e itu tapora.

9 E a paa tausani taua aronga i kai ra; tuku atura aia ia ratou kia aere.

10 Aere atura aia e tana au pipi katoa ki runga i tetai pai i reira ra, tapae atura i te enua ra i Dalemanuta.

11 Kua aere maira te au Pharisea e ui mai kiaia, e e pati mai i tetai akairo no runga i te rangi, ei timata anga mai na ratou iaia.

12 Kua karanga atura aia ma te aue i roto i tona uaorai ngakau, Eaa i pati mai ei teianei uki tangata i te akairo? e tikai taku e karanga atu kia kotou na, Kare te akairo e orongaia atu ki teianei uki.

13 Akaruke atura aia ia ratou, oki akaou atura ki runga i te pai ra, ano maira ki tetai pae ra.

14 E kare te au pipi i rave mai i te kai, i ngaropoina, okotai ua a ratou manga i taua pai ra.

15 Kua ako aturā Iesu ia ratou, na ko atura, E akamaroiroi, e matakite oki i te akaopue a te au Pharisea, e te akaopue a Heroda.

16 Kua akaeatu iora ratou ratou uaorai, na ko akera, No te mea kare a tatou kai.

17 Te kite aturā Iesu, kua na ko atura aia kia ratou, Eaa kotou e akaeatu ei, i te mea kare a kotou kai? te vai ua na to kotou manako kore e te akono kore? e te vai poiri ua nei rai to kotou ngakau?

18 E mata to kotou, kare e tika kia akara? e taringa oki, e kare e tau kia akarongo? e kare aina o kotou manako?

19 Iaku i vavaʼi i nga manga e rima i nga tausani e rima ra, eia a kotou tapora i akaki i te toenga kai ra? Kua na ko maira ratou, Okotai ngauru ma rua.

20 E nga manga oki e itu i nga tausani e a ra, eia a kotou tapora i akaki i te toenga kai ra? Kua na ko maira ratou, E itu.

21 Kua karanga atura aia kia ratou, Eaa kotou i kore ei i kite?

22 E tae maira aia ki Betesaida, te aratakiia maira tetai tangata matapo kiaia ra e kua pati maira, kia akatukia atu aia kiaia.

23 Kua rave atura aia i te rima o taua tangata matapo ra, arataki atura ki vao mai i taua vila ra: e kia tutua atura ai i te uavare ki runga i tona mata, e kia tuku i te rima ki rungao iaia, kua ui atura iaia i tana i kite ra.

24 Kua nānā akera aia ki runga, na ko maira, Te kite nei au i te tangata, mei te rakau ra te tu, te aere ua ra.

25 Kua tuku akaou atura aia i te rima ki rungao i tona mata, e kua karanga atura kia nānā aia ki runga: kua puera rava atura, te kite meitaki atura aia i te tangata ravarai.

26 Kua tuku atura aia iaia i tona ngutuare, na ko atura, Auraka e tomo ki roto i te vila nei, auraka oki tetai tangata no taua vila ra e akakiteia.

27 Aere ke aturā Iesu, ma tana au pipi, i te au vila i Kaisarea Philipi ra: kua ui atura aia kia ratou i te ara ra, na ko atura, Koai au nei i ta te tangata tuatua anga?

28 Kua na ko maira ratou, Ko Ioane bapetizo: ko Elia oki, ta tetai papaki; tetai peroveta ra, ta tetai aronga.

29 Kua karanga atura aia kia ratou, Koai ra au nei i ta kotou na tuatua anga? Kua tuatua mairā Petero kiaia, na ko maira, Ko te Mesia rai koe.

30 Kua ako atura aia kia ratou, auraka rava ratou e akakite ki te tangata i taua tuatua iaia ra.

31 Kua akamata atura aia i te akakite ia ratou e, e manganui to te Tamaiti a te tangata nei mate e tikaʼi, e akarukeia aia e te aronga pakari, e te kau taunga nunui, e te au tata tuatua ra, e tamate ravaia oki, e e tu akaou kia tae ki te po toru.

32 E te akakite pu tika ra aia i te reira tuatua, kua arataki ke aturā Petero iaia, e kua ako atura iaia.

33 Kua ariu maira aia, e kua akara maira i tana au pipi, kua akamura maira ia Petero, na ko maira, Ka aere ke atu koe, e Satani, ki muri iaku: kare koe i tau i ta te Atua ra, ko ta te tangata ra taau i tau.

34 Kua karanga atura oki aia ki te tangata tini ra, ma tana uaorai au pipi, kua na ko atura, Ko tei inangaro i te aru mai iaku ra, e akaruke aia iaia uaorai, e rave i tana satauro, ka aru mai ei iaku.

35 Ko tei umuumu atu i tona uaorai ora, ka ngere aia i te ora: ko tei kopae ra i tona ora iaku, e i te evangelia nei, e ora ïa tona.

36 E eaa ta te tangata nei puapinga, kia rauka iaia to teianei ao katoatoa, e riro atura tona vaerua?

37 E eaa ta te tangata nei kia oronga ei oko i tona vaerua?

38 E teianei, ko te akama iaku, e taku nei tuatua, i teianei uki akaturi, e te rave ara, koia katoa, ta te Tamaiti a te tangata nei e akama, kia tae mai aia ma te au angela tapu, e te kakā o tona Metua.