Tu Ngateitei o te Tangata—E Tikaanga Takino Putuputuia
“Ko te au tu katoatoa o te oraanga i roto i te puakapa tetai takainga ke mai o te oraanga taakamaia e te tu akangateitei kore.”—MAGDALENA KUSSEROW REUTER, TEI ORA MAI MEI TE PUAKAPA TAPEKAANGA A TE NAZI.
NOATU te tu vinivini o te reira, kare te au angaanga rikarika o te au puakapa tapekaanga a te Nazi i te tuatau o te Tamaki II o te Ao e, ko te akamataanga e kare katoa e ko te openga ia o te takinga kinoanga ki runga i te tu ngateitei o te tangata. Me akara tatou i te tuatau i topa me kore i teia tuatau, te taka ua ra te tika e ko te: “Oraanga taakamaia e te tu akangateitei kore” kua roa i te akapera anga.
Inara, kare te au takinoanga o te tu ngateitei o te tangata, i takotingaia ki te au angaanga takinokino tei tupu mai ana i roto i te tuatua enua o te tangata. Te kitea putuputuia nei te reira na roto i tetai au mataara kikite. E akamanako ana i tetai tamaiti tei tatiaeaeia no tetai au tu o te kopapa. Me kore i tetai manuiri tei aviriia no tetai au peu “ke.” Me kore tetai tangata tei akavaavaaia no te kara o tona pakiri me kore no tona enua. Penei ki te aronga e rave ra i te reira e mea takatakata ua ia, kareka ko te mamae e te akama e kite ra te aronga e taakamaia ra kare ia i te mea katakata.—Maseli 26:18, 19.
Eaa te Tu Ngateitei o te Tangata?
Te akamarama maira tetai tikitinari i te tu ngateitei ei ‘tu me kore ei turanga tau, turanga akangateiteiia, me kore akapaapaaia.’ No reira, ko te tu ngateitei o te tangata, te o maira to tatou aerenga manako ia tatou uaorai e to etai ke tu kia tatou. Noatu e maata te au mea ka akakeu i to tatou manako ngakau no runga ia tatou uaorai, ko te mataara e manako maira me kore e akono maira etai ia tatou e tuanga maata te reira i roto i te akataka anga e koai tatou e to tatou uaorai puapinga i roto i te oraanga i te au ra ravarai.
Pouroa te au taiate tei roto te putaua, te paruru koreia, e te paruparu. Inara, kare te o anga ki roto i teia au turanga e tau kia akaiti mai i te tu ngateitei o tetai tangata. Ko te tu e te manako o etai ke ka takino i te tu ngateitei o tetai. Ko te mea tangi ra koia oki ko te aronga i roto i te au turanga taitaia te takinoia ana me kore te akavaavaaia ana to ratou tikaanga ki te tu ngateitei o te tangata. E rongo putuputu ana tatou i te au tuatua mei te “puapinga kore,” “tau kore,” e te “ngateitei kore” i roto i te akono anga takinga kino i te aronga ruaine, te putaua, me kore i te aronga maki manako me kore tei apikepike te kopapa!
Eaa ra te tangata e taakama ai i tetai e tetai? Ka rauka ainei te tikaanga tau ki te tu ngateitei o te tangata? Ka oronga mai te atikara ka aru mai i te pauanga pumaana mei te Tuatua a te Atua, koia oki te Pipiria.