Tuatua Tika​—Ko Etai ke ua Ainei ka Akapera?

“E mea riri naku te pikipikikaa, e e riri ana au me pikikaaia mai au!” i akakite ei tetai tamaine e 16 ona mataiti. E manako akapera ana rai te maataanga ia tatou. Ka inangaro tatou i te au mea ka akakiteia mai kia tatou​—noatu e e mea akakite vaaia mai me kore e mea tataia mai​—e e tika tikai te reira. Inara te akakite ra ainei tatou i te tika me akakite tatou i tetai tuatua ki etai ke?

I roto i tetai kimikimianga tei raveia i Tiamani, kua manako te maataanga i te aronga tei pau mai e “ka meitaki ua kia pikikaa no runga i tetai au mea rikiriki, ei paruru ia koe me kore i etai ke mei te kino, ae, e ka anoano katoaia te reira, no te tangata kia noo au ua ma tetai e tetai.” E kua tata tetai vaine tata nuti: “E manako meitaki te akakite i te tika e i te tika anake ua i te au taime pouroa inara ka tupu te iu.”

Penei te inangaro ra tatou e ko te tangata ua te ka tuatua mai i te tuatua tika kareka ra te manako ra tatou e e tumuanga tau to tatou i tetai au taime, kia kore e tuatua i te tuatua tika? E puapinga ainei me akakite tatou i te tika e me kare? Eaa te au openga o te tuatua i tetai mea kare i te tika?

Te Kino tei Akatupuia e te Tuatua Tika Kore

E akamanako ana i te kino ta te tuatua tika kore ka akatupu. Ka akatupu te pikikaa i te tu irinaki kore i rotopu i nga tokorua akaipoipo e i rotopu i te au mema o te pamiri. Ka takino te urutoe kare e tumuanga, i te ingoa meitaki o tetai tangata. E maata te ka pou no te angaanga pikipikikaa a te aronga angaanga e ka taopenga mai i reira ki te au apinga oko maata roa atu. Te riro nei te au pepa tero pikipikikaa no te moni tero ka akaokiia mai ki te tangata, ei akangere i te au kavamani i te moni tei anoano maataia no te rave anga i tetai au angaanga no te papuriki. Ka takino te au tuatua taviriviri a te aronga kimikimi i te au ngai angaanga memeitaki, e te taviivii i te ingoa meitaki o te au akaaerenga ingoa meitaki. Ka riro te au ravenga pikikaa kia ona vave i roto i tetai tuatau poto ua, ei keia i te aronga iniveti tei vare i te tuku i ta ratou moni i akaputu ana i to ratou oraanga katoa me kore ei akatupu i tetai mea kino roa atu. No reira rai te Pipiria i akakite mai ei kia tatou e ko tetai o te au apinga viivii maata roa atu ki te Atua ko Iehova koia oki ko “te arero pikikaa” e “te kite pikikaa, e tuatua i te tuatua pikikaa”!​—Maseli 6:16-19.

Ka akatupu te pikipikikaa e totoa ua nei i te kino ki te tangata tataki tai e ki te taiate katoatoa. E iti ua ake rai te ka patoi i taua tika ra. Eaa ra i reira te tangata e tuatua ai i te mea tika kore ma te akakoro tikai? E pikikaa ainei te au tuatua tika kore pouroa? Ka akamanako ana tatou i te pauanga ki teia au uianga i roto i te atikara ka aru mai.

[Tutu i te kapi 3]

Ka akatupu te pikikaa i te tu irinaki kore i rotopu i nga tokorua akaipoipo