Iehova, te Atua Tuatua Mou
“Kua akaora koe iaku, e te Atua tuatua-mou, e Iehova.”—SALAMO 31:5.
1. Eaa te au turanga i te rangi e i te enua i te kore anga te pikikaa?
I VAI ana tetai tuatau kare te pikikaa. Te noo ra i runga i te au rangi kitea koreia te au mea vaerua apa kore, e tavini ra i Tei Anga ia ratou, “te Atua tuatua-mou.” (Salamo 31:5) Kare te pikikaa, kare te akavareanga. Kua komunikeiti a Iehova i te tuatua mou ki tana au tamariki vaerua. Kua rave aia i te reira no te mea kua inangaro aia ia ratou e no te mea te manako oonu ra aia i to ratou tu oraanga. Te aite katoa ra taua turanga i te enua. Kua anga a Iehova i te tangata mua e te vaine, e na roto i tana mataara ikiia, kua komunikeiti ua atu aia kia raua na roto i te tu taka meitaki, tika ua, e te tuatua mou. Mei teaa ra te meitaki i te reira!
2. Naai i akamata mai i te pikikaa, e no teaa ra?
2 Inara, i te openga ra, kua anoano atu tetai tamaiti vaerua a te Atua ma te mataku kore i te akanoo iaia uaorai ei atua taemoemo, te patoi anga ia Iehova. Ko teia vaerua, tei kitea mai e ko Satani te Tiaporo, kua inangaro i tetai ke kia akamori atu iaia. E rauka ei tana akakoroanga, kua akamata mai aia i te tuatua pikikaa ei ravenga no te arataki mai i tetai ke ki raro ake i tana akatereanga. Na te raveanga i te reira, kua riro mai aia ‘e pikikaa e e metua oki no te pikikaa.’—Ioane 8:44.
3. Akapeea a Adamu raua ko Eva i te ariu anga atu ki ta Satani pikikaa, e eaa te au tupuanga?
3 Na roto i tetai ovi, kua akakite atu a Satani ki te vaine mua, ko Eva, e me akono kore aia i ta te Atua akauenga me kai i te ua rakau tei tureia, kare aia e mate. E pikikaa te reira. Kua akakite katoa aia kiaia e na te kai anga ka riro mai aia mei te Atua rai, te kiteanga i te meitaki e te kino. E pikikaa, katoa, te reira. Noatu kare a Eva i pikikaaia ana i mua ana, kua kite aia e ko tana i akarongo atu mei te ovi ra kare te reira i rotai ki ta te Atua i akakite atu ki tana tane, ko Adamu. Noatu rai, kua iki aia i te irinaki ia Satani, kare ia Iehova. Kua pikikaa meitakiia, kua rave atu aia i te ua rakau e kua kai iora. I muri mai, kua kai katoa a Adamu i te ua rakau. (Genese 3:1-6) Mei ia Eva rai, kare rava a Adamu i rongo ana i te pikikaa i mua ana, inara kare aia i akavareia. (1 Timoteo 2:14) Na roto i tana au angaanga, kua akaari aia e kua kopae aia i Tei Maani iaia. Te tupuanga ki te au tangata ravarai e tumatetenga ia. No te mea kua akarongo kore a Adamu, kua totoa atura te ara e te mate—ma te pe anga e te maata o te taitaia—ki tana uanga katoatoa.—Roma 5:12.
4. (a) Eaa ra te tu o te pikikaa tei akakiteia i roto i te kainga i Edene? (e) Eaa ta tatou ka rave kia kore e akavareia e Satani?
4 Kua totoa katoa te tuatua pikikaa. Kia kite tatou e ko taua au tuatua pikikaa tei akakiteia i roto i te kainga i Edene e au tamakianga ia ki te tu tuatua tika o Iehova uaorai. Kua tuatua pakari oki a Satani e kua akangere pikikaa ua te Atua i tetai apinga meitaki mei nga tokorua mua. Kare ra te reira i te tika. Kare a Adamu raua ko Eva i puapingaia ana mei to raua akarongo kore anga. Kua mate raua, mei ta Iehova rai i tuatua e ka pera raua. Noatu rai, kua aere ua atu ta Satani tamakianga pikikaa kia Iehova, e tae ua atu i te au anere mataiti i muri mai kua akauruia te apotetoro ko Ioane kia tata no runga ia Satani “ko tei pikikaa i to te ao katoatoa nei.” (Apokalupo 12:9) Kia kore e akavareia e Satani te Tiaporo, ka tau tatou kia irinaki pu tikai i to Iehova tu tuatua mou e tana Tuatua. Ka akapeea e rauka ei ia koe i te akatupu e te akaketaketa i toou irinaki i roto ia Iehova e te paruru ia koe uaorai mei te tuatua akavare e te au pikikaa tei akakitekiteia e Tei Patoi iaia?
Kite a Iehova i te Tuatua Mou
5, 6. (a) Eaa te kite te rauka ra ia Iehova? (e) Akapeea te kite tangata i te akaaite angaia atu ki to Iehova?
5 Te akataka putuputu maira te Pipiria ia Iehova e ko tei “anga i te apinga tini ravarai.” (Ephesia 3:9) Koia “te Atua i anga i te rangi e te enua, e te tai, e te apinga tini ravarai i roto ra.” (Angaanga 4:24) I te mea e ko Iehova Tei Anga, kua kite aia i te tuatua mou no te au mea ravarai. Ei akatutu: Ka akamanako ana i tetai tangata tei parani e oti kua akatu i tona uaorai are, te akapapaanga i te au rakau e te patiatia anga i te au naero ki roto ra. Ka kite meitaki aia ia roto e a vao i taua are ra e kua marama maata atu no runga i te reira i tetai ua atu ka akara mai. Kua kite te tangata no runga i ta ratou au mea i parani e i maani. Ma te aiteite, kua kite Tei Anga pouroa i tei anoanoia kia kiteia no runga i tana i anga ra.
6 Kua tuatua manea te peroveta ko Isaia no runga i te maata o to Iehova kite. Ka tatau tatou: ‘Koai tei aite i te moana i tona kapu-rima; e kua anga oki i te rangi i te angaonu; e kua akao oki i te one-pueu o te enua nei ki roto i te aite; e kua aite i te au maunga ra i te aite akateiaa ra, e te au tuaivi ra i te aite tautau? Koai tei aite i te vaerua o Iehova; mei te mea koia tona tumu korero i apii atu ei kiaia? Koia koai ka akaaiteite ei i te tuatua, e naai aia i apii mai, e i akakite mai i te arataa tuatua-tau ra; e i akakite mai iaia i te pakari, e i akakite mai iaia i te arataa o te karape?’ (Isaia 40:12-14) E tikai, e “Atua kite oki” a Iehova e tei “karape i te kite.” (1 Samuela 2:3; Iobu 36:4; 37:16) Mei teaa te meangiti i ta tatou i kite me akaaiteia atu! Noatu te kite umereia tei rauka i te au tangata ravarai, kare to tatou maramaanga i te au mea angaia e vaitata atu ki te ‘pae i to te [Atua] ra au aerenga.’ Mei te “tuatua koumuumu” rai me akaaiteia atu ki te “mangungu ra.”—Iobu 26:14.
7. Eaa ta Davida i kite mai no to Iehova kite, e no reira eaa ta tatou ka akatika?
7 I te mea na Iehova i anga ia tatou, e mea tau i reira e kua kite meitaki aia ia tatou. Kua kite te Ariki ko Davida i teia. Kua tata aia: “E Iehova, kua unuunumouia au e koe, e kua kitea oki au. Kua kite koe i toku noo anga ki raro, e toku tu anga ki runga; kua kite koe i toku nei manako i te atea ke. Kua unuunumou tikai koe i toku aerenga e toku moe anga ki raro, e kua kite koe i toku au aerenga katoa nei. Kare rava oki e tuatua o roto i toku vaa, i toe i te kitea puia e koe, e Iehova.” (Salamo 139:1-4) Ae, kua kite a Davida e te akono ra te tangata i te anoano rangatira—kua oronga mai te Atua i te kite kia tatou kia akarongo me kare kia akarongo kore iaia. (Deuteronomi 30:19, 20; Iosua 24:15) Noatu rai, kua kite meitaki atu a Iehova ia tatou i to tatou kite anga ia tatou uaorai. Te inangaro ra aia i tei meitaki no tatou, e ka rauka iaia i te arataki i to tatou au aerenga. (Ieremia 10:23) E tikai, kare atu e puapii, tangata karape, tangata ako i papa meitaki i te apii mai i te tuatua mou kia tatou e kia akariro ia tatou kia pakari e kia mataora.
E Tuatua Mou Oki a Iehova
8. Akapeea tatou i te kiteanga e e tu tuatua mou to Iehova?
8 E mea ke rai i te kite i te tuatua mou, inara e mea ke atu i te akakite ua anga i te tuatua mou, te akono anga i te tu tuatua mou. Ei akaraanga, kua iki te Tiaporo, auraka e “mou i te tuatua-mou.” (Ioane 8:44) Ei tukeanga, kua “ki [a Iehova] . . . i te tuatua mou.” (Exodo 34:6, NW) Te akaari putuputu maira te au Tuatua Tapu i to Iehova tu tuatua tika. Kua tuatua te apotetoro ko Paulo e ‘kare e tika i te Atua kia pikikaa,’ e kare te Atua ‘e pikikaa.’ (Ebera 6:18; Tito 1:2) E tuanga puapinga te tu tuatua mou no te tu peretana o te Atua. Ka rauka ia tatou i te akairi atu e te irinaki ki roto ia Iehova e tuatua mou oki aia; kare rava aia e akavare i tona aronga tiratiratu.
9. Akapeea to Iehova ingoa i te kapiti anga atu ki te tuatua mou?
9 Te akapapu maira to Iehova ingoa i tona tu tuatua mou. Te aiteanga o te ingoa tu-Atua koia oki “Ka Akariro Aia kia Tupu.” Te akakite mai nei teia ia Iehova e ko tei Akatupu marie ra i te katoatoa o tana i taputou ra. Kare e rauka i tetai i te rave i te reira. No te mea ko Iehova Tei Teitei Rava, kare e rauka i tetai apinga i te arai i te tupuanga o tana au akakoroanga. Kare anake a Iehova i te tuatua mou mari ra tei iaia anake te mana e te pakari kia akariro katoatoa i tana i tuatua kia tupu.
10. (a) Akapeea a Iosua i te kite anga i to Iehova tu tuatua mou? (e) Eaa te au taputou a Iehova taau i kite e kua akatupuia?
10 Ko Iosua tetai o te manganui tei kite atu i te au tupuanga umere tei akapapu mai i to Iehova tu tuatua mou. Tei Aiphiti a Iosua i to Iehova apaianga mai i te mate e tai ngauru ki rungao i taua iti tangata, te totou taki tai anga i te reira na mua. Ko tetai atu mea, kua kite atu a Iosua i te tupuanga o ta Iehova au taputou no te akaora mai i to Iseraela mei Aiphiti e kia arataki ia ratou ki roto i te Enua Taputouia, te autuanga i te au vaeau ririnui o Kanaana tei patoi ia ratou. Vaitata i te openga o tona oraanga, kua akakite atu a Iosua ki te aronga pakari o te iti tangata o Iseraela: “Kua kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.” (Iosua 23:14) Noatu kare koe i kite ana i te au temeio mei ta Iosua i kite, kua kite ana ainei koe i te tu tuatua mou o ta te Atua au taputou i roto i toou oraanga?
Akakite Mai a Iehova i te Tuatua Mou
11. Eaa te akaari maira e te inangaro ra a Iehova i te komunikeiti i te tuatua mou ki te tangata ravarai?
11 Ka akamanako ana i tetai metua ma te kite maata inara e taki tai ua ake taime e tuatua ana ki tana tamariki. Te ariki akameitaki ua ra ainei koe e kare a Iehova e mei te reira rai? Te komunikeiti aroa ua maira a Iehova ki te au tangata ravarai, e te rave ra aia i te reira ma te oronga ua. Te tapa ra te au Tuatua Tapu iaia e ko te “Pu Ikuiku Maata Rava Atu.” (Isaia 30:20, NW) Na roto i tona tu aroa takinga meitaki, te komunikeiti maira aia ki te aronga kare e inangaro ana i te akarongo ki aia. Ei akaraanga, kua tukunaia a Ezekiela kia tutu atu ki te aronga ta Iehova i kite e kare e akarongo mai. Kua tuatua a Iehova: “E te tamaiti a te tangata na, ka tu koe ka aere ki te ngutuare o Iseraela, ka karanga atu ei i taku nei au tuatua kia ratou.” I reira kua akamatakite atu aia: “Kare ra . . . [ratou] e akarongo mai ia koe; kare oki ratou e akarongo mai iaku ra: kua uouomatoa anake ra oki te ngutuare o Iseraela, e te ngakau mārokiakia.” E tukuanga angaanga ngata te reira, inara kua rave ua atu a Ezekiela i te reira ma te tiratiratu, e i te rave anga i te reira, kua akaari aia i to Iehova tu ngakau aroa. Me kite atu koe ia koe i roto i tetai tukuanga angaanga tutuanga ngata e kua irinaki koe ki runga i te Atua, penei ka papu koe e ka akaketaketa aia ia koe mei tana i rave ki tana peroveta ko Ezekiela.—Ezekiela 3:4, 7-9.
12, 13. Na roto i teea au tu ta te Atua komunikeiti anga ki te au tangata?
12 Te anoano ra a Iehova no te “tangata katoatoa kia ora, e kia rauka te kite i te tuatua-mou.” (1 Timoteo 2:4) Kua tuatua ana aia na roto i te au peroveta, na roto i te au angera, e na roto i tana Tamaiti akaperepere ra, ko Iesu Karaiti. (Ebera 1:1, 2; 2:2) Kia Pilato, kua tuatua a Iesu: “I anau mai ei au nei, i aere mai ei au ki te ao nei, e akakite i te tuatua-mou. No te tuatua-mou aia ra, ka akarongo mai ïa i toku reo.” Kua rauka ia Pilato tetai atianga puapinga no te apii i te tuatua mou no runga i ta Iehova ravenga no te ora na roto i te Tamaiti a te Atua. Inara, kare a Pilato no te tua o te tuatua mou, e kare aia i inangaro i te apii mei ia Iesu. Kareka ra, kua pau aviri atu a Pilato: “Eaa te tuatua-mou?” (Ioane 18:37, 38) Mei teaa te miianga nona! Inara, e manganui tei akarongo atu i te tuatua mou ta Iesu i akakitekite. Ki tana au pipi kua tuatua aia: “E ao ra to to kotou mata, te akara nei ïa; e to to kotou taringa, te akarongo nei ïa.”—Mataio 13:16.
13 Kua akono mai a Iehova i te tuatua mou na roto i te Pipiria e kua akariro e kia rauka te reira i te tangata katoatoa. Te akaari maira te Pipiria i te au mea mei te reira tikai. Te akataka maira te reira i to te Atua au tu, au akakoroanga, e te au akauenga, e pera katoa te tu tika tikai o te au mea a te tangata ra. Kua tuatua a Iesu na roto i te pure kia Iehova: “Ko te tuatua aau na te tuatua-mou.” (Ioane 17:17) No teia, e puka takake tikai te Pipiria. Kua tata uaia te reira i raro ake i te akauruanga a te Atua tei kite i te au mea ravarai. (2 Timoteo 3:16) E apinga aroa akaperepere ia ki te tangata ravarai, tetai te akaperepereia ra e te au tavini o te Atua. Ka pakari tatou i te tatau i te reira i te au ra.
E Mou Piri i te Tuatua Mou
14. Eaa tetai au apinga ta Iehova e karanga ra e ka rave aia, e eaa ra tatou ka irinaki ei iaia?
14 Ka tau tatou kia manako pakari i ta Iehova e akakite maira kia tatou i roto i tana Tuatua. Koia rai tana e tuatua ra nona ra, e ka rave aia i tana e tuatua ra ka rave aia. E tumu to tatou no te irinaki i te Atua. Ka rauka ia tatou i te irinaki i te reira me tuatua a Iehova e ka tuku mai aia i te “mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.” (2 Tesalonia 1:8) Te irinaki katoa ra tatou i ta Iehova tuatua me tuatua aia e te inangaro ra aia i te aronga e aruaru ra i te tuatua tika, me tuatua aia e ka oronga mai aia i te ora mutu kore ki te aronga e akono ra i te akarongo, e me tuatua aia e ka takore aia i te mamae, te aue, e te matenga. Te akaketaketa maira a Iehova i te tumu kia irinakiia teia taputou openga na oronga anga i teia ikuikuanga ki te apotetoro ko Ioane: “Ka tata ana: e tuatua-mou oki teianei au tuatua e te pikikaa kore.”—Apokalupo 21:4, 5; Maseli 15:9; Ioane 3:36.
15. Eaa etai au pikikaa ta Satani e akakitekite ra?
15 Ko Satani te tuke tikai ra mei ia Iehova. Kare e ka akamarama, te akavare ra aia. E rauka ei tana akakoroanga no te akaanga ke i te tangata mei te akamorianga mou, te akakitekite ra a Satani i te au tu tuatua pikikaa. Ei akaraanga, ka akariro a Satani e kia irinaki tatou e e mamao roa te Atua e kare e manako mai ana i te mamaeanga i te enua nei. Inara, te akaari maira te Pipiria e te manako oonu maira a Iehova i tana au mea ora e te tataraara pakari ra no te maata o te tu kino e te mamaeanga. (Angaanga 17:24-30) Te inangaro katoa ra a Satani i te tangata kia irinaki e e kaimoumou ua te aruaruanga i te pae vaerua. Ei tukeanga, te akapapu maira te au Tuatua Tapu kia tatou e “kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.” Pera katoa, te akakite taka meitaki maira te reira e “koia tei tutaki mai i te aronga i kimi tikai iaia.”—Ebera 6:10; 11:6.
16. Eaa ra te au Kerititiano i tau ei kia vai maroiroi e kia mou piri i te tuatua mou?
16 No runga ia Satani, kua tata te apotetoro ko Paulo: “Koia te aronga i akapoiriia to ratou ngakau akarongo kore e te atua o teianei ao ra, kia kore te mārama o te evangelia kakā o te Mesia, ko te tutu o te Atua ra, kia kakā mai i roto ia ratou.” (2 Korinetia 4:4) Mei ia Eva rai, te akavare pikikaaia nei tetai e Satani te Tiaporo. Te aru atura tetai ke i te aerenga o Adamu, tei kore i akavareia inara kua iki akakoro ua i te mataara o te akarongo kore. (Iuda 5, 11) No reira, e mea puapinga kia vai maroiroi e kia mou piri te au Kerititiano i te tuatua mou.
Umuumu a Iehova i te “Akarongo Pikikaa Kore”
17. Eaa ta tatou ka rave e rauka ei to Iehova tu marekaanga?
17 No te mea e tu akono tuatua mou tona i roto i tana au ravenga katoatoa, te umuumu maira a Iehova i te aronga e akamori ra iaia kia akono katoa i te tuatua mou. Kua tata te tata taramo e: “Koai, e Iehova, te ka tuitarere i toou ra puakapa? koai te ka noo i to maunga tapu ra? Ko te tangata aerenga tiratiratu, ko tei akono i te tuatua-tika ra; e ko tei tuatua i te tuatua-mou i roto i tona ra ngakau.” (Salamo 15:1, 2) Ki te ngati Iuda tei imene i taua au tuatua, te taiku anga i to Iehova maunga tapu kare e ekokoanga e kua manakoia te Maunga ko Ziona, i reira kua apai atu te Ariki ko Davida i te araka o te koreromotu ki te puakapa tei akatuia e ia i reira. (2 Samuela 6:12, 17) Kua akamaara mai te maunga e te puakapa i te ngai i noo akatutu uaia ei a Iehova. I reira ka rauka i te tangata i te akavaitata atu ki te Atua e rauka ei i te pati akatenga i tona tu marekaanga.
18. (a) Eaa te umuumuia ra no te pirianga oa ki te Atua? (e) Eaa te ka uriuriia i roto i te atikara e aru mai nei?
18 Ko tetai ua atu te inangaro ra i to Iehova pirianga oa ka tau kia tuatua i te tuatua mou “i roto i tona ngakau,” kare ma tona ngutu ua. Kia akono tika mei te ngakau te au oa o te Atua e kia oronga i te akapapuanga “akarongo pikikaa kore,” te tupu maira oki te au angaanga o te tu tuatua mou mei te ngakau. (1 Timoteo 1:5; Mataio 12:34, 35) Kare te oa o te Atua i te tangata kikite me kore akavare, no te mea ko “te tangata pikikaa ra, ko ta Iehova ïa e rikarika ra.” (Salamo 5:6) Te angaanga pakari ra te Au Kite o Iehova takapini i te enua i te akono i te tu tuatua mou i te aruanga i to ratou Atua. Ka akara te atikara e aru mai nei i teia tumu tuatua.
Akapeea Koe me Pau?
• Eaa ra a Iehova i kite ei i te tuatua mou no te au apinga ravarai?
• Eaa te akaari maira e e tu tuatua mou to Iehova?
• Akapeea a Iehova i te akakiteanga mai i te tuatua mou?
• No te tuatua mou, eaa te umuumuia ra no tatou?
[Au Tutu i te kapi 10]
Kite te Atua tuatua mou i te au apinga ravarai tana i anga
[Au Tutu i te kapi 12, 13]
Ka tupu ta Iehova au taputou