Eaa Taau ka Mou Mai Mei te Tamariki?

“A TE tamariki ua koe!” Mei te mea e tuatuaia mai taua au tuatua ra kia tatou, kare paa tatou e rekareka. Noatu to ratou tu taurekareka, te taka meitaki ua ra e kare i pakari ake te tu o te tamariki, kare i rauka ake te kite, e kare i rauka te karape, tei akapiri matau uaia ki te tu pakari.​—Iobu 12:12.

Noatu ra, i tetai atianga kua akakite a Iesu ki tana au pipi e: “Koia mou taku e karanga atu kia kotou na, Kia kore kotou e akatu keia, e kia riro mei te tamariki mea riki ra, kare kotou e o ki te basileia ra ki te ao.” (Mataio 18:3) Eaa ra te aiteanga i ta Iesu tuatua? Eaa to te tamariki au tu te ka tau te aronga mamaata kia aru?

Tatanu Anga i te Tu Akaaka Mei to te Tamariki

E akamanako ana i te turanga tei akakeu ia Iesu kia tuatua i taua au tuatua ra. Kia tae atu ki Kaperenauma i muri ake i tetai tere roa, kua ui atura a Iesu ki tana au pipi e: “I tauetono ana kotou i te aa i te arataa ra?” No te akama kua muteki ua te au pipi, no te mea kua tauetono ana ratou i rotopu ia ratou uaorai e koai tei maata atu ia ratou. I te openga, kua akatoatoa ua ratou i te ui kia Iesu e: “Koai te ka maata i te basileia o te ao?”​—Mareko 9:33, 34; Mataio 18:1.

Penei e mea umere e vaitata i te toru mataiti i muri ake i te noo anga e Iesu, ka taumaro te au pipi no runga i te taoonga me kore i te turanga. Inara, i utuutuia mai ratou i roto i te akonoanga ngati Iuda, ko tei akariro i teia au mea nei ei mea puapinga maata roa. I te akaraanga, na teia turanga akonoanga, kapiti mai i te tu apa ua o te tangata, i akakeu teia aerenga manako o te au pipi.

Kua noo iora Iesu ki raro, kua kapiki maira i te au pipi kiaia, e kua karanga atura: “Ko te tangata i anoano e, ei mua aia, ei akaopenga rava aia e tikaʼi, e ei tavini no ratou ravarai.” (Mareko 9:35) Kare e kore kua poitirere roa ratou i teia au tuatua nei. Kua akatarevake takiri te tuatua a Iesu i te irinakianga o te ngati Iuda no te tu maata! I reira kua kapiki atura a Iesu i tetai tamaiti meangiti ki te pae iaia. I te takave anga i te tamaiti ma te akaperepere, kua akaketaketa atura aia i tona manako: “Koia mou taku e karanga atu kia kotou na, Kia kore kotou e akatu keia, e kia riro mei te tamariki mea riki ra, kare kotou e o ki te basileia ra ki te ao. E teianei, ko te taakaaka iaia uaorai mei teianei tamaiti iti, koia te ka maata i te basileia o te ao ra.”​—Mataio 18:3, 4.

Kare e aiteia te pakari i teia apiianga no runga i te tu akaaka! E akamanako ana ra i taua mea ra. Te takapini ra tetai pupu tangata mamaata i tetai manga tamaiti, te akara matariki ra i taua tamaiti ra. Kare e aiteia te tu maru e te ngakau irinaki ua o te tamaiti! Kare e kaitamaki e kare e akakoro kino! E kauraro tikai e te akaaka! Ae, e akaraanga manea tikai ta tera manga tamaiti meangiti ua i akaari mai no te tu akaaka.

Taka meitaki ua te manako o Iesu. Ka anoanoia tatou pouroa kia tatanu i te tu akaaka mei to te tamariki te tu, me ka inangaro tatou kia noo i te Patireia o te Atua. I roto i ta Iehova akanoonooanga no te pamiri, kare e ngai no te tarere kaitamaki me kore no te parau. (Galatia 5:26) Ko te tika, ko teia te au tu tikai tei akakeu ia Satani te Tiaporo kia meameaau ki te Atua i te akamataanga. No reira rai a Iehova i rikarika ai ia ratou!​—Maseli 8:13.

Ka umuumu te au Kerititiano kia tavini, kare kia taangaanga i to ratou mana. Noatu e eaa te reka kore o te angaanga me kore te tu moraro o te tangata, ka akakeu te tu akaaka ia tatou kia tavini i etai ke. Ka apai viviki mai taua au tu angaanga akaaka ra i te au akameitakianga maata. Te karanga maira a Iesu: “Ko te kite mai i tetai tamaiti iti mei teianei, no toku nei ingoa, kua kite mai aia iaku; e ko te kite mai iaku ra, kare ïa ko au anake tana i kite maira, koia ra, ko tei tono mai iaku nei.” (Mareko 9:37) Ka riro te tu vaerua maoraora, akaaka, mei to te tamariki te tu, i te tavaitai ia tatou ki te Peretana teitei rava atu i te ao katoa nei e pini ua ake, e tana Tamaiti. (Ioane 17:20, 21; 1 Petero 5:5) Ka kokoti tatou i te meitaki ka rauka mai no te oronga. (Angaanga 20:35) E ka mareka roa tatou i te akatupu anga atu i te au e te tu tavaitai tei kiteaia i roto i te iti tangata o te Atua.​—Ephesia 4:1-3.

Ngoie Ua i te Apii e te Ngakau Irinaki Ua

Aru mai kua akakite a Iesu i tetai apiianga ke atu kia tamou mai te aronga mamaata mei te tamariki: “Ko tei kore e āriki i te basileia o te Atua mei te tamariki mea riki ra, kare takiri aia e o ki reira.” (Mareko 10:15) Kare te tamariki i te akaaka anake ua; e ngoie katoa ra i te apii ia ratou. “E maata tikai te au mea ka rauka ia ratou i te tamou, mei te rimu rai me akangote i te vai,” i karanga ai tetai metua vaine.

No reira, e rauka ai kia noo i te Patireia o te Atua, ka anoanoia tatou kia ariki e kia akarongo i te karere o te Patireia. (1 Tesalonia 2:13) Mei te tamariki anau ou te tu, ka anoanoia tatou kia ‘kaki tikai mei te tamariki anau ou, i te u iro koreia ra, i te tuatua, kia pakari [tatou] i te reira.’ (1 Petero 2:2) Peea i reira, mei te mea e e ngata i te marama atu i tetai apiianga Pipiria? “Kare te tamariki e akamutu i te ui ua mai rai e ‘No teaa ra?’ e na te rauka ua mai anga tetai pauanga tau ki ta ratou au uianga,” e akakite ra tetai tangata angaanga akono tamariki. E mea tau tikai kia aru tatou i to ratou akaraanga. No reira e apii ua atu rai. E tuatua ki te au Kerititiano kua rauka te kite. Pati kia Iehova i te pakari. (Iakobo 1:5) Kare e ekoko, ka akameitakiia mai taau au pure tuku kore.​—Mataio 7:7-11.

Inara penei ka manako tetai aronga e, ‘Kare ainei ra te aronga ngoie ua i te apii e akavare ngoie uaia?’ Kare te reira e tupu mei te mea e e tumu tau te arataki ra ia ratou. Ei akaraanga, e mea natura ua i te tamariki kia uri ki to ratou metua no te aratakianga. “Na te paruru anga e te akono anga i ta ratou tamariki i te au ra ravarai kua rauka i te au metua i te akapapu mai e kua tau ratou kia irinakiia,” e karanga ra tetai metua tane. Papu roa e e tumuanga tau rai to tatou kia irinaki i to tatou Metua i te rangi, ia Iehova. (Iakobo 1:17; 1 Ioane 4:9, 10) Te oronga poka kore ua mai nei a Iehova i te au aratakianga na roto i tana Tuatua i tataia. Te akapumaana e te tauturu mai nei tona vaerua tapu e tana akaaerenga ia tatou. (Mataio 24:45-47; Ioane 14:26) Na te taangaanga anga i teia au mea e orongaia mai nei e paruru ia tatou mei te kino pae vaerua.​—Salamo 91:1-16.

Ka riro katoa te tatanu anga i te irinaki i roto i te Atua mei to te tamariki te tu, i te oronga mai i te manako au. Kua akakite tetai tangata apii i te Pipiria e: “I te tamarikianga tatou ka aere ua tatou ki tetai tere ma te kore e apinga i tutaki i te patete, e ma te kore i kite e ka akapeea e tae atu ei ki te openga o to tatou tere, e oti akera kare rava tatou e manako ekoko ana e ka apai meitaki ua to tatou metua ia tatou ki reira.” Mei te reira ainei to tatou irinakianga i roto ia Iehova ia tatou e aere ra na roto i te oraanga?​—Isaia 41:10.

Ka riro te irinaki pu tikai i roto i te Atua ei tauturu ia tatou i te kopae i te au tu e te au angaanga te ka takino i to tatou turanga pae vaerua. Kareka ra, kua irinaki papu tikai tatou i te au tuatua a Iesu e kua kite ua to tatou Metua i te rangi i ta tatou au angaanga e me na mua tatou i te kimi i te Patireia e te tuatua tika na te Atua, ka akono mai te Atua ia tatou. Ka tauturu teia ia tatou i te patoi i te timataanga kia akara tamou ki te au mea materia i te kopae anga atu i reira i te au apainga pae vaerua.​—Mataio 6:19-34.

“Kareka i te Kino ra, Ei Tamariki ïa Kotou”

Noatu e i anau apa ia mai, e manea tikai e te tiama te ngakau e te manako o te tamariki mea riki. No teia tumu, te raurau maira te Pipiria i te au Kerititiano e: “Kareka i te kino ra, ei tamariki ïa kotou.”​—1 Korinetia 14:20.

Ka akamanako ana ia Monique e rima ona mataiti, tei rere ua i te rekareka i te akakite anga ki tona mama e: “E oa ou toku ko Sarah, e rouru mingi mingi tona mei toku rai!” Kare roa te kara tuke o te pakiri e to Sarah iti tangata i taikuia mai ana. Karanga tetai metua e: “Kare te tamariki e kite ana i te tuke i rotopu i te au kara. Kare takiri ratou e manako atu ana i te tu o te tangata me kore e akavaavaa ana.” I roto i teia tu, e manea tikai te akaata mai anga te tamariki i te manako o to tatou Atua papakitai kore, ko tei inangaro i te au tangata ravarai o te pa enua.​—Angaanga 10:34, 35.

E mea umere tikai to te tamariki tu kite i te akakore apa. Karanga mai tetai metua: “Me ta ta a Jack raua ko Levi, e akakite ana maua e kia tataraara raua, e kare e roa te kangakanga mataora akaou ra raua. Kare raua e akariri riri ana, e kare e kopekope ana i tei tupu, e kare e maro mai ana na mua ake ka akakore mai ei i te apa. Ka akaau ua raua e oti kua kanga akaou.” E akaraanga meitaki tikai no te aronga mamaata kia aru!​—Kolosa 3:13.

Tetai katoa, ka ariki vave ua te tamariki mea riki e e Atua tetai. (Ebera 11:6) Maata te taime e riro ana to ratou tu natura i te akakite i te tika ei akakeu ia ratou kia akakitekite ma te mataku kore ki etai ke. (2 Ariki 5:2, 3) E riro ua ana ta ratou au pure ngoie ua, i te akatukia i te au ngakau marokiakia roa atu. E me rokoia e te timataanga, e mea umere tikai to ratou tu maroiroi i te pae akono tau e akaari mai ana. E apinga aroa akaperepereia te au tamariki mea riki!​—Salamo 127:3, 4.

Akaoki Akaouia te Tu Manea

Penei ka umere koe e me, ‘Ka rauka ainei i te aronga mamaata i te akaoki akaou mai i to ratou au tu manea i te tamarikianga?’ Te pauanga mama ua e te pumaana koia oki ae! Te akapapu ua maira te akaueanga a Iesu kia “riro mei te tamariki mea riki ra” e ka rauka.​—Mataio 18:3.

Ei akatutuanga: Penei ka angaanga tetai pupu tangata akaou i te au angaanga ati ki runga i tetai tutu oko maata. I te rave anga i te reira kua akaatea ratou i te repo e petetue ua ra i runga, e kua akatuke takiri i te au angaanga mako kore tei raveia ana i te au taime i akaouia ai i muao. Te oti anga te aka angaanga maata a te aronga akaou, kua akaari akaouia mai te au kara tou ua e te tu manea natura tikai o te tutu kia kite ua te katoatoa. Mei te reira katoa rai tatou, ma te aruaru tuku kore, te tauturu a te vaerua tapu o Iehova, e te turuturuanga akaperepere a te putuputuanga Kerititiano, ka rauka i te akaoki akaou mai i te au tu manea tei uua natura ua ana i to tatou tamarikianga.​—Ephesia 5:1.

[Tutu i te kapi 9]

E tu akaaka ua to te tamariki

[Tutu i te kapi 10]

Kare te tamariki mea riki e akavaavaa ana, e ka viviki ua ratou i te akakore e te akangaropoina i te apa