Amosa e Tangata Akaputuputu me Kore e Tangata Kotikoti Suke Ainei?
I TE tuatau o te iva anere mataiti M.T.N., kua akaueia te peroveta ko Amosa e te taunga kino ra ko Amazia, tei akamori ana i te puakatoro, kia akamutu i tana angaanga totouanga i roto ia Iseraela. Kua patoi a Amosa, i te na ko anga: “E tiaki puakatoro ra au, e e [“kotikoti suke,” NW] sukamino oki: Kua rave mairā Iehova iaku, ka aru aere ei au i te anana ra, e kua tuatua mairā Iehova kiaku, Ka aere, ka totou ki toku au tangata kia Iseraela.” (Amosa 7:14, 15) Ae, na Iehova i tono atu ia Amosa ei peroveta; kare e nana uaorai i manako mai i teia. Inara eaa te aiteanga o ta Amosa tuatua e e tangata “kotikoti” suke aia no te au pu rakau tukamino?
E tai ua rai taime e kiteia ana teia tuatua Epera i roto i te New World Translation. I tetai au urianga ke mai a te au aronga urianga Pipiria kua uri ratou i teia tuatua ei “tangata akaputuputu,” “tangata akaau,” “tangata topetope,” me kore e “tangata tanutanu,” kare ei “tangata kotikoti” suke tukamino. Inara, te karanga ra te tianara Economic Botany e te urianga tano atu no teia tuatua e “tangata koputaputa” no te mea te akakite maira teia tuatua i te angaanga tikai a tetai tangata akaau no te au suke tukamino.
Te angaanga kotikoti me kore koputaputa anga, koia oki, te koputaputa anga i te au suke tukamino, kua kite meitakiia i Aiphiti e i Kupero mei te au tuatau taito mai. Kare te koputaputa anga, me kore te kotikoti anga, e rave akaouia ana i Iseraela i teia tuatau nei no te mea e tukeke te au tu suke e akatupuia ana i roto i te reira enua. Inara, e rave ana te au Iseraela i te kotikoti anga i te tuatau ia Amosa, i te mea e te au tukamino e tupu ra i Iseraela i taua taime ra, no Aiphiti mai te reira.
I te akaraanga, na te koputaputa anga i te au suke, ka rauka te reira i te akangote i te vai e te akamaata atu i tona vai. Te akamaata katoa ra te reira i te ethylene gas, e na teia e akaviviki atu i te para anga, ei tupuanga e mamaata te ua suke e te vene katoa. Kapiti katoa, kare te rango patia e kanga mai i te ua no te mea kua para viviki ua te reira.
Noatu tona tupuanga akaaka ei tiaki mamoe e ei tangata kotikoti suke ra, kare a Amosa i mataku ana i tona au enemi. Mari ra, kua akakite mataku kore aia, i te karere akavaanga a Iehova kia Iseraela. E akaraanga meitaki tikai te reira no te au tavini o te Atua i teia tuatau, tei akakite katoa nei i tetai karere reka koreia!—Mataio 5:11, 12; 10:22.