Auraka e Emiemi!
1. I teea mataara ka kore ei tatou e “tāpu i te meitaki”?
1 Na te piri maroiroi anga ki roto i te akakiteanga i te tuatua meitaki o te Patireia o te Atua, kare tatou e “tāpu i te meitaki” mei te aronga i roto i ta tatou ngai tutu anga. (Mase. 3:27) Kare atu e karere meitaki atu i te oronga ki te au tangata ravarai mari ra ko te au tuatau meitaki ki mua i raro ake i te tutara a te Atua. Noatu e ka akakite maoraora ua koe i te manakonakoanga Patireia na te akakitekite ua anga me kore i te oronga anga i te au puka, kore koe e akariro ei akakoroanga naau kia akono i tetai apii Pipiria, me kare koe i rave ake i te reira?
2. Eaa tatou ka emiemi ei i te akamata i tetai apii Pipiria?
2 I tetai au taime, ko tetai arairaianga maata rava ki te akonoanga i tetai apiianga Pipiria koia oki ko to tatou manako no runga i te reira. E emiemi ana tetai pae i te akonoanga i tetai apii Pipiria no tei ngere i te tukatau me kore no te maata i ta ratou angaanga. Penei ka tauturu te au tamanakoanga e aru mai nei ia koe kia kore koe e emiemi i te piri atu ki roto i te angaanga apii Pipiria.—Mata. 28:19; Anga. 20:20.
3. Eaa tatou i tau ei kia apii i te Pipiria?
3 Ngere i te Tukatau: Penei e iti ua toou kite apii me kore no etai atu au tumu te ngere ra koe i te tukatau i roto i toou kite i te akono i tetai apii Pipiria. Te au orometua Kerititiano tukatau i te anere mataiti mua, e aronga ‘apii koreia e te kite kore.’ Eaa tei tauturu ia ratou i te apii atu i te tuatua mou ki etai ke? ‘Ia Iesu katoa ra oki ratou.’ (Anga. 4:13) Kua apii ratou mei te Puapii Maata, ko Iesu, e kua tataia tana au apiianga e te au ravenga no tatou i roto i te au Tuatua Tapu. Noatu me kua kotingaia toou kite apii, te rauka nei ia koe te apiianga pae vaerua tei aite koreia ki tetai ua atu apiianga.—Isa. 50:4; 2 Kori. 3:5.
4. Eaa ta tatou ka kite mai mei te akaraanga o Amosa?
4 I tetai taime kua taangaanga a Iehova i te au peroveta kia ako i te au tutara tarevake me kore i etai atu i roto i te turanga teitei. Tetai pae, mei ia Amosa rai, e tupuanga akaaka ua tona. Kua karanga a Amosa e: “Kare au i te peroveta; kare katoa oki au i te tamaiti a te peroveta; e tiaki puakatoro ra au, e e akaputuputu sukamino oki.” (Amo. 7:14) Noatu ra, kare a Amosa i emiemi ana i te oronga atu i te karere akavaanga a Iehova ki te taunga akamori puakatoro ko Amazia. (Amo. 7:16, 17) Kia akamaara ua rai tatou e te rave ra tatou i te angaanga a te Atua e nana e tauturu mai ia tatou kia tukatau no tana angaanga.—2 Timo. 3:17.
5. Eaa tatou ka aruaru ei i te akamata i tetai apii Pipiria noatu e e maata ta tatou angaanga?
5 Maata te Angaanga: Noatu e e maata taau angaanga, papu e kua akanoo ke ana koe i te tuatau kia piri putuputu atu ki roto i te angaanga orometua. Ko te akonoanga i tetai apii Pipiria, ko tetai tuanga mataora roa atuia o te angaanga orometua. E tikaanga manea tikai i te kite anga i ta Iehova Tuatua e angaanga ra i roto i te oraanga o tetai tangata. (Ebe. 4:12) E mareka ana a Iehova me akono tatou i te au akaatinga uaorai i te tauturu i tetai tangata kia “rauka te kite i te tuatua-mou.” (1 Timo. 2:4) E mataora katoa ana te au angera me tataraara tetai tangata i tona oraanga i mua atu ana e te tere ra ki mua i te pae vaerua.—Luka 15:10.
6. Eaa te tuanga ngateitei tei rauka ia tatou i te rave i te anoano o te Atua?
6 Te inangaro ra te Atua “i te tangata katoatoa kia ora, e kia rauka te kite i te tuatua-mou.” (1 Timo. 2:4) E tuanga ngateitei tikai ta tatou i te angaanga rotai anga ki te anoano o te Atua, kare e emiemi ana i te akonoanga i te au apii Pipiria!