Aere Vaitata Atu ki te Marama

KUA riro ana te au are turama ei akaora i te au oraanga e manganui. Ki tetai tangata teretere tei roiroi, e maata atu ta te marama e kite mamaoia atura ka rave, i to te akamatakite ua mai i te au akau kino. Ka akakite katoa mai te reira e te vaitata maira te ngai e akakoro ra aia. Aiteite rai ki te reira, te vaitata katoa atura te au Kerititiano i teia tuatau ki te openga o tetai tere mamao, tei arataki mai ana ia ratou na roto i tetai ao poiri e te kino i te pae vaerua. I roto i te Pipiria, kua akaaiteia te tangata nei​—te manganui tei takake mai mei te Atua​—ki “te tai oripu ua nei; kare rava oki e akaea anga; na tona au ngaru oki e akapeke i te vari, e te repo.” (Isaia 57:20) Te koropiniia nei te iti tangata o te Atua e taua tu ra. Noatu ra, e manakonakoanga manea tikai to ratou no te ora, tei riro ei marama akatutu ua no ratou e te tau kia irinakiia. (Mika 7:8) Kia akameitakiia a Iehova e tana Tuatua, “kua ruruia te mārama na te aronga tuatua-tika ra, e te rekareka na te aronga e tiratiratu te ngakau ra.”​—Salamo 97:11.a

Tetai au Kerititiano ra, kua akatika ratou i te au akanauruanga kia akatatipake ia ratou mei te marama o Iehova e takinoia atura to ratou akarongo mei te pai rai tei parari ki runga i ta tatou ka akaaite ki te au toka kikino​—koia te noinoi apinga materia, te angaanga tau kore, me kore te apoteiti. Ae, mei te anere mataiti mua, tetai papaki “kua akangaa pai oki i [to ratou] akarongo.” (1 Timoteo 1:19; 2 Petero 2:13-15, 20-22) Penei ka tau kia akaaiteia te ao ou ki te ava maata e akatika atura tatou ki reira. I na e te vaitata roa maira te reira i teianei, kare e aiteia te aka tumatetenga no tetai kia ngere i ta Iehova akaperepereanga!

Kopae i te ‘Akangaa Pai i Toou Akarongo’

I te au anere mataiti i topa, penei e mamao te area i te teretere meitaki ua mai anga tetai pai na te moana noatu ra penei ka parari te reira i te vaitata mai anga ki te ava. Te maataanga i te taime ko te tuanga kino roa atu o te tere, e tupu ana te reira i te taime e vaitata maira te pai ki te enua. Mei koia katoa no te manganui, ko te tuatau kino roa atu i roto i te tuatua enua o te tangata koia oki ko “te au ra openga” o teia akatereanga o te au mea nei. Tano meitaki te akatakaanga te Pipiria i teia ei “kino maata,” no te au Kerititiano akatapuia tikai.​—2 Timoteo 3:1-5.

Eaa ra teia au tuatau openga i ngata ai? No te mea kua kite a Satani e “e manga tuatau poto ua” tona e vai nei no te tamaki i te iti tangata o te Atua. No reira aia i akapakari atu ei i tana kamupeini kino ei takino i to ratou akarongo. (Apokalupo 12:12, 17) Inara kare tatou i ngere i te tauturu. Te riro ua nei rai a Iehova ei akapuanga no te aronga e akarongo i tana ako. (2 Samuela 22:31) Kua oronga mai aia i te au akaraanga akamatakite no tatou ei akaari pu ua mai i ta Satani au ravenga kikite e te kino. Ka akamanako ana tatou e rua nga akaraanga e o maira te iti tangata Iseraela ia ratou e vaitata atura ki te Enua Taputouia.​—1 Korinetia 10:11; 2 Korinetia 2:11.

Vaitata ki te Enua Taputouia

Raro ake i te aratakianga a Mose, kua akaoraia mai te iti tangata Iseraela mei Aiphiti. Kare i roa, kua vaitata atu ratou ki te kena i te tua tonga o te Enua Taputouia. I reira kua tono a Mose e 12 tangata kia tutaka i te enua. E ripoti taitaia ta e tai ngauru au tangata tutaka tiratiratu kore i akaoki mai, te karanga anga e kare e puapingaia to Iseraela kia tamaki atu i to Kanaana no te mea e aronga “mamaata anake” e te ririnui to ratou nuku vaeau. Eaa ra ta te reira i akatupu ki te ngati Iseraela? Te akakite maira te papaanga e kua akamata ratou i te koumuumu ia Mose raua ko Aarona, i te na ko anga e: “Eaa oki tatou i aratakiia mai ei e Iehova ki teianei enua, kia mate i te koke, e kia riro ta matou au vaine e ta matou au tamariki? . . . E akataka ana tatou i tetai arataki ia tatou, e oki tatou ki Aiphiti.”​—Numero 13:1, 2, 28-32; 14:1-4.

E akamanako ua ana! Kua kite mata ana teia aronga tikai ia Iehova i te taakama anga i te mana ririnui ko Aiphiti​—te mana tutara o taua tuatau ra​—na roto i te au mate kino e tai ngauru e tetai temeio vavaria roa i te Tai Muramura. E tei mua ua ia ratou te Enua Taputouia, ka anoano uaia ratou kia aere vaitata atu ki te reira mei te pai e aere vaitata atu ra ki te marama e akairo ra i te ngai e akakoro ra aia. Inara kua irinaki ratou e kare e rauka ia Iehova i te akavi i te au patireia puapinga kore ua o te au oire o Kanaana. Kare e kore kua riro teia tu ngere i te akarongo ei akataitaia i te Atua e nga tangata tutaka ngakau toa, ko Iosua raua ko Kaleba, tei karanga e ko Kanaana mei te “manga ïa na [Iseraela]”! Kua ripoti mai taua tokorua ra i ta raua i kite mata, no te mea kua aere tikai raua na roto ia Kanaana. I te kore anga te tangata i tomo ki roto i te Enua Taputouia, kua maroia rai a Iosua raua ko Kaleba kia noo atu rai ki roto i te metepara no tetai au rau ngauru mataiti, inara kare raua i mate ana ki reira ma te aronga tiratiratu kore. Ae, na Iosua raua ko Kaleba i tauturu i te arataki i te uki tei aru mai ki vao i te metepara e ki te Enua Taputouia. (Numero 14:9, 30) I teianei i te aere atu anga no te rua o te taime, kua aro atu a Iseraela i tetai timataanga ke. Ka akapeea ra ratou?

Kua timata a Balaka te Ariki o Moabi i te taumaa ia Iseraela na roto i te peroveta pikikaa ko Balaama. Inara, kua araiia e Iehova teia ravenga na te maani anga ia Balaama kia oronga i te au akameitakianga, eiaa te taumaaanga. (Numero 22:1-7; 24:10) Kare i tuku i te au, kua akamata akaou mai a Balaama i tetai parani kino ke, tei akakoroia kia kore e rauka i te iti tangata o te Atua te enua. Akapeea ra? Na roto i te akanauru anga ia ratou kia akaturi e kia akamori ia Baala. Noatu kua puapinga kore katoa teia ravenga, kua taopenga mai ra te reira ki roto i te akavare angaia e 24,000 ngati Iseraela. Kua akaturi ratou ki te au vaine o Moabi e kua akapiri atu ia ratou uaorai kia Baala o Peora.​—Numero 25:1-9.

E akamanako ana ra i tera! E manganui ua atu o taua au ngati Iseraela ra tei kite ana i te arataki mai anga a Iehova ia ratou na roto i “taua medebara maata rikarika ra.” (Deuteronomi 1:19) Inara, kia tae tikai ki te kena o ta ratou tuanga, kua inga rai e 24,000 o to te Atua au tavini ki te au anoano o te kopapa e kua tamateia atura e Iehova. E akamatakiteanga tikai teia ki to te Atua iti tangata i teia tuatau ia ratou e vaitata atura ki tetai tuanga ngateitei maata rava atu!

I roto i tana tautaanga openga kia arai i te au tavini o Iehova i teia tuatau kia kore e rauka ta ratou tutaki, kare e anoanoia tetai au ravenga ou na Satani. Na roto i tetai ravenga e akamaara maira ia tatou i tei tupu i to Iseraela akavaitata mua atu anga ki te Enua Taputouia, e titau putuputu ua ana a Satani i te akatupu i te mataku e te ekoko, na roto i te au tamatakuanga, te takingakino, me kore i te aviri. Kua tuku ua atu tetai au Kerititiano ki taua tamatakuanga ra. (Mataio 13:20, 21) Tetai ravenga ke tei puapingaia i te au tuatau koia oki ko te takino i te tu akono tau o te tangata. I tetai au atianga, kua tauta ana tetai aronga tei aere mai ki roto i te putuputuanga Kerititiano i te takino i te aronga apikepike i te pae vaerua e tei kore e aaere papu tika ana i roto i te marama o te Atua.​—Iuda 8, 12-16.

Ki te aronga rako tangata pakari e te matakite, ko te turanga moraro viivii roa o te tu akono tau e tupu viviki nei ki teia ao, e akairo ririnui tikai te reira no to Satani turanga taitaia. Ae, kua kite a Satani e kare e roa atu ana kare e rauka akaou iaia i te takino i to te Atua au tavini tiratiratu. No reira e taime tau tikai teia no tatou kia vai matakite ua i te pae vaerua ki ta Satani au tautaanga.

Tauturu kia Vai Matakite i te Pae Vaerua

Kua akataka mai te apotetoro ko Petero i te tuatua totou a te Atua mei “te lamepa e kakā ua i te ngai poiri ra,” no te mea ka tauturu te reira i te au Kerititiano kia kite e kia marama i te akatupuanga o to te Atua akakoroanga. (2 Petero 1:19-21) Te aronga ka akatupu i te inangaro no te Tuatua a te Atua e tuku atu rai kia aratakiia e te reira, ka kite ratou e ka akatikatika a Iehova i to ratou arataa. (Maseli 3:5, 6, NW) No tei ki taua aronga akono mou ra i te manakonakoanga, kua ‘imene ratou i te rekareka ngakau ra,’ kareka te aronga kare i kite ia Iehova me kore tei akaruke i tona arataa e “mamae ngakau” ia i te openga e te “atiati anga o te vaerua” ra. (Isaia 65:13, 14) No reira, na roto i te apii maroiroi i te Pipiria e te taangaanga i ta tatou i kite, ka rauka ia tatou i te akatinamou i to tatou mata ki runga i te manakonakoanga mou e kare ki runga i te au mea navenave poto ua o teia akatereanga o te au mea nei.

E mea puapinga katoa te pure ki to tatou vai ara ua anga i te pae vaerua. I te tuatua anga no runga i te openga o teia akatereanga o te au mea nei, kua akakite a Iesu e: “E tenana, e ara kotou, e tamou tikai i te [“pati anga,” NW] kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.” (Luka 21:34-36) Akara ana i te taangaanga anga a Iesu i te tuatua “pati anga,” koia oki e tu akatenga tikai no te pure. Kua kite a Iesu e ka takinoia te raukaanga o te ora mutu kore i teia tuatau kino maata. Te akaata maira ainei taau au pure i toou anoano ngaueue kore kia vai ara pu ua i te pae vaerua?

Auraka tatou e akangaropoina e ko te tuanga kino roa atu o te teretereanga ki ta tatou tuanga penei e ko te tuanga openga rai ia o te tere. No reira, e mea puapinga tikai e auraka rava tatou e akangaropoina i te marama te ka arataki ia tatou ki to tatou ora.

Kia Matakite i te Marama Pikikaa

I te au tuatau o te au pai teretere, ko tetai tu kino e akatupuia ana na te au tangata kino e iki ana i te au po kare e marama no te mea ka ngata i reira i te au mataro kia kite i te enua. Penei ka tuku aere teia au tangata i te au mori ki te au ngai kino tikai i te pae taatai i te akavare i te au rangatira pai kia taui i to ratou kaveinga. Ko te aronga e vare ana penei ka parari to ratou pai, ka aruia ta ratou kako, e ka pou te oraanga.

Na roto i te tu aiteite, te inangaro nei a Satani, te ‘angela pikikaa katoa no te mārama,’ i te takore i te pirianga o to te Atua iti tangata Kiaia. Penei ka taangaanga te Tiaporo i te au “aposetolo pikikaa” e te “au tavini [apoteiti] no te tuatua-tika” i te akavare i te aronga vare ua. (2 Korinetia 11:13-15) Inara mei te rangatira e te mataro matakite e te karape kare i vare ana i te marama pikikaa, mei te reira katoa te au Kerititiano “no te mātau i kite ei to ratou ngakau i te meitaki e te kino” kare e vare i taua aronga turuturu i te au apiianga pikikaa e te au apiianga akakino a te tangata.​—Ebera 5:14; Apokalupo 2:2.

E apai aere ana te au mataro pai i tetai papaanga no te au are turama ta ratou ka kite i te ara. Te akakite maira te papaanga i te au tu o te are turama tataki tai, kapiti mai i ta te reira uaorai au tikinara takake. Te akakite ra The World Book Encyclopedia e: “E akataka ana te au mataro e ko teea are turama ta ratou e kite atura​—e te ngai katoa te reira ratou​—na te tirotiro mata anga i te tu o te are turama e te akara anga i te papaanga o te au mori.” Aite rai ki te reira, ka tauturu te Tuatua a te Atua i te aronga tika te ngakau kia kite i te akamorianga mou e te aronga e aruaru ra i te reira, i teia au tuatau openga tikai e akateitei nei a Iehova i te reira kia teitei rava atu i te akonoanga pikikaa. (Isaia 2:2, 3; Malaki 3:18) I te akataka meitaki mai anga i te aka tuke i rotopu i te akamorianga mou e te mea pikikaa, te na ko maira a Isaia 60:2, 3 e: “E tapokiia oki te enua nei e te poiri, e te au tangata i te poiri tangotango ra: e iti mairā Iehova ki runga ia koe, e kitea ua ïa mai oki tona kakā ki runga ia koe ra. E aere mai oki te pa enua ki toou ra mārama, e te au ariki oki ki te kakā o toou ra kake anga ki runga.”

I te au mirioni ua atu o te pa enua katoatoa e arataki mouia atura e te marama o Iehova, kare rava to ratou akarongo e rokoia e te kino i te tuanga openga o to ratou tere. Mari ra, ka tere meitaki ua ratou na roto i te au ra toe o teia akatereanga o te au mea nei e tae atu ei ki roto i te akapuanga ponuiaau ua o te ao ou.

[Tataanga Rikiriki i Raro]

[Tutu i te kapi 15]

Mei te au mataro rai, e matakite ana te au Kerititiano auraka e akavareia e te au marama pikikaa