Maara Ainei ia Koe?

Te ariki rekareka ra koe i te tatau anga i te au itiu ou o Te Punanga Tiaki? Akara ana ra, me ka rauka ia koe i te pau i te au uianga ka aru mai:

• Eaa ta te au metua tane ka kite mai mei te au tuatua a te Atua ko Iehova kia Iesu i muri ua ake i tona papetitoanga?

E toru apinga ta te au metua tane ka kite mai mei te au tuatua a te Atua ko Iehova. Te mea mua, na te akakite anga e e Tamaiti a Iesu nana te akaari maira a Iehova i te tu arikianga e te tu manako anga. Te orongaia ra ki te tamariki te akapapu anga me manakoia atu ratou ei au mema takake no te pamiri na roto i taua au tuatua ngakau tae ra. Te rua, kua akaari mai a Iehova i tona aroa no tana Tamaiti. Ka tauturu te au akakiteanga maoraora o te aroa na roto i te tuatua e te angaanga kia tupu ruperupe te tamariki. Te toru, kua akaari mai a Iehova i tona tu mareka rava i tana Tamaiti. Te akara ra tetai metua tane aroa i te au atianga kia akakite atu ki tana tamariki e te rekareka ra aia i te au mea meitaki ta ratou e tuatua ra me kore e rave ra. Te akaketaketaia ra e te akamaroiroiia ra te tamariki me akakite te metua e te akaperepereia ra ratou.​—Tia.-Mati, kapi 25.

• I naea te aronga akara etu i atoro atu ei ia Iesu?

Te akakite maira tetai tataanga Pipiria e: “Kare te Taunga Purepure i atoro ana ia Iesu i roto i te are puakatoro i te po o tona anauanga mei ta te au tiaki mamoe rai i rave. Kua aere mai ratou i nga mea marama i muri mai.” E “tamaiti iti” ua a Iesu i te reira taime e te noo ra i roto i tetai are. (Mata. 2:7-11) Naringa e kua orongaia kia Iesu te auro e te au apinga puapinga i te po i anauia ai aia, ka oronga ua ainei a Maria e rua manu rikiriki i ko i te iero e 40 ra i muri ake?​—Tia.-Mati, kapi 31.

• Eaa ta te manganui ka rave kia akapuapinga i to ratou oraanga?

Penei ka ui tetai e, ‘Ka rauka ainei iaku i te akatanotano i toku au turanga e te akamama mai i te tu o toku oraanga?’ Kua rave a Amy i te reira. Kua puapingaia aia inara kare ra e mataora ana. Kua kite mai aia e na te aruaru anga i tetai ngai angaanga i roto i teianei ao kua vaitata takiri aia i te taka ke rava mai mei te akarongo. No reira, kua iki aia i te tuku i te au anoano o te Patireia na mua e kua rauka i te painia no tetai tuatau. Kua karanga a Amy e, “Teianei te kite nei au i te tu merengo mou tikai tei kore roa au i kite ana” i te aruaru anga i te au akakoroanga na teianei ao.​—1/15, kapi 19.

• Ko teea “uki” ainei ta Iesu e taiku maira i roto i tana au tuatua tei rekotiia i roto ia Mataio 24:34?

E taangaanga putuputu tau kore ana a Iesu i te kupu “uki” i te tuatua anga ki te me kore no runga i te au tangata rave kino. Inara kare aia i rave ana i te reira i roto i teia turanga i tona tuatua anga ki tana au pipi, e kare e roa atu ana ka akatainuia ratou e te vaerua tapu. Ko ratou te aronga te ka kite meitaki i te au taopenga anga tei taikuia i roto ia Mataio 24:32, 33. No reira i te akara anga te tuatua ra a Iesu ki tana au pipi akatainuia, to te anere mataiti mua e i teia tuatau no tana au tuatua.​—2/15, kapi 23-4.

• Kia tau kia Iakobo 3:17, eaa te au tu ta tatou ka akaari?

Kia vai iro koreia, te anoanoia ra tatou kia patoi vave ua i te au apinga kino. (Gene. 39:7-9) Kia vai ponuiaau katoa ua tatou, i te kopae anga i te tu ae me kore i te au angaanga te ka takino i te au. No reira e mea meitaki no tatou tataki tai kia ui kiaia uaorai e: ‘Te kiteaia ra ainei au ei tangata akatupu au me kore e tangata akatupu pekapeka? E manamanata putuputu ana ainei au ki tetai ke? Te riri vave ua ra ainei au, me kore te akariri atura au i tetai ke? Me kore kua papa ua ainei au i te akakore i te apa e kare e maro viviki atu e kia aru ua mai i toku uaorai au turanga?’​—3/15, kapi 24-5.