Akapeea Koe me Vaito i te Manuia?

KUA oronga mai tetai tikitinari i te aiteanga o te manuia e ko “te rauka anga mai o te moni maata, te akapaapaa anga, me kare te rongonui.” Ko te reira ainei te aiteanga ki katoa? Ko te moni maata ainei, te akapaapaa anga, me kare te rongonui te au vaito anga o te manuia? I mua ake ka pau mai ei koe, e akamanako no runga i teia: Kare i rauka mai ia Iesu te au mea puapinga materia i roto i tona tuatau oraanga. Kare i rauka mai iaia te akapaapaa anga a te tangata e manganui; kare katoa aia i akamanako maataia ana e te au tangata puapinga i tona tuatau. Inara, e tangata manuia tikai a Iesu. Eaa ra?

I runga i te enua nei, e “maata [to Iesu] apinga i te Atua ra.” (Luka 12:21) I muri ake i tona tuakaouanga, kua akapuapinga te Atua iaia na te akakoronaanga iaia “i te kakā e te mana.” Kua akateitei rava Iehova i tana Tamaiti “e kua oronga mai i te ingoa i maata ua atu i te teitei i te au ingoa ravarai nei nona.” (Ebera 2:9; Philipi 2:9) Kua akarekareka te ora anga o Iesu i te ngakau o Iehova. (Maseli 27:11) Kua manuia tona oraanga i te enua nei no te mea kua akaoti te reira i ta te reira akakoroanga. Kua rave a Iesu i te anoano o te Atua e kua apai mai i te akangateitei anga ki Tona ingoa. No reira, kua akangateitei te Atua ia Iesu ma te puapinga maata, te akapaapaa anga, e te rongonui kare tetai tangata kite, tetai tangata poritiki, me kare tetai tangata tarekareka e kite tikai. Ko Iesu tikai te tangata manuia maata rava atu tei aaere na runga i te enua.

Kua kite te au metua Kerititiano e me aru ta ratou tamariki i te au takainga vaevae o Karaiti, te akapuapinga anga ki te Atua mei te tu o Iesu, ka rauka mai ia ratou te au akameitakianga apinganui i teianei e ka rekareka i te au tutakianga kare i akamanakoia i te akatereanga ou te aere maira. Kare e mataara meitaki rava atu no tetai mapu ou kia aru i to Iesu takainga vaevae mari ra kia rave i te angaanga ta Iesu i rave​—na te raveanga i te angaanga orometua tamou me ka rauka.

Inara, i etai au enua, ko te peu aruaruia no te au mapu ou kia kore e rave i te angaanga orometua tamou. I te akamutuanga tetai tangata ou i tana apiianga, penei ka tau kia rauka mai iaia te angaanga, kia akaipoipo, e kia ora au ua. I etai taime, ka tapu tarevake tetai au mapu ou mei taua oraanga rai mei te raveanga i te angaanga orometua tamou. (Maseli 3:27) Eaa ra? No te taomi anga, ka aru ratou i te au turanga peu i te reira ngai. Kua tupu te reira kia Robert.a

Me U ana te Peu e te Akava Ngakau

Kua tupu mai a Robert e ko tetai o te Au Kite o Iehova. I tona au mataiti mapu, kare i meitaki ana tona tu akono e tana iki anga taeake. Kua akamata tona mama i te manamanata no runga iaia. No reira, kua pati aia i tetai painia, tetai orometua tamou o te Au Kite o Iehova, kia akamaroiroi iaia. Ka akamarama mai a Robert eaa tei tupu mai i muri ake.

“Kua akameitaki tikai au i te akono anga ta te taeake painia i akaari mai kiaku. No tona akatauanga meitaki kua inangaro au i te rave i te angaanga painia me akaruke au i te apii. Kua manamanata akaou i reira a Mama​—inara no tetai tumu ke. I na, i roto i ta matou peu ka meitaki no tetai tamaine kia painia i muri ake i te apii, inara ka tau tikai te tamaiti kia rauka mai te moni na mua, e i reira ka akamanako ei aia no runga i te angaanga painia.

“Kua rauka mai iaku taku pepa e kua akamata i taku uaorai pitiniti. Kare i roa ana kua oonu tikai au i roto i taku pitiniti e kua aere ua atu au ki te au uipaanga e te angaanga tutu aere anga. Kua tamanamanata toku akava ngakau iaku​—kua kite au e ka rauka iaku te tavini ia Iehova ma te ki katoa. Inara, kua ngata tikai i te akamatara mai mei te au mea ta tetai atu i akamanako no runga iaku, inara kua mataora au i te raveanga i te reira. Kua akaipoipo au i teianei, e e painia ana au e taku vaine no te nga mataiti e rua i topa ake nei. I ou ake nei, kua ikiia au ei tavini orometua i roto i te putuputuanga. Ka tika iaku i te tuatua e kua kite au i te mataora tika tikai i te tavinianga ia Iehova ma toku ngakau katoa, ki toku rave anga ki katoa.”

Kua akamaroiroi putuputu ana teia makatini i te au mapu kia apii i tetai angaanga me kare akatupu i tetai angaanga tau​—me ka rauka i te apii. Eaa te akakoroanga? Kia maata mai te moni? Kare. Ko te tumu mua kia turu meitakiia ratou uaorai ei aronga maata e kia tavini ki katoa ia Iehova, i te maata anga i roto i te angaanga orometua tamou. Inara, e tupu putuputu ana e kua akaereere te au tangata e te vaine mapu i te aruanga i tetai angaanga e kua meangiti mai te puapinga o te angaanga orometua. Kare tetai aronga e manako ana i te rave anga i te angaanga tamou. Eaa ra?

Kua akamarama mai te au tuatua Robert no runga i teia tumu. I muri ake i te rauka anga tana pepa, kua akamata Robert i tetai pitiniti. Kare i roa ana, tei runga aia i tetai mataara puapinga kore. Ko tona akakoroanga kia tinamou i te pae moni. Inara ka rauka ainei i tetai tangata i roto me kare i vao i te putuputuanga Kerititiano te reira akakoro anga? Ka tau te au Kerititiano kia tauta i te akono anga meitaki i te moni, te akono anga meitaki i ta ratou au apainga moni; inara ka tau ratou kia marama e i teia au tuatau papu kore, e iti ua te tangata tei tae ki te ngai ka manako ratou uaorai e e tinamou i te pae moni. No reira i riro ei te totou a Iesu tei tataia i roto ia Mataio 6:33 ei akapumaana ki te au Kerititiano.

Kua mataora Robert e kua iki aia kia aru i te anoano o tona ngakau kare i te au rave anga peu a tona enua. I teia tuatau nei, te rekareka ra aia i tetai angaanga i roto i te tavini anga tamou. Ae, e angaanga ngateitei tikai te angaanga orometua tamou. Te au nei a Robert no te mea te tavini ra aia ia Iehova, ‘ki tona ki katoa anga’ i nana ei.

E Taangaanga Tikai i Toou Au Kite

E manganui te au tangata kite i roto i te Au Kite o Iehova. Ko tetai o ratou e kikite tikai; ko tetai atu i te au angaanga kite rima rave. Pouroa teia au mea meitaki e no ko mai ia Iehova, tei “oronga mai i te ora, e te aʼo, e te au mea katoa.” (Angaanga 17:25) Me kare e ora, kua puapinga kore teia au mea meitaki.

No reira, e mea tau tikai, kia taangaanga tatou i to tatou au oraanga akatapuia i roto i te angaanga Iehova. Kua iki tetai tangata mapu i te reira. I ora ana aia i te anere mataiti mua T.N. Ei mema no tetai pamiri rongonui, i noo ana aia i tona tuatau mapu i roto i te oire rongonui ko Tareso i Kilikia ra. Noatu i anauia ei ngati Iuda, kua rauka mai iaia tona tika anga ei tangata Roma mei tona papa. Kua oronga mai te reira i te au tika anga e te au mea meitaki e manganui. I tona tupu anga, kua apii aia i te Ture ma tetai “poropeta” maata i te reira tuatau​—ko Gamaliela. I te akara anga e kare i roa ana, ka rauka mai iaia i ‘te moni, te akapaapaa anga, e te taoonga teitei.’​—Angaanga 21:39; 22:​3, 27, 28.

Koai teia tangata mapu? Ko Saula tona ingoa. Inara kua riro mai a Saula ei Kerititiano e kua riro mai e ko te apotetoro ko Paulo. Kua tuku ke aia i tona au anoano e kua oronga i tona oraanga katoa ki te angaanga Iehova ei Kerititiano. Kare a Paulo i kiteia mai, ei roia rongonui, mari ra ei tangata tutu aere ma te maroiroi i te tuatua meitaki. I muri ake i te raveanga e vaitata ki te 30 mataiti ei mitinari, kua tata Paulo i tetai reta ki tona au taeake i Philipi. I roto i te reira kua akakite akaou aia i te au mea tana i rave i mua ake ka riro mai ei aia ei Kerititiano, e kua tata aia i reira: “I akaruke ei au [no Iesu Karaiti] i te au mea katoa ra, e kua riro ïa ei teita iaku, kia rauka iaku te Mesia.” (Philipi 3:8) Kare, kare a Paulo i tataraara ana i te mataara tana i taangaanga i tona oraanga!

Akapeea te terenianga ta Paulo i rauka mai mei ia Gamaliela? E mea puapinga ainei te reira kiaia? Ae! I etai au atianga kua oronga aia i te “akatika anga, e te akamou anga i te evangelia nei.” Inara ko ta Paulo angaanga maata koia oki ko te tutu aere anga i te tuatua meitaki​—ko tetai apinga kare tana apiianga mua i apii iaia.​—Philipi 1:7; Angaanga 26:​24, 25.

Mei teia tuatau nei rai, kua rauka i etai aronga i te taangaanga i to ratou au kite e pera katoa ta ratou apii anga kia rave i te anoano o te Patireia. Ei akatauanga, e pepa ta Amy, i te apii teitei i roto i te pae moni e tetai atu i roto i te pae ture. E angaanga ana aia i mua ana i tetai pitiniti i te pae ture, inara i teia tuatau e angaanga ana aia ei orometua kare i tutakiia i roto i tetai opati o te au manga o te Taiate Punanga Tiaki. Te akataka nei a Amy i tona oraanga i teianei: “Kua irinaki au e kua rave au i te ikianga meitaki rava atu i toku oraanga. . . . Kare au e inangaro i te taui i toku ngai ma tetai atu au taeake apii teitei. E parau tikai toku i toku ikianga. Teia tikai te au mea taku i anoano e i inangaro​—te au, te oraanga mataora e tetai angaanga meitaki e te merengo anga.”

Kua iki a Amy i tetai mataara tei apai mai kiaia i te au, te merengo anga, e te akameitakianga ia Iehova. Ae kare tetai nga metua Kerititiano e inangaro i tetai apinga ke atu no ta ratou tamariki!

Manuia Anga i Roto i te Angaanga Orometua Kerititiano

E tika, ka tika kia manako tau no runga i te manuia anga i roto i te angaanga orometua Kerititiano. Kare e ngata kia manako manuia ua me e rekareka to tatou i te tuatau i roto i te angaanga orometua, te tua anga i te au puka Pipiria me kare te tuatua oraora anga ki te tangata kainga no runga i te Pipiria. Inara me kite iti ua tatou i te taringa akarongo ra, penei ka manako tatou e kua puapinga kore to tatou taime. Inara, e akamaara e, ko tetai aiteanga o te manuia anga koia oki ‘te rauka anga mai te akapaapaa anga.’ Noai te akapaapaa anga ta tatou ka inangaro kia rauka mai? No Iehova oki. Ko teia ta tatou ka rauka mai noatu e ka akarongo mai te tangata ki ta tatou tuatua me kare ra. Kua apii a Iesu i tana au pipi no tetai apiianga ririnui tikai i roto i teia tu.

Ka maara ia koe e kua tuku atu a Iesu e 70 aronga tutu Patireia ki “te au oire, e te au ngai ravarai tana i akakoro e, e aere katoa aia ki reira.” (Luka 10:1) Kia tutu aere ratou i roto i te au taoni e te au vira kare a Iesu i aru atu. E angaanga ou tikai teia na ratou. No reira, kua oronga atu a Iesu i te au ako anga meitaki i mua ake ka tuku ei ia ratou ki vao. I te aravei anga ratou i “te tamaiti no te au,” ka oronga ratou kiaia i tetai akakitekite anga meitaki no runga i te Patireia. Inara, me kua tuaru ia ratou, e aere atu ratou ma te manamanata kore. Kua akamarama Iesu e ko te aronga tei kore i akarongo mai kia ratou kua patoi tikai ratou ia Iehova.​—Luka 10:​4-7, 16.

I te akaoti anga te 70 i ta ratou angaanga tutu aere, kua ripoti atu ratou kia Iesu “ma te rekareka, kua na ko maira, E te Atu, kua vi katoa te au demoni ia matou i to ingoa na.” (Luka 10:17) E mea poitirere tikai no taua au tangata apa kia tuaru i te au mea ora vaerua ririnui tikai! Inara, kua akamatakite a Iesu i tana au pipi maroiroi e: “Auraka ra kotou e rekareka i te mea i vi te au vaerua kino ia kotou: e rekareka ra i to kotou ingoa i tataia ki runga i te ao ra.” (Luka 10:20) Penei kare tei te 70 te mana ririnui kia tuaru i te au temoni i te au taime katoatoa, e kare katoa ratou e kite i te au tupu anga rekareka i te angaanga orometua i te au taime katoa. Inara me kua tiratiratu ratou, ka kite ratou i ta Iehova mareka anga i te au taime katoa.

E Ariki ana Ainei Koe i te Au Tavini Tamou?

Kua tuatua tetai tangata mapu ki tetai tangata pakari Kerititiano e: “Me karatuati au mei te apii teitei, ka kimi au i tetai angaanga. Me kare e kitea e au tetai angaanga, ka akamanako au i reira i te rave anga i tetai tu o te angaanga tamou.” Inara, kare ko te reira te manako o te maata anga tei rave i te angaanga painia. Kia painia, kua tuku atu tetai aronga i te tuatau kia aru i tetai angaanga meitaki. Kua akaruke tetai atu i te au apii anga meitaki. Mei te apotetoro ko Paulo, kua rave ratou i te au atinga, inara mei ia Paulo, ia Robert, e ia Amy rai, kare ratou i tangi ana no ta ratou au iki anga. Kua ariki ratou i ta ratou akameitaki anga kia taangaanga i to ratou au kite kia akapaapaa ia Iehova, tei tau kia orongaia i te au mea meitaki ta ratou ka oronga.

No tetai au tumu tuke tuke, kare tetai o te Au Kite tiratiratu e manganui o Iehova i roto i te turanga kia painia. Penei e au apainga Tuatua Tapu ta ratou kia akono. Inara, me te tavini ra ratou i te Atua ma to ratou ‘ngakau katoa, vaerua katoa e to ratou manako katoa,’ ka rekareka Iehova ia ratou. (Mataio 22:37) Noatu e kare i rauka ia ratou i te painia, kua kite ratou e ko te aronga tei painia kua iki ratou i tetai angaanga meitaki.

Kua tata te apotetoro ko Paulo: “Eiaa e akatau atu i teianei ao.” (Roma 12:2) Kia tau ki ta Paulo ako anga, kare tatou e aru i te au peu me kare te au turanga o teianei ao kia akatau i to tatou manako. Me ka rauka ia koe i te painia me kare ra, e maani koe i te angaanga Iehova e ko te mea puapinga rava atu i toou oraanga. Ka manuia koe me tei ia koe te akameitaki anga Iehova.

[Tataanga Rikiriki i Raro]

[Tutu i te kapi 19]

Auraka koe kia piritia ki te mataara puapinga kore