Ka Tau Ainei kia Apii te Au Metua i ta Ratou Tamariki no Runga i te Ainga?

▪ Maata te au metua e tauta pakari ana i te paruru i ta ratou tamariki kia kore e tu i te au maki kikino. Ka anoano katoaia te au metua kia akapera rai te paruru anga i ta ratou tamariki mei te au tu peu kikino tau kore. Tetai mataara ka rauka ia ratou te rave i teia, na roto i te apiianga ia ratou i te au mea tau no runga i te ainga. (Maseli 5:3-23) Ka anoanoia te terenianga e te aratakianga tau a te metua no te mea te akaariari pu uaia nei te au teata ainga ki te tamariki na roto i te tivi e te Initaneti, roto i te au puka e te komiki.

“Kare te manamanata i teia tuatau e no te apii ra ta tatou tamariki no runga i te ainga,” i akamarama ai te Poropeta o te tuanga apii ko Diane Levin, te vaine tata puka. “Ko te manamanata koia oki, eaa te apiiia ra kia ratou, to ratou mataiti, e naai e apii ra ia ratou. Te apiianga e rauka maira i te tamariki no runga i te ainga mei te aronga pitiniti e mei te au tu peu arikiia, e pakari tikai te akakeuanga, e te kino.”

Ka anoanoia te au metua kia paruru i ta ratou tamariki mei te au aerenga manako tarevake e te tau kore, e taviivii nei i te taiate tangata. (Maseli 5:1; Ephesia 6:4) Ka anoanoia kia kite te tamariki i te tu e angaanga ana to ratou kopapa, akapeea me akono i to ratou kopapa, e ka akapeea me paruru ia ratou mei te au tangata angaanga kino. Mua ake ka mapu ei​—te tuatau kua akamapu mai te tamaiti—​ka anoanoia te tamaine kia kite no runga i te riu, e eaa te tupu ana me akamata tona riu. Mei te reira katoa te tamaiti, ka anoanoia aia kia kite e i etai taime ka mauu aia i roto i te moe. Te rikirikianga te tamariki, kia apii te au metua ia ratou i te ingoa tikai o te au mero kopapa. Ka apii te au metua akaperepere e toru au apiianga puapinga no runga i teia au mero: (1) E mea umere roa teia koia ua te ka akara. (2) Eiaa te reira kia tuatuaia na roto i te tu tau kore. (3) Auraka kia amiriia me kore kia akaariia ki etai ke. I te tamariki e pakari maira, kia akamanako nga metua e eaa te taime tau no te akamarama e, akapeea te vaine e nui ei.a

Aea te au metua e akamata ai i taua apiianga ra? Akamata vave. Penei ka akamata te tamaine i tona riu mua i te 10 mataiti me kore i mua ake i te reira. No te tamaiti, penei ka akamata aia i te mauu i roto i te moe i te 11 me kore te 12 mataiti. Me kare te tamariki e marama ana e eaa te tupu nei, ka riro teia au tu ei mea manamanata tikai. Kia akapapuia ki te tamariki i mua roa ake e kare e apinga tarevake me tupu teia au tu kia ratou. Taime tau rai teia i te tauturu ia ratou kia marama i te puapinga o te aru i te au kaveinga Pipiria no te tu akono tau​—kare teia e rauka ana i te au porokaramu apii no runga i te ainga i te oronga mai.​—Maseli 6:27-35.

[Tataanga Rikiriki i Raro]