E Akonoanga Ainei Tetai ka Tau Kia Irinakiia?

Me kare koe e mataora ana i te tu o tetai akonoanga, penei ka ngata ia koe i te irinaki i tetai ua atu akonoanga. Inara kia papu ia koe e te vai nei tetai akonoanga ka tau kia irinakiia. Ia Iesu i te enua nei, kua akaputuputu mai aia i tetai pupu tangata akarongo mou e kua apii ia ratou kia akarotai i to ratou oraanga ki to Iehova au turanga. Te vai nei rai te au pipi akarongo mou a Karaiti​—e au tangata tiratiratu teia e tauta ra i te aru i te au kaveinga Kerititiano i roto i to ratou oraanga. Ka kite koe ia ratou iea?

Karanga a Estelle, tei taikuia i mua ake e: “Akamata au i te kite no runga i te Pipiria, i te apii anga te Au Kite o Iehova iaku. Kare i roa ana kua marama au i ta Ioane 8:32 e akakite ra e: ‘Ka kite ïa kotou i te tuatua-mou, e na te tuatua-mou kotou e akarangatira.’”

Karanga katoa a Ray, tei taikuia i mua ake e: “Na te apii anga ki te Au Kite o Iehova, i kite ei au e kare na te Atua i akatupu i te turanga taitaia o te tangata. Mataora tikai au i te kite anga e noatu e tumuanga tau to te Atua kia tuku ua i te kino kia tupu, te taputou katoa maira aia e kare e roa atu ka takore aia i te reira.”

Te taka ua ra e, e ngata tikai i te rave i te mea tika me kare te maataanga o te tangata e aru ana i te kaveinga Pipiria. Inara ka rauka ua i te rave. Manganui te tangata e inangaro ra i tetai tauturu kia marama i te Pipiria e kia rauka i te akono i ta te reira e apii ra. No reira te Au Kite o Iehova e apii ei te Pipiria kare e tutaki, ki te mirioni ua atu tangata i te ao katoa. I te au epetoma, e manganui ua atu te apii nei i ta te Pipiria tikai e apii maira. Tei tupu, te akavaitata maira ratou ki te Atua ko Iehova, e te akatupu ra i tetai oraanga mataora atu.a

Me aravei akaou koe i te Au Kite o Iehova, kore ei koe e ui kia ratou e eaa te tumu i irinaki ei ratou i ta ratou akonoanga? Atokotoko marie i ta ratou apiianga e to ratou tuatua enua. E oti naau rai e iki e me e akonoanga tetai e vai nei ka rauka ia koe te irinaki.