Eaa ka Anoanoia ai Kia Akara Matatio i Taau Akonoanga?

Penei ka anoanoia kia vai ia koe no tetai maki kino. Ka inangaro koe kia papu tikai ia koe e ka kite te taote i te vai i toou maki, no te mea tei roto toou oraanga i tona rima. Kare ainei i te mea meitaki kia akara e me i rave ana rai aia i teia tu vavai i mua ana?

Kia akapera katoa rai tatou i te akara matatio i ta tatou uaorai akonoanga. Me tei roto koe i tetai akaaereanga akonoanga, tera te aiteanga te tuku ra koe i toou irinakianga ki roto i to ratou rima. Te kapiti maira teia i toou manakonakoanga no te oraanga mutu kore.

Kua oronga mai a Iesu i tetai kaveinga ei tauturu ia tatou kia akamanako meitaki no runga i te akonoanga. Kua akakite aia e: “Te kitea nei te au rakau katoa i tona uaorai ua tikai.” (Luka 6:44) Ei akatauanga, me akara koe i tetai akonoanga me kore irinakianga, eaa te au ua ta te reira e ua maira? Ko te moni ainei te mea puapinga roa atu ki te au arataki akonoanga? Te aru ra ainei to ratou aronga irinaki i te kaveinga Pipiria no runga i te tamaki, e te kaveinga no te mea tika e te mea tarevake? E akonoanga ainei tetai ka tau kia irinakiia? Te pati atu nei matou ia koe kia akara marie i te au atikara ka aru mai.