Kua Oronga Puareinga Ratou ia Ratou Uaorai—I Taiwan

MEI te rima mataiti i topa, kua tavini a Choong Keon e Julie, e nga tokorua akaipoipo mei te 30 o raua mataiti ei nga painia tamou i Sydney, i Autireria. Kua akakite a Choong Keon e: “E angaanga moni ana maua i tetai taime e e oraanga meitaki tikai to maua. E manea te reva e e meitaki te turanga o te oraanga i te ngai e noo ra maua. Mataora maua i te noo vaitata ki te pae i to maua ngutuare tangata e to maua au oa.” Tera ra, kua manako ekoko ua a Choong Keon raua ko Julie. Eaa te tumu? Kua kite raua e ka rauka ia raua i te akamaata atu i ta raua tavini anga ia Iehova, inara kua emiemi raua i te rave i te au tauianga.

I na, i ko i te uruoaanga i te mataiti 2009, kua akarongo raua i tetai akoanga tei riro ei akakeuanga kia raua. Kua ako mai te vaa tuatua i te aronga te ka rauka i te akamaata atu i ta ratou angaanga orometua. Karanga aia e: “E akamanako ana i teia: Ka rauka i tetai tangata akaoro i te tanga i tona motoka ki te tua kaui me kore ki te tua katau, me te tere ra te motoka. Mei te reira katoa, ka arataki a Iesu ia tatou kia akamaata atu i ta tatou angaanga orometua, me te tere ra tatou ki mua, koia oki me te tauta ra tatou kia taeria to tatou akakoroanga.”a Irinaki tikai raua e te tuatua tika maira te vaa tuatua kia raua. I ko i taua uruoaanga ra, kua uiuiia tetai nga tokorua mitinari tei tavini i Taiwan. Kua akakite raua i to raua mataora i te tavini anga i reira e te anoano maataia ra te tauturu. Kua manako a Choong Keon raua ko Julie e kua tau meitaki teia au tuatua no raua.

Karanga a Julie e “te oti anga taua uruoaanga ra, kua pure maua kia Iehova kia oronga mai i te ngakau toa kia neke atu ki Taiwan.” Tuatua aia e: “Tera ra kua mataku tikai maua. Mei te mea rai e ka rere maua ki roto i tetai punāvai oonu no te taime mua.” Ko te irava tei tauturu ia raua kia rave i taua takainga ra ko Koheleta 11:4, te na ko ra e: “Ko tei tiaki i te matangi ra, kare aia e ruru i te ua; e ko tei akara i te tumurangi ra, kare aia e kokoti.” Akakite a Choong Keon e: “Kua iki maua kia kore e ‘tiaki e kia akara ua,’ mari ra kia akamata i te ‘ruru e te kokoti.’ Kua pure raua—e kua pure akaou—kua tatau i te au tua o te au mitinari, kua tuku i te au imere ki te aronga tei aere ki Taiwan, kua oko i to raua motoka e te au apinga o te are, e kua neke atu ki Taiwan e toru marama i muri mai.

KITE I TE MATAORA I TE TUTU AERE

Tere atu i te 100 taeake e te tuaine mei te enua au ke e tavini ra i Taiwan, i te au ngai e anoano maataia ra te aronga tei akakitekite i te Patireia. No Autireria, Peritane, Kanata, Varani, Tiapani, Korea, Paniora e Marike mai ratou, e e tukeke to ratou mataiti, mei te 21 ki te 73. E 50 tuma ia ratou, e au tuaine kare i akaipoipo. Eaa tei tauturu i teia au taeake e te au tuaine maroiroi kia rave i ta ratou angaanga orometua i roto i tetai enua ke? Ka akara ana tatou.

Ko Laura, e tuaine kare i akaipoipo mei Kanata mai, te tavini ra ei painia i te tua opunga o Taiwan. Tera ra, mei te tai ngauru mataiti i mua ana, kare roa aia ereka ana i te angaanga tutu aere. Te tumu, no te mea kare e maata ana tona taime i roto i te angaanga orometua. Muri mai ra, kua pati tetai au oa i Kanata iaia kia aru ia ratou ki Mexico no te angaanga tutu aere, e tai marama. “Ko te taime mua teia i akapou maata ei au i toku taime i roto i te angaanga orometua, e kua poitirere au i te mataora o teia angaanga!”

Kua riro teia tupuanga mataora ei akakeu ia Laura kia neke ki tetai putuputuanga reo ke i Kanata. Kua apii aia i te reo Tinito, kua tavini i roto i tetai pupu reo Tinito, e kua akanoo i tetai akakoroanga kia neke ki Taiwan, e ko te reira tana i rave ia Tepetema 2008. “Kua pou mei te okotai mataiti i matau ei au i te turanga o toku ngai nooanga ou,” i karanga ai a Laura, “tera ra, i teianei kare au e manako akaou ana i te oki ki Kanata.” Eaa tona manako no te angaanga tutu aere? “E mataora tikai,” i tuatua ai aia. “Kare atu e tu merengo i te kite i te aronga apii Pipiria tei taui i to ratou oraanga e kua kite no runga ia Iehova. Kua tauturu te tavini anga i Taiwan iaku kia kite i teia tu mataora.”

AKAKOROMAKI ME APII I TE REO KE

Ko Brian raua ko Michelle, e nga tokorua e 30 tuma o raua mataiti no Marike mai, mei te varu mataiti i topa kua aere raua ki Taiwan. I te akamataanga, manako raua e kare ta raua angaanga orometua e puapinga ana. Tera ra kua akakite tetai mitinari kia raua e: “Noatu e ka rauka ua ia korua i te oronga atu i tetai aenga pepa ki tetai tangata, akamaara e penei ko te taime mua teia i akarongo ana aia no runga ia Iehova. No reira e tuanga puapinga taau i roto i te angaanga orometua!” Kua riro teia tuatua akamaroiroi ei tauturu ia Brian raua ko Michelle kia kore e tuku i te au. Kua akakite tetai taeake kia raua e kia kore e akaparuparuia, eiaa raua e manako e e mama ua i te apii i te reo Tinito, mari ra ka roa te tuatau i te apii i taua reo ra. I reira, kua puapingaia raua i roto i te angaanga painia.

Eaa te ka tauturu ia koe kia apii i tetai reo ke? E mea meitaki i te aere ki te enua e tuatua ra i taua reo ra. Aere ki te au uipaanga, kapiti atu ki te au taeake e te au tuaine, e kia aru ia ratou i roto i te angaanga tutu aere. Karanga a Brian e: “Me kite atu koe i te aronga e ariu maira ki te karere Patireia, e te aroa pumaana o te au taeake e te au tuaine, ka akakeuia koe kia tavini i roto i tetai enua ke.”

AKAPEEA TE ANGAANGA MONI?

Maata te au taeake tei neke ki te ngai e anoano maataia ra te tauturu i Taiwan, kua rauka i te turuturu i ta ratou angaanga painia na te apii anga i te reo Papaa ki etai ke. Ko Kristin raua ko Michelle, e oko ana raua i te kai moana. Akamarama mai a Kristin e, “Kare roa au i rave ana i teia i mua ana, inara kua riro teia angaanga ei tauturu iaku kia noo i roto i teia enua.” I te tuatau i aereia, kua rauka mai ia Kristin tetai aronga ei oko putuputu i tana kai moana. Kua tauturu teia angaanga iaia e tana vaine i te pae moni, e kua rauka ia raua te akapou maata i te taime ki ta raua angaanga puapinga koia oki, te angaanga painia.

“KIA MATAORA I TOOU TERE”

Ko William raua ko Jennifer, e nga tokorua no Marike mai, kua neke raua ki Taiwan mei tetai itu mataiti i topa. Karanga a William e: “I tetai au taime, kua roiroi tikai maua i te apii i te reo, te tavini anga ei painia, te akono anga i te putuputuanga, e te rave anga i te angaanga moni ei akono ia maua.” Eaa tei tauturu ia raua kia puapingaia e kia mataora ua? Kua tauta raua i te akanoo i te au akakoroanga tau meitaki. Ei akatutuanga, no te mea kare maua i akanoo kia viviki i te kite i te reo Tinito, kare maua i akaparuparuia e kua marie i te apii i te reo.

Kua maara ia William i ta tetai akaaere tutaka i tuatua kiaia e, “Kia mataora i toou tere, kare i te ngai ua tei akakoroia e koe.” Tera te aiteanga, muri ake ka akanoo ei koe i taau akakoroanga pae vaerua, kia mataora koe i te au takainga taau ka rave kia akatupu i taua akakoroanga ra. Karanga a William e na te taangaanga anga i taua ako ra, kua tauturu ia raua kia rave i te au mea tau, kia akarongo i te ako a te au taeake, e kia akatikatika i ta raua i matau kia puapingaia ta raua angaanga orometua i roto i te enua ou. Karanga aia e, “Kua tauturu katoa te reira ia maua kia akapou i tetai taime kia akara i te tu manea o taua enua ra.”

Ko Megan katoa tetai, e tuaine painia aia kare i akaipoipo no Marike mai, tei mataora ra i tona tere i te itae atu anga i tona akakoroanga kia tukatau i te reo Tinito. I te au openga epetoma e aru ana aia i tetai pupu i te tutu aere i roto i tetai ngai umere tikai—ko te uapu o Kaohsiung, te uapu maata roa atu i Taiwan. E tutu aere ana a Megan i te tuatua meitaki mei tera paʼi ki tera paʼi, e ki te au tangata ravakai mei Bangladesh mai, Initia, Indonesia, te Philippines, Thailand, e Vanuatu. “No te mea e noo ana te au tangata ravakai i roto i te ava no tetai tuatau poto ua, e akamata ana matou i te apii Pipiria i taua taime rai. Kia itae ia ratou pouroa, e apii ana au e a me kore e rima tangata i te taime okotai.” Peea tana tuatua anga i te reo Tinito? Karanga aia e, “Inangaro tikai au kia viviki i te kite i te reo, tera ra e akamaara ana au i te tuatua a tetai taeake kiaku, ‘Tauta i te ka rauka ia koe, e na Iehova e akono i te toenga.’”

TAU MEITAKI, MAMA UA, E TE MATAORA

Mua ake ka neke atu ei a Cathy no Peritane mai ki tetai enua ke, kua kimikimi aia e ko teea te enua tei tau meitaki no tetai tuaine kare i akaipoipo. Kua pure aia kia Iehova e kua tata atu ki te au opati manga i te ui no runga i te ngai tau meitaki no te au tuaine kare i akaipoipo. Muri ake i te reira, kua akakite mai te opati manga e ko teea te au enua tei meitaki nona, e kua iki aia i te aere ki Taiwan.

I te mataiti 2004, e 31 ona mataiti, kua neke a Cathy ki Taiwan e kua akono i tetai oraanga mama ua. Akakite aia e: “E ui ana au ki te au taeake e te au tuaine i te au ngai e mama i te oko i te kai. Kua riro ta ratou pauanga ei tauturu iaku i te pae moni.” Eaa tei tauturu iaia kia akono tamou i tetai oraanga mama ua? Karanga a Cathy e: “E pure putuputu ana au kia Iehova kia tauturu iaku kia mareka ua i taku kai e toku kakau. Kua pau mai a Iehova i taku pure na te apii anga iaku kia kite i taku e anoano ra e kia kore e mii i taku e inangaro ra.” Tuatua aia e: “Mataora ua au i toku oraanga mama ua no te mea te tauturu ra te reira iaku kia akamou i te manako ki runga i te au mea pae vaerua.”

E oraanga mama ua to Cathy e te mataora. Akakite aia i te tumu e: “Kua rauka iaku i te tutu aere i roto i tetai ngai e maata te tangata e ariu maira ki te tuatua meitaki. E tu mataora tikai te reira!” I tona tae anga mai ki Taiwan, e rua putuputuanga Tinito i roto i te oire i akamata ai aia i te painia, i teianei ra e itu putuputuanga. Karanga a Cathy e: “Te kite pu tikai anga i teia tupuanga umere e te tauturu anga i te angaanga kokoti, kua riro toku oraanga ei mea mataora tikai i te au ra ravarai!”

“TE INANGARO MAIRA RATOU IAKU!”

Eaa tei tupu kia Choong Keon raua ko Julie, tei taikuia i te akamataanga o teia atikara? I mua ana, kua manako a Choong Keon e no te mea kare aia e tukatau ana i te reo Tinito, e iti ua tana ka rauka i te rave i roto i te putuputuanga. Inara e tuke rai te manako o te au taeake. Karanga a Choong Keon e: “Te riro mai anga ta matou putuputuanga e rua putuputuanga, e maata atu taku apainga ei tavini tauturu.” Kua tuatua aia ma te katakata e: “I taua taime ra, kite mai au e te tavini tikai ra au i te ngai e anoano maataia ra te tauturu. Mareka tikai au e te inangaro maira ratou iaku!” Teianei te tavini ra aia ei tangata pakari. Karanga a Julie e: “E merengo e te mataora tikai to maua oraanga, kare i aite mei to mua ana. Kua aere mai maua ki konei kia tauturu i te au taeake, inara kua kite mai maua e kua tauturuia maua. Te akameitaki nei maua ia Iehova no teia tikaanga kia tavini i konei!”

I roto i te au enua e manganui, te inangaroia nei rai te aronga angaanga no te kokoti anga pae vaerua. Te vaitata ra ainei koe i te akaoti i te apii e te kimi ra e eaa taau ka rave i roto i toou oraanga? Me kare koe i akaipoipo, te inangaro ra ainei koe kia akamaata atu i taau angaanga i roto i te akaaerenga a Iehova? Ka inangaro ainei koe kia kite toou ngutuare tangata i te au mea meitaki i roto i te tavini anga ia Iehova? Kua ritaea ainei koe, e ka inangaro i te taangaanga i toou tu kite karape kia tauturu i etai ke? Papu ia koe e ka rauka te au akameitakianga me akamaata atu koe i taau angaanga orometua na te tavini anga i te ngai e anoano maataia ra te aronga tei akakitekite i te Patireia.