TUMU MANAKO I TE KAPI MUA | AU ANGERA—E TIKA TIKAI AINEI RATOU? TE TUMU I PUAPINGA AI
Te Tika no Runga i te au Angera
Ka inangaro ainei koe i te kite i te tika no runga i te au angera—koai ratou, noea mai ratou, e eaa ta ratou e rave ra? Kare atu e ngai meitaki no te kimi i te pauanga, mari ra i roto i te Tuatua akauruia a te Atua, te Pipiria. (2 Timoteo 3:16) Eaa ta te Pipiria e akakite maira kia tatou?
▸ E vaerua te Atua, pera katoa te au angera. “Kare ïa o te vaerua e ivi, e kare oki e kiko.” Te noo ra te au angera meitaki i te rangi e te tu ua ra ki mua i te aroaro o te Atua.—Luka 24:39; Mataio 18:10; Ioane 4:24.
▸ I tetai au atianga, kua mama mai te au angera ma te kopapa tangata kia rave i ta ratou angaanga i te enua nei, e oti kua akaruke i to ratou kopapa te akaotianga i te reira.—Te Au Akava 6:11-23; 13:15-20.
▸ Noatu e te akatutu ra te Pipiria i te au angera ei tane e kua mama mai ratou ei au tane, kare e tane e te vaine i rotopu ia ratou. Kare ratou e akaipoipo e te anau tamariki. Pera katoa, kare te au angera i akamata ana ei tangata i te enua nei—ei pepe, tamariki, e ei aronga mamaata. Na Iehova i anga i te au angera; no reira te kapiki ra te Pipiria ia ratou ko “te au tamariki a te Atua.”—Iobu 1:6; Salamo 148:2, 5.
▸ Karanga te Pipiria “e au tuatua ravarai a te tangata nei, e ta te au angela katoa ra” e te akaari maira e tuatua ana te au angera i to ratou uaorai reo. Noatu kua taangaanga te Atua i te au angera kia tutu aere ki te au tangata, kare aia e akatika ia tatou kia akamori i te au angera e te pure kia ratou.—1 Korinetia 13:1; Apokalupo 22:8, 9.
▸ E manotini ua atu te au angera, penei e pirioni ua atu.a—Daniela 7:10; Apokalupo 5:11.
▸ Te au angera “ko tei maata i te ririnui”—e ririnui atu i te tangata—e e maata atu to ratou kite i to te tangata. Te akaraanga ka rauka ia ratou te tere viviki, e viviki ake i tetai ua atu apinga i te ao katoa.—Salamo 103:20; Daniela 9:20-23.
▸ Noatu to ratou mana maata i te pae manako e te pae vaerua, kua kotingaia te au angera. Te vaira te au mea kare ratou i kite.—Mataio 24:36; 1 Petero 1:12.
▸ Kua angaia te au angera na to ratou uaorai tu, te tu atua, e te tu rangatira. No reira, mei te tangata rai, ka rauka ia ratou te iki i te mea tika e te tarevake. Te mea mii, kua iki tetai au angera i te patoi i te Atua.—Iuda 6.
[Tataanga Rikiriki i Raro]
a Ko te manotini e 10,000. E tai manotini i te manotini e 100 mirioni. Inara, karanga a Apokalupo “kua mano tini i te mano anga” te au angera. Koia oki e anere mirioni ua atu, me kore pirioni ua atu au angera!
[Pia i te kapi 5]
Akapeea te au Angera me Akanooia?
Te angera maata, ko Mikaela, koia te pu o te au angera e nona te mana e te taoonga maata. Akaari taka meitaki maira te au Tuatua Tapu ko Mikaela tetai ingoa o Iesu Mesia.—1 Tesalonia 4:16; Iuda 9.
Seraphi e au angera taoonga teitei e te ngateitei, te vaitata ua ra ratou ki te terono o te Atua.—Isaia 6:1-3.
Kerubi e taoonga teitei katoa to ratou e te akono ra i te apainga puapinga, te piri vaitata ra ki te kakā o Tei Mana Katoatoa. E akaari putuputuia ana ratou i mua i tona aroaro.—Genese 3:24; Ezekiela 9:3; 11:22.
E manotini ua atu au angera te tavini ra i Tei Teitei Rava kia rave e te akatupu i tona anoano.b—Ebera 1:7, 14.
[Tataanga Rikiriki i Raro]
b No tetai akakiteanga maata atu no runga i te au angera, akara i te pene 10 o te puka Eaa Tikai ta te Pipiria e Apii Maira? pera katoa i roto i te au manako ke mai te tumu tuatua “Koai a Mikaela te Angera Maata?” neneiia e te Au Kite o Iehova. Ka rauka katoa i runga i te www.jw.org.