Noai ra te Apa?

Me kare na te Atua i akatupu i te au turanga mamae, akapeea i reira te onge, te tamaki, te maki mate e te au tumatetenga natura i tupu ei? Te akakite maira te Tuatua a te Atua ko te Pipiria e toru au tumu i tupu ei te mamae ki te tangata:

1. Karapii, Noinoi e te Roto Riri. “Te tutara ra tetai tangata ki rungao i tetai, ei mate nona uaorai.” (Koheleta 8:9) E tupu ana te mamae ki tetai au tangata no te akaaereanga a tetai aronga noinoi e te viivii.

2. Tuatau Kitea Koreia. Tupu te mamae ki te tangata, no te mea “kare rava e tangata i kite i tona ra tuatau.” (Koheleta 9:12) Me ka tupu te au tumatetenga manako koreia ki tetai au tangata, penei ka ū ratou me kore ka mate ratou i te tarevake o te aronga manako kore.

3. Te Tutara Kino o Teianei Ao. Te akakite maira te Pipiria i te tumu maata i tupu ei te mamae ki te tangata. Karanga ra e: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Ko Satani te Tiaporo taua “vaerua kino” ra, e angera ririnui aia na te Atua inara “kare aia i mou i te tuatua-mou.” (Ioane 8:44) Kua piri katoa tetai au angera kia Satani e kua meameaau i te Atua ei akatupu i to ratou anoano tika kore, riro atura ratou i reira ei au temoni. (Genese 6:1-5) Mei te tuatau mai i to ratou meameaau anga, na Satani e te au temoni i akatupu i te au turanga mamae o teianei ao. Te kino ua atura teia i teia tuatau. E riri maata to te Tiaporo e koia “tei pikikaa i to te ao katoatoa nei,” e tei tupu mai “e mate ra oki to te enua.” (Apokalupo 12:9, 12) E tutara kino a Satani. E reka ana aia i te kite i te mamae me tupu ki te tangata. Na Satani—kare na te Atua—i akatupu i te au turanga mamae o te tangata.

AKAMANAKO ANA: Kua aite a Satani ki tetai tangata kare ona aroa, e ki tetai tangata kino tei akatupu i te mamae ki tetai ke. Inara ko te Atua, te karanga ra te Pipiria e: “Ko te Atua oki te aroa.” (1 Ioane 4:8) Kia tau ki tona au tu meitaki, “kia atea ke atu te tuatua kino i te Atua; e te ara i te Mana katoatoa.”—Iobu 34:10.

Inara, penei ka manako rai koe e, ‘Eaa te roa ka akatika te Atua Mana Katoatoa ia Satani kia tutara?’ Mei ta tatou i kite, e riri ana te Atua i te kino e ka taitaia aia me tupu te mamae kia tatou. Te karanga maira tana Tuatua e: “E uri i to kotou tumatetenga katoa ki runga iaia; koia oki te tiaki mai ia kotou.” (1 Petero 5:7) Inangaro te Atua ia tatou, e e mana tona i te takore i te au tu mamae e te au tu tika kore, e ka akamārama mai te atikara ka aru mai i te reira.a