Ta Tatou Mea Mua
1. Akapeea a Iesu i te akaari anga e e mea puapinga te angaanga orometua kiaia?
1 Ko te angaanga orometua te mea mua kia Iesu. Kua angaanga pakari aia i te aere na raro ua no tetai anere ua atu maire, na roto ia Paretaina i te tutu aere ki te manganui ua atu te ka rauka iaia. Kua akamama aia i tona oraanga kia akapou i tona taime e tona manako ki te angaanga orometua. (Mata. 8:20) Te tauta anga te urupu tangata kia kore aia e aere, kia rauka i te akaora i to ratou aronga maki, kua akakite aia e: “E tutu aere rai au i te evangelia o te basileia o te Atua i te au oire ke atu e tikaʼi; i tonokia mai ei oki au.”—Luka 4:43.
2. Eaa ra te angaanga orometua i puapinga maata ai kia Iesu?
2 Eaa ra te angaanga orometua i puapinga maata ai kia Iesu? Te apinga mua kiaia ko te akatapu anga i to Iehova ingoa. (Mata. 6:9) No tona aroa i tona Metua i te rangi, i inangaro ei aia i te akatupu i Tona anoano e te akono i Tana au akauenga ravarai. (Ioa. 14:31) Kapiti mai, e manako maata ana aia i te tangata e te inangaro i te tauturu ia ratou.—Mata. 9:36, 37.
3. Akapeea tatou me akaari e te akamou ra tatou ki runga i te angaanga orometua?
3 Aru ia Iesu: Te akamou anga i to tatou manako mei ia Iesu rai e riro ua ana ei akaaoanga, no te mea te maro maira to teianei ao i te akapou i to tatou taime e e maata te au tamanamanata. (Mata. 24:37-39; Luka 21:34) No reira, e akapapu meitaki tatou i te au mea puapinga maata roa atu, te akanoo anga i te taime no te akapapa e kia piri putuputu ki roto i te angaanga tutu aere. (Phili. 1:10) Ka tauta pakari tatou i te akono marie i te tu o to tatou oraanga kia mama ua, e kia kopae atu i te taangaanga pu ua i to teianei ao.—1 Kori. 7:31, NW.
4. Eaa ra i puapinga roa ai i teianei kia tamou marie i te mea mua?
4 Me kotingaia te taime, e rave ana te tangata pakari i te mea puapinga roa atu na mua. Ei akaraanga, me kite aia e te vaitata maira tetai uriia kino, ka akapou aia i tona taime e tona maroiroi i te akateateamamao anga, kia ora tona pamiri e kia akamatakite atu i tona au tangata tupu. Ka rave aia i te au angaanga rikiriki a muri mai. Te poto nei te tuatau e tae mai ei te uriia o Aramakito. (Zepha. 1:14-16; 1 Kori. 7:29) E rauka ai ia tatou i te akaora ia tatou uaorai e te aronga e akarongo maira kia tatou, ka anoanoia tatou kia matakite ia tatou uaorai e ta tatou e apii ra, noatu tei roto me kore tei vao i te putuputuanga. (1 Timo. 4:16) Ae, tei runga to tatou ora i te tuku ua anga i te angaanga orometua ei mea mua!