Tetai Vitio te Akakite ra i te Peu Puapinga Maata i te Pae Vairakau
Te akara maata ra te aronga kite o te ture e te rapakauanga o te oraanga kopapa ki te au manako i te pae akono e te tikaanga o te aronga maki. Kua akamaata te reira i te au rapakauanga e te au ravenga ou te ka puapingaia e te Au Kite o Iehova. (Anga. 15:28, 29) Ko te akamou anga ia o te vitio Transfusion-Alternative Health Care—Meeting Patient Needs and Rights. E akara i te reira, e uriuri akaou i reira i taau i tamou mai.—Akakiteanga: No te mea kua kapitiia mai te au tutu poto ua no te vavai anga, e mea tau kia matakite te au metua i te akarakara anga i te vitio ma ta ratou tamariki rikiriki.
(1) Eaa ra te au tangata rapakau i akara akaou ei i te taangaangaia anga i te pamuanga toto? (2) E oronga mai i nga akaraanga e toru no te vavaianga ngata tei raveia ana ma te kore te pamuanga toto. (3) Eia au taote e te au taote vavai takapini i te ao nei tei akakite mai i to ratou inangaro i te akono i te aronga maki ma te kore te pamuanga toto? Eaa ratou i inangaro ei i te rave i te reira? (4) Eaa tei kiteaia akenei e te au apii a te are maki no runga i te taangaanga anga i te toto? (5) Eaa te au manamanata no te oraanga kopapa te ka piri mai ki te pamuanga toto? (6) Eaa te manakoanga openga ta te aronga karape e manganui i kite mai no runga i te puapinga o te ravenga ke atu o te pamuanga? (7) Eaa te akatupu ra i te anaemia? Mei teaa te roa e rauka ai i te kopapa o te tangata i te akakoromaki i te reira? Eaa te ka rauka kia raveia ei pau atu i te reira? (8) Akapeea e rauka ai i te au teera toto muramura i te akamaataia i roto i te kopapa o tetai tangata maki? (9) Eaa te au ravenga e taangaangaia ana kia akaiti mai i te pou o te toto i te tuatau o te vai anga? (10) Ka puapinga ainei te ravenga ke atu o te pamuanga no te tamariki ou me kare no te tangata tei o atu i roto i tetai tupuanga tumatetenga i te au turanga akakino i te oraanga? (11) Eaa tetai o te au kaveinga maata i te pae akono no te ravenga rapakau meitaki? (12) Eaa ra i puapinga ai no te Kerititiano kia rave i te ikianga i mua ake no te rapakauanga kare e toto? Akapeea tatou i te raveanga i te reira?
Ko te ariki anga i etai o teia au rapakau anga tei akaariia i roto i teia vitio ei tumu no te tukuanga tika uaorai tei tau ki te akava ngakau o tetai tei tereniia e te Pipiria. Kua oti ia koe i te iki e ko teea taau ravenga ke atu o te pamuanga ka ariki ua noou uaorai e taau tamariki? Kia akakite pu ia tikai ki te au mema o te pamiri kare i te Kite i taau ikianga e te au tumu no te reira.—E akara i te “Au Uianga a te Aronga Tatau” i roto i te Tiunu 15 e te Okotopa 15, 2000, itiu o Te Punanga Tiaki.