Porokaramu Ou no te Akaputuputuanga Kotinga

I roto i teia “au tuatau kikino tei ngata roa no te akono atu,” te umuumu ra tatou i te pakari tei tau ki te Atua kia rauka e kia tamou ua atu i ta Iehova arikianga. (2 Timo. 3:1, NW) Ka oronga mai te akaputuputuanga kotinga te porokaramu no te 2005 mataiti tavinianga kia tatou i te ako anga tau e te akamaroiroianga i te akatupu anga te reira i te tumu manako “Kia Aratakiia e te ‘Pakari no Runga Maira.’ ”​—Ia. 3:17.

Te tuatua kapipiti mua, “Akaari Anga i ‘te Pakari no Runga Maira’ i Roto i to Tatou Oraanga,” ka tauturu ia tatou i te kite mai eaa te kapiti maira i te tu viivii kore, te tu ponuiaau, te tau ua, e te papa ua anga i te akarongo. I reira ka oronga te akaaere kotinga i te manako ki tetai au tu e toru no runga i te pakari mei te rangi maira. Ka taopenga te akaaere tapere i te ra mua na te akaarianga e akapeea te au orometua Kerititiano, noatu e te akaraia ra e etai ei pupu tangata ‘apii koreia e te kite kore,’ kua papa ua i te tuatuaanga i te pakari o te Atua.​—Anga. 4:13.

I te rua o te ra, ka tauturu tetai tuatua kapipiti te ingoa e “Aruaru i te Au Apinga te Akamaroiroi Ra” ia tatou kia akataka e kia kopae i te au apinga te ka akaparuparu ia tatou i te pae vaerua. Ka tauturu katoa te reira ia tatou e akapeea e rauka ai ia tatou i te akamaroiroi i tetai ke i te au uipaanga putuputuanga, i roto i te angaanga orometua koro, e i roto i te ngutuare tangata. Te tuatua papuriki, “Akapeea te Pakari Tau i te Atua e Akapuapinga ra ia Tatou,” ka akaoonu i to tatou arikianga rekareka no te au akameitakianga tei rauka mai ia tatou ia tatou e akono ra i te au kaveinga tu-Atua i roto i to tatou oraanga. Te tuatua openga, “Ka Paruru te Akonoanga i te Pakari Tu-Atua ia Tatou,” ka akamaroiroi i to tatou akakoroanga kia uri kia Iehova no te pakari i te au tuatau openga ra.

Tetai apinga maata i te au akaputuputuanga ravarai koia oki ko te papetitoanga o te au pipi ou. Ka akatutu katoaia mai te Apii Orometua Teokaratiki e te Punanga Tiaki no taua epetoma ra i runga i te porokaramu. Te inangaro ra a Iehova ia tatou katoatoa kia puapingaia mei te pakari tana e oronga maira. Ka akapuapinga maataia tatou i te pae vaerua e te ako anga e te akamaroiroianga te tiaki ua maira ia tatou i ta tatou akaputuputuanga kotinga.​—Maseli 3:​13-18.