Akaputuputuanga Kotinga te ka Tauturu i te Paruru i to Tatou Turanga Pae Vaerua
1. Eaa tetai akanoonooanga a Iehova te ka tauturu ia tatou i te akatupu i ta tatou angaanga kia akatotoa aere i te tuatua meitaki?
1 Te oronga aroa maira a Iehova i te akakiteanga, te terenianga, e te akamaroiroianga te anoano ra tatou i te akatupu i te angaanga tana i oronga mai kia tatou i te akatotoa aere i te tuatua meitaki. (Mata. 24:14; 2 Timo. 4:17) Ko ta tatou akaputuputuanga kotinga o te mataiti tetai o taua akanoonooanga ra. Ka akatupu te porokaramu ou no te mataiti tavini anga 2010 i te tumu tuatua “Paruru i Toou Turanga Pae Vaerua,” akatumuia ki runga ia Roma 8:5 e ia Iuda 17-19. Kua akapapaia te reira kia akamata i te epetoma o Aukute ra 31, 2009.
2. (a) I teea au mataara e puapinga ai tatou mei te akaputuputuanga kotinga? (e) Akapeea te au akaputuputuanga kotinga i topa akenei i te tauturu anga ia koe i roto i te angaanga orometua?
2 Ka Puapingaia Tatou: Ka akamatakite mai te porokaramu kia tatou i te au kino, mei te au tavarenga anga te ka kaimoumou i to tatou taime e te akaanga ke i to tatou au manako mei te mea puapinga tikai. Ka kite tatou akapeea i te kopae i te tu tukutuku ua, e ka akamanako tatou eaa te au tu o te tangata pae vaerua. Ka akaari mai te tuatua kapipiti akapeea te au tangata tataki tai e te au pamiri i te rave anga i te au takainga i te akaketaketa i to ratou turanga pae vaerua, i roto i te au taomianga e te au timataanga pakari no te akarongo. Ka tauturu te porokaramu ia tatou kia paruru i to tatou ngakau, kia akono tamou i to tatou oraanga pae vaerua, e kia akamanako meitaki i te au akameitakianga mekameka te tapapa maira i te aronga tei paruru i to ratou turanga pae vaerua.
3. Aea ta kotou akaputuputuanga kotinga, e eaa taau ka rave?
3 Me kite vave koe e aea e kiea e raveia ai ta kotou akaputuputuanga kotinga, e akanoo i te au parani kia tae mai e kia akarongo ki te au tuanga katoatoa o te porokaramu. Papu e, te akameitaki ra a Iehova i te au tautaanga a te aronga maroiroi.—Mase. 21:5.
4. Eaa te ka rauka mai ia tatou i ko i ta tatou akaputuputuanga kotinga e tu mai nei?
4 E tika rai, na Iehova i Oronga mai i teia apinga aroa meitaki. Te porokaramu tei akapapaia e te pupu tavini akono meitaki ko ta tatou tikaiia e anoano ra kia tavini ua atu ei au orometua Kerititiano. Te akameitaki nei tatou ia Iehova no tana au akanoonooanga aroa katoatoa i te tauturu anga ia tatou kia ‘mou piri tikai i ta tatou tuatua ma te ngaueue kore.’—Ebe. 10:23-25; Iako. 1:17.