Akapaapaa ia Iehova i te Uipa Anga Maata Ra
1, 2. Eaa te atianga ta te uruoaanga tapere e oronga maira kia tatou, e na roto i teea au mataara e rauka ai ia tatou i te akatupu i te reira?
1 Te oronga maira ta tatou au uruoaanga tapere i te mataiti tataki tai kia tatou i tetai atianga meitaki tikai i te akakaka ia Iehova. Mei to Davida rai to tatou au manako, tei imene e: “Ka akapaapaa au ia koe i roto i te uipa anga maata ra i reira; ka akapaatu au ia koe i rotopu i te au tangata ririnui.” (Sa. 35:18) I te Uruoaanga Tapere “Te Akarongo Tu Atua” e vaitata maira, akapeea tatou e akapapu ei e ei iti tangata taokotaiia, e tumu anga tatou no te akapaapaanga kia Iehova?
2 Tetai mataara e rauka ai ia tatou i te rave i teia koia oki na roto i to tatou tu. Kua karanga mai tetai manitia akaaere o tetai ngai uruoaanga e: “Akatumuia ki runga i ta kotou au uruoaanga, kua akakite matou ki tetai au pupu akonoanga te inangaro ra i te tarau i teia ngai kia aere mai e kia akara e akapeea te Au Kite o Iehova e akanoonoo ana i tetai uruoaanga, mei te mea e e mako tikai ta ratou akanoonooanga.” Na roto i to tatou tu akaraanga, to tatou taokotaianga, e to tatou tu, te oronga ra tatou tataki tai ki taua au tuatuaanga meitaki no te akapaapaa, tei tau tikai ra ki to tatou Atua.—1 Pe. 2:12.
3, 4. Akapeea te tu tau i te tauturu anga ia tatou i te kakau i te tu te tau ra te au orometua Kerititiano, i ko i te uruoaanga e i muri ake i te au tuanga?
3 Toou Uaorai Akaraanga: Te umuumuia ra te tu tau kia kakau e kia akamanea ia tatou uaorai na roto i te tu e te akapaapaa ra ia Iehova. (1 Timo. 2:9) Te karanga ra te puka Ministry School, kapi 132, e: “Te manako ra tetai tangata tau ua e auraka e akariri inangaro kore atu i tetai ke e auraka e kimi kia akarakaraia mai aia uaorai.” I te au enua e manganui, kua riro te kakau tau kore ei apinga matauia. Inara, te ariki rekareka ra a Iehova i te tautaanga ta tatou e tuku ra i te komono meitaki iaia. (Anga. 15:14) Noatu e ka raveia te uruoaanga i roto i tetai ngai tamataoraanga me kore tetai ngai tarekarekaanga, kua riro mai te akaputuputuanga e ko ta tatou ia “uipa anga maata ra” i te toru ra o te uruoaanga. No reira, ia tatou e akaputuputu ra i mua ia Iehova, ka tau tatou kia akamanea ma te tu ngateitei tei tauia e te Peretana teitei rava atu i roto i te ao katoa e pini ua ake.—1 Para. 29:11.
4 Ka inangaro katoa tatou i te oronga i te akamanakoanga ki to tatou tu akaraanga i muri ake i te tuanga akaotianga i te au ra tataki tai. Noatu e penei paa te inangaro ra tatou i te aao i te au kakau meitaki atu i te tuatau akaangaroi me kore i tetai kaikai anga i tetai ngai kaikai anga, e mea puapinga e te tau ra rai to tatou kakau e te akamanea anga ei aronga te “akatutu ra i te akangateitei tikai i te Atua.” (1 Timo. 2:10) Kare te kakau tau e akaraia ana e eaa te rekaia ra e te ao nei. (1 Ioane 2:16, 17) Te oronga maira ta tatou au puka Kerititiano i te au akatutuanga meitaki o te kakau tau, tei akapapa meitakiia o te au tane e te au vaine i roto i te au turanga tukeke aere. Te aao anga i to tatou au kati ia tatou i roto i te oire o te uruoaanga ka riro mai ei akamaaraanga e e au orometua Kerititiano tatou i te au taime ravarai.—2 Kori. 6:3, 4.
5, 6. Akapeea e rauka ai ia tatou i te akaari i te akangateitei no ta Iehova kaingakai pae vaerua?
5 Akangateitei i te Kaingakai a Iehova: Kua oora te Atu Ngateitei o te ao katoa e pini ua ake i tetai kaikaianga maata. (Isaia 25:6; 1 Kori. 10:21) Me te akaperepere maata ra tatou i to tatou ngai i te kaingakai pae vaerua a Iehova, ta tatou akakoroanga i reira kia tae atu i te au ra katoatoa e toru o te uruoaanga. Kua akanoo ake ana ainei koe i te ngai nooanga, te apinga akaoro, e te tuatau orote mei te ngai angaanga? Kua akapapa ake ana ainei koe kia rava te taime no te teateamamaoanga e te teretereanga kia tae atu koe ki te ngai o te uruoaanga papa vave ua i te kimi i te au nooanga, kia akapiri atu ki to tatou au taeake, e kia kapiti atu kia ratou i te akapaapaanga ia Iehova i roto i te akamataanga o te imene e te pure?—Sa. 147:1.
6 Ka akakeu te akangateitei no ta Iehova kaingakai ia tatou kia akarongo meitaki tikai ki te porokaramu e kia kopae i te tuatua ua atu ki tetai ke, te kaikai anga, me kore te ori aere ua anga i te au ngai aere anga. Na roto i te tavini akono meitaki e te pakari, te oronga maira a Iehova i te kai pae vaerua ta tatou e inangaro ra i teianei. (Mata. 24:45) Kare e rauka i tetai ia tatou kia topa i tetai ua atu o te reira. Ka tau te au metua kia noo ki ta ratou tamariki e kia tauturu ia ratou kia puapinga pu tikai.—Deu. 31:12.
7. Eaa ta tatou e patiia maira kia rave no te kaikai avatea, e no teaa ra?
7 Te patiia atu nei e kia apai mai tatou i tetai kai kia kore e akaruke i te ngai uruoaanga kia tiki atu i tetai kai i te taime o te ora kaikai anga i te avatea. Mei teaa tikai te meitaki me rave te katoatoa i te reira i teia mataiti! (Ebera 13:17) Te oronga maira teia akanoonooanga i tetai atianga meitaki kia rekareka i te akataeakeanga akamaroiroi anga ma to tatou au taeake e te oronga ra i tetai tu taokotaianga e te au te akangateitei ra ia Iehova.—Sa. 133:1.
8, 9. Eaa tetai atianga akaou atu ta te uruoaanga e oronga maira kia tatou kia akapaapaa ia Iehova?
8 Akakitekite ua Anga: E te aere ra e te oki maira mei te ngai uruoaanga, e manganui te au atianga no tatou i te akapaapaa ia Iehova ma to tatou au vaa. (Ebera 13:15) Noatu me te kaikai ra tatou i tetai ngai kaikaianga me kore te pukapuka ra ki te aronga angaanga o te motera, e akara tatou i te au mataara i te oronga atu i tetai akakitekiteanga. Te ki ra to tatou au manako e to tatou au ngakau i te au apinga pae vaerua mei te uruoaanga. E oronga atu tatou i teia au mea meitaki ki te aronga ta tatou e aravei aere ua ra.—1 Pe. 3:15.
9 Te akara ra tatou ki mua ma te tapapaanga inangaro maata ki teia atianga kia akameitaki ia Iehova “i roto i te au uipa anga ra.” (Sa. 26:12) Kia rauka ia tatou i te akapaapaa taokotai ia Iehova i ko i te Uruoaanga Tapere “Te Akarongo Tu Atua.”
[Pia i te kapi 4]
Au Akamaara Anga no te Uruoaanga
◼ Au Ora no te Porokaramu: Ka akamata te porokaramu i te 9:30 a.m. i te au ra katoatoa e toru. Ka ngaa te ngutupa i te 8:00 a.m. E nga mea miniti i mua ake ka akamata ai te porokaramu, ka noo te tiamana i runga i te paata e te akatangiia ra te akamataanga o te akatangi anga o te imene Patireia. I taua taime ra kia noo pouroa tatou ki to tatou au nooanga kia rauka i te porokaramu i te akamata i roto i tetai tu tau. Ka oti mai te porokaramu i te 5:05 p.m. i te Varaire e te Maanakai e i te 4:10 p.m. i te Tapati.
◼ Paka Anga: I te au ngai uruoaanga e kua rauka ia tatou i te akatereanga tinamou o te au ngai paka anga, ka vai ua te au ngai e kare e tutaki tei akanooia ki runga i tei tae mua mai, ka peke mua ia. Ka riro te au kati uruoaanga ei akatakaanga no te paka anga. Ko te aronga ua e e tikaanga aere ua ta ratou no te paka anga tei akatikaia e te konitara te ka akatikaia kia paka i te ngai tapaoia no te pirikoki. Mei te mea e kua kotinga uaia te ngai paka anga, kia tauta pakari kia raveia te taokotaianga e tai motoka e kare kia aere ua e tai me kore e rua tangata i te motoka.
◼ Tapao Nooanga: Ka rauka te au nooanga i te tapao uaia no te aronga tei aru mai e tai o kotou apinga akaoro me kore te noo ra e tai o kotou are.
◼ Moni Tauturu: E maata te moni e pou ana i te akanoonooanga i tetai uruoaanga tapere. Ka rauka ia tatou i te akaari i to tatou arikianga na te oronga anga i te au moni tauturu oronga ua ki te angaanga i te ao nei i to tatou Are Uipaanga Patireia me kore i te uruoaanga. Tetai au tieki te orongaia ra i te uruoaanga ka tau kia tataia ki te “Watch Tower Society.”
◼ Kare e Akarongo Meitaki Ana: I te au uruoaanga maatamaata mai ake ka akakitekiteia atu te porokaramu i te ngai o te otitoriomu i runga i te ratio FM. Ka raveia tetai akakiteanga no runga i teia i te akamata anga o te tuanga mua. Kia puapingaia mei teia akanoonooanga, ka anoanoia koe kia apai mai i tetai ratio FM meangiti ua ma te apinga akarongo no te taringa.
◼ Kaikai i te Avatea: E apai mai ine i tetai kai auraka oki e akaruke i te ngai uruoaanga kia tiki mai i tetai kai i te taime o te ora kaikai i te avatea. Penei ka rauka i te taangaangaia tetai pia akaanu meangiti ua te ka rauka i te tauruia i raro ake i tetai nooanga. Te au pia akaanu maatamaata tano na te pamiri, te au kapu io, e te au kava kare e akatikaia i roto i te ngai o te uruoaanga.
◼ Rekotianga: Kare e tau kia tamouia tetai ua atu au apinga rekoti ki te apinga akatangi me kore te paoa o te reira ngai e ka rauka ua kia taangaangaia i te mataara e kare e tamanamanataia tetai ke.
◼ Nenei Tutu: Me ka inangaro koe i te nenei tutu, kare te apinga pura e tau kia taangaangaia i te tuatau o te au tuanga.
◼ Au Pager e te Au Cell Phone: Kia akanooia teia kia kore e riro ei tamanamanata anga.
◼ Au Kino Anga e te Au Tupuanga Poitirere Ua: Me tupu ake tetai tupuanga poitirere ua i te pae rapakau i te ngai o te uruoaanga, e aravei atu ine i te tavini tauturu vaitata ua mai, e ka akakite viviki atu aia ki te Tipatimani no te Tauturu Mua kia rauka i to tatou tangata kite no te tauturu mua i te akara i te tu kino o te turanga e kia oronga atu i te tauturu. Me ka umuumuia, ka ringi atu ratou i te au ngai e inangaroia te tauturu.
◼ Au Motera: (1) Auraka e tapao maata i te au pia te ka inangaro tikaiia, e auraka kia maata atu te tangata te ka akatikaia i roto i toou pia. (2) Me ka tipu koe i taau tapaoanga, e akakite viviki ki te motera. (3) Auraka e tunu kai i roto i te au pia kare e akatikaia i te tunu kai. (4) Auraka e takinga kino i tetai ua atu o te kaikai popongi tei oronga uaia mai, te kaope, te au aiti te orongaia ra no te au manuiri kia kai na ia ia ratou i roto i te motera ra. (5) Akaari i te au ua o te vaerua tapu i te akonoanga i te aronga angaanga i te motera i te tuatau tikai o te au taime no te aere anga ki roto e te akaruke anga.