Au Uruoaanga Tapere—E Taime no te Akamorianga Mataora
1. Peea te au oroa a to Iseraela i aiteite ei ki ta tatou au uruoaanga tapere i teia tuatau?
1 E aere putuputu ana a Iosepha, a Maria, ta raua tamariki, e etai atu ki Ierusalema ki te oroa mataiti. I teia au atianga nei, kare ratou e manako ana i to ratou au manamanata mari ra, ka akamanako ua ratou no runga i te au mea puapinga maata atu i roto i to ratou oraanga. Oronga mai te au oroa i te tuatau no ratou kia akamanako e kia tuatua no runga i to Iehova meitaki e kia akamanako i tana Ture. Ka oronga mai ta tatou uruoaanga tapere e tu mai nei i taua au atianga rai no te akamori ia Iehova ma te mataora.
2. Eaa ta tatou ka rave i te akapapa anga no te uruoaanga tapere e tu mai nei?
2 Anoanoia kia Akapapa: No te aere anga ki Nazareta ka anoanoia te pamiri o Iesu kia aere mei tetai 200 kiromita te aere anga, e te oki mai anga na raro ua. Noatu kare tatou i kite e eia o Iesu au teina e te tuaine, ka rauka ua ra ia tatou te akamanako i te paranianga e te tautaanga tei anoanoia a Iosepha raua ko Maria kia rave. Kua akapapa ainei koe kia tae i te au ra ravarai e toru o te uruoaanga tapere e tu mai nei? Penei ka anoanoia kia orote mai mei te angaanga me kore, kia tuatua ki toou pu me kore kia akakite ki te puapii e kare taau tamaiti e tae atu ki te apii i taua au ra ra. Kua tapao ainei koe i tetai ngai i roto i te motera me ka anoanoia te reira? Ka rauka ainei ia koe te oronga atu i te tauturu ki tetai tangata e anoano takake tona i roto i te putuputuanga kia tae ki te uruoaanga?—1 Ioa. 3:17, 18.
3. Peea te au oroa a to Iseraela i te oronga anga i te au atianga no te taokotaianga akamaroiroi?
3 Taokotaianga Akamaroiroi: E atianga meitaki tikai ta te au oroa ngati Iuda i oronga mai no te taokotaianga akamaroiroi ma te au oa akamori! Kare ekoko kua tapapa ana to Iesu pamiri i te taokotai atu ki te au oa kua roa te pirianga. Rauka ia ratou te au atianga mataora i te aravei i te au oa ou i roto i te au urupu ngati Iuda, e te poroteraita ka tae atu me kore te aere ra ki Ierusalema.
4. Akapeea tatou me akaari e te akaperepere ra tatou i to tatou taokotaianga taeake Kerititiano?
4 Tetai tumu i akanoonoo ei te tavini akono meitaki e te pakari kia akaputuputu mai tatou ki te ngai okotai i te akarongo i te au akoanga i ko i te au uruoaanga tapere, i to te tata ua mai i taua au akoanga ra koia oki, kia rauka ia tatou te akamaroiroi atu i tetai e tetai. (Ebe. 10:24, 25) No reira, e parani kia tae vave ki te uruoaanga i te au ra ravarai, kia mataora i te taokotai atu ki etai ke i mua ake ka akamata ai te tiamana i tetai porokaramu akatangi imene poto ua, i te akakite mai e kua tae te taime i te noo ki raro. I to te aere i te tiki kai, te akamaroiroiia maira tatou kia apai mai i tetai manga kai ua, e kia noo rai i ko i te uruoaanga kia rauka ia tatou te aravei e te tuatua atu ki te aronga i te pae mai ia tatou. To tatou taokotaianga taeake Kerititiano, e apinga aroa te reira no ko mai ia Iehova e, e mea tau kia akaperepere tatou i te reira.—Mika 2:12.
5. Eaa te ka tauturu ia tatou kia puapinga maataia mei te porokaramu?
5 E Taime no te Apii: Mei tona tamarikianga, kua akariro a Iesu i te au oroa ei tuatau apii no runga i tona Metua i te rangi. (Luka 2:41-49) Eaa te ka tauturu ia tatou e to tatou au pamiri kia puapinga maataia mei te au tuanga te ka orongaia mai? I te tuatau o te au akoanga, e noo ua ki raro, kopae i te tuatua puapinga kore ua. Tamate i taau tereponi apaipai rima me kore pager me kore i te au apinga mei te reira, kia kore e tamanamanata ia koe me kore i etai ke. Akamou i toou mata ki runga i te vaa tuatua, tata i tetai au manako poto ua. Noo kapiti e te pamiri, te akapapu e te akarongo ra taau tamariki. I te aiai, akapou tetai taime i te uriuri kapiti i te au manako ta kotou i mareka.
6. Eaa ta tatou ka akamaara no runga i to tatou kakau e te akamanea?
6 Kakau e te Akamanea: Te au manuiri okooko e aere ra na te ara, ka kite vave ua ratou i to Iesu pamiri e etai atu aronga akamori ngati Iuda e aere ra ki te au oroa e te oki maira, no te mea e veruveru to ratou tapa kakau e te ri kerekere i runga ake i te veruveru. (Nume. 15:37-41) Noatu kare i te kakau tuke ta te au Kerititiano e aao ana, kua kite uaia ra tatou no te tau i to tatou kakau e no te mako e te ma. Kia akamanako meitaki tatou i to tatou akaraanga me aere ki te uruoaanga, me oki mai, e i roto i te oire e raveia ra te uruoaanga. Noatu ka taui to tatou kakau me oti te porokaramu, kia aao ua rai tatou i te kakau te ka akangateitei i te ingoa o Iehova, e kia aao i to tatou kati uruoaanga. Na roto i teia tu ka akaraanga tuke rai tatou mei te aronga kare i te Au Kite, e ka mareka rai te aronga e akara maira.
7. Eaa tatou ka akamanako ei i te tauturu i te angaanga i ko i te uruoaanga?
7 Anoanoia te Aronga Tauturu: E maata te aronga angaanga ka anoanoia kia rauka i te akatere meitaki i te uruoaanga. Ka rauka ainei ia koe i te oronga i tetai tauturu? (Sala. 110:3) Te angaanga e raveia ana i ko i te au uruoaanga, e tuanga te reira no ta tatou angaanga tapu e te oronga ra i tetai akaraanga meitaki. Kua mareka tikai te manitia o tetai ngai uruoaanga i te aronga tauturu tei tama i te are, e kua tata aia i teia: “Inangaro nei au te akameitaki ia kotou no teia putuputuanga umere roa atu taku i kite. Kua akarongo ana au e e iti tangata meitaki te Au Kite o Iehova. E rongo meitaki to ratou i roto i ta matou pitiniti. Me akaruke ratou i tetai ngai, e ma rava atu te reira i to te taime mua i kite ei ratou. Kua akariro kotou e to kotou akaaerenga i teia ngai ei ngai manea roa atu no te iti tangata, e kua raveia te reira e tetai pupu tangata ngateitei roa atu ta matou i aravei ana.”
8. Eaa te au atianga no te akakitekite aere i roto i te oire o te uruoaanga?
8 Au Atianga kia Akakitekite Atu: Maata to roto i te oire o te uruoaanga ka akara mai i te au manuiri kakau manea e te ma e to ratou au kati uruoaanga, penei ka inangaro ratou kia kite, e na teia e oronga mai i tetai atianga no tatou kia akakite kia ratou no runga i te uruoaanga. Kua apai mai tetai tamaiti e a mataiti i tana kopi o te puka ou tei tukuia mai, ki ko i te are kaikai te oti anga te porokaramu e kua akaari i te reira ki te vaine raverave kai. Kua akatuera teia i te mataara no te nga metua o teia tamaiti kia pati i teia vaine ki te uruoaanga.
9. Akapeea ra tatou me aru i te tu akaperepere o to Iesu pamiri i te au atianga kia kite no runga ia Iehova?
9 E au atianga mataora tikai te au oroa i taito, te tapapaia ana e te au ngati Iuda tei inangaro kia kite maata atu no runga ia Iehovah. (Deu. 16:15) Rekareka ua te pamiri o Iesu i te rave i tetai ua atu akaatingaanga kia tae, e kia puapinga maataia. Mei te reira rai to tatou tu akaperepere i ta tatou au uruoaanga tapere, te akamanako anga i te reira ei apinga aroa mei ko mai to tatou Metua aroa i te rangi. (Iako. 1:17) Te taime rai teia i te akapapa no teia atianga i te au mataiti, kia akamori ia Iehova ma te mataora!
[Pia i te au kapi 6, 7]
Au Akamaara Anga no te Uruoaanga Tapere
◼ Au Ora no te Porokaramu: Ka akamata te porokaramu i te 9:20 i te popongi i te au ra katoatoa e toru. Ka ngaa te ngutupa i te ora 8:00 i te popongi. Me akamata ana te akatangianga o te imene Patireia, kia noo pouroa tatou ki to tatou au nooanga kia akamata te porokaramu i roto i te tu tau. Ka oti mai te porokaramu i te 4:55 i te aiai Varaire e te aiai Maanakai, e i te 3:40 i te aiai Tapati.
◼ Paka Anga: I roto i te ngai uruoaanga kare e tutakiia ana te ngai paka anga e akatereia ra e tatou, ko te aronga mua ka tae mai ka peke ia ratou te reira ngai. Ko te aronga pakipakitai ua e kati Tika no te Paka Anga to ratou te ka akatikaia kia paka i te ngai tapaoia no te aronga pakipakitai. I te mea e kare e maata ana te ngai paka anga, e tauta kia na roto mai e tai ua motoka.
◼ Tapaoanga i te Au Nooanga: Ka rauka te au nooanga i te tapao no te aronga ua tei aru mai ia koe i runga i toou apinga akaoro me kore e tai o kotou are e noo ra, pera katoa te aronga e rave ra koe i tetai apii Pipiria.—1 Kori. 13:5.
◼ Kaikaianga Avatea: E apai mai i tetai kai ine, eiaa oki e akaruke i te ngai uruoaanga kia tiki atu i tetai kai i te ora kaikai i te avatea. Ka rauka tetai pia akaanu meangiti ua kia apainaia mai te ka o me tauruia ki raro ake i toou nooanga. Te au pia akaanu mamaata na te pamiri, te au kakapu io, kare e akatikaia i roto i te ngai uruoaanga.
◼ Moni Tauturu: Ka rauka ia tatou i te akaari i to tatou ariki rekareka i te au akanoonooanga no te uruoaanga na te oronga ua anga i te au moni tauturu ki te angaanga Patireia i ko i to tatou Are Uipaanga Patireia me kore i ko i te uruoaanga. Tetai au tieki te orongaia ra i te uruoaanga ka tau kia tataia ki te “Christian Congregation of Jehovah’s Witnesses.”
◼ Au Tupuanga Kino e te Au Manamanata Tupu Poitirere Ua: Me tupu ake tetai manamanata tupu poitirere ua i te pae rapakau i te ngai o te uruoaanga, e aravei atu i te tavini tauturu vaitata ua mai kia koe ine, e nana e akakite viviki atu ki te Tipatimani Tauturu Rapakauanga kia rauka i to tatou tangata tauturu i te akara i te tu kino o te turanga e kia oronga atu i te tauturu. Me ka umuumuia, e ringi atu ratou i te Numero 111 o Nu Tireni, me kore te Numero 998 o Rarotonga. Kare i reira te ngai tauturu viviki e ringiia na runga i te tereponi apaipai rima no te au mea rikiriki ua.
◼ Tamaka: I te au mataiti ravarai e tupu ana te kino no te tamaka. E meitaki atu i te tauru i te tamaka tau e te tano meitaki te ka rauka i tetai i te aere meitaki ua i runga i te ngai kake anga, te au auri vaavaarua, e te vai atura.
◼ Kare e Akarongo Meitaki Ana: I ko i te au uruoaanga i Nu Tireni ka akakitekiteia atu te porokaramu i roto i te otitoriomu na runga i te ratio FM. Kia puapingaia mei teia akanoonooanga, ka anoanoia koe kia apai mai i tetai ratio FM meangiti ua ma te apinga akarongo no te taringa.
◼ Rekotianga: Kare e tau kia tamouia tetai ua atu au apinga rekoti ki te apinga akatangi me kore ki te paoa o te reira ngai kia kore e tamanamanata atu i tetai ke.
◼ Au Pereoo e te Au Nooanga Atuatu: Auraka e apai mai i te au pereoo pepe e te au nooanga atuatu ki roto i te ngai uruoaanga, ine. Inara, ko te au nooanga pepe te ka akanoo meitakiia ki runga i tetai nooanga i te pae i nga metua, ka arikiia te reira. I ko i te maataanga o te au uruoaanga, e ngai tetai i reira no te akaruke i te au pereoo.
◼ Akari Pipi: Te maataanga o te au uruoaanga e raveia ana i roto i te au ngai topiriia e au matini akaangiangi matangi tetai. No reira, e mea meitaki kia kore tatou e pipi maata i te au akari pipi e pakari te aunga, te ka akatupu i te kino ki te aronga kare e meitaki i te akaea me kore tetai au manamanata mei te reira.—1 Kori. 10:24.
◼ Au Pepa Follow-Up: Kia taangaangaia te pepa Please Follow Up (S-43) i te akakite mai no runga i tetai tei akaari mai i te inangaro no ta tatou akakitekite anga atu i te tuatau o te uruoaanga. Ka tau te au papuritia kia apai mai e tai me kore e rua pepa follow-up ki te uruoaanga. Kia tuku atu i te au pepa akaki meitakiia ki ko i te Pia Vairanga Puka kia akonoia te reira me kore ki te tekeretere o toou putuputuanga me oki atu koe.—Akara i Ta Tatou Angaanga Patireia o Noema 2009, kapi 4.
◼ Au Are Kaikaianga: E akariro i toou tu meitaki i ko i te au are kaikaianga ei akangateitei i te ingoa o Iehova.
◼ Au Motera: (1) Auraka e tapao i te au ngai nooanga me kare e anoanoia, e auraka kia tere atu te au tangata e akatikaia ra i te noo i roto i toou ngai nooanga. (2) Me ka tipu koe i taau tapaoanga, e akakite viviki atu ki te motera. (3) E apai i te pereoo tari kiri kakau me kua papa tikai koe i te taangaanga i te reira e oti kia akaoki viviki atu koe i te reira kia rauka i tetai ke i te taangaanga atu. (4) Auraka e tunu kai i roto i te au pia kare e akatikaia i te tunu kai. (5) Kare roa tatou e inangaro i te rave maata mai i te kai oronga uaia mai i te popongi, te kaope, te au aiti te vaira na te au manuiri ei kai, ia ratou i ko i te motera. (6) Akaari i te au ua o te vaerua i te akono anga i te aronga angaanga o te motera i te au atianga ravarai. Te akono ra ratou i te au manuiri e manganui e te ariki rekareka maira i to tatou tu takinga meitaki, te akakoromaki, e te manako tau.
◼ Angaanga Tauturu: Ka maata rava atu to tatou mataora ka rauka mai mei te tae anga ki te uruoaanga, me tauturu atu tatou i te angaanga tei anoanoia i te rave. (Anga. 20:35) Tetai ua atu tei inangaro i te rave i te reira, kia ripoti atu ki te Tipatimani o te Angaanga Tauturu i ko i te uruoaanga. Ka rauka rai te au tamariki i raro ake i te 16 mataiti kia tauturu na te angaanga anga i raro ake i te akaaereanga a tetai metua me kore a tetai tangata tiaki me kore a tetai atu tangata mamaata tei arikiia e tetai ia ratou.