E Aru ia Karaiti na te Akaarianga i te Tu Ngateitei
1. Akapeea te tumu manako no te uruoaanga i teia mataiti e piri atura ki te akaarianga i te tu ngateitei?
1 Te akamarama maira te Pipiria e, ko tei Ngateitei i te Ao Katoa e Pini Ua Ake, ko Iehova, kua kakauia ki te tu ngateitei. (Sa. 104:1) Kua tuatua ua rai e kua akono ua rai a Iesu na roto i tetai tu tei akangateitei i tona Metua e te au akanoonooanga a tona Metua. (Ioane 17:4) Ka rauka ia tatou tataki tai i te au atianga kia aru ia Iesu e kia akakaka ia Iehova i te tuatau o ta tatou Au Uruoaanga Tapere “E Aru ia Karaiti!” e tu mai nei.
2. Akapeea to tatou tae atu anga ki te tuanga tataki tai e akangateitei ra ia Iehova?
2 Akamori Anga Ngateitei: Ka rauka ia tatou i te akangateitei ia Iehova na te paranianga kia tae atu ki te kaikaianga pae vaerua tei akapapaia no tatou. Kua tuatua ake ainei koe ki toou pu e kua akapapa i taau au akanoonooanga kia tae atu ki te ra tataki tai o te uruoaanga, kapiti mai te Varaire? Kua parani ake ainei koe kia tae vave atu no te kimianga i tetai nooanga e kia piri atu ki roto i te imene e te pure akamataanga? Kua parani ake ainei koe i taau au kai no te tuaero kia rauka ia koe i te kaikai kapiti atu ki toou au taeake i te ngai o te uruoaanga? I te akamataanga o te tuanga tataki tai me pati meitaki mai te tiamana ia tatou kia noo atu ki to tatou au nooanga i mua ake ka akamata ei te akatangianga imene, kia akaoti viviki i reira tatou i ta tatou au pukapukaanga e kia noo ki raro no te akamataanga o te porokaramu.
3. Akapeea te akarongo meitaki anga ki te porokaramu i te akangateitei anga i ta tatou akamorianga?
3 Na te akarongo meitaki anga ki te porokarama te akangateitei katoa ra i to tatou Metua i te rangi. I muri ake i te akarakaraanga i tetai uruoaanga tapere i tona ngai, kua tata tetai tangata ripoti e ka umere te aronga e akarakara maira i “te tu akaraanga meitaki o te aronga i reira, ia ratou e aru ra i tei tuatuaia maira na roto i te tu muteki e te ngateitei e te akaari anga i to ratou arikianga i te au mea pae vaerua.” Kua tata katoa aia no runga i “te au tamariki e manganui . . . , e ma te umere te noo mako ua ra ratou katoatoa me kore te varenga ra ratou i te akara i te au irava i roto i te Pipiria Tapu.” E te raveia ra te porokaramu, kare ko te taime te reira i te komakoma puapinga kore ua, te text anga, te kaikaianga, me kore te ori aere ua anga na roto i te au ara aaereanga. Kia noo te au mapu ki to ratou au metua kia rauka te au metua i te tauturu ia ratou kia puapingaia mei te porokaramu. (Deu. 31:12; Maseli 29:15) Te akaari maira te reira au tautaanga i te tu akangateitei no tetai ke e te ariki anga no te kai pae vaerua e orongaia maira.
4. Eaa tatou ka akaari ei i te akaraanga ngateitei ia tatou i te uruoaanga?
4 Akaraanga Ngateitei: E manganui tei akakite mai i te rekareka no te au akamaaraanga i roto i tetai tuatua e “Akaari i te Tu Ngateitei Kerititiano i te Au Taime Ravarai” i te uruoaanga tapere i te mataiti i topa, e te akaketaketa maira i te au tavini o te Atua kia tauta i te akaari i te tu ngateitei Kerititiano i roto i to ratou kakauanga e te akamaneaanga. I teia mataiti kia akamanako meitaki katoa tatou i teia. Te akaata ra to tatou akaaraanga i to tatou au manako no Iehova e no te arikianga rekareka i te riro mai anga ei Au Kite nona. Kia kakau ua rai tatou ei aronga tei “mou i te akono i te Atua ra.”—1 Timo. 2:9, 10.
5. Akapeea tatou i te akonoanga i tetai akaraanga ngateitei i te taime akaangaroi anga i roto i te oire o te uruoaanga?
5 Ka akaari ua ainei tatou i te akaraanga ngateitei ia tatou e aere ra ki te uruoaanga? E akamaara e e manganui te ka kite mai ia tatou e aao ra i to tatou au kati uruoaanga ia tatou i roto i te oire o te uruoaanga. Kia tuke rai to tatou akaraanga mei te au tangata aere. No reira, noatu i te taime akaangaroi anga, mei te aere anga ki vao i te kaikai i muri ake i te porokaramu, kia kakau tatou i tei tau i te au orometua i roto i te oire no te akakoroanga i te aere atu anga ki tetai uruoaanga Kerititiano e auraka e aao i te au kakau mei te au jean, au piripou poto, me kore te au piriaro. Mei teaa tikai te akakiteanga ta teia ka oronga mai ki te oire tangata! E rekareka ana a Iehova me te akaata ra to tatou akaraanga i to tatou turanga ei au orometua.
6. Eaa te au tupuanga meitaki no te akaarianga i te tu ngateitei Kerititiano?
6 Au Tupuanga Mataora: Te akaarianga i te tu ngateitei Kerititiano i ko i ta tatou au uruoaanga, te akatupu ra i te au atianga kia akakitekite atea ua e te oronga ra te reira i tetai akamanako anga meitaki ki te aronga e akarakara maira. I te openga o tetai uruoaanga, kua karanga mai tetai tangata maata e: “Kare roa matou i kite ana i tetai pupu tangata mako tikai. To kotou tu, ko te tu ia e umuumu maira te Atua ia tatou.” Te akatutuanga i te tu ngateitei, te akaari ra i te ngateitei e te aroa no tetai e tetai e te akakaka ra ia Iehova. (1 Pe. 2:12) Te akatutu maira te reira i to tatou mataku i te Atua e to tatou ariki anga rekareka i te tikaanga manea no te ikuikuia mai anga e to tatou Metua. (Ebera 12:28) Kia aruaru tatou i te akaari i te tu ngateitei ia tatou e tapapa atura i te Uruoaanga Tapere “E Aru ia Karaiti!” i teia mataiti.
[Pia i te kapi 5]
Au Akamaara Anga no te Uruoaanga Tapere
◼ Au Ora no te Porokaramu: Ka akamata te porokaramu i te 9:20 i te popongi i te au ra katoatoa e toru. Ka ngaa te ngutupa i te 8:00 i te popongi. Me akamata ana te akatangianga o te imene Patireia, kia noo pouroa tatou ki to tatou au nooanga kia rauka te porokaramu i te akamata i roto i te tu tau. Ka oti mai te porokaramu i te 5:05 i te aiai i te Varaire e te Maanakai, e i te 4:10 i te aiai i te Tapati.
◼ Paka Anga: I te au ngai uruoaanga e kua rauka ia tatou te au ngai paka anga, ka vai ua te au ngai va e kare e tutaki ki te tangata mua ua ka tae mai, ka peke ia ratou. Ka riro te au kati uruoaanga ei akatakaanga no te paka anga. Ko te aronga pakipakitai ua e e kati raitini tikaanga to ratou, te ka akatikaia kia paka i te ngai tapaoia no te aronga pakipakitai. I te mea e e kotinga uaia te ngai paka anga, e tauta pakari kia aere mai ki roto e tai motoka.
◼ Tapaoanga i te Au Nooanga: Ka rauka te au nooanga i te tapao uaia no te aronga tei aru mai ia koe i runga i toou apinga akaoro me kore e tai o kotou are e noo ra.
◼ Kaikai i te Tuaero: E apai mai i tetai kai ine eiaa oki e akaruke i te ngai no te uruoaanga kia tiki atu i tetai kai i te ora kaikaianga. Penei ka rauka tetai pia meangiti akaanuanu kai i te tauruia i raro ake i toou nooanga. Kare te au pia mamaata akaanuanu kai tano na te pamiri, te au kakapu io, e te au kava, e akatikaia i roto i te ngai o te uruoaanga.
◼ Moni Tauturu: E maata te moni e pou ana i te akanoonooanga i tetai uruoaanga tapere. Ka rauka ia tatou i te akaari i to tatou ariki mareka anga na te oronga ua anga i te au moni tauturu ki te angaanga i te ao nei i to tatou Are Uipaanga Patireia me kore i te uruoaanga. Tetai au tieki te orongaia ra i te uruoaanga ka tau kia tataia ki te “Watch Tower.”
◼ Au Tupuanga Kino e te Au Manamanata Tupu Poitirere Ua: Kua koumuumu mai te au ngai e oronga tauturu mai ana e e maata te aronga e ringi ana ia ratou i runga i te cell phone no runga i te au manamanata rikiriki ua. Me tupu ake tetai manamanata tupu poitirere ua i te pae rapakau i te ngai o te uruoaanga, e aravei atu i te tavini tauturu vaitata ua mai kia koe ine, e nana e akakite viviki atu ki te Tipatimani no te Tauturu Mua kia rauka i to tatou tangata tauturu i te kite mai e mei teaa rai te kino o te manamanata e kia oronga atu i te tauturu. Me te umuumuia ra, na to tatou tangata tauturu i reira e ringi atu i te numero tauturu.
◼ Kare e Rongo Meitaki Ana: Ka akakitekiteia atu te porokaramu i te ngai o te otitoriamu i runga i te ratio FM. Kia puapingaia mei teia akanoonooanga, ka anoanoia koe kia apai mai i tetai ratio FM meangiti ua ma te apinga akarongo no te taringa.
◼ Rekotianga: Kare e akatikaia i tetai ua atu apinga rekoti kia tamouia ki te apinga akatangi me kore te paoa i te ngai uruoaanga e ka rauka ua te reira i te taangaangaia i te mataara e kare e tamanamanata atu i tetai ke.
◼ Au Akari Pipi: Te maataanga o te au uruoaanga e raveia ana i roto i te au ngai topiriia e te irinaki ra tatou ki runga i te au matini e akatere ra i te reva. No reira, e mea takinga meitaki no tatou kia kotinga i te taangaanga anga i te au akari pipi pakari te aunga, te ka akakeu i te au tupuanga kino ki te aronga e e ngata ia ratou i te akaea me kore e au maki to ratou te piri atura ki te reira.—1 Kori. 10:24.
◼ Au Pepa Follow-Up: Kia taangaangaia te pepa Please Follow Up (S-43) kia oronga mai i tetai akakiteanga no runga i tetai ua atu tei akaari mai i te inangaro ei tupuanga no ta tatou akakitekite ua anga i te tuatau o te uruoaanga. Ka tau te au papuritia kia apai mai e tai me kore e rua pepa follow-up ki te uruoaanga. Ka rauka katoa teia au pepa i ko i te Tipatimani no te Pia Vairanga Puka o te uruoaanga. Te au pepa akaki meitakiia kia tukunaia atu ki te Pia Vairanga Puka kia akonoia me kore ki te tekeretere o toou putuputuanga me oki atu koe.—Akara i Ta Tatou Angaanga Patireia o Peperuare 2005, kapi 6.
◼ Au Motera: (1) Auraka e tapao i te au ngai nooanga me kare e anoanoia, e auraka e kia tere atu te au tangata e akatikaia ra i te noo i roto i toou ngai nooanga. (2) Me ka tipu koe i taau tapaoanga, e akakite viviki atu koe ki te motera. (3) E apai i te apinga tari kiri kakau me kua papa tikai koe i te apai, e oti kia akaoki viviki atu koe i te reira kia rauka i tetai ke i te taangaanga atu. (4) Auraka e tunu kai i roto i te au ngai nooanga e kare e akatikaia i te tunu kai. (5) Ei au Kerititiano, papu e kare roa tatou e inangaro i te rave maata mai i te au kai i te popongi e oronga uaia mai ana, te kaope, te au aiti e vai ra na te au manuiri kia kai ia ratou i ko tikai i te motera. (6) Akaari i te au ua o te vaerua i te au taime ravarai i te akonoanga i te aronga angaanga i te motera. (7) Me ka tupu mai tetai manamanata no runga i toou ngai nooanga i te motera, kia papu i te akakite atu ki te Tipatimani no te Ngai Nooanga ia koe i te uruoaanga.