Porokaramu Ou no te Ra Akaputuputuanga Takake
E akapapaanga umere tikai to te mata. (Sa. 139:14) I na, ka rauka ua te reira i te akara ki runga e tai ua apinga i te taime okotai. Te tika ra te reira i te tu tika tikai e te tu akatutuanga. Kia taka meitaki e kia akara tamou i to tatou akaraanga i te pae vaerua, ka tau tatou kia akamou i to tatou manakoanga i te raveanga i to te Atua anoano. I te akamanakoanga i te au arairaianga te maata ua maira i to Satani ao, te tau ra te porokaramu no te ra akaputuputuanga takake no te 2006 mataiti tavini anga i te akatupu i te tumu tuatua “Kia Akono Meitaki i Toou Mata”!—Mata. 6:22.
Eaa ta tatou ka rave kia rauka mai i te au akameitakianga mei Iehova ra? (Maseli 10:22) Ka uriuriia teia uianga i roto i te tuanga “Kokotianga i te Au Akameitakianga no te Akono Anga i Tetai Mata Meitaki.” Ka akaari mai te au uiuianga e akapeea tatou e puapingaia ai mei te akonoanga i te au kaveinga o te Tuatua Tapu. Te ako mua a te vaa tuatua atoro ra, e “Akonoanga i Tetai Mata Meitaki i Roto i Tetai Ao Kino,” ka akamatakite mai ia tatou i te au apinga te tamanamanata ra i to tatou oraanga e ka pokia marie ua atu i to tatou turanga pae vaerua. Ka kite katoa mai tatou eaa te kapitiia maira i te ikianga “i taua tuanga meitaki nei.”—Luka 10:42.
Akapeea e rauka ai i te au metua e tetai atura i te akamaroiroi i te au Kerititiano mapu kia akara tamou ki runga i te au aruaruanga pae vaerua? Te au tuanga “Te Au Metua te Akatano Tika ra i ta Ratou Kakao” e “Te Au Mapu Tei Itae Atura i te Au Akakoroanga Pae Vaerua” ka kapitiia mai te au tuatua mei te au metua e te au mapu no runga i teia uianga puapinga. (Sa. 127:4) Te ako anga openga a te vaa tuatua atoro ka uriuri e akapeea tatou i te aaere kapiti atu ma ta Iehova akaaerenga ei aronga tataki tai, ei au pamiri, e ei putuputuanga katoa.
Noatu e te ou ua ra tatou i te piri mai anga ki te tuatua mou, me kore te tavini ra ia Iehova no te au ngauru mataiti, e mea puapinga no tatou kia ‘akono meitaki i to tatou mata.’ Ka tauturu mai te porokaramu no te ra akaputuputuanga takake ia tatou i te rave tikai i te reira.