Porokaramu Ou no te Ra Akaputuputuanga Takake

Me kite atu tatou me kore te akarongo atura i tetai akairo no te matakiteanga inara kare oki i akono i te reira, ka kino te au tupuanga. E mea puapinga maata roa atu kia akono i te aratakianga i te pae vaerua te orongaia maira e Iehova. Ka akamaataia teia i roto i te porokaramu no te ra akaputuputuanga takake no te mataiti tavinianga te ka aere mai. Te tumu manako koia oki “E Matakite i to Kotou Akarongo Anga.”​—Luka 8:18.

I roto i tana tuatua mua, ka akara te vaa tuatua atoro ra e akapeea te ako anga i roto i te nga pene akamataanga o ta Paulo reta akauruia ki te au Epera e tau ra kia tatou i teia tuatau nei. I roto i te tuatua openga, “Kia Matakite i te Ikuikuanga Tu-Atua,” ka tauturu aia i te katoatoa kia akara matatio me te akarongo tikai ra ratou kia Iehova, ki tana Tamaiti, e te “tavini akono meitaki e te pakari.”​—Mata. 24:45.

E maata te au tuanga o te porokaramu ka riro ei puapinga tikai no te au ngutuare. “Au Ngutuare te Akarongo ra ki ta te Atua Tuatua ma te Tamanamanata Kore” ka tauturu ia tatou kia kopae i te au apinga o te ao i te pokia anga i to tatou turanga i te pae vaerua. Ka kapitiia mai te au uiuianga o te aronga tei akono i te au tauianga kia rauka ia ratou i te tuku i te au mea pae vaerua ko te apinga mua ia. “Akapeea te Akarongo Meitaki Anga ki ta te Atua Tuatua e Akaketaketa ra i ta Tatou Au Mapu” ka kapitiia mai te au uiuianga o te au mapu tei tu oki no te tuatua mou i te apii, ma to ratou au oa, me kore i roto i te angaanga orometua. “Aronga Rikiriki te Akarongo ra ki ta te Atua Tuatua e te Apii Ra” ka tauturu ia tatou e auraka e manako meangiti ua i te tu kite o te aronga mapu no te apiianga. Ka tauturu te au uiuianga ma te aronga mapu e to ratou au metua ia tatou kia kite i te meitaki te ka tupu mai no te apiianga i te tamariki i roto i te au mataara a Iehova mei te tamariki anga mai.

Ia Satani e “arataki ke ra i te katoa anga o te au tangata i te enua nei,” te akaari ra a Iehova i tona tavini tiratiratu i te mataara ka tau ratou kia aaere. (Apo. 12:9, NW; Isaia 30:21) Ka akariro te akarongo meitaki anga ki tana ako e te akono tika anga i te reira i roto i to tatou au oraanga kia kite pakari mai tatou, kia apai mai i te tu mataora kia tatou, e kia arataki atu ki te oraanga mutu kore.​—Maseli 8:​32-35.