Akapeea me Taangaanga i te Poroutia Nuti Meitaki no ko i te Atua!
Tataia te Poroutia ou ei Tauturu ia Tatou no te Oki Akaou Anga e te Akamata i te au Apii Pipiria
1. Eaa te poroutia ou tei tukuia mai i ko i te Uruoaanga Tapere “Paruru i Toou Ngakau!” tei tataia ei tauturu ia tatou no te oki akaou anga e te akamata i te au apii Pipiria?
1 Rekareka tikai tatou i ko i te Uruoaanga Tapere “Paruru i Toou Ngakau!” te tukuia mai anga tetai poroutia ou ei tauturu ia tatou no te oki akaou anga e te akamata i te au apii Pipiria. Aiteite te Nuti Meitaki no ko i te Atua! ki te poroutia Umuumu ta te reira e mono ra, no te mea e poto ua te au apiianga. Ka tauturu teia ia tatou kia taangaanga meitaki i te poroutia no te au apii Pipiria i te ngutupa. Ko te poroutia Umuumu, no runga te reira i te au umuumuanga Kerititiano e kua ngata i tetai aronga apii ou i te ariki, kareka teia poroutia ou, no runga te reira i te nuti meitaki i roto i te Pipiria.—Anga. 15:35.
2. Eaa ra i neneiia ai te poroutia Nuti Meitaki?
2 Eaa ra i tataia ai te reira? E pati ua ana te au taeake i te ao katoa nei i tetai apinga ka mama ua i te marama, ei akaariu mai i te tangata ki te tuatua mou e oti taki atu ki roto i te puka ta te Pipiria e Apii Maira, ta tatou puka tumu no te au apii Pipiria. Te aronga kare e inangaro ana i te tatau puka, ka reka atu ratou i te apii i te Pipiria na roto i te poroutia. Tetai katoa, mama atu i te uri i tetai poroutia ki roto i te au reo e manganui.
3. Akapeea teia poroutia i tuke ei mei tetai au puka apii ke mai?
3 Te tu i Tataia Ai: Maataanga o ta tatou au puka apii, kua tataia kia mama ua i te tangata i te tatau i te reira e kia marama i te tuatua mou, noatu ko ratou anake ka apii. E tuke ra teia poroutia. Kua tataia ei tauturu no te apii Pipiria ma tetai puapii. No reira, me oronga koe i te poroutia ki tetai tangata, e mea meitaki i te uriuri e tai me kore e rua parakarapa. Potopoto ua te au parakarapa kia rauka i te uriuri i ko i te ngutupa o te tangata me kore i tana ngai angaanga. E meitaki i te akamata i roto i te apii numero 1, tera ra ka rauka rai i te akamata i te apii i roto i tetai ua atu ngai o te poroutia.
4. Akapeea te poroutia te tauturu anga ia tatou kia apii tika atu mei roto mai i te Pipiria?
4 I roto i te maataanga o ta tatou au puka, ka kiteaia te au pauanga o te au uianga i roto i te au parakarapa. Inara, i roto i teia poroutia ka kiteaia te au pauanga i roto i te Pipiria. Maataanga o te tangata te inangaro ra i te apii mei roto mai i te Pipiria eiaa mei roto atu i ta tatou au puka. No reira, pouroa te au irava i roto, ko tetai papaki ua tei taikuia mai. Ka anoanoia kia tatau tika atu i te reira mei roto mai i te Pipiria. Ka tauturu teia i te aronga apii kia kite e ko ta ratou e apii ra, no ko mai i te Atua.—Isa. 54:13.
5. Eaa ra i puapinga ai no te puapii kia akapapa meitaki no te au taime ka apii?
5 Kare te poroutia e akamarama mai ana i te au irava pouroa. No teaa ra? No te mea kua tataia te reira ei akamaroiroi i te tangata apii kia ui i tetai au uianga, e kia tauturu i te puapii kia taangaanga i tona tu karape i te apii. No reira, e mea puapinga kia akapapa meitaki no te au taime ka apii. Inara, kia matakite: Auraka e maata roa te tuatua. E reka ana tatou i te akamarama i te au Tuatua Tapu. Tera ra, e maata te puapinga ka rauka na te pati anga i te tangata apii kia akamarama mai aia i tona manako no te aiteanga o te irava. Me tau te taangaanga anga i te au uianga, ka tauturu tatou iaia kia akamarama mai eaa te aiteanga o te irava.—Anga. 17:2.
6. Akapeea tatou me taangaanga i te poroutia: (a) me ekoko te tangata no runga i te Atua e te Pipiria? (e) me aere mei tera are ki tera are? (ng) kia akamata i tetai apii Pipiria na te oronga tika atu anga? (ke) no te atoro akaou anga?
6 Mei te au puka ke rai no te rave i te au apii, ka rauka i te oronga i teia poroutia i tetai ua atu taime, noatu eaa te puka oronga no taua marama ra. E maata te ka reka i te taangaanga i te reira me oronga tika atu i tetai apii Pipiria i te ngutupa. E mei tei akakiteia i ko i te uruoaanga tapere, me taangaangaia te reira no te atoro akaou anga i te aronga tei akaari mai i te inangaro, “papu roa e ka riro te oki akaou anga ei mea mataora tikai!”—Akara i te au pia i te kapi 7-9.
7. Akapeea koe me rave i tetai apii Pipiria i roto i te poroutia?
7 Peea me Rave i te Apii: Akamata tatou i te uriurianga na te tatau anga i te uianga akatouia tei tanumeroia. Aru mai, tatau i te parakarapa e te (au) irava tei akaararaia. Taangaanga i te au uianga te ka tauturu i te tangata ngutuare kia marama i te aiteanga o te au irava. E oti i mua ake ka neke ei ki te tuanga ka aru mai, pati i te tangata ngutuare kia pau i te uianga tei akatouia, kia papu e te marama ra aia. Penei no te au atoro anga mua, kia uriuri e tai rai uianga tei akatouia. Muri mai, ka rauka i te akaroa atu i te uriurianga kia pou te katoaanga o te apii.
8. Akapeea tatou me akaari i te au irava ki te tangata ngutuare, e no teaa ra?
8 Te au irava tei taikuia i muri ake i te tuatua “e tatau ia,” ko te reira te au irava ka pau tika atu i te uianga tei akatouia. Me akaari tatou i tetai irava ki te tangata ngutuare, eiaa e karanga e, “Kua tata te apotetoro ko Paulo e” me kore, “Akara ana i ta Ieremia i totou.” Ka manako mai te tangata ngutuare e, na te tangata ua nei teia au tuatua ta tatou e tatau atu nei. E meitaki atu i te karanga e, “Te karanga nei te Tuatua a te Atua e” me kore, “Akara ana i ta te Pipiria i totou mai.”
9. Ka anoanoia ainei kia tatau i te au irava pouroa i te tuatau o te apii?
9 Ka tatau ainei tatou i te au irava pouroa tei taikuia, me ko te au irava ua e karanga ra e “e tatau ia”? Tei runga te reira i te turanga o te tangata apii. E tumu tetai i taikuia mai te au irava. E au manako puapinga to roto, e ka puapingaia no te uriurianga. I roto ra i tetai au turanga, penei no te rava kore te taime o te tangata apii, tona inangaro, me kore kare aia e kite roa i te tatau, ka akaari mai te reira e kia tatau ua tatou i te au irava e karanga ra e “e tatau ia.”
10. Eaa te taime tau no tatou kia taui i te apii ki te puka ta te Pipiria e Apii Maira?
10 Taime Tau Kia Taui ki te Puka ta te Pipiria e Apii Maira: Muri ake i tetai au apii e kua putuputu te reira, ka rauka ia tatou i te taui ki te puka ta te Pipiria e Apii Maira me kore e apii ua atu rai i te poroutia Nuti Meitaki. Na te au papuritia rai e iki i te taime ka tau i te taui. Me rave tatou i te reira, ka akamata ainei tatou mei te pene mua mai o te puka ta te Pipiria e Apii Maira? Kare e araiia. E tukeke te turanga o te tangata. Tera ra, ka puapingaia te maataanga o te aronga apii na te apii akaou anga i taua au tumu manako ra i roto i te puka ta te Pipiria e Apii Maira.
11. Eaa ra tatou ka taangaanga meitaki ei i teia poroutia ou?
11 Roto i tetai ao kare e maata te nuti meitaki, e tikaanga ngateitei tikai to tatou kia akakite i te nuti meitaki rava atu—koia oki te tutara nei te Patireia o te Atua, e kare e roa atu ka apai mai te reira i tetai ao ou te ngai e vai ei te tuatua tika! (Mata. 24:14; 2 Pete. 3:13) Te irinaki nei tatou e ko te manganui tei akarongo i teia karere, ka ariki ratou i teia au tuatua akauruia e: “Te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai mai i te tuatua meitaki ra, o tei tutu aere i te ora ra; o tei tuatua mai kia Ziona, Tei to Atua ra te au!” (Isa. 52:7) Kia taangaanga tatou i teia poroutia ou ei apai i te nuti meitaki a te Atua ki te aronga e kaki ra i roto i ta tatou ngai tutuanga!
[Pia i te kapi 7]
Me Ekoko te Tangata no Runga i te Atua e te Pipiria:
● Roto i tetai au ngai, te kite nei te au papuritia e me taikuia te tuatua “Atua” e te tuatua “Pipiria,” kare te tangata e inangaro i te akarongo mai. No reira, i te atoro anga mua, penei e mea meitaki kia tuatua no runga i te au mea ta te tangata e manako ra i roto i to kotou ngai, koia oki ka inangaroia tetai kavamani meitaki, tetai ngai e rauka mai ei te tauturu no te au pamiri, e ta te tuatau ki mua ka apai mai no ratou. Penei e akaari i te poroutia Nuti Meitaki i muri ake i tetai au pukapukaanga kia akaari akapeea tatou te kite anga e e Atua tetai, e te tumu i irinaki ei tatou i te Pipiria.
[Pia i te kapi 8]
Me Aere Mei Tera Are ki Tera Are:
● “Aere mai au i te akaari e ka rauka ia koe i te kite i ta te Atua i akakoro no te tangata no te tuatau ki mua. I manako ana ainei koe e me ka takore te Atua i to tatou mamae? [Tiaki no te pauanga.] Te akaari nei teia poroutia i te ngai i roto i te Pipiria ka kite koe i te pauanga o taua uianga ra. [Oronga i te poroutia kiaia, e oti tatau i te parakarapa mua i roto i te apii numero 1, pera katoa ia Ieremia 29:11.] Mei taau i tatau mai, e mea tau ainei kia inangaro te Atua i tetai oraanga meitaki atu no tatou a te tuatau ki mua? [Tiaki no te pauanga.] Me ka inangaro koe, naau teia kopi. Me oki akaou mai au, ka uriuri taua i te rua o te parakarapa kia kite i te pauanga a te Pipiria no teia uianga, ‘Akapeea te Atua me takore i te mamae o te tangata?’” Me maata te taime o te tangata ngutuare i te atoro anga mua, penei ka rauka ia korua kia tatau e kia uriuri i te parakarapa rua e te au irava Pipiria e toru. Akanoo kia oki akaou kia uriuri i te uianga rua o taua apii ra.
● “Maata te tangata e inangaro ra i te pure me o ratou ki roto i te manamanata. E pure ana ainei koe i tetai taime? [Tiaki no te pauanga.] I toou manako te akarongo maira te Atua i te au pure ravarai, me e au pure ainei tetai kare aia e mareka ana? [Tiaki no te pauanga.] E poroutia taku e akaari maira e akapeea koe e kite ei i te pauanga a te Pipiria no teia au uianga. [Oronga i tetai kopi kiaia, e oti uriuri kapiti i te parakarapa mua o te apii 12 e te au irava “e tatau ia.”] Kare ainei i te mea mataora i te kite e te puareinga ua ra te Atua i te akarongo kia tatou? Inara, kia kite tatou i te puapinga tikai o te pure, ka anoanoia tatou kia kite meitaki no runga i te Atua. [Uri ki te apii 2 e oti tatau i te au tumu manako rikiriki.] Me ka inangaro koe, ka akaruke mai au i teia poroutia naau, a tetai taime ka tatau ei taua i te au pauanga a te Pipiria no teia au uianga.”
● “Aere mai au no te mea te manamanata nei te tangata no runga i te au mea e tupu nei i roto i teianei ao. I toou manako ka meitaki mai te au turanga? [Tiaki no te pauanga.] Maata te tangata tei poitirere i te kite anga e e nuti meitaki to roto i te Pipiria e oronga maira i te manakonakoanga no tatou. Teia tetai au uianga ka rauka i te Pipiria i te pau.” Oronga i te poroutia, pati kiaia kia iki i tetai uianga i te kapi openga tana e reka ana. Uri ki te apii, e oti akatutu akapeea me rave i tetai apii. Akanoo kia oki akaou kia uriuri i te uianga ka aru mai i roto i taua apii ra.
[Pia i te kapi 9]
Tamata i te Oronga Tika Atu:
● “Aere mai au i te akakite i tetai mataara ou no te apii i te Pipiria. E 15 apii i roto i teia poroutia e akaari maira i te ngai ka kite koe i te au pauanga no te au uianga puapinga i roto i taau Pipiria. [Akaari kiaia i te kapi mua e te kapi openga.] Kua tamata ana ainei koe kia marama tikai i te Pipiria? [Tiaki no te pauanga.] Ka akaari ana au kia koe i te tu mama me rave i te apii. [Uriuri i te parakarapa mua no te uianga 3 i roto i te apii 3, e oti tatau ia Apokalupo 21:4, 5. Me ka tau, uriuri i te parakarapa e te au irava “e tatau ia” ka aru mai.] Me ka inangaro koe, ka akaruke mai au i teia poroutia naau. Te akamaroiroi nei matou ia koe kia tamata e tai ua taime i te apii i te Pipiria. Me ka reka koe, ka apii ua atu taua. Me oki mai au, ka uriuri taua i te apii mua. E tai rai kapi.”
[Pia i te kapi 9]
Akaari i te Poroutia ou i te Atoro Akaou Anga:
● Me oki no te atoro akaou anga i tetai tangata tei akaari mai i te inangaro, penei e karanga tatou e: “Mataora te kite akaou ia koe. Apai mai au i teia poroutia e akaari maira i te au pauanga Pipiria no te au uianga puapinga e manganui. [Oronga i te poroutia kiaia, e oti pati iaia kia akara i te kapi openga.] Ko teea tumu tuatua taau e reka ana? [Tiaki no te pauanga. E oti uri ki te apii tana i iki.] Ka akaari atu au akapeea me taangaanga i teia poroutia kia kite i te pauanga a te Pipiria.” Akatutu i tetai apii na te uriuri anga e tai me kore e rua parakarapa e te au irava “e tatau ia.” Kua akamata koe i tetai apii Pipiria! Akaruke i te poroutia kiaia, e oti akanoo kia oki akaou. Me oti ia korua taua apii ra, uriuri i tetai apii ke tana i iki, me kore akamata mei te akamataanga mai o te poroutia.