Uua Rai te Tutuanga na Runga i te Tereponi
1. Eaa ka akamanakoia ai te tutuanga na runga i te tereponi ei tuanga puapinga no ta tatou angaanga orometua?
1 Eaa tatou ka akamanako ei i te tutuanga na runga i te tereponi i roto i ta tatou angaanga orometua? No te mea, ko tetai mataara teia i te tauturu i etai ke kia rauka te kite tika tikai no te ora. (2 Pete. 3:9) Noatu ko te tutu mei tera are ki tera are te mataara tumu e akakite aere ana tatou i te tuatua meitaki o te Patireia o te Atua, e rave ana rai tatou i tetai au ravenga ke atu kia taeria te aronga kare e kitea ana i te kainga.—Mata. 24:14; Luka 10:1-7; Apo. 14:6.
2. E akapeea ana me akaaere i te tutuanga na runga i te tereponi?
2 Te Akaaere Anga i te Reira: Mei te akanoonooanga no te angaanga tutuanga i tera are ki tera are, kua akanoo katoaia rai te tutuanga na runga i te tereponi no te au papuritia. Penei na te tangata okotai me kore na tetai pupu meangiti e rua ki te toru tangata e rave i te reira. Kia raveia i roto i tetai ngai muteki ua. Maata tei kite e e meitaki atu te noo ki ko i tetai kaingakai e ta ratou au apinga matauia no te tutu aere mei tera are ki tera are i mua ia ratou.
3. Eaa ta tatou ka akamanako me tutu na runga i te tereponi?
3 Me Tutu na Runga i te Tereponi: Me tutu na runga i te tereponi, kia tuatua tatou na roto i te tu pukapuka ua. Penei ka tatau ua te aronga ou i ta ratou tuatua ki te tangata ngutuare, kia na roto ra i te tu pukapuka ua. Ka riro te au tuatua akamataanga i roto i Ta Tatou Angaanga Patireia e te aenga pepa Ka Inangaro Ainei Koe i te Kite i te Tuatua Mou? ei tauturu maata. I roto i taau uaorai tuatuaanga, akataka i taau karere ka oronga, akapapu eaa taau uianga ka ui, e kia papa ua tetai au irava ei pau i te uianga. Ka oronga koe i te au puka e orongaia ana mei tera are ki tera are. Akamanako i teia au akamaaraanga: Kia maru, tuatua marie ua. Ei tu akangateitei, akakoromaki, e te oaoa, no te mea ka kite uaia mai teia i runga i te tereponi. Akarongo me akakite mai te tangata ngutuare i tona manako, e oti akameitaki atu iaia. Matakite eiaa e taiku atu i te akanoonooanga no te moni tauturu, ko te manakoia e e angaanga patipati moni teia i runga i te tereponi.
4. Eaa ta te tutuanga na runga i te tereponi ka tauturu ia tatou kia rave i roto i ta tatou ngai i tukuia mai?
4 Penei e tangata maki taau ka tuatua atu i runga i te tereponi me kore e tangata angaanga moni, kare e kitea ana i roto i te angaanga orometua mei tera are ki tera are. Tetai papaki e noo ana i roto i te au ngai kua rokaia te aua me kore i roto i te au apatimani kare e tikaia tetai ua atu tangata ki roto. No reira, i te tauta anga kia rave akaope takiri i ta tatou angaanga orometua, e akamanako rai i te taangaanga i te mataara uua no te tutuanga na runga i te tereponi.