Akapeea i te Oronga i te Puka Pipiria e Apii Maira

Te kapitiia maira i roto i te kapi i roto ake te au tamanakoanga tukeke aere no te oronga anga i te puka Pipiria e Apii Maira. Kia puapinga meitakiia, e tuku i te reira i roto i taau uaorai au tuatua, e taui i taau araveianga ki te au tangata i roto i taau ngai e angaanga ana, e akamatau ki te au manako no te tuatua anga i roto i te puka. Tetai au tuatua akamataanga ke atu te tau ra no taau ngai e angaanga ra ka rauka katoa i te taangaangaia.​—Akara i Ta Tatou Angaanga Patireia Tianuare 2005, kapi 8.

Aramakito

◼ “Me akarongo ana te au tangata i te tuatua ‘Aramakito,’ e manako ana te manganui i tetai tamateanga maata. Ka poitirere ainei koe i te kite mai ia Aramakito e e apinga mataora tikai i te tapapa atu? [Tiaki no te pauanga. Tatau i reira ia Apokalupo 16:14, 16.] E akara ana i teia tuatua e eaa te tu o te oraanga i muri ake ia Aramakito.” E uri ki te kapi 82-4 e tatau i te parakarapa 21.

Pipiria

◼ “E taiku putuputu ana te au tangata ki te Pipiria e ko te Tuatua a te Atua. Kua manako ana ainei koe e akapeea tetai puka tei tataia e te au tangata i tau i te kapikiia e ko te Tuatua a te Atua? [Tiaki no te pauanga. Tatau i reira ia 2 Petero 1:21 e te parakarapa 5 i te kapi 19-20.] Te oronga maira teia puka i te pauanga a te Pipiria ki teia au uianga.” Akaari i te au uianga i te kapi 6.

◼ “I teia tuatau nei, maata atu te au akakiteanga te ka rauka ua i te tangata i to mua atu ana. Inara iea i toou manako te ngai e kiteaia ai e tatou te ako anga tau te ka tauturu ia tatou i te arataki i te au oraanga mataora, e te manuia? [Tiaki no te pauanga. Tatau i reira ia 2 Timoteo 3:16, 17 e te parakarapa 12 i te kapi 23.] Te akataka maira teia puka e akapeea tatou i te akono anga i tetai tu te akamareka ra i te Atua e te puapinga ra ia tatou.” Akaari i te tiati e te tutu i te kapi 122-3.

Mate/​Tuakaouanga

◼ “E manganui te au tangata te manako ra eaa tikai te tupu ana me mate ake. I toou manako e ka kite ainei tatou? [Tiaki no te pauanga. Tatau i reira ia Koheleta 9:5 e te parakarapa 5-6 i te kapi 58-9.] Te akataka katoa maira teia puka i te aiteanga o te tuakaouanga ta te Pipiria e taputou maira no te aronga tei mate.” Akaari i te tutu i te kapi 75.

◼ “Me mate ana tetai tangata ta tatou i akaperepere, e mea natura i te inangaro i te kite akaou i taua tangata ra. Kare ainei koe e akatika? [Tiaki no te pauanga.] E manganui tei kite mai i te pumaana i roto i te taputou a te Pipiria no tetai tuakaouanga. [Tatau ia Ioane 5:28, 29 e te parakarapa 16-17 i te kapi 71-2.] Te pau katoa maira teia pene i teia au uianga.” Akaari i te au uianga i te akamataanga i te kapi 66.

Ora Mutu Kore

◼ “E maata te au tangata e inangaro ana i te oraanga meitaki i te pae kopapa e tetai oraanga roa. Inara me ka rauka ainei, ka inangaro ainei koe i te noo e tuatau ua atu? [Tiaki no te pauanga. Tatau i reira ia Apokalupo 21:3, 4 e te parakarapa 17 i te kapi 54.] Te uriuri ra teia puka e akapeea e rauka ai ia tatou i te ora mutu kore e eaa te tu o te oraanga me akatupu tikaiia taua au taputou ra.”

Pamiri

◼ “E inangaro pouroa ana tatou kia rauka i tetai oraanga pamiri mataora. Kare ainei koe e akatika? [Tiaki no te pauanga.] Te tuatua ra te Pipiria no runga i tetai apinga ka rauka i te katoatoa i roto i te pamiri i te rave te ka akatupu i te tu mataora i roto i te pamiri​—kia aru i te Atua i te akaarianga i te aroa.” Tatau ia Ephesia 5:1, 2 e te parakarapa 4 i te kapi 135.

Are

◼ “I roto i te au ngai e manganui, kua ngata mai te kite anga i tetai ngai meitaki i te nooanga te ka peke i te tutaki. I toou manako e a tetai tuatau ka rava meitaki ua te au are no te katoatoa? [Tiaki no te pauanga. Tatau i reira ia Isaia 65:21, 22 e te parakarapa 20 i te kapi 34.] Te akataka maira teia puka e akapeea teia taputou mei te Atua ra e akatupuia ai.”

Atua ko Iehova

◼ “E maata te au tangata te irinaki ra i roto i te Atua te inangaro ra kia piri vaitata atu kiaia. Kua kite ainei koe e te pati maira te Pipiria ia tatou kia akavaitata atu kiaia? [Tiaki no te pauanga. Tatau i reira ia Iakobo 4:8a e te parakarapa 20 i te kapi 16.] Kua akapapaia teia puka i te tauturu i te au tangata kia kite maata atu no runga i te Atua, na te taangaanga anga i ta ratou uaorai kopi o te Pipiria.” Akaari i te au uianga i te akamataanga i te kapi 8.

◼ “E manganui te au tangata e pure ana kia akatapuia to te Atua ingoa, me kore kia akangateiteia. Kua manako ana ainei koe e koai taua ingoa ra? [Tiaki no te pauanga. Tatau i reira ia Salamo 83:18 e te parakarapa 2-3 i te kapi 195.] Te akataka maira teia puka eaa ta te Pipiria e apii tikai maira no runga i te Atua ko Iehova e tana akakoroanga no te au tangata ravarai.”

Iesu Karaiti

◼ “Kua rongo te au tangata takapini i te ao nei ia Iesu Karaiti. E karanga ana tetai pae iaia e e tangata meitaki tikai ua aia. E akamori ana tetai pae iaia e ko te Atua Mana Katoatoa. I toou manako e puapinga ainei eaa ta tatou e irinaki ra no runga ia Iesu Karaiti?” [Tiaki no te pauanga. Tatau i reira ia Ioane 17:3 e te parakarapa 3 i te kapi 37-8.] Arataki i te manako ki te au uianga i te akamataanga i raro ake i te ingoa o te pene.

Pure

◼ “Kua manako ana ainei koe e akapeea te Atua i te pauanga i te au pure? [Tiaki no te pauanga. Tatau i reira ia 1 Ioane 5:14, 15 e te parakarapa 16-18 i te kapi 170-2.] Te akataka katoa maira teia pene eaa tatou ka pure ei ki te Atua e eaa ta tatou ka rave kia rongoia e ia.”

Akonoanga

◼ “E manganui te au tangata te akamata ra i te akamanako i te au akonoanga o te ao nei e ko te tumu anga e kare oki e ko tetai pauanga no te au manamanata o te au tangata ravarai. I toou manako te arataki ra ainei te akonoanga i te au tangata i te mataara tika? [Tiaki no te pauanga. Tatau i reira ia Mataio 7:13, 14 e te parakarapa 5 i te kapi 145-6.] Te akara matatio ra teia pene e ono tu te akataka maira i te akamorianga ta te Atua e mareka ra.” Akaari i te papaanga i te kapi 147.

Tumatetenga/​Mamaeanga

◼ “Me tupu ana tetai tumatetenga, e manganui te ui ra me te manako tikai maira te Atua i te au tangata e te kite maira i to ratou mamaeanga. Kua manako ana ainei koe no runga i te reira? [Tiaki no te pauanga. Tatau i reira ia 1 Petero 5:7 e te parakarapa 11 i te kapi 11.] Te akataka maira teia puka e akapeea te Atua i te takore takiri anga i te mamae o te au tangata ravarai.” Akaari i te au uianga i te akamataanga i te kapi 106.

Tamaki/​Au

◼ “E anoano ana te au tangata i te au ngai ravarai i te au. I toou manako te manakonakoanga no te au i te enua nei e mea moemoea ua ainei? [Tiaki no te pauanga. Tatau i reira ia Salamo 46:8, 9.] Te uriuri ra teia puka e akapeea te Atua i te akatupu anga i tona akakoroanga e ka apai mai i te au i te ao katoa nei.” Akaari i te tutu i te kapi 35, e akamanako i te parakarapa 17-21 i te kapi 33-4.

[Pia i te kapi 5]

Au Mataara i te Taiku Atu Anga i te Akanoonooanga no te Moni Tauturu

“Me ka inangaro koe i te oake mai i tetai manga moni tauturu i teia ra ki ta matou angaanga i te ao katoa, ka ariki rekareka ua au i te reira.”

“Mei te mea e orongaia ana ta matou au puka kare e tiati ana, e ariki ana matou i te au moni tauturu tau meitaki no ta matou angaanga i te ao katoa.”

“Penei te umere ra koe e akapeea teia angaanga i te raveia anga. Te tumu koia oki te turuturuia ra ta matou angaanga i te ao katoa e te au moni tauturu oronga uaia. Me ka inangaro koe i te oake mai i tetai manga moni tauturu i teia ra, ka mataora ua au i te ariki i te reira.”