Patuanga i te Are Uipaanga Patireia—Tetai Tuanga Puapinga Maata no te Angaanga Tapu
1. Eaa tei akatupuia i te patuanga i te Are Uipaanga Patireia, inara eaa te inangaroia ra rai kia raveia?
1 I te rima mataiti i topa akenei, e 16 Are Uipaanga Patireia tei akatuia, e 2 tei akaouia, e e 8 kua akatoroia e kua akaouia i roto i te ngai o te manga Nu Tireni. Te ariki ngakau tae tikai nei matou no te angaanga pakari a te au Kumiti Patu Anga o te Tapere e te katoatoa tei tauturu atu ia ratou. Noatu e e aka angaanga tikai tei raveia, e maata atu rai te inangaroia ra kia raveia i te patuanga i te Are Uipaanga Patireia. Akapeea tatou katoatoa i te turuanga i teia tuanga puapinga o ta tatou angaanga tapu kia Iehova?—Apo. 7:15.
2. Akapeea tatou i te turu tikai anga i te angaanga no te patuanga i te Are Uipaanga Patireia?
2 Kia Puareinga Ua: Me e papuritia koe kua papetitoia, te pati nei matou ia koe kia oronga ua ia koe uaorai kia angaanga kapiti ma te Kumiti Patu Anga o te Tapere na te akakianga i tetai Kingdom Hall Volunteer Worker Questionnaire. (Sa. 110:3) Pouroa te aronga te ka tauturu kia puareinga ua i te angaanga e kia rauka te tu taokotaianga. (Sa. 133:1) Noatu me kare oou kite karape i te patuanga, ka riro katoa koe ei tauturu maata ki te puapinga o tetai angaanga patuanga. Penei ka rauka katoa ia koe te terenianga te ka akatika ia koe kia taangaanga roa atuia i te tuatau ki mua.
3. Na roto i tetai atu au mataara e rauka ai ia tatou i te akaari i to tatou turuanga no teia akanoonooanga?
3 Me kare e rauka ia koe i te tauturu, ka rauka ia koe i te akaari i taau turuanga na te akamaroiroianga i tetai ke te ka piri mai ki roto i te akanoonooanga. Ka rauka ia koe i te rave i te au tuanga angaanga i roto i te putuputuanga a te aronga tei aere i te angaanga. Na te paranianga ki mua, ka rauka i te aronga pakari i te akapapu e kua akono meitakiia te putuputuanga me te angaanga ra tetai pae i runga i te angaanga no te Are Uipaanga Patireia. Kare e ekokoanga, te mareka maira a Iehova me angaanga taokotai kapiti tatou no te akatereanga i te au anoano o te Patireia ki mua.—Ebera 13:16.
4. Akapeea tatou i te akamaroiroianga i te aronga tei piri atu ki roto i te au angaanga no te patuanga i te Are Uipaanga?
4 Kia Akamaroiroi: Te o maira te tuatau roa e te angaanga pakari i te patuanga i te au are akamorianga. No reira, te marama ua ra e, i tetai au taime ko te aronga tei patiia atu kia tauturu i runga i te au angaanga patuanga ka aere ratou mei to ratou au putuputuanga tikai. Kia viviki tatou i te oronga i te akameitakianga e te akamaroiroianga ki te aronga tauturu i te patuanga, tei akono i te au akaatinga kia akono i teia “angaanga.”—Anga. 6:3; Roma 14:19.
5. Akapeea te aronga tauturu no te patuanga i te akaarianga i te tu tau?
5 Kia Paunu Meitaki: Ko te tutuanga i te Patireia o te Atua ta tatou angaanga teokaratiki maataia. (Mareko 13:10) I te akamanakoanga i teia, te tauta ra te au Kumiti Patu Anga o te Tapere kia akapapa i te au angaanga kia kore oki te aronga tauturu e umuumu puapinga koreia kia noo roa mei to ratou putuputuanga. Pera katoa, ka aruaru te aronga tauturu no te patuanga i te tu tau i te akonoanga i ta ratou au apainga e manganui. Kua akono ratou i te au apinga inangaroia kia akapapu e te akonoia ra ta ratou au tukuanga angaanga i te putuputuanga i te tuatau e kare ratou i reira.
6. Eaa tei akatupuia me taokotai kapiti te katoatoa i roto i te putuputuanga i te akatereanga i te akamorianga mou ki mua?
6 Te akataka maira te apotetoro ko Paulo i te au mema no te putuputuanga e te angaanga kapiti ra ma te taokotaianga kia “tupu akera te kopapa i te maata anga o tona uaorai meitaki ma te aroa.” (Ephe. 4:16) To tatou inangaro no Iehova e no te akamori mou te akakeu ra ia tatou kia taokotai kapiti kia tutu aereia te tuatua meitaki e kia turuturu i te patuanga i te Are Uipaanga Patireia.