E Ngai Tutu Anga Taau Naau Uaorai?
1. Eaa tetai ngai tutu anga naau uaorai?
1 Ko tetai ngai tutu anga naau uaorai ko tetai ngai ia tei orongaia kia koe. Penei e ngai meitaki te reira kia rauka ua ia koe i te itae viviki atu e i te tutu aere ko koe anake ua me kore ko korua ko tetai papuritia. I te mea e e puapinga tikai i te turuturu i te au akanoonooanga a te putuputuanga no te pupu akakitekiteanga, me ka rauka ia koe, te rauka anga tetai ngai tutu anga naau uaorai kia angaanga koe i tetai au atianga ke mai, ka rauka i te tauturu i te oronga anga i tetai akakitekiteanga meitaki, i roto tikai i te au putuputuanga e e aka ngai ta ratou ngai tutu anga.—Anga. 10:42.
2. Eaa tetai au puapinga i te rauka anga tetai ngai tutu anga naau uaorai?
2 Au Puapinga: Kua kite mai tetai pae i tetai atu puapinga i te tutu aere i roto i tetai ngai tutu anga na ratou uaorai i te pae mai i ta ratou ngai angaanga, i to ratou ora kaikai me kore i te oti tika mai anga te angaanga. E rekareka ana tetai pae i te angaanga kapitianga ei pamiri i roto i to ratou oire e tai ora aere i mua ake i te Apii Puka a te Putuputuanga. Te au atoro akaou anga e te au apii Pipiria tei rauka mai, tei tetai ngai vaitata ua mai, ei tupuanga i reira, kare i pou maata ana te tautaanga, te ora, e te moni. No te mea e e maata atu te ka akatupuia i roto i tetai tuatau poto ua, te rauka anga i tetai ngai tutu anga naau uaorai penei ka tauturu i tetai pae kia painia tauturu i tetai au taime aere me kore kia piri atu ei au painia tamou. Kapiti katoa atu, te angaanga anga i roto i tetai ngai tutu anga naau uaorai e te matau mai anga i te au ngutuare tangata, ka tauturu ia ratou kia irinaki mai ia tatou e te akatano anga i ta tatou akatutu anga ki to ratou au inangaro, e te akapuapinga maata rava atu anga i ta tatou angaanga orometua.
3. Eaa te tupuanga o tetai painia tei pati atu i tetai ngai tutu anga nana uaorai?
3 Te akakite maira tetai painia tei akamaroiroiia e te akaaere tutaka kia pati atu i tetai ngai tutu anga nana uaorai: “Kua ariki au i teia manako tauturu e kare i roa ana kua matau meitaki mai au i te au tangata ngutuare i roto i taku ngai tutu anga. Kua taui au i te ora o taku au atoroanga kia tau ki to ratou turanga. Tei tupu mai, kua kake mai taku atoro akaouanga mei te 35 ki te 80 e tere atu i te marama, e e itu aku apii Pipiria i te kainga.”
4. Akapeea e rauka ai ia tatou tetai ngai tutu anga na tatou uaorai e akapeea tatou i te angaanga anga i te reira?
4 Akapeea te Rauka Anga: Me ka inangaro koe i te pati atu i tetai ngai tutu anga naau uaorai, e tuatua atu koe ki te tavini e akono ra i te mapu. Eiaa e emiemi i te pati atu i tetai papuritia kia angaanga kapiti mai kia koe, e kia rekoti i te au kainga kare e tangata. E tauta kia oti mai ia koe te ngai tutu anga i roto i te a marama. Me e aka angaanga ia koe i te rave i te reira, penei ka rauka ia koe i te pati atu ki toou akaaere no te Apii Puka a te Putuputuanga me kore i tetai ke no te tauturu. I te openga o te a marama, ka rauka ia koe i te akaoki i te mapu i oti mai ia koe me kore e pati atu kia angaanga akaou koe i te reira. Inara, auraka koe e mou ua atu rai i te reira mari ra kia akaokiia atu kia rauka i tetai atu i te pati i te reira. Me tei roto koe i tetai putuputuanga e kare e maata ana te ngai tutu anga e kare e rauka ia koe i te pati atu i tetai ngai tutu anga naau uaorai, penei ka rauka ia koe i te pati atu i tetai tuanga o tetai ngai tutu anga mei toou akaaere apii puka.
5. Eaa te umuumuia ra kia rauka i te akatupu i ta tatou akaueanga kia tutu aere?
5 Ta tatou akaueanga kia tutu aere “e kako rava ake te ao katoa nei” e angaanga maata tikai. (Mata. 24:14) Te umuumuia ra tetai akanoonooanga meitaki no te tautaanga. Kapiti atu ki te pupu akakitekiteanga, te tutu aere anga i roto i tetai ngai tutu anga naau uaorai, ka tauturu ia tatou kia itae maata atu i te ka rauka ia tatou te au tangata ma te tuatua meitaki.