Me Kare te Au Tangata i te Kainga
1. Eaa tetai akaaoanga matauia i te piri atu anga ki roto i te angaanga orometua mei tera are ki tera are?
1 I roto i te au ngai e manganui e aka angaanga tikai i teia taime i te kite mai i te au tangata i te kainga. I roto i teia “au tuatau kikino,” e manganui te maroia ra i te angaanga roa atu kia rauka ia ratou i te au apinga umuumuia no te oraanga. (2 Timo. 3:1, NW) Penei tetai pae kua aere ki te angaanga me kore kua aere ki te toa me kore kua aere ki tetai tamataoraanga. Akapeea tatou i te itae anga i te reira au tangata ma te tuatua meitaki?
2. Akapeea tatou i te akapapuanga e ka akonoia te au kainga e kare e tangata?
2 Akono i te Au Rekoti Meitaki: Te takainga mua koia oki kia tata i te au are e kare e tangata i te kainga. E puapinga tikai teia me angaanga putuputu ana koe i taau ngai tutu anga. E tata ana ainei koe i te ingoa o te mataara, te numero o te ngai tutu anga, toou ingoa e te ra? Penei ka akaruke koe i tetai manga ngai no te au tataanga me oki akaou me kore me angaanga akaou koe me kore tetai atu papuritia i te au kainga e kare e tangata. I te openga o te tuatau tutu anga, e maara i te oake atu i te rekoti me kore te au tataanga ki te tangata e akono ra i te au mapu, me ka akatika mai ra aia e kia angaanga koe i te au kainga e kare e tangata te meitaki ua ra. E taangaanga i tetai vaanga pepa akaou mai i te tata i te au inangaro taau i kite mai e ka akono atu i te reira.
3. Eaa tetai au tamanakoanga no te itae anga i te aronga e kare ratou i te kainga?
3 Tauta i Tetai Atu Taime: Penei tetai pae aronga e kare ratou i te kainga i roto i te epetoma, penei tei te kainga ratou i te au aiai me kore i te au openga epetoma. Ka rauka ainei ia koe i te akanoo i taau papaanga kia oki akaou a tetai tuatau tau? (1 Kori. 10:24) Me kare, penei ka rauka ia koe i te oake atu i te au numero e kare e tangata i te kainga, ki tetai papuritia te ka rauka i te oki atu a tetai taime ke. Me kore, penei ka rauka ia koe i te tata atu ki te aronga e kare ratou i te kainga me kore e tauta i te itae atu ia ratou na runga i te terepaoni. Penei ka mataora te au papuritia ma te au kotinga anga i te pae kopapa i te tauturu atu ia koe i te reira.
4. Eaa te akatutu maira i te puapinga no te oki akaouanga ki te au kainga e kare e tangata?
4 Te akatutu maira tetai tupuanga i te puapinga i te tautaanga i te aravei atu i te aronga e kare ratou i te kainga. I muri ake i te oki putuputu anga te au papuritia ki tetai kainga e toru mataiti, i te openga ra kua aravei atuia te tangata ngutuare. Kua kitea mai e no te tiaki ua ana aia i te reira au taime katoa ra no tetai Kite kia aere mai i te akamata akaou i tana apii Pipiria i rave ana i mua ake i neke mai ei aia ki te reira ngai.
5. Eaa te taime e manakoia ai e kua oti tetai ngai tutu anga?
5 Akaoti i te Ngai Tutu Anga: Eaa te taime e manakoia ai e kua oti tetai ngai tutu anga? Tei matauia, me kua akonoia te au tautaanga tau i te aravei atu i tetai tangata i roto i te au kainga tataki tai. Penei e mea tau kia akaruke ua i tetai aenga pepa me kore tetai makatini takere ma te tu matakite i te au kainga e kare e tangata, i roto tikai i te au ngai tutu anga e kare e angaanga putuputuia ana. Kia akaotiia te ngai tutu anga i roto i te a marama. E oti kia akakite vaveia atu ki te tavini e akono ra i te au mapu kia rauka iaia i te tata ki runga i tana rekoti.
6. Eaa tatou ka tauta ei i te itae i te au tangata ravarai i roto i ta tatou ngai tutuanga ma te tuatua meitaki?
6 Ka inangaro tatou kia rauka te au tangata e manganui i te au atianga kia kite mai i te kapiki i te ingoa o Iehova e kia akaoraia. (Roma 10:13, 14) Kapiti mai i roto i te reira ko te aronga e kare ratou i to ratou kainga me aere atu tatou mei tera are ki tera are. Mei te apotetoro ko Paulo rai, kia akariro koe ei akakoroanga naau “kia akakite ua atu au i te evangelia o te aroa ua o te Atua.”—Anga. 20:24.