Kua Papa Ainei Koe no te Kaikaianga Pae Vaerua?
1. Eaa te au tu akapapaanga te o maira no te kaikaianga?
1 E maata te akapapaanga e umuumuia ra no te kaikaianga. E okoia mai ana te au kai, e akapapa meitakiia ana, e oti e orongaia atu ei. Te oronga anga i te kai ka anoanoia te akanoonoo anga meitaki. Pera katoa, kia akapapa katoaia te ngai e kai ei i te kai. Kia akapapa katoa te au manuiri, me e ngai mamao tikai ta ratou ka aere atu, kia tae ki reira. Noatu e maata te angaanga e o maira, e puapinga tikai te kaikaianga i tetai kai ma te mataora e te rekareka ma te au oa e te ngutuare tangata. Kare e roa atu ana ka taokotai mai te Au Kite o Iehova i te ao katoa i roto i te pupu mamaata e te pupu rikiriki kia mataora i tetai kaikaianga pae vaerua tei tapapa maataia ana—ko te Uruoaanga Tapere “Kia Vai Matakite Ua!” E maata te au angaanga tei rave takereia no te akapapa meitaki anga i te porokaramu e te au mea. Kua patiia mai tatou katoatoa. Kia tae atu e kia rauka mai te puapinga maata, kia akapapa meitaki katoa tatou ia tatou uaorai.—Mase. 21:5.
2. Eaa te ka umuumuia kia tae atu ki te katoaanga o te uruoaanga no ta tatou kaikaianga pae vaerua?
2 Kia Puapinga Maataia: Kua oti ainei taau au parani kia tae atu ki te katoaanga o te uruoaanga no teia kaikaianga pae vaerua? Me ka tau, e tuatua atu ki toou pu i te akakite kiaia e ka aere koe ki te au tuanga ravarai o taau uruoaanga, kapiti mai te ra mua. Kua oti ainei taau au akanoonoo anga no te mataara e te ngai noo anga? Kia akapapu te aronga pakari e ka akono meitakiia te aronga pakarikari e te aronga makimaki pera katoa i tetai ke te anoano ra i te tauturu.—Iere. 23:4; Gala. 6:10.
3. Eaa ra tatou kare e aere atu ki tetai uruoaanga pa enua e kare tatou i patiia mai?
3 I tetai au ngai ka raveia te au uruoaanga pa enua. E akamaara ua rai e kua patiia mai tetai au putuputuanga tikai e te aronga tereketi no tetai au enua mai ki teia au uruoaanga. I te rave anga i teia au akanoonooanga, kua tare meitaki te opati manga e eia i patiia, i te akamanako anga e eia nooanga e te au rumu o te otera ka rauka. Ka maata rava te tangata me ka aere atu te au papuritia ki tetai uruoaanga pa enua kare ratou i patiia mai.
4. Eaa te au akamaara anga te ka tauturu ia tatou kia papa ua no te akamata anga o te porokaramu i te au ra tataki tai?
4 E akapapa kia tae vave atu ki te uruoaanga i te au ra tataki tai e kia rauka tetai nooanga i mua ake ka akamata ai te porokaramu. E taangaanga i nga miniti i mua ake ka akamata ai te uruoaanga i te akara i te au porokamu tei tataia. Ka tauturu teia ia koe kia akonokono i toou ngakau no te au manako te ka orongaia mai. (Ezera 7:10) Me akakite mai te tiamana i te akatangi anga imene, kia mataora i te akarongo e kia papa ua i te piri atu ki roto i te imene anga i te imene mua e te pure.
5. Akapeea to tatou ngutuare tangata e puapinga maata ai mei te porokaramu?
5 Me noo kapiti te au mema ngutuare i te tuatau o te uruoaanga, ka rauka i te nga metua i te akapapu e te akarongo meitaki ra ta ratou tamariki ki te porokaramu. (Deu. 31:12) Te akamaroiroiia atu nei te katoatoa kia akara i roto i ta ratou au Pipiria i te au irava e tatauia ra. Ka tauturu te au tataanga poto ia koe kia akarongo meitaki atu. I muri mai, ka tauturu te au mea taau i tata ana kia akamaara koe i te au manako puapinga o te au akoanga. Auraka e varenga i te tuatua puapinga kore ua i te tuatau o te uruoaanga me kore i te akaruke i toou nooanga. Me e cell phone taau, auraka e tuku i te reira kia tamanamanata ia koe e tetai atu i te tuatau o te porokaramu. I muri ake i te tuanga tataki tai, eaa ka kore ei e uriuri manako ki tetai ke i ta tatou i mataora ana mei te porokaramu?
6. Eaa tetai tu puapinga maata no ta tatou au uruoaanga, e akapeea tatou e mataora maata ai i te reira?
6 I ko i te uruoaanga tapere, e atianga meitaki no tatou kia rekareka i tetai pirianga vaitata ki to tatou au taeake e te au tuaine, kare i kiteaia ana i teianei ao. (Sala. 133:1-3; Mare. 10:29, 30) Eaa ka kore ei e aravei atu i te aronga e noo ra i te pae mai ia koe e kia tuatua atu kia ratou i te tuatau kaikaianga? Ko tetai akameitakianga teia ka rauka mai me kare e maata te kai e kia noo ua rai i ko i te ngai uruoaanga e kare e aere atu ki tetai are kaikaianga. E akapapu e kia akariro ua rai i taua au atianga ra ei akamaroiroi anga i tetai e tetai.—Roma 1:11, 12.
7. Eaa te au akapapaanga ta tatou ka rave no runga i te kakau ta tatou ka aao?
7 Kakau: E mea meitaki i te akara e kua akaue a Iehova i te ngati Iseraela kia maani i te au veruveru ki runga i te tapa o to ratou kakau ma te au taura auika. (Nume. 15:37-41, NW) E akamaara anga teia kia ratou e e iti tangata akatakakeia ratou ei akamori ia Iehova. I teia tuatau, to tatou tu kakau ngateitei e te tau e aao ana tatou i ko i te uruoaanga, te akatakake ra ia tatou mei teianei ao. Te riro ra te reira ei akakiteanga pakari ki te aronga te akara maira me aere tatou ki vao i te kaikai i muri ake i te porokaramu. No reira e akamanako meitaki no runga i te kakau ta tatou ka aao.
8. Akapeea tatou me akakitekite ki tetai ke ia tatou i ko i te oire o te uruoaanga?
8 E Akakitekite Atu: Na te parani meitaki anga, penei ka rauka ia tatou i te akakitekite ki te au tangata i ko i te oire o te uruoaanga. Ko tetai taeake raua ko tana vaine tei aere atu ki tetai are kaikaianga i muri ake i te porokaramu kua tou aia ki tona kati uruoaanga e kua ui atu ki te tangata tuati e: “E maata ainei te au tangata taau i kite ana e aao ra i teia au kati?” Kua karanga atu te tangata tuati e e kite ana aia ia ratou e e manako ana aia e eaa ratou i aao ei i taua au kati ra. Kua taki atu teia ki tetai pukapukaanga, e kua pati atu te taeake i te tangata tuati ki te uruoaanga.
9. Akapeea tatou i te akaari anga i to tatou tu ariki rekareka kia Iehova Tei pati mai ia tatou?
9 Noatu e na to tatou au taeake e oronga mai ana i te au akoanga katoatoa, te uriuri anga, e te au akatutuanga, ko to tatou Metua i te rangi ra ko Iehova Tei Oronga aroa mai i teia kaikaianga pae vaerua o te mataiti. (Isa. 65:13, 14) Te akaari rekareka nei tatou ki Tei pati mai ia tatou kia tae atu ki te au ra tataki tai e te ariki rekareka anga i te au kai pae vaerua e orongaia maira. Kua oti ainei taau au akapapaanga no te reira?
[Pia i te kapi 6]
Au Akamaara Anga no te Uruoaanga Tapere
◼ Au Ora no te Porokaramu: Ka akamata te porokaramu i te 9:20 i te popongi i te au ra katoatoa e toru. Ka ngaa te ngutupa i te 8:00 i te popongi. Me akamata ana te akatangianga o te imene Patireia, kia noo pouroa tatou ki to tatou au nooanga kia akamata te porokaramu i roto i te tu tau. Ka oti mai te porokaramu i te 4:55 i te aiai Varaire e te aiai Maanakai, e i te 4:00 i te aiai Tapati. No te uruoaanga pa enua, ko te porokaramu no te Paraparau, ka akamata i te 1:20 i te avatea, e ka taopenga i te 4:45 i te aiai.
◼ Paka Anga: I roto i te ngai uruoaanga kare e tutakiia ana te ngai paka anga e akatereia ra e tatou, i na ko te aronga mua ka tae mai ka peke ia ratou te reira ngai. Ko te aronga pakipakitai ua e kati Tikaanga Paka Anga to ratou te ka akatikaia kia paka i te ngai tapaoia no te aronga pakipakitai. I te mea e kua kotinga uaia te ngai paka anga, e tauta pakari kia aere mai ki roto e tai motoka.
◼ Tapaoanga i te Au Nooanga: Ka rauka te au nooanga i te tapao uaia no te aronga tei aru mai ia koe i runga i toou apinga akaoro me kore e tai o kotou are e noo ra.
◼ Kaikaianga Avatea: E apai mai i tetai kai ine, eiaa oki e akaruke i te ngai uruoaanga kia tiki atu i tetai kai i te ora kaikai i te avatea. Ka rauka tetai pia akaanu meangiti ua kia apainaia mai te ka o me tauruia ki raro ake i toou nooanga. Te au pia akaanu mamaata tano na te pamiri, te au kakapu io, e te kava, kare e akatikaia i roto i te ngai uruoaanga.
◼ Moni Tauturu: Ka rauka ia tatou i te akaari i to tatou ariki mareka anga i te au akanoonooanga no te uruoaanga na te oronga ua anga i te au moni tauturu ki te angaanga Patireia i ko i to tatou Are Uipaanga Patireia me kore i ko i te uruoaanga. Tetai au tieki te orongaia ra i te uruoaanga ka tau kia tataia ki te “Watch Tower.”
◼ Au Tupuanga Kino e te Au Manamanata Tupu Poitirere Ua: I tetai au taime e ringiia mai ana te ngai tauturu viviki na runga i te cell-phone no runga i tetai au manamanata rikiriki ua. Me tupu ake tetai manamanata tupu poitirere ua i te pae rapakau i te ngai o te uruoaanga, e aravei atu i te tavini tauturu vaitata ua mai kia koe ine, e nana e akakite viviki atu ki te Tipatimani Tauturu Rapakauanga kia rauka i to tatou tangata tauturu i te akara i te tu kino o te turanga e kia oronga atu i te tauturu. Me ka umuumuia, e ringi atu ratou i te Numero 111 o Nu Tireni, me kore te Numero 998 o Rarotonga.
◼ Tamaka: I te au mataiti ravarai e tupu ana te kino no te tamaka. E meitaki atu i te taru i te tamaka tau e te tano meitaki te ka rauka i tetai i te aere meitaki ua i runga i te ngai kake anga, te au auri vaa ruarua, e te vai atura.
◼ Kare e Akarongo Meitaki Ana: I Nu Tireni ka akakitekiteia atu te porokaramu i te ngai o te otitoriomu i runga i te ratio FM. Kia puapingaia mei teia akanoonooanga, ka anoanoia koe kia apai mai i tetai ratio FM meangiti ua ma te apinga akarongo no te taringa.
◼ Rekotianga: Kare e tau kia tamouia tetai ua atu au apinga rekoti ki te apinga akatangi me kore ki te paoa o te reira ngai kia kore e tamanamanata atu i tetai ke.
◼ Au Pereoo e te Au Nooanga Atuatu: Auraka e apai mai i te au pereoo pepe e te au nooanga atuatu ki roto i te ngai uruoaanga, ine. Inara, ko te au nooanga ruru paruru pepe te ka ruruia ki runga i tetai nooanga i te pae i nga metua, ka arikiia te reira. Te maataanga o te au uruoaanga te vai ra tetai ngai no te akaruke anga i te au pereoo oparapara.
◼ Akari Pipi: Te maataanga o te au uruoaanga e raveia ana i teianei i roto i te au ngai topiriia e au matini akaangiangi matangi tetai. No reira, e mea meitaki kia kore tatou e pipi maata i te au akari pipi e pakari te aunga, te ka akatupu i te kino ki te aronga kare e meitaki i te akaea e te manamanata ra i te aunga o te akari pipi.—1 Kori. 10:24.
◼ Au Pepa Follow-Up: Kia taangaangaia te pepa Please Follow Up (S-43) i te akakite mai no runga i tetai tei akaari mai i te inangaro no ta tatou akakitekite anga atu i te tuatau o te uruoaanga. Ka tau te au papuritia kia apai mai e tai me kore e rua pepa follow-up ki te uruoaanga. Kia tuku atu i te au pepa akaki meitakiia ki ko i te Pia Vairanga Puka kia akonoia te reira me kore ki te tekeretere o toou putuputuanga me oki atu koe.—Akara i Ta Tatou Angaanga Patireia o Peperuare 2005, kapi 6.
◼ Au Are Kaikaianga: E akariro i toou tu meitaki i ko i te au are kaikaianga ei akangateitei i te ingoa o Iehova.
◼ Au Motera: (1) Auraka e tapao i te au ngai nooanga me kare e anoanoia, e auraka e kia tere atu te au tangata e akatikaia ra i te noo i roto i toou ngai nooanga. (2) Me ka tipu koe i taau tapaoanga, e akakite viviki atu ki te motera. (3) E apai i te apinga tari kiri kakau me kua papa tikai koe i te taangaanga i te reira e oti kia akaoki viviki atu koe i te reira kia rauka i tetai ke i te taangaanga atu. (4) Auraka e tunu kai i roto i te au pia kare e akatikaia i te tunu kai. (5) Kare roa tatou e inangaro i te rave maata mai i te kai oronga uaia mai i te popongi, te kaope, te au aiti te vaira na te au manuiri ei kai, ia ratou i ko i te motera. (6) Akaari i te au ua o te vaerua i te akonoanga i te aronga angaanga o te motera i te au atianga ravarai. Te akono ra ratou i te au manuiri e manganui e te ariki rekareka maira i to tatou tu takinga meitaki, te akakoromaki, e te manako tau.