Akapeea i te Akapapa i Tetai Akatutuanga no te Makatini
1. Eaa i meitaki atu ei i te akapapa i tetai akatutuanga uaorai no te makatini e kia tamou ngakau ua i tetai akaraanga tei orongaia mai i roto i Ta Tatou Angaanga Patireia?
1 ‘Eaa tatou ka akapapa ai i te au akatutuanga no te makatini,’ penei ka manako mai koe, ‘i te mea e e kiteaia ana te au akatutuanga i roto i te au itiu tataki tai o Ta Tatou Angaanga Patireia?’ I te mea e kua kite mai te manganui i teia au akatutuanga ei tauturu maata, te umuumuia ra rai te akapapaanga uaorai. Penei ko tetai akatutuanga te puapinga ra i roto i tetai ngai tutuanga kare e tau ana i roto i tetai ngai ke. No reira, auraka tatou e manako e ka anoanoia tatou kia oronga i te au makatini mei tei akakite tikaiia mai i roto i te au akatutuanga akaraanga. Noatu me ka iki mai tatou i te taangaanga i tetai akatutuanga akaraanga, e meitaki atu kia akakite i te au manako i roto i ta tatou uaorai au tuatua.
2. Eaa te o maira i te akaraanga e eaa taau atikara ka akaari atu?
2 Iki i Tetai Atikara: I te tatau mua anga i te makatini, e iki i tetai atikara te tau ra ki taau ngai tutuanga e kua kite mai koe e e reka tikai ana koe. Toou irinaki papu e te tu maoraora i te oronga anga i te atikara penei ka akakeu i tetai tangata ngutuare i te inangaro katoa i te tatau i te reira. Noatu e ka akaari koe i tetai atikara te ka inangaroia e te maata anga o te au tangata i roto i taau ngai tutuanga, kia kite meitaki katoa koe i tetai au atikara ke mai i roto i te makatini. Te akatika ra te reira ia koe i te taui i taau akatutuanga me aravei atu koe i tetai tangata e e apinga ke atu tana e inangaro ra.
3. Eaa te tu o te akamataanga tuatua taau e taangaanga ana tei puapinga meitaki tikai?
3 Ui i Tetai Uianga: Aru mai, e akapapa meitaki i taau au tuatua akamataanga. E puapinga tikai taau akamataanga tuatua. Penei e mea meitaki atu i te ui ki tetai tangata ngutuare i tetai uianga te akakeu ra i te manako kia akamaroiroi i tona inangaro i roto i te atikara taau i iki mai i te akaari atu. E puapinga tikai te au uianga e eaa to ratou manako. E kopae i te ui atu i tetai apinga te ka akamareka kore i te tangata ngutuare me kore ka akakeu iaia kia tauetono.
4. Eaa te au puapinga no te tatauanga i tetai irava ki tetai tangata ngutuare me te tau ra te au turanga?
4 Tatau i Tetai Irava: Taopenga i reira, e iki i tetai irava kia tatau me te tau ra te turanga o te tangata ngutuare, penei ko tetai tei kiteaia i roto i taau atikara e akaari atura. Te tatauanga i tetai irava, te tauturu ra i te tangata ngutuare kia kite mai e no roto mai ta tatou karere i te Tuatua a te Atua. (1 Tesa. 2:13) Te oronga katoa ra te Tuatua Tapu i tetai akakitekiteanga kiaia noatu e kare aia e ariki mai i te au makatini. E akaaraara ana tetai pae i te inangaro o te tangata ngutuare na te tatauanga i tetai irava i mua ake ka ui atu ei i tetai uianga tikai. Penei ka akakite atu koe i tetai irava na te karanga anga, “Te inangaro nei au i toou manako no runga i tei akakiteia i roto i teia irava Pipiria.” E arataki i reira te manako o te tangata ki tetai manako aiteite ua i roto i te makatini, e e oronga atu i tetai tuatua poto ua kia akakeu roa atu i tona inangaro i mua ake ka oronga ai koe i te reira.
5. Eaa te au kaveinga tau ka tau tatou kia akamanako i te akapapaanga i tetai akatutuanga o te makatini?
5 Kare e au ture tikai e eaa te ka tuatuaia me te oronga ra i te au makatini. Tei matauia, e meitaki atu kia mama ua e kia poto ua taau akatutuanga. E taangaanga i tetai araveianga tei tau meitaki ua kia koe e te akatupu ra i te au tupuanga meitaki. E akamou ki runga i te puapinga meitaki tikai o te au makatini, e kia maoraora ua koe. Me akapapa meitaki koe, ka meitaki roa atu koe i te oronga anga i Te Punanga Tiaki e te Awake! ki te aronga tei “akonoia no te ora mutu kore ra.”—Anga. 13:48.